Te Auala e Akoako Atu ei a Iesu

I TE aso e tasi ne fai atu ei a Iesu ki se tagata me e ‵tau o alofa a ia ki tena tuakoi. Ne fesili atu a te tagata ki a Iesu: ‘Ko oi toku tuakoi?’ Ia, ne iloa ne Iesu a mea e mafaufau ki ei a te tagata tenei. E mafaufau a te tagata me ko tino fua o tena matakāiga mo tena lotu ko ana tuakoi. Tela la, ke onoono aka tatou ki pati ne fai atu ne Iesu ki tou tagata.

I nisi taimi e akoako atu a Iesu mai te faiga o se tala. Tenā eiloa te mea ne fai ne ia i te taimi tenā. Ne fai atu ne ia se tala e uiga ki se tino Iutaia mo se tino Samalia. Ko oti ne iloa ne tatou me i te tokoukega o tino Iutaia e se fia‵fia ki tino Samalia. Ia, tenei te tala a Iesu:

I te aso e tasi ne fanatu se tino Iutaia i se auala i te mauga telā e tau atu ki Ieliko. Kae ne ‵po aka a ia ne tino ‵faomea. Ne kaisoa ne latou ana tupe kae ne ta fakamasei a ia kae toeitiiti eiloa ko mate tou tagata.

Fakamuli ifo, ne fanatu se faitaulaga Iutaia i te auala tenā. Ne lavea ne ia a te tagata telā ne ta fakamasei. Se a tau faka‵tau me ne ana mea ne fai? Ia, ne fanatu a ia ki te suā feitu o te auala kae ne fanatu eiloa i tena auala. Oti aka, ne vau a te suā tino lotu. A ia se tino Levi. E mata, ne tu a ia? Ikai, ne seki tu foki a ia ke fesoasoani atu ki te tagata telā ne ta fakamasei. E mafai ne koe o lavea atu a te faitaulaga mo te tino Levi kolā ko ‵mao ‵ki atu i te auala.

Kae onoono la me ko oi tenei e ‵nofo mo te tagata ne ta fakamasei. A ia se tino Samalia. Kae ne fesoasoani atu a ia ki te tino Iutaia. Ne tuku atu ne ia ne vailakau ki ana pa‵kiaga. Mai tua ifo i konā, ne ave ne ia a te tino Iutaia ki se koga telā e mafai o malōlō kae ke toe ‵lei ei a ia.

I te otiga o tena tala, ne fai atu a Iesu ki te tagata telā ne fesili atu a ia ki ei, penei: ‘Ko oi te tino i te tokotolu konei ne fai pelā me se tuakoi ki te tagata telā ne ta fakamasei? E mata, ko te faitaulaga, te tino Levi io me ko te tino Samalia?’

Ne tali atu a te tagata: ‘Ko te tino Samalia. Ne alofa kaimalie a ia ki te tagata telā ne ta fakamasei.’

Ne fai atu a Iesu: ‘E tonu koe. Tela la, fano koe kae ke ‵pau au faiga ki nisi tino e pelā mo te mea ne fai ne te tagata tenei.’

E mata, e fiafia koe ki te auala e akoako atu ei a Iesu? E mafai o tau‵loto ne tatou a mea tāua e uke ‵ki māfai e fakalogo‵logo tatou ki pati a Iesu i te Tusi Tapu, i ne?