Mataupu e 9
Te Kamataga o te Olaga o Iesu i Tena Kāiga
I TE taimi ne tupu aka ei a Iesu i Nasaleta, a te fa‵kai tenā se tamā fa‵kai telā e se nā lo ko tāua. Ne tu te fa‵kai tenā i te koga maugā ko Kalilaia, e se ‵mao malosi mai te vanu gali ko Ieseleelu.
I te taimi ne ave ei a Iesu ne Iosefa mo Malia mai Aikupito, kāti ko lua fua ana tausaga, kae e foliga mai me ko ia ko te tama e tokotasi a Malia. E se leva kae ne ‵fuli te tulaga tenā. Fakamuli ifo ne fa‵nau mai a Iakopo, Iosefa, Simeona, mo Iuta, kae ne fai foki a Malia mo Iosefa mo fai ne mātua ki tama‵liki fāfine. Kāti e isi aka foki ne taina mo tuagane fo‵liki e tokoono o Iesu io me e tokouke atu.
E isi aka foki a nisi kāiga o Iesu. Ko oti ne ‵logo tatou i tena fakataina matua ko Ioane, telā ne nofo i se koga e fia maila te ‵mao mai konā, i Iutaia. Kae ne nofo pili mai i Kalilaia ko Salome, kae kāti a ia ko te taina o Malia. Ne avaga Salome ki a Sepetaio, tela la, a lā tama‵liki tāgata e tokolua, ko Iakopo mo Ioane, ko fakataina o Iesu. E se iloa ne tatou me ne masani malosi a Iesu mo tamaliki tāgata konā a koi ‵tupu aka latou, kae fakamuli ifo ne fai latou mo fai ne taugasoa pele.
Ne ‵tau o galue malosi a Iosefa ke fesoasoani atu ki tena kāiga telā ne gasolo o tokouke. A ia se kamuta. E tausi ne Iosefa a Iesu e pelā me ko tena tama tonu. Tela la, ne taku sāle a Iesu ko te “tama a te kamuta.” Ne fakaakoako ne Iosefa a Iesu ke fai mo fai se kamuta, kae ne tauloto faka‵lei a ia ki ei. Tenā loa te pogai ne fai fakamuli atu ei a tino me i a Iesu “ko te kamuta.”
Ne fakavae te olaga o te kāiga o Iosefa ki te tapuakiga ki a Ieova te Atua. I te tausiga o te Tulafono a te Atua, ne akoako atu ne Iosefa mo Malia a lā tama‵liki ki mea faka-te-agaga ‘i te taimi ne ‵nofo ei latou i te lotou fale, ne sa‵sale atu latou i te auala, ne ta‵kato fakatasi latou, kae ‵tu atu foki latou ki luga.’ Ne isi se sunako i Nasaleta kae e mafai o tali‵tonu tatou me ne ave sāle ne Iosefa a tena kāiga ke tapuaki i konā. Kae kāti e se taumate a te ‵toe mea gali ki a latou ko olotou malaga kolā ne fai sāle ki te faletapu o Ieova i Ielusalema. Mataio 13:55, 56; 27:56; Maleko 15:40; 6:3; Teutelonome 6:6-9.
▪ Kati e tokofia a taina mo tuagane fo‵liki o Iesu, kae ko oi la a igoa o nisi tino i a latou?
▪ Ko oi a nisi fakataina lauiloa o Iesu?
▪ Se a te galuega faka-te-foitino telā ne galue fakamuli a Iesu i ei, kae kaia?
▪ Ne a akoakoga tāua ne tuku atu ne Iosefa mō tena kāiga?