Se Tamaliki Tagata Telā ne Tō Tena Moe

OI AUE! Se a te mea ko tupu i konei? E mata, ne pakia malosi a te tamaliki tagata telā e takato i te laukele? Kiloke! e tokotasi te tagata mai tāgata kolā ne o‵mai ki tua mo te fale ko Paulo! E lavea foki ne koe a Timoteo i konā? E mata, ne tō ki tua mai te fāmalama a te tamaliki tagata?

Ao, tenā eiloa a te mea ne tupu. Ne fai ne Paulo se lauga ki soko kolā ne ‵nofo i Teloa. Ne iloa ne ia me ka se toe lavea ne ia latou mō se taimi leva ona ko te mea e ‵tau o fanatu a ia i te vaka i te suā aso. Tela la, ne tumau eiloa a ia i te faipati atu ke oko eiloa ki te valuāpo.

Ia, a te tamaliki tagata tenei ko Eutikasi ne sagasaga i te fāmalama, kae ne tō tena moe. Ne to ifo a ia ki tua mo te fāmalama, ne tō a ia mai te tolu o fogāfale ki lalo eiloa i te laukele! Tela la, ko maina koe i te pogai ko manava‵se malosi ei a tino. I te taimi ne puke aka ei ne tāgata a te tamaliki, e tonu eiloa te mea ne manava‵se latou ki ei. Ko mate tou tagata!

I te taimi ne lavea ei ne Paulo me ko mate te tamaliki, ne takato a ia i luga i te tamaliki kae ne ‵sai atu ki a ia. Telā ne fai atu ei a ia: ‘Sa manava‵se. E ‵lei fua a ia!’ Kae ne ‵lei eiloa a ia! Se vavega! Ne toe fakaola mai ne Paulo te tamaliki! Ne lifu kae fia‵fia te vaitino.

Ne toe olo atu latou katoa ki luga kae ne ‵kai. Ne tumau eiloa a Paulo i te faipati atu ke oko ki te taimi ko ao mai ei. Kae e mautinoa me ne seki toe tō eiloa a te moe o Eutikasi! I te otiga, ne sopo atu a Paulo, Timoteo mo nisi tino kolā ne faima‵laga fakatasi latou i te vaka. E iloa ne koe me ne olo atu latou ki fea?

Ko fakaoti ne Paulo i te taimi tenā a te tolu o ana malaga talai, kae ko foki atu a ia ki tena fa‵kai. I te malaga tenei, ne nofo atu a Paulo i te fa‵kai e tasi fua ko Efeso i tausaga e tolu. Tela la, ne leva atu a te malaga tenei i lō te lua o ana malaga.

Mai tua ifo o te tiakinaga o Teloa, ne afe a te vaka ki Mileto mō se vaitaimi. Ona ko Efeso ne tu i ne nāi maila fua mai i konā, ne ‵kami mai ne Paulo a toeaina i te fakapotopotoga ke o‵mai ki Mileto ko te mea ke mafai ne ia o faipati atu ki a latou mō te ‵toe taimi. Mai tua ifo i konā, i te taimi ko fai ei ke tiakina a te vaka, e pefea te lotou fanoa‵noa ke lavea atu i a Paulo ko fano!

I te fakaotiga loa, ne oko atu a te vaka ki Kaisaleia. A koi nofo atu a Paulo i konā i te fale o te soko ko Filipo, ne fakailoa atu ne te pelofeta ko Akapasi se mea ki a Paulo. Ne fai atu a ia me ka fai a Paulo mo fai se pagota māfai e oko atu a ia ki Ielusalema. Kae ne tonu eiloa, tenā eiloa te mea ne tupu. Mai tua ifo o tena nofoga i te falepuipui mō tausaga e lua i Kaisaleia, ne uga atu a Paulo ki Loma ke tu atu i te fono fakamasino i mua o te pule o Loma ko Kaisala. Ke onoono aka tatou me se a te mea ne tupu i te malaga ki Loma.