Te Gataga o Mea Ma‵sei Katoa

SE A te mea e lavea ne koe i konei? E tonu, se kautau i luga i solofanua ‵kena. Kae ke onoono aka la me ne o‵mai latou mai fea. E ‵tele mai a solofanua mai te lagi i kaumana! E mata, e isi eiloa ne solofanua ‵tonu i te lagi?

Ikai, a mea konei e se ne solofanua ‵tonu. E iloa ne tatou a te mea tenei me e se mafai o ‵tele a solofanua i kaumana, i ne? Kae e faipati mai eiloa a te Tusi Tapu e uiga ki solofanua i te lagi. E iloa ne koe me kaia e fai ei penā?

E fai penā me i aso ko ‵teka ne fakaaogā malosi a solofanua i taua. Tela la, e fai mai i te Tusi Tapu e uiga ki tino kolā e ‵tele atu i luga i solofanua mai te lagi ke fakaasi atu me e isi se taua a te Atua mo tino i te lalolagi. E iloa ne koe me se a te igoa o te koga taua tenei? Ko Amaketo. A te taua tenā ka fakaseai ei a mea ma‵sei katoa i te lalolagi.

A Iesu ko te Tino telā ka takitaki ne ia a te taua atu i te taua tenei i Amaketo. Masaua, a Iesu ko te tino telā ne filifili ne Ieova ke fai mo tupu i Tena Malo. Tenā eiloa a te pogai e pei ei a Iesu ki se fou fakatupu. Kae e fakaasi mai i te pelu me ka tamate ne ia a fili katoa o te Atua. E mata, e ‵tau o ofo tatou me ka fakaseai ne te Atua a tino ma‵sei katoa?

Ke toe onoono ki te Tala e 10. Ne a mea e lavea ne koe i konā? E tonu, ko te Lolo lasi telā ne fakaseai ei a tino ma‵sei. Ko oi ne fai ne ia a te Lolo? Ko Ieova te Atua. Nei la ke onoono ki te Tala e 15. Se a te mea ko tupu i konā? Ko fakaseai a Sotoma mo Komolo ne te afi telā ne tuku ifo ne Ieova.

‵Suke ki te Tala e 33. Onoono me ne a mea ko ‵tupu ki solofanua mo kaliota tau a te kau Aikupito. Ko oi ne fai ne ia a te vai ke ‵fati ifo ki luga i a latou? Ko Ieova. Ne fai ne ia penā ke puipui ei ana tino. Onoono ki te Tala e 76. Ka lavea ne koe i konā me ne talia eiloa ne Ieova ana tino, ko tino Isalaelu, ke fakamaseigina ona ko te lotou amio ma‵sei.

Tela la, e se ‵tau o ofo tatou me ka uga mai ne Ieova ana kautau faka-te-lagi ke fakagata ei a mea ma‵sei katoa i te lalolagi. Kae ke mafaufau aka me ne a mea ka iku mai i ei! Ke ‵suke ki te suā itulau kae ke onoono aka tatou.