Mataupu e 10

Malaga ki Ielusalema

NE OKO atu ki te taimi e ‵somo sāle aka ei a lau o lakau. Ko te taimi tenā ne olo sāle atu ei te kāiga o Iosefa, fakatasi mo olotou taugasoa mo olotou kāiga i tausaga katoa i te malaga ki Ielusalema ke fakamanatu te Paseka. Ne ‵tau o olo atu latou i te malaga telā kāti e 65 maila te ‵mao, kae ne ua‵te sāle a tino i ei. Ko 12 tausaga o Iesu i te taimi tenā, kae ne olioli eiloa a ia ke na oko atu ki te ‵kaiga fakamanatu tenā.

A te Paseka e se se fakamanatuga e fai fua i se aso e tasi mō Iesu mo tena kāiga. E ‵nofo atu foki latou i konā i te ‵kaiga telā ne ‵soko atu ki ei i aso e fitu ko te ‵kaiga o falaoa sē faka‵fete, me e ma‵natu aka latou i te mea tenā se vaega o te faiga o te Paseka. Ona ko te mea tenā, ne ‵tau o fakamaumau se lua vaiaso i te faiga o te malaga mai te lotou fa‵kai i Nasaleta, penā foki loa mo te ‵nofoga i Ielusalema. Kae i te tausaga tenā ne tai mata leva atu te malaga tenā, ona ko te mea telā ne tupu ki a Iesu.

Ne fatoā sae aka te fakalavelave i te malaga o toe foki atu mai Ielusalema. Ne leake a Iosefa mo Malia me ne nofo atu a Iesu i te potukau o olotou kāiga mo taugasoa kolā ne faima‵laga fakatasi latou. Kae ne seki sae mai a ia i te taimi ne ma‵nava aka ei ­latou i te po, kae ne olo laua o ‵sala a ia i lā taugasoa kolā e faima‵laga fakatasi mo laua. Kae ne seki maua. Tela la, ne toe ‵foki atu eiloa a Iosefa mo Malia ki Ielusalema ke ‵sala aka a ia i ei.

Ne salasala aka ne laua a ia i te aso kātoa, kae seki maua. Ne seki maua foki ne laua a ia i te lua o aso. Kae oti aka loa, i te tolu o aso, ne olo atu laua ki te faletapu. I konā loa, i te potu e tasi, ne matea atu ei ne laua a Iesu e sagasaga i te kogāloto o faiakoga Iutaia, ne fakalogologo a ia ki a latou kae ne fai foki ne ia ana fesili.

“Taku tama, kaia ne fai ei ne koe te mea tenei ki a maua?” ko te fesili a Malia tenā. “A maua mo tou tamana ne salasala ki a koe mo te manavase.”

Ne ofo a Iesu me ne seki iloa ne laua te koga ne ‵tau o maua a ia i ei. “Kaia e salasala mai ei koulua ki a au?” ko tena fesili. “E se iloa ne koulua me ko ‵tau mo au o nofo i loto i te fale o toku Tamana?”

Ne seki maina a Iesu me kaia ne seki iloa ei ne ana mātua te mea tenā. I konā loa, ne toe ‵foki atu a Iesu fakatasi mo ana mātua kae ne fakalogo faeloa a ia ki a laua. Ne gasolo aka eiloa a ia o poto kae ne tupu aka foki a ia i te feitu faka-te-foitino kae ne alofagina ne te Atua mo tino. E tonu, talu mai te taimi ne foliki ei a ia, ne fai ne Iesu se fakaakoakoga ‵lei, e se gata fua i te salasalaga ki mea faka-te-agaga kae ne fakaasi atu foki ne ia te āva ki ana mātua. Luka 2:40-52; 22:7.

▪ Se a te malaga telā ne fai sāle ne Iesu fakatasi mo ana kāiga i te taimi e ‵somo aka ei a lau, kae e pefea te leva o te malaga tenā?

▪ Se a te mea ne tupu i te malaga telā ne fai ne latou kae ko 12 i ei a tausaga o Iesu?

▪ Se a te fakaakoakoga telā ne fai ne Iesu mō talavou i aso nei?