Mataupu e 27

Te Kalagaga o Mataio

NE FATOĀ oti atu te faka‵leiga ne Iesu o te tino telā ne masaki faka‵mate, kae ne tiakina ne ia Kapanaumi i te Namo o Kalilaia.Ne toe olo atu a tino e tokouke ki a ia, kae ne kamata a ia o akoako atu ki a latou. I tena sasaleatuga, ne matea ne ia a Mataio, telā e fakaigoa foki ki a Levi, e sagasaga i tena ofisa ao lafoga. “Tautali mai ki a au,” ko te ‵kamiga a Iesu.

Kāti e se taumate ko oti ne masani ‵lei a Mataio i akoakoga a Iesu, e pelā eiloa mo Petelu, Anitelea, Iakopo mo Ioane i te taimi ne kalagagina ei latou. Kae e pelā eiloa mo latou, ne talia fakavave ne Mataio te ‵kamiga. Ne tu a ia ki luga, ne tiakina ne ia ana tiute pelā me se tagata ao lafoga, kae ne tautali atu ki a Iesu.

Fakamuli ifo, ne fai ne Mataio se ‵kaiga lasi i tena fale, kae kāti ne fakamanatu mai i ei tena kalagaga. E se gata fua i a Iesu mo Ana soko kae ne ‵nofo mai foki i konā a taugasoa mua o Mataio. Ne fakatakalia‵lia sāle a tāgata konā ne olotou taina Iutaia me ne ‵tae ne latou a lafoga mō pule Loma kolā ne takalia‵lia latou ki ei. Kae ko tō silia foki a tupe ne puke sāle ne latou mo te sē fakamaoni i lō te lafoga masani.

Ona ko te matea atu me ne ‵nofo fakatasi a Iesu mo vaegā tino penā i te ‵kaiga, ne fesili atu penei a te kau Falesaio ki ana soko: “Se a te mea ko ‵kai fakatasi ei te otou faiakoga mo tino ao lafoga, pelā foki mo tino agasala?” Ne lagona ne Iesu te lotou fesili kae ne tali atu a ia penei ki te kau Falesaio: “A tino sē ma‵saki, e se ma‵nako ki se tokitā, ako latou fua kolā e ma‵saki. Olo o salasala aka me se a te uiga o te muna tenei: ‘Au e loto ki te alofa, kae e se ko taulaga.’ Me i a au e seki vau o kalaga ki tino amio‵tonu, ako tino agasala.”

Kāti ne ‵kami mai ne Mataio a tino ao lafoga konā ki tena fale ko te mea ke mafai ne latou o fakalogo‵logo ki a Iesu kae ke maua ne latou se faka‵leiga i te feitu faka-te-agaga. Tela la, ne kau atu a Iesu ki a latou ko te mea ke fesoasoani atu ki a latou ke maua se fesokotakiga ‵lei mo te Atua. Ne seki takalialia a Iesu ki vaegā tino penā, e pelā mo te kau Falesaio kolā ne fia amio‵tonu. Kae ona ko tena alofa ne fai ei a ia pelā me se tokitā faka-te-agaga ki a latou.

Tela la, a te alofa o Iesu ki tino agasala konā e se ko te talia fua ne ia o olotou agasala kae ko te fakaasiatuga o ana uiga ‵gali kolā ne fakaasi atu foki ki a latou kolā ne ma‵saki i te feitu faka-te-foitino. Masaua me ona ko te alofa ne ‵kapa atu ei tena lima kae ne fakapatele atu ki te lepela, ana muna: “Au e loto ki ei. Ke ‵mā koe.” Ke na fakaasi atu foki ne tatou te vaegā alofa penā mai i te fesoasoani atu ki tino fakaa‵lofa, kae maise eiloa ko te fesoasoani atu ki a latou i te feitu faka-te-agaga. Mataio 8:3; 9:9-13; Maleko 2:13-17; Luka 5:27-32.

▪ Tefea te koga ne nofo ei a Mataio i te taimi ne matea ei a ia ne Iesu?

▪ Se a te galuega a Mataio, kae kaia ne takalia‵lia ei a nisi tino Iutaia ki ­vaegā tino penā?

▪ Se a te fāmeo telā ne fai atu ki a Iesu, kae se a tena tali?

▪ Kaia ne kau atu ei a Iesu ki tino agasala?