Ne Fakalogo Faeloa a Iesu

E mata, e faigofie faeloa a te fakalogo ki ou mātua?— I nisi taimi e faigata. E mata, ne iloa ne koe me ne fakalogo eiloa a Iesu ki a Ieova mo ana mātua?— E mafai o fesoasoani atu tena fakaakoakoga ki a koe ke fakalogo ki ou mātua māfai e se na ko faigofie ke fai penā. Ke onoono aka tatou ki nisi fakamatalaga e uiga ki te mea tenei.

A koi tuai o vau a Iesu ki te lalolagi, ne ‵nofo fakatasi a ia mo tena Tamana, ko Ieova, i te lagi. Kae ne isi foki ne mātua o Iesu i te lalolagi. A igoa o lāua ko Iosefa mo Malia. E iloa ne koe me ne fai pefea lāua mo fai ana mātua?—

Ne puke ne Ieova te ola o Iesu i te lagi kae tuku atu ki loto i a Malia ko te mea ke mafai o fanau kae ola a Iesu i te lalolagi. A te mea tenei se vavega! Ne tupu aka a Iesu i loto i a Malia e pelā eiloa mo nisi pepe i loto i olotou mātua. Kāti ko te iva masina mai tua ifo i ei, ne fanau mai ei a Iesu. Tenei te auala ne fai ei a Malia mo tena avaga ko Iosefa, mo fai a mātua o Iesu i te lalolagi.

I te taimi ko 12 fua ei a tausaga o Iesu, ne fai ne ia se mea telā ne fakaasi atu ei te lasi o tena alofa ki tena Tamana, ko Ieova. Ne tupu te mea tenei i te taimi ne fai ei ne Iesu mo tena kāiga se malaga loa ki Ielusalema mō te Paseka. I te ‵fokiatuga o latou ki te lotou fale, ne seki mafai o maua ne Iosefa mo Malia a Iesu. E iloa ne koe me ne nofo atu a ia i fea?—

Ne ‵foki fakavave atu a Iosefa mo Malia ki Ielusalema kae ‵sala atu ki a Iesu i koga katoa. Ne manava‵se malosi lāua me ne seki mafai o maua ne lāua a ia. Kae mai tua o aso e tolu, ne maua atu ne lāua tou tagata i te faletapu! E iloa ne koe me se a te pogai ne nofo atu ei a Iesu i te faletapu?— Me e mafai o tauloto ne ia i konā a mea e uke atu e uiga ki tena Tamana, ko Ieova. Ne alofa a ia ki a Ieova kae ne manako ke iloa ne ia a te auala ke fakafiafia atu ki a ia. Ke oko foki eiloa ki te taimi ko matua faka‵lei ei a ia, ne fakalogo faeloa a Iesu ki a Ieova. Ne fakalogo a Iesu faitalia me ne faigata ki a ia a te mea tenei kae ne ‵tau foki o logo‵mae a ia i ei. E mata, ne faka‵logo foki a Iesu ki a Iosefa mo Malia?— Ao, e fai mai te Tusi Tapu me ne fakalogo eiloa a ia.

Ne a mea ne tauloto ne tatou mai te fakaakoakoga a Iesu?— E ‵tau o fakalogo koe ki ou mātua, faitalia me e faigata ke fai penā. E mata, ka fai eiloa koe penā?—