Te Talavou ko Iesu i te Faletapu

KILO atu ki te tamaliki tagata e faipati ki tāgata ma‵tua konei. A latou ko faiakoga i te faletapu o te Atua i Ielusalema. Kae ko te tamaliki ko Iesu. Ko tai matua eiloa a ia. Nei la ko 12 ana tausaga.

Ne ofo malosi a faiakoga me ne uke a mea ne iloa ne Iesu e uiga ki te Atua mo mea kolā e tusi i te Tusi Tapu. Kaia e se ‵nofo mai foki ei a Iosefa mo Malia i konei? Kofea laua? Ke onoono aka tatou.

I tausaga katoa ne ave ne Iosefa tena kāiga ki Ielusalema mō te fakamanatuga fakapito e igoa ki te Paseka. Se malaga loa mai Nasaleta ki Ielusalema. E seai se tino e isi sena motokā, kae e seai foki ne pasi. Ne seki ai ne mea penā a latou i aso konā. A te tokoukega o tino e sa‵sale, kae e nofo pelā ki te tolu o aso kae ne oko atu latou ki Ielusalema.

I te taimi tenā ko lasi ‵ki a te kāiga o Iosefa. Tela la, ne isi a taina mo tuagane fo‵liki o Iesu kolā ne ‵tau o tausi ki ei. Ia, i te tausaga tenā, ko oti ne olo atu a Iosefa mo Malia mo lā tama‵liki i te malaga loa o toe ‵foki atu ki te lotou fakai ko Nasaleta. Ne manatu aka laua me e ‵nofo tasi a Iesu mo nisi tino kolā e olo tasi latou i te malaga. Kae i te taimi ne ma‵nava ei latou i te fakaotiga o te aso, ne seki mafai o maua ne laua a Iesu. Ne ‵sala atu laua ki a ia fakatasi mo olotou kāiga mo taugasoa, kae ne seki nofo a ia i a latou! Tela la, ne toe ‵foki atu laua ki Ielusalema o ‵sala ki a ia i konā.

Fakamuli loa, ne maua ne laua a Iesu i konei fakatasi mo faiakoga. Ne fakalogologo a ia ki a latou kae ne ‵sili atu a fesili. Kae ne ofo a tino katoa i te poto o Iesu. Kae ne fai atu a Malia: ‘Taku tama, kaia ne fai ei ne koe a te mea tenei ki a maua? A maua mo tou tamana ko manava‵se ‵ki i te ‵salaga ki a koe.’

‘Kaia ne ‵tau ei mo koulua o ‵sala mai ki a au?’ ne tali atu a Iesu. ‘E se iloa ne koulua me e ‵tau o nofo au i te fale o toku Tamana?’

E tonu, ne fiafia malosi a Iesu ke nofo i koga kolā e mafai ne ia o tauloto e uiga ki te Atua. E ‵lei foki ke maua ne tatou a lagonaga penā, i ne? I te lotou fa‵kai ko Nasaleta, e se taumate ne fano a Iesu ki fakatasiga mō tapuakiga i vaiaso katoa. Ona ko te mea ne fakalogologo faka‵lei sāle a ia, ne tauloto ne ia a mea e uke mai te Tusi Tapu. Ke na fai tatou pelā mo Iesu kae tau‵tali atu ki tena fakaakoakoga.