Mataupu e 11

Ne Fakatoka ne Ioane te Auala

NE ‵TEKA atu a tausaga e sefulufitu talu mai te taimi ko 12 ei a tausaga o Iesu kae ne fakafesilisili atu a ia pelā me se tamaliki ki faiakoga i te faletapu. Ko te ‵tau e ‵somo aka ei a lau i te tausaga ko te 29 T.A., kae ne foliga mai pelā me ne fai‵pati a tino katoa e uiga ki te fakataina o Iesu ko Ioane, telā ne talai atu i te fenua kātoa i tafa o te Vaitafe o Iolitana.

E tonu, a Ioane se tagata telā e ‵kese ana foliga mo ana pati. Ne pei a ia ki gatu o fulufulu kamela, kae ne fai foki ne ia se fusi pa‵kili manu e fakatamilo i tena taugāsulu. Ne kai a ia ki sē akelise mo meli vao. Se a tena fekau? “Ke sala‵mo koutou me ko pili mai te Malo o te lagi!”

Ne fakaosofia a loto o ana tino fakalogo‵logo i te fekau tenā. Ne iloa ne te tokoukega o latou me ne ‵tau o sala‵mo latou, ko tena uiga, ke ‵fuli ne latou olotou manatu kae ke ‵teke atu latou ki olotou olaga mua i te olaga nei e pelā me se mea telā e se manakomia. Tela la, mai i kogā koga katoa i tafa o te Iolitana, ke oko foki eiloa ki Ielusalema, ne olo atu a tino ki a Ioane e pelā me ne vaitino, kae ne papatiso ne ia latou, ne ufi latou katoa ki lalo i te vai ko te Iolitana. Kaia?

Ne papatiso ne Ioane a tino pelā me se fakailoga, io me se takuatuga, o te lotou loto sala‵mo ki agasala i te feagaiga o tulafono a te Atua. Tela la, i te taimi ne olo atu ei te kau Falesaio mo Satukaio ki te Iolitana, ne taku fakamasei ne Ioane a latou. Ana muna: “A koutou ne tama a gata ma‵sei.” “Fakaasi mai ne faiga e iloa ei me ko sala‵mo koutou ki otou agasala. Kae sa manatu pelā me e mafai ne koutou o ‵kalo keatea mai i te otou fai aka pelā, ‘Apelaamo ko te motou tupuna.’ Au e fai atu me e mafai ne te Atua o fakatupu ake ne fanau mō Apelaamo i fatu konei! Ko toka nei te takū mo ‵tua ki lalo a lakau mai i olotou tafito; a lakau katoa kolā e se fua ‵lei, ka ‵tua ki lalo kae ‵pei katoa ki te afi.”

Ona ko te ‵saga malosi atu o tino ki a Ioane, ne uga atu ne te kau Iutaia a faitaulaga mo te kau Levi ki a ia. Ne fesili atu latou penei: “Ko oi koe?”

Ne taku ‵tonu atu a Ioane: “Au e se ko te Keliso.”

“Kae ko oi la koe?” ko te lotou fesili. “A koe ko Elia?”

“Ikai, au e se ko ia,” ko tena tali.

“A koe se Pelofeta?”

“Ikai!”

Tela la, ne toe fesili atu ei latou penei: “Kae ko oi la koe? Fai aka sau fakamatalaga e uiga ki a koe. E ‵tau o maua se motou tali ke fai atu ki a latou kolā ne uga mai ne latou a matou.”

Ne fakamatala atu penei a Ioane: “Ko au ko te leo o te tino telā e kalaga sāle i te vao, ‘Faka‵tonu te auala o Ieova!’ E pelā eiloa mo pati ne fai mai ne te pelofeta ko Isaia.”

“Kaia e papatiso ei ne koe a tino,” e fia iloa ne latou, “manafai e se ko koe te Keliso, e se ko Elia, e se se Pelofeta?”

Ne tali atu a ia penei: “Au e papatiso ki te vai, kae ko ia telā e se iloa ne koutou, tenā e ‵tu fakatasi mai mo koutou, e vau i oku tua.”

Ne fakatoka ne Ioane te auala mai te faiga ke ‵lei a foliga o loto o tino ke talia ne latou te Mesia telā ka fai mo fai te Tupu. Ne fai atu a Ioane penei e uiga ki te Tino tenā: “Kae ka vau a ia telā e sili atu i a au, e se ‵tau mo au o ‵tala ana taka.” A te tonuga loa, ne fai atu foki a Ioane penei: “A ia telā ka vau i oku tua, e sili atu i a au, ne muamua foki i a au.”

Tela la, a te fekau a Ioane, me “Ko pili mai te Malo o te lagi,” ne fai pelā me se faka‵pulaga ki tino ke iloa ne latou me ko pili o kamata te galuega a te Tupu telā ne fakaeke ne Ieova, ko Iesu Keliso. Ioane 1:6-8, 15-28; Mataio 3:1-12; Luka 3:1-18; Galuega 19:4.

▪ A Ioane se vaegā tagata pefea?

▪ Kaia ne papatiso ei ne ia a tino?

▪ Kaia ne mafai ei ne Ioane o fai atu me ko pili mai te Malo?