Iesu Keliso—E ‵Tau o Masaua Pefea ne Tatou a ia?

I a Tesema, e ‵kilo atu io me e fakaataata ne tino e tokouke i te lalolagi kātoa a Iesu e pelā me se pepe. E nofo atu i loto i te tali fagai manu, se pokisi lasi telā e tuku i ei a mea fagai manu. Kae e mata, e ‵tau o masaua ne tatou a Iesu e pelā me se pepe?​—a Ke sau‵tala malie aka tatou e uiga ki se auala e tasi ke masaua ne tatou a ia. E mafai o iloa ne tatou a mea e uiga ki ei mai mea ne ‵tupu ki se potukau o tausi mamoe i te vao i se po e tasi i se koga e pili ki Peteleema.

Ne fakasae fakapoi atu se agelu ki tausi mamoe. Ne fai atu a ia ki a latou: “Ko oti ne fanau mai ki a koutou i te aso tenei se Fakaola, telā ko Keliso te Aliki.” Ne fai atu foki te agelu me ka maua ne latou a Iesu “e fakapulupulu ki laugatu kae e moe i se tali fagai manu.” I konā foki eiloa, ne faka‵sae atu a nisi agelu e tokouke kae kamata “o tavae atu ki te Atua.”

E pefea ou lagonaga moi ne lagona ne koe a agelu e tavae atu ki te Atua?​— Ko oko eiloa i te fia‵fia o tausi mamoe! “Tatou ka olo nei eiloa ki Petelema,” olotou muna, “ke lavea ne tatou te mea telā ko oti ne tupu.” I konā ne maua atu ei ne latou a “Malia e pelā foki mo Iosefa, mo te tamaliki e takato i loto i te tali fagai manu.”

E seki leva kae olo atu a nisi tino ki Petelema i te koga ne ‵nofo atu ei a Malia mo Iosefa. I te taimi ne fai atu ei ne tausi mamoe a mea ne ‵tupu, ne ōfo katoa latou. E mata, e fiafia koe ke iloa atu a mea fakaofoofogia konei?​— E fia‵fia eiloa a tatou katoa kolā e a‵lofa ki te Atua. Nei la, ke onoono aka tatou ki te pogai ne fia‵fia malosi ei a tino i te fanaumaiga o Iesu. E ‵tau mo tatou o toe ‵foki ki te taimi mai mua o avaga a Malia.

I te aso e tasi ne āsi atu ki a Malia a te agelu e igoa ki a Kapilielu. E folafola atu ne ia me ka fanau mai ne tou fafine se pepe telā “ka fai mo fai se tino sili kae ka taku a ia ko te Tama a te Atua Tafasili i te Maluga.” “Ka pule a ia e pelā me se Tupu,” ko muna a Kapilielu, “kae ka seai se gataga o tena Malo.”

Ne manako a Malia ke iloa ne ia a te auala e mafai ei o tupu te mea tenei, ona ko te mea e seki ‵moe aka eiloa mo se tagata. Tela la, ne fakamatala atu ei ne Kapilielu ki tou fafine: “Ka pulou a koe ne te ‵mana o te Atua Tafasili i te Maluga,” kae “ka taku ei te tamaliki telā ka fanau mai me e tapu, ko te Tama a te Atua.” A te aumaiga o te Tama a te Atua mai te lagi kae tuku atu tena ola ki loto i te moegatama o Malia ke tupu aka ki se pepe​—se vavega sili eiloa tenā!

Kai lavea ne koe a ata io me ko fakaasiga o “tāgata ‵poto” e tokotolu kolā e āsi atu ki te pepe ko Iesu fakatasi mo tausi mamoe?​— E masani o lavea atu a vaegā ata penā i taimi o te Kilisimasi. Kae e se ‵tonu a ata konā. A “tāgata ‵poto” konā ne tino iloilo fetū, ne tino kolā e fai ne latou a mea kolā e taku fakamasei ne te Atua. Ke onoono aka tatou me ne a mea ne ‵tupu i te lotou okoatuga. E fai mai te Tusi Tapu: “I te taimi ne ulu atu ei latou ki loto i te fale ne matea ne latou te tamaliki mo Malia tena mātua.” I te taimi tenei, ko se fai a Iesu mo fai se pepe i loto i te tali fagai manu; ko fai mo fai se tamaliki telā e ‵nofo fakatasi mo Iosefa mo Malia i se fale!

Ne maua pefea ne tino iloilo fetū a Iesu?​— Ne takitaki atu muamua latou ne se “fetū,” ki te tupu ko Helota i Ielusalema, kae e se ki Petelema. E fai mai te Tusi Tapu me ne manako a Helota ke tamate ne ia a Iesu. Nei la, mafaufau ki te mea tenei. Ko oi, i tau faka‵tau ne fakasae aka ne ia te fetū ke takitaki atu ei a tino iloilo fetū ki a Helota?​— E se ko te Atua tonu, ko Ieova, kae ko tena fili sili, ko Satani te Tiapolo!

I aso nei, e taumafai a Satani o fai a tino ke mafau‵fau me i a Iesu se pepe vāivāi fua. Kae ne fai atu te agelu ko Kapilielu ki a Malia: “Ka pule a ia e pelā me se Tupu . . . kae ka seai se gataga o tena Malo.” Nei la, ko pule mai a Iesu e pelā me ko te Tupu i te lagi, kae ko pili o fakaseai atu ne ia a fili katoa o te Atua. Tenā te kilokiloga e ‵tau o maua ne tatou e uiga ki a Iesu, kae e ‵tau o fakamatala atu ne tatou ki nisi tino.