Mataupu e 85

Te Salasalaga ki Tino Kolā e ‵Galo

NE FIAFIA malosi a Iesu ke ‵sala aka kae ke maua foki ne ia a latou kolā ka tavini atu mo te loto maulalo ki te Atua. Tela la, ne ‵sala aka ne ia so se tino ke sautala ki ei e uiga ki te Malo, e aofia i ei a tino takutakua i te ma‵sei. Ne olo atu a vaegā tino penā ke fakalogo‵logo ki a ia.

I te ‵kilo atu ki ei, ne munasele atu te kau Falesaio mo faiakoga ki a Iesu me ne māfuta fakatasi a ia mo tino kolā ne manatu māmā latou ki ei. Ne mui‵mui latou penei: “A te tagata tenei e fiafia ki tino agasala, kae ‵kai fakatasi foki mo latou!” Ko tō ma‵luga latou ke fai penā! Ne ma‵natu aka te kau Falesaio mo faiakoga o te Tulafono me i tino ma‵lalo ne mea fua e seai. Ne fakaaogā eiloa ne latou a te faigā­muna faka-Epelu ko te ‛am ha·’aʹrets, ko “tino o te lalolagi [te fenua],” ke faka­asi atu ei te lotou sē fia­‵fia ki vaegā tino penā.

Ne ‵kese a amioga a Iesu, me ne fakaasi atu ne ia te āva, te alofa, mo te atafai ki tino ­katoa. Ona ko te mea tenā, e tokouke a tino ma‵lalo, e ­aofia foki i ei a nisi tino takutakua i amioga ma‵sei, ne fia faka­logo‵logo ki a ia. Kae e a te fāmeo o te kau Falesaio me ne fesoasoani atu a Iesu ki tino kolā ne manatu māmā latou ki ei?

Ne tali atu ne Iesu te lotou manatu ‵teke mai te faiga o se tala fakatusa. Ne faipati atu a ia ona ko te kilokiloga a te kau Falesaio, me i a latou e amio‵tonu kae e ‵nofo tonu foki latou i loto i te lafu mamoe a te Atua, kae ne ‵teka atu keatea a tino fakatakalia‵lia pelā mo te kau ‛am ha·’aʹrets kae ko ‵galo atu. Fakalogo mai ki tena fesili:

“Kafai e isi se tino o koutou e isi ne ana mamoe e lau, kae galo se tasi o latou, se a te mea ka fai ne ia? E tuku ne ia te tinoiva mo te tokoiva mamoe i te vao, kae fano o ‵sala te mamoe ne galo ke maua. Kafai e maua, ko oko eiloa i tena fiafia, kae amo ki ana tuā­uma. Ko ave ei ne ia ki tena fale, kae ‵kami ana taugasoa mo ana tuakoi ke o‵mai. Ko fai atu ei a ia ki a latou, ‘Ke fia‵fia ake tatou, me ko oti ne maua ne au taku mamoe telā ne galo!’”

Kae ne fakamatala mai penei ne Iesu a te aogā o tena tala: “Au e fai atu ki a koutou, me e penā foki eiloa te lasi o te fiafia i te lagi i te tino agasala e tokotasi, ko salamō i lō te tinoiva mo te toko­iva tino amio‵tonu, kolā e se aogā ki ei te salamō.”

Ne ma‵natu aka te kau Falesaio me i a latou e amio‵tonu kae e se aogā te salamō ki a latou. I te taimi ne munasele atu ei a nisi tino o latou ki a Iesu i ne nai tausaga mai mua atu i ei ona ko tena ‵kai fakatasi mo tino ao lafoga mo tino agasala, ne fai atu penei a ia ki a latou: “Me i a au ne seki vau o kalaga ki tino amio‵tonu, kae ko tino agasala.” A te kau Falesaio kolā ne fia amio‵tonu, ne seki fia sala‵mō. Telā ne seai ei se fiafia ne maua i te lagi. Kae e isi se fiafia e maua mai i tino agasala kolā e sala‵mō tonu.

Ke toe faka‵mafa faka‵lei mai ne Iesu te manatu me i te ‵fokimaiga o tino agasala kolā ne ‵galo se pogai o fiafiaga ‵lasi, ne toe taku mai ne ia te suā tala fakatusa. “E pelā foki mo se fafine e isi ne ana tupe siliva e sefulu, kae ne galo e tasi. Se a la tena mea ka fai? Ka fa‵ka ne ia se molī kae tuetue ne ia tena fale, kae onoono faka‵lei ki koga katoa ke maua ne ia te tupe. Kafai ko maua ne ia te tupe, ko ‵kami ei ne ia ana taugasoa mo ana tuakoi ke o‵mai. Ko fai atu ei a ia penei, ‘Ke fia‵fia fakatasi ake tatou, me ko maua ne au taku tupe ne galo!’”

Ne tai ‵pau foki te fakamatalaga a Iesu ki ei, penei: “Au e fai atu ki a koutou, me penā foki eiloa te fia‵fia o te kau agelu a te Atua, i te tino agasala e tokotasi ko salamō.”

E pefea te fakaofoofogia o te a‵lofa mo te fia‵fia o agelu a te Atua ki te ‵fokimaiga o tino agasala kolā ne ‵galo! Kae maise eiloa me i tino ma‵lalo kolā ne manatu māmā muamua ki ei, ko te kau ‛am ha·’aʹrets ne aofia fakamuli i te Malo faka-te-lagi o te Atua. Ona ko te mea tenā, ne maua ei ne latou se tulaga i te lagi telā e maluga atu i tulaga o te kau agelu! Kae e se loto ma‵sei io me fanoa‵noa i ei te kau agelu, me e fakatāua ne latou te manatu me ne fetaui kae ne manumalo foki a tino agasala konā i nisi fakanofo­nofoga i te olaga nei kolā ka fai ei latou ke fai mo fai ne tupu mo fai­taulaga i te lagi kolā e loto malama‵lama kae loto ­a‵lofa foki. Luka 15:1-10; Mataio 9:13; 1 Kolinito 6:2, 3; Fakaasiga 20:6.

▪ Kaia ne māfuta fakatasi ei a Iesu mo tino kolā ne lauiloa pelā me ne tino agasala, kae ne a pati munasele ne fai atu ne te kau Fale­saio i ei?

▪ Ne a manatu o te kau Falesaio e uiga ki tino ma‵lalo?

▪ Ne a tala fakatusa ne fakaaogā ne Iesu, kae se a te aogā o mea konā ki a tatou?

▪ Kaia e fakaofoofogia ei te fia‵fia o te kau agelu?