Mataupu e 5

Te Fanaumaiga a Iesu—I Fea Kae Anafea?

NE FAKATONU atu ne te tupu o te Malo o Loma, ko Kaisala Aokuso, me e ‵tau o ‵foki atu a tino katoa ki olotou fa‵kai ne fa‵nau latou i ei kae ke tusi olotou igoa i konā. Tela la, ne faimalaga atu a Iosefa ki te koga ne fanau mai ei a ia, ko te fa‵kai o Peteleema.

E tokouke a tino ne olo atu ki Peteleema ke tusi olotou igoa, kae tasi ‵pau eiloa te koga ne mafai o maua ne Iosefa mo Malia ke ‵nofo i ei ko te fale fagai manu. I konā loa, ne fanau mai a Iesu, i te fale telā ne tausi ei a asini mo nisi manu aka foki penā. Ne fakapulupulu ne Malia a ia ki laugatu kae ne fakamoe a ia i te tali fagai manu, ko te koga telā e tuku ei a meakai a manu.

A te tonuga loa, ne fai ne te Kaisala ko Aokuso a te tulafono ki te tusiga o igoa ona ko te takitakiga a te Atua. Ona ko te mea tenā ne mafai ei o fanau mai a Iesu i Peteleema, ko te fa‵kai telā ko leva ne ‵valo mai i te Tusi Tapu me e ‵tau o fanau mai i ei te tino pule telā ne folafola mai.

Kae e pefea te tāua o te po tenā! Ne maina atu se mainaga malapulapu ki se potukau o tino tausi mamoe i te vao. Ko te ‵malu tenā o Ieova! Kae ne fai atu penei te agelu a Ieova ki a latou: “Sa ma‵taku, kiloke, ko aumai ne au te tala ‵lei mō koutou, ka fakafiafia ei a tino katoa! I te po eiloa tenei i te fa‵kai o Tavita, ko fanau ei te otou fakaola ko Keliso te Aliki! Tenei te fakailoga e fakamaoni ei a te mea nei ki a koutou: Ka maua atu ne koutou se tamaliki e fakapulupulu ki laugatu e moe i te tali fagai manu!” Ne ‵sae fakapulele mai a nisi agelu e tokouke kae ne usu atu penei: “Ko te vikiga o te Atua i koga tafasili i te ma‵luga. Ke maua i te lalolagi a te filemu, mō tino katoa kolā e fiafia ki ei te Atua!”

I te taimi ne olo keatea ei a agelu, ne fai‵pati te kau tausi mamoe, te suā tino ki te suā tino, penei: “‵Tou olo ki Peteleema o ‵kilo ki te mea tenei ko oti ne tupu, telā ne fakailoa mai ne Ieova.” Ne olo fakavave atu latou kae ne maua ne latou a Iesu e pelā eiloa mo muna a te agelu. I te taimi ne taku atu ei ne tausi mamoe a mea kolā ne fai atu ne te agelu ki a latou, ne ofo a tino katoa kolā ne fakalogo‵logo ki ei. Ne tausi ne Malia a pati katoa konā kae ne fakatāua ne ia a mea konā i tena loto.

E tokouke a tino i aso nei e tali‵tonu me ne fanau mai a Iesu i te po 25 o Tesema. Kae ko Tesema ko te taimi e ‵to ei a vaiua kae e ‵moko ‵ki i Peteleema. E se ‵tau o ‵nofo atu a tausi mamoe i te vao i te po fakatasi mo olotou lafu i te taimi tenā o te tausaga. Kae kāti e se mafai ne te tupu o Loma o fakatonu atu ki ana tino kolā ne fia ‵teke atu ki a ia ke fai ne latou se malaga i te kogāloto o te vaitaimi o te tau ‵moko ke tusi ei olotou igoa. E foliga mai me ne fanau mai a Iesu i te taimi telā e ‵to ei a lau o lakau i te tausaga tenā. Luka 2:1-20; Mika 5:2.

▪ Kaia ne faima‵laga atu ei a Iosefa mo Malia ki Peteleema?

▪ Ne a mea fakaofoofogia ne ‵tupu i te po telā ne fanau mai ei a Iesu?

▪ E iloa pefea ne tatou me ne seki fanau mai a Iesu i te po 25 o Tesema?