Ko Faka‵tu ne Iesu a Tino ‵Mate

A TE tamaliki fafine e lavea ne koe i konei ko 12 ana tausaga. E puke ne Iesu tena lima, kae ko tena mātua mo tena tamana kolā e ‵tu pili atu ki ei. E iloa ne koe me kaia ko fia‵fia malosi ei laua? Ke onoono aka tatou.

A te tamana o te tamaliki fafine se tagata maluga e igoa ki a Iailo. I te aso e tasi ne masaki tena tama fafine, kae ne fakatakato ki lalo i tena moega. Kae ne seki gasolo o ‵lei tou fafine. Ne gasolo aka eiloa o masei tena masaki. Ne manava‵se a Iailo mo tena avaga, me e foliga mai me ka mate a te lā tama fafine foliki. A ia ko te lā tama fafine eiloa e tokotasi. Tela la, ne fano a Iailo o ‵sala a Iesu. Ko oti ne lagona ne ia a mea e uiga ki vavega kolā ne fai ne Iesu.

I te taimi ne maua ei ne Iailo a Iesu, e isi se vaitino tokouke i ana tafa. Kae ne fanatu eiloa a Iailo i loto i te vaitino kae ne totuli ifo ki vae o Iesu. ‘Taku tama fafine ko oko eiloa i te masaki,’ ne fai atu a ia. ‘Fakamolemole, vau aka o fai ke ‵lei a ia,’ ne akai atu tou tagata. Ne fai atu a Iesu me ka fanatu a ia.

A koi sa‵sale atu latou, ne tumau eiloa i te ua‵lolo atu o te vaitino ke fakapilipili atu. Ne tu fakapoi a Iesu. ‘Ko oi ne fakapatele mai ki a au?’ ne fesili atu tou tagata. Ne lagona ne Iesu me ne fano keatea te ‵mana mai i a ia, telā ne iloa ei ne ia me e isi se tino ne fakapatele atu ki a ia. Kae ko oi la? Se fafine telā ne masaki malosi i tausaga e 12. Ne fanatu a ia kae ne fakapatele atu ki gatu o Iesu, kae ne ‵lei ei a ia!

Ne fai ne te mea tenei ke tai ‵lei te loto o Iailo, me ne lavea ne ia a te faigofie ki a Iesu ke faka‵lei aka ne ia se tino. Kae oti aka ne oko mai se avefekau. ‘Sa toe fakalavelave atu ki a Iesu,’ ne fai atu a ia ki a Iailo. ‘Tau tama ko oti ne mate.’ Ne lagona ne Iesu a te mea tenei kae ne fai atu a ia ki a Iailo: ‘Sa manavase, ka ‵lei eiloa a ia.’

I te okoatuga a latou ki te fale o Iailo, ko ‵tagi a tino i ei mo te fanoanoa lasi. Kae ne fai atu a Iesu: ‘Sa ‵tagi. E seki mate a te tamaliki. E moe fua tou fafine.’ Kae ne ‵kata kae fakatauemu atu latou ki a Iesu, me ne iloa ne latou me ko mate te tamaliki fafine.

Telā ne ave ei ne Iesu a te tamana mo te mātua o te tamaliki fafine mo ana apositolo e tokotolu ki te potu telā e moe i ei a te tamaliki. Ne puke ne ia te lima o te tamaliki fafine kae ne fai atu penei: ‘Tu ki luga!’ Kae ne toe ola mai te tamaliki fafine, e pelā eiloa mo te mea e lavea ne koe i konei. Kae ne tu aka tou fafine kae ne sasale atu! Tenā eiloa te pogai ko fiafia malosi ei tena mātua mo tena tamana.

E se tenei eiloa te tino muamua ne fakatu aka ne Iesu mai te mate. A te tino muamua telā e fakamatala mai ne te Tusi Tapu ko te tama tagata a se fafine ko mate tena avaga telā e nofo i te fa‵kai ko Naina. Fakamuli ifo, ne fakatu aka foki ne Iesu a Lasalo, te tuagane o Malia mo Maleta, mai te mate. Kafai ko pule mai a Iesu e pelā me ko te tupu a te Atua, ka toe fakafoki atu ne ia a tino ‵mate e tokouke ‵ki ki te ola. E mata, e se fia‵fia tatou e uiga ki te mea tenā?