Mataupu e 56
Ne a Mea e Fakalailai ei se Tino?
NE MOMEA aka te uke o ‵tekeatuga ne fai ki a Iesu. E se gata fua i te tiakina atu ne ana soko e tokouke a ia, kae ne taumafai foki a tino Iutaia i Iuta o tamate a ia, e pelā eiloa mo olotou taumafaiga ke fai penā i te taimi ne nofo atu ei a ia i Ielusalema i te Paseka i te 31 T.A.
A te taimi tenei ko te Paseka i te 32 T.A. Ona ko te fakatonuga a te Atua ke kau atu ki ei, kāti ne fanatu eiloa a Iesu ki te Paseka i Ielusalema. Kae ne fakaeteete a ia i ei me ko fia tamate ne nisi tino a ia. Oti aka loa, ne toe foki atu ei a ia ki Kalilaia.
Kāti ne nofo atu a Iesu i Kapanaumi i te taimi ne olo atu ei a Falesaio mo faiakoga o te Tulafono mai Ielusalema ki a ia. Ne sala‵sala aka ne latou a pogai ke ‵losi atu ei ki a ia e uiga ki te solitulafono ki mea faka-te-lotu. “Kaia e se faka‵logo ei ou soko ki te akoakoga ne tuku fakasolo mai ne ‵tou tupuga ki a tatou?” ko te lotou fesili. “Me e se ‵fano olotou lima manafai e ‵kai?” E seai se tulafono a te Atua e uiga ki te mea tenā, kae e ma‵natu aka te kau Falesaio me se agasala matagā ke se fai te tū masani tenā, telā ne aofia i ei te ‵fanoga o lima ke oko atu eiloa ki tulilima.
Ne seki tali atu a Iesu ki te lotou fāmeo tenā, kae ne fakasino atu a ia ki olotou amioga ma‵sei mo te mata‵fatu i te solitulafono ki te Atua. “Kaia foki la koutou e se faka‵logo ei ki fakatonuga a te Atua, kae e fakasili‵sili ne koutou otou akoakoga?” ko tena fesili. “I te Atua ne fakatonu mai, ‘Āva ki tou tamana mo tou mātua. So se tino foki e pati masei ki tena tamana mo tena mātua, a te tino tenā e ‵tau o tamate.’ Kae e akoako ne koutou, me i so se tino e fai atu ki tena tamana mo tena mātua penei, ‘So se mea a aku e aogā ki a koulua, a te mea tenā ko te taulaga ki te Atua.’ Tela la, ko se ‵tau a ia o āva ki ona mātua.”
A te tonuga loa, ne akoako sāle atu ne te kau Falesaio me i tupe, kope, io me ko so se isi mea aka telā e taku pelā me se meaalofa ki te Atua, ne mea mō te faletapu, kae e se mafai o fakaaogā a mea konā mō so se isi mea aka. Kae ko te tonuga loa, e taofi aka faeloa a te meaalofa tenā ne te tino telā ne ofo atu ne ia. I te auala eiloa tenā, ne mafai fua ne se tamaliki tagata o fai atu me e “Kopani” ana tupe io me ko ana kope—ko tena uiga se taulaga mō te Atua io me ko te faletapu—kae ko fakaseke ei a ia ki tena tiute ke fesoasoani atu ki ana mātua ma‵tua, kolā kāti ko fakaa‵lofa ‵ki.
Se mea ‵tau ke ita a Iesu ki amioga ma‵sei a te kau Falesaio i te ‵fuli fakakōtua ne latou o te Tulafono a te Atua, ana muna: “Tenei te pogai ko fakasēaogā ei ne koutou a te muna a te Atua, ona ko otou akoakoga. A koutou ne tino ‵loi! Ko tu tonu eiloa ki a koutou a te muna a te pelofeta ko Isaia! ‘A tino konei e āva mai fua ki a au i olotou gutu ako olotou loto e ‵mao mai i a au. E se aogā olotou tapuakiga ki a au, i te mea ko akoako atu ne latou a akoakoga a tino ke fai pelā me ne tulafono a te Atua!’”
Kāti ne talia ne te vaitino ke olo atu te kau Falesaio o ‵tu i mua o Iesu ke fai ne olotou fesili ki a ia. I konā loa, me e seai se tali a te kau Falesaio ki pati polopoloki a Iesu ki a latou, ne kalaga atu ei a ia ke na o‵mai te vaitino. Ana muna: “Faka‵logo mai, kae e ‵tau foki o malama‵lama koutou. E se fakamasei te tino ne mea kolā e kai ne ia, kae ko mea kolā e mafaufau a ia ki ei kae faipati ne ia.”
Fakamuli loa, i te taimi ne ulu atu ei latou ki loto i te fale, ne fesili atu penei ana soko: “E iloa ne koe i Falesaio ne ita i te lagonaga ne latou a tau fakamatalaga tenā?”
Ne tali atu a Iesu penei: “So se lakau e seki ‵toki ne toku Tamana faka-te-lagi, e unu keatea. Tuku fua i ei, me ko latou eiloa ne takitaki ‵kivi. Kae kafai ko te tino ‵kivi e takitaki ne ia te suā tino ‵kivi, e ‵to laua ki te lua.”
Kāti ne ofo a Iesu i te taimi ne fai ei a Petelu mo fai te sui o te kau soko kae ne fakamolemole atu ke maua a nisi fakamatalaga e uiga ki mea kolā e fakalailai ei te tino. Muna a Iesu: “A koutou foki koi pouliuli eiloa? E se iloa ne koutou i te mea e ulu ki te gutu, ko fano ei i tena fanoga? Kae ko te mea e vau i te gutu, e fanake tonu eiloa mai te loto, tenā te mea e fakamasei ne ia a te tino. Me ko te loto e mafua mai ei a mafaufauga ma‵sei: ko te tatino, ko te mulilua, ko te finalalolagi, ko te kaisoa, ko te faitala ‵loi, mo te fatufatu. A mea konei e fakamasei ne latou a te tino, kae ko te kai mo lima e se ‵fano, e se fakamasei ei a te tino.”
Ne seki ‵teke atu i konā a Iesu ki te ‵tu ‵mā masani. Ne seki fakamatala atu ne ia me e se ‵tau o ‵fano muamua a lima o se tino a koi tuai o fakatoka ne ia a meakai io me e kai ki ei. Kae ne taku fakamasei i konā ne Iesu a uiga ‵loi o takitaki lotu kolā ne taumafai o faitogafiti kae fakasekeseke ki tulafono amio‵tonu a te Atua mai te faka‵mafa aka ne latou a tū masani kolā e se maua i te Tusi Tapu. E tonu, ko amioga ma‵sei e fakalailai ei te tino, kae ne fakaasi atu ne Iesu me e māfua sāle mai a mea konā i te loto o te tino. Ioane 7:1; Teutelonome 16:16; Mataio 15:1-20; Maleko 7:1-23; Esoto 20:12; 21:17; Isaia 29:13.
▪ Ne a ‵tekeatuga ne fe‵paki mo Iesu i konā?
▪ Ne a ‵losiga ne fai atu ne te kau Falesaio, kae e pelā mo muna a Iesu ne mata‵fatu sāle pefea te kau Falesaio o solitulafono ki te Atua?
▪ Ne a mea ne fakaasi atu ne Iesu me e fakalailai sāle i ei te tino?