Te Nofo Fakapagotaga i Papelonia ke Oko ki te Toe Atiakaga o ‵Pui o Ielusalema

A koi ‵nofo fakapagota te kau Isalaelu i Papelonia, ne fe‵paki latou mo tofotofoga e uke o te lotou fakatuanaki. A Satalaka, Mesako mo Apeteniko ne ‵pei ki loto i se ogāumu ‵vela, kae ne aumai latou ne te Atua ki tua kae koi ola. Fakamuli ifo, i te otiga o te fakatakavalega o Papelonia ne Metai mo Pelesia, ne ‵pei atu a Tanielu ki loto i te lua o leona, kae ne puipui foki ne te Atua a ia mai te ‵ponoga o gutu o leona.

I te otiga, ne fakasaoloto ne te tupu o Pelesia ko Kulesa a te kau Isalaelu. Ne ‵foki atu eiloa latou ki te lotou fenua i te 70 tausaga mai tua ifo o te lotou avega ki Papelonia pelā me ne pagota. E tasi te mea muamua ne fai ne latou i te lotou ‵fokiatuga ki Ielusalema ko te faitega o te faletapu o Ieova. Kae seki leva kae taofi te lotou galuega ne olotou fili. Tela la, e nofo pelā ki te 22 tausaga mai tua ifo o te lotou ‵fokiatuga ki Ielusalema kae fatoā oti te faitega o te faletapu.

‵Soko atu ki ei, ka tau‵loto tatou e uiga ki te malaga a Esela o toe foki atu ki Ielusalema ke fakagaligali aka te faletapu. E nofo pelā ki te 47 tausaga mai tua ifo o te otiga o te faletapu. Kae i te 13 tausaga mai tua ifo o te malaga a Esela, ne fesoasoani atu a Neemia ke toe faite a ‵pui o Ielusalema kolā ne maofa valevale. A te Vaega e LIMA e aofia i ei a tausaga e 152 o tala fakasolopito ke oko atu ki te taimi tenā.