Mataupu e 41

Ne Fakatau Kinau a Tino e Uiga ki a Ia

NE FATOĀ oti ne talimālō a Iesu i te fale o Simona, kae ne kamata ne ia a te lua o ana malaga talai i Kalilaia. I tena malaga mua i te koga tenā, ne olo atu foki ana soko muamua, ko Petelu, Anitelea, Iakopo, mo Ioane. Kae i konā loa ne olo atu fakatasi mo ia a apositolo e toko 12, penā foki loa mo nisi fāfine. E aofia i ei a Malia te Makatala, Susana, mo Ioana, ko te avaga a te pule i te fale o te tupu ko Helota.

Ne gasolo o uke a mea ne fai ne Iesu, kae ne gasolo aka foki o uke a kinauga ne fai e uiga ki tena galuega. Ne ave ki a Iesu se tagata telā ne ulufia ne temoni, kae ne ‵kivi ana mata kae gūgū foki tou tagata. I te faka‵leiga ne Iesu o te tagata tenā, ne seki toe pule te kau temoni ki a ia kae ne mafai o toe faipati a ia kae ko ‵pula ana mata. Ko ofo malosi i ei te vaitino. Ko kamata o fai atu latou penei: “E a, e se ko te Tama tenei a Tavita?”

Ona ko te tokouke o tino ne maopoopo i tua o te fale telā ne nofo i ei a Iesu, ne seki maua ei ne latou mo ana soko se avanoaga ke ‵kai latou. E se gata fua i a latou kolā ne ma‵natu aka pelā me i a ia ko te ‘Tama a Tavita,’ telā ne folafola mai, kae ne isi foki i konā ne faiakoga o te Tulafono mo Falesaio kolā ne faima‵laga mai te koga ‵mao ko Ielusalema ko te mea ke taku fakasēaogā ne latou a ia. Ko ‵logo te kāiga o Iesu i te uke o kinauga kolā ne fai e uiga ki a Iesu, kae ne olo atu foki latou ke puke mai a ia. Se a te pogai?

Ia, koi tuai eiloa o tali‵tonu a taina o Iesu me i a ia ko te Tama a te Atua. Kae ko te uke o kinauga mo fakalavelave ne ‵tupu mai ona ko ia, ko se fetaui mo uiga o te Iesu telā ne iloa ne latou a koi tuputupu aka a ia i Nasaleta. Tela la, ne tali‵tonu latou me kāti ko masei te ulu o Iesu. Ko ma‵natu aka latou penei: “A ia ko fakavalevale,” kae ne fia puke atu latou ki a ia ke na ave keatea.

Kae ko manino ‵lei te fakamaoniga me ne faka‵lei aka ne Iesu te tagata telā ne ulufia ne temoni. E iloa ‵lei ne faiakoga o te Tulafono mo Falesaio me e se mafai lele eiloa o fakafiti ne latou te manatu tenā. Tela la, ne fai atu latou penei ki tino ke taku fakasēaogā ei a Iesu: “E afuli fua ne ia temoni, i te ‵mana o Pelesepulo te aliki o temoni.”

Ne iloa ‵lei ne Iesu olotou manatu, telā ne kalaga atu ei a ia ki faiakoga o te Tulafono mo Falesaio ke na o‵mai, ana muna: “So se malo e nofo mavaevae kae fai taua, e se tumau. So se fa‵kai io me ko so se kāiga e nofo mavaevae kae fai taua, e se tumau foki eiloa. Kafai e fai taua a potukau i loto i te malo o Satani, ko tena uiga ko nofo mavaevae tena malo, ko malepelepe ei.”

Mā‵faga o fakamatalaga tonu! Me e fai atu te kau Falesaio me e isi ne tino i a latou kolā e mafai o ‵tuli keatea a temoni, ne fesili atu a Iesu penei: “Kafai la e afuli ne au a temoni i te ‵mana o Pelesepulo, i oi la te ‵mana e afuli ei ne otou fanau a temoni?” Io me ko tena uiga, e ‵tau eiloa o fai atu ki tino konā a ‵losiga kolā ne fai atu ne latou ki a Iesu. Kae ne fakailoa atu a Iesu penei: “Kae kafai ko te agaga o te Atua e afuli ei ne au a temoni, ko tena uiga, ko i a koutou eiloa a te Malo o te Atua.”

Ke fakaasi atu me i te ‵tuliga ne ia o temoni se fakamaoniga eiloa o tena malosi ki luga i a Satani, ne fai atu penei a Iesu: “E se mafai ne se tino o ulu ki loto i te fale o te tagata mafi o puke ana mea, seiloga ke mua o saisai ne ia te tagata mafi, ko mafai ei ne ia o puke ne mea mai tena fale. So se tino e se kau i a au, ko tena uiga e ‵teke ki a au. So se tino foki e se fakamaopoopo fakatasi maua, ko tena uiga e fakamaofa ne ia aku mamoe.” E ‵teke tonu atu te kau Falesaio ki a Iesu, kae e fakaasi atu i ei me i a latou ne sokoga o Satani. Ko ‵tuli keatea ne latou a tino Isalaelu mai i a ia.

Tela la, ne fakailoa atu ne Iesu ki tino e uiga fakasatani kolā ne ‵teke atu ki a ia me i “tino kolā e fai muna ki te agaga tapu, e se fakamagalogina.” Ne fakamatala atu a ia penei: “So se tino e fai muna ki te Tama a te Tagata e fakamagalogina; kae ko te tino e fai muna ki te agaga tapu, e se fakamagalogina ke oko eiloa ki te se gata mai.” Ne fai eiloa ne faiakoga o te Tulafono mo Falesaio a te agasala telā e se mafai o fakamagalo me ne fai atu latou mo te loto masei me ne mafua mai i a Satani a mea kolā e manino eiloa me ko te galuega fakaofoofogia a te agaga tapu o te Atua. Mataio 12:22-32; Maleko 3:19-30; Luka 8:1-3; Ioane 7:5.

▪ Ne ‵kese pefea te lua o malaga a Iesu i Kalilaia i lō tena malaga muamua?

▪ Kaia ne taumafai ei a kāiga o Iesu o puke a ia?

▪ Ne taumafai pefea te kau Falesaio o taku fakasēaogā ne latou a vavega a Iesu, kae ne fakamavale pefea ne Iesu a latou?

▪ Se a te agasala telā ne fai ne Falesaio konā, kae kaia?