Ko Fanau a Iesu i se Fale Fagai Manu

E ILOA ne koe me ko oi te tamā pepe tenei? Ao, ko Iesu. Ne fatoā fanau mai a ia i se fale fagai manu. A te koga tenei se koga e tausi ei a manu. Ne fakamoe ne Malia a Iesu i te tali fagai manu, ko te koga telā e tuku i ei a meakai mō asini mo nisi manu aka ke ‵kai i ei. Kae kaia e ‵nofo ei a Malia mo Iosefa i konei fakatasi mo manu? E se ‵lei a te koga tenei mō se pepe ke fanau i ei, i ne?

Ao, e se ‵lei. Kae tenei te pogai ko ‵nofo ei latou i konei: A te pule o Loma, ko Kaisala Aokuso, ne fai ne ia se tulafono me e ‵tau mo tino katoa o ‵foki atu ki te fa‵kai ne fa‵nau mai ei latou ke fakamau ki lalo olotou igoa i se tusi. Ia, ne fanau mai a Iosefa i te fa‵kai tenei ko Peteleema. Kae i te taimi ne oko atu ei laua mo Malia, ne seki ai se potu e avanoa mō laua i so se koga. Tela la, ne ‵tau o o‵mai laua ki te koga tenei fakatasi mo manu. Kae i te aso eiloa tenei ne fanau mai ei ne Malia a Iesu! Kae e pelā mo te mea e matea ne koe, e malosi eiloa a ia.

E lavea ne koe a tausi mamoe e o‵mai o āsi ki a Iesu? Ne ‵nofo latou i te kogā vao i te po o tausi olotou mamoe, kae ne maina atu ki a latou se mainaga lasi. Se agelu eiloa tenā! Ne ma‵taku malosi a tausi mamoe. Kae ne fai atu a te agelu: ‘Sa ma‵taku! E isi se tala ‵lei mō koutou. I te aso nei, i Peteleema, ne fanau mai a Keliso te Aliki. Ka fakasao ne ia a tino! Ka maua atu ne koutou e pulupulu ki laugatu kae moe i te tali fagai manu.’ I konā eiloa ne o‵mai a agelu e tokouke kae ne kamata o tavae atu ki te Atua. Tela la, ne olo fakavave atu a tausi mamoe o ‵sala ki a Iesu, kae ne maua eiloa ne latou a ia.

E iloa ne koe me kaia e tāua malosi ei a Iesu? E iloa ne koe me ko oi tonu eiloa a ia? Masaua, i te tala muamua i te tusi tenei ne fakamatala atu e uiga ki te Tama muamua a te Atua. A te Tama tenei ne ga‵lue fakatasi mo Ieova i te faitega o te lagi mo te lalolagi mo nisi mea katoa. Ia, a te tino tenei ko Iesu!

E tonu, ne ave ne Ieova te ola o tena Tama mai te lagi kae ne tuku atu ki loto i a Malia. I konā foki eiloa ne kamata o tuputupu aka se pepe i loto i tou fafine e pelā eiloa mo te ‵tupuakaga o nisi pepe i loto i olotou mātua. Kae ko te pepe tenei ko te Tama a te Atua. Fakamuli loa ne fanau mai a Iesu i konei i te fale fagai manu i Peteleema. Ko malamalama nei koe me kaia ne fia‵fia malosi ei a agelu o fakailoa atu ki tino me ko oti ne fanau mai a Iesu?