Maupu e 61

Ne Faka‵lei Aka te Tamaliki Telā ne Pukea

A KOI ‵galo atu a Iesu, Petelu, Iakopo, mo Ioane, kae kāti ne ‵nofo atu latou i te mauga ko Hele­moni, kae ne fe‵paki eiloa a nisi soko mo se mea faigata. I tena fokiatuga, ne matea vave ei ne Iesu me e isi se fakalavelave. Ko maopoopo mai se vaitino e sikomia ei ana soko, kae ne fakatau kinau latou mo faiakoga o te Tulafono. I te taimi ne matea atu ei ne tino a Iesu, ne ‵poi latou i ei kae ne ‵tele atu ke fetaui mo ia. “Se a te mea e finau ei koutou mo latou?” ko tena fesili.

Ne tu atu se tagata i mua o te vaitino, ne totuli ifo i mua o Iesu, kae ne fakamatala atu penei: “Te Faiakoga, ne aumai ne au taku tamaliki tagata ki a koe, i te mea e pukea ne te agaga masei, kae ko se mafai ne ia o faipati. Kafai ko pukea a ia ne te agaga, e pei ‵tuki a ia ki te laukele, kae takapiaga tena gutu, kae fakagaī ana nifo kae makeke mo tena foitino katoa. Ne fai atu au ki ou soko ke tuli keatea ne latou te agaga mai i a ia, kae e se maua ne latou.”

Ne oso atu a faiakoga o te Tulafono me ne seki mafai ne soko o faka‵lei aka te tamaliki tenā, kae kāti ne fakatauemu atu ki olotou taumafaiga. I te taimi faigata tenā, ne oko atu ei a Iesu ki konā. Ana muna: “A koutou ne tino ko oko eiloa i te sē talitonu! E ma‵nako faeloa koutou ke fakatasi tatou ko te mea ke tali‵tonu koutou? Kae pefea te leva e ma‵nako ei koutou ke kufaki faeloa au ki a koutou?”

Kāti ne faipati atu Iesu ki tino katoa i konā, kae kāti e se taumate, ne fakasino tonu atu eiloa ana pati ki faiakoga o te Tulafono kolā ne faka‵tupu a fakalavelave ki ana soko. Kae ne fai atu penei a Iesu e uiga ki te tamaliki: “Aumai te tamaliki tagata ki a au.” Kae i te fanatuga o te tamaliki ki a Iesu, ne fakasiga a ia ki lalo ne te temoni telā e pukea a ia i ei kae ne fai ei a ia ke fitifiti malosi. Ne takapilipili eiloa te tamaliki i te laukele, kae takapiaga ei tena gutu.

“Ko pefea te leva ne maua ei ne ia a te mea nei?” ko te fesili a Iesu.

Ne tali atu tena tamana: “Talu mai tena folikiga. E uke a taimi e taumafai ei te agaga o tamate te tamaliki, i te ‵pei ne ia ki te afi mo te vai.” Telā ne akai atu ei te tamana penei: “A koe ke alofa kae fesoasoani mai ki a matou, manafai e mafai ne koe!”

Kāti ne salasala aka ne te tamana tenā se fesoasoani i te fia o tausaga. Kae i konā loa ko fanoanoa ‵ki a ia ona ko te sē mafai ne soko o Iesu o faka‵lei aka tena tamaliki. Ona ko te fakamolemole malosi mai o te tagata, ne fakamalosi atu a Iesu penei: “Ao, ‘Manafai e mafai ne koe!’ E faigofie mea katoa ki te tino e isi sena fakatuanaki.”

Ne kalaga fakavave atu te tamana penei: “E isi soku fakatuanaki.” Kae ne akai atu a ia penei: “Fesoasoani mai ki a au māfai e se lava toku fakatuanaki!”

Ne matea atu ne Iesu me ko ‵tele mai te vaitino ki konā, telā ne fakatonu atu penei a ia ki te temoni: “Te Agaga Tuli mo te Gūgū, ko fakatonu atu ne au koe ke fano keatea mai te tamaliki, kae sa toe foki ki a ia.” I te fano keateaga o te temoni, ne fai ne ia ke paka­laga valevale te tamaliki kae ke fitifiti valevale. Oti aka loa, ne takato filemu ei te tamaliki i te laukele, telā ne kamata o fai atu penei te tokoukega o tino: “Ko mate!” Kae ne puke a Iesu ki te lima o te tamaliki tagata, kae ne tu a ia ki luga.

I te taimi ne uga atu ei te kau soko ke talai, ne ‵tuli keatea ne latou a temoni. Tela la, i te lotou uluatuga ki loto i te fale, ne fesili atu latou penei ki a Iesu: “Kaia e se mafai ei ne matou o tuli te agaga masei keatea?”

Ne fakaasi atu ne Iesu me ne fai penā ona ko te sē lava o te lotou fakatuanaki, ana muna: “E seai ake eiloa se isi malosi e mafai ne ia o fai se vaegā mea penei, vaganā ko te ‵mana o te ‵talo.” Ne ‵tau o fakatoka faka‵lei a koi tuai o tuli keatea te temoni malosi ‵ki tenā. Ne ‵tau o maua te fakatuanaki malosi kae ‵talo atu ke maua te fesoasoani malosi o te Atua.

Kae ne toe fai atu a Iesu penei: “Ke masaua ne koutou te manatu tenei: Kafai e ‵pau te lasi o te otou fakatuanaki mo te fuaga o te sinapi, e mafai ne koutou o muna atu ki te mauga tenei, ‘Masiki mai konei ki ko,’ ko te mea eiloa ko masiki. Me e mafai ne koutou o fai so se mea i te fakatuanaki.” E malosi ‵ki eiloa te fakatuanaki!

Kāti e foliga mai e pelā me e se mafai o manumalo io me ave keatea a fakalavelave mo mea faiga‵ta kolā e taofi ei te taviniga ki a Ieova e pelā eiloa mo te tu mai o se matugā mauga lasi. Kae ne fakaasi mai ne Iesu me kafai e ati aka ne tatou te fakatuanaki i ‵tou loto, e fakamalosi aka te mea tenā ke tupu malosi aka, ka ­matua ‵lei te fakatuanaki kae ka fai ei ke mafai ne tatou o manumalo i vaegā fakalavelave mo mea faiga‵ta kolā e fai pelā me ne mauga. Maleko 9:14-29; Mataio 17:19, 20; Luka 9:37-43.

▪ Se a te mea ne fetaui mo Iesu i tena fokiatuga mai te mauga ko Helemoni?

▪ Se a te fakamalosiga telā ne avatu ne Iesu ki te tamana o te tamaliki tagata telā ne pukea ne te temoni?

▪ Kaia ne seki mafai ei ne te kau soko o tuli keatea te temoni tenā?

▪ E pefea te malosi e mafai o oko atu ki ei te fakatuanaki e pelā mo te mea ne fakaasi mai ne Iesu?