Ne Faka‵lei ne Iesu se Tamaliki Fafine mo se Tagata ‵Tuli

I te otiga ne taku fakamasei ne Iesu te kau Falesaio ona ko olotou tuu kolā ne fakama‵lie aka ei olotou manakoga, ne tiakina ne Iesu te koga tenā fakatasi mo ana soko. Ne fanatu tou tagata ki kogā fenua i tafa o Tulo mo Saitonu i Foinikia, i se fia o maila ki matū togala.

Ne maua ne Iesu se fale mō olotou ‵nofo, kae ne seki manako a ia ke iloa ne tino me e nofo atu a ia i konā. Kae ke oko foki eiloa ki te fenua tenei, e lavea eiloa a ia ne tino. Ne maua a Iesu ne se fafine Eleni, telā ne fanau i te koga tenei, kae ne kamata o akai atu tou fafine: “Alofa mai ki a au, e te Aliki, te Tama a Tavita. A taku tama fafine ko pukea ne te temoni.”—Mataio 15:22; Maleko 7:26.

Mai tua malie ifo, ne fakamalosi atu a soko o Iesu ki a ia: “Uga atu a ia ke fano me ka fakalavelave mai faeloa a ia ki a tatou.” Kae ne fakamatala atu ne Iesu te pogai ne seki saga atu ei a ia ki te fafine tenā: “Au ne seki uga mai ki se isi tino kae ki mamoe o te fenua o Isalaelu kolā ko ‵galo.” Kae ne seki fano keatea a te fafine tenei. Ne fanatu a ia kae totuli ifo i mua o Iesu, kae fakamolemole atu: “Te Aliki, fesoasoani mai ki a au.”—Mataio 15:23-25.

Kae kāti ke tofotofo aka te fakatuanaki o tou fafine, ne fakaaoga ei ne ia te manatu sē ‵lei o te kau Iutaia e uiga ki tino mai nisi fenua: “E sē se mea tonu ke ‵pei atu a falaoa a tama‵liki ki tamā kuli.” (Mataio 15:26) I te faipati e uiga ki “tamā kuli,” ne fakaasi atu ei ne Iesu tena loto alofa ki tino kolā e se ne tino Iutaia. Kāti ne fakaasi atu foki i ana mataalofa mo tena leo atafai a lagonaga konā.

Ne seki ita i ei te fafine, kae ne fakaaoga foki ne ia a pati fakailoga tino a tino Iutaia kae ne fai atu tou fafine mo te loto maulalo: “E tonu koe, e te Aliki, kae ko tamā kuli e ‵kai foki ki mea kolā e ma‵tutu ifo mai i taipola a olotou matai.” Ne lavea ne Iesu te ‵lei o te loto o tou fafine kae fai atu: “Te fafine, ko oko eiloa te lasi o tou fakatuanaki; ke fai eiloa penā e ‵tusa mo te mea e manako koe ki ei.” (Mataio 15:27, 28) Kae ne fai eiloa penā, faitalia me ne seki nofo atu te tamaliki fafine i konā! I te taimi ne foki atu ei te fafine ki tena fale, ne maua atu ne ia tena tamaliki fafine e takato mai i luga i te moega kae ko ‵lei tou fafine—“ko oti ne fano keatea te temoni mai i a ia”!—Maleko 7:30.

Ne tiakina ne Iesu mo ana soko a kogā koga o Foinikia kae olo atu ki te fenua i te feitu ki luga o te Vaitafe o Iolitana. Kāti ne olo atu latou ki te suā feitu o te Iolitana i se kogā koga ki matū o te Tai o Kalilaia, kae olo atu ki kogā koga o Tekapoli. I konā loa, ne olo aka latou ki luga i se mauga, kae ne maua latou ne te vaitino. Ne aumai ne latou ki a Iesu olotou tino vae ma‵sei, tino sē katoatoa olotou foitino, mo tino gūgū. Ne tuku atu ne latou a tino ma‵saki konei i mua o Iesu, kae ne faka‵lei ne ia a latou. Ona ko te ōfo malosi, ne ‵viki atu ei a tino ki te Atua o Isalaelu.

Ne saga malosi eiloa a Iesu ki te tagata ‵tuli e tokotasi telā e se mafai o faipati faka‵lei. E mafai o malamalama koe i lagonaga o te tagata tenā i va o tino e tokouke. Kāti ne matea atu ne Iesu a te manavase o te tagata tenā, telā ne ave keatea ei ne Iesu tou tagata mai te vaitino. I te taimi ne ‵nofo tokolua atu ei lāua, ne fakaasi atu ne Iesu ana mea ka fai mō ia. Ne tuku ne ia ana maikao ki loto i taliga o te tagata, ne puaki atu, kae ne fakapatele atu ki te alelo o te tagata. Oti aka, ne kilo aka a Iesu ki te lagi, kae ne fai atu ne ia se tugapati telā e fakauiga penei: “Ke ma‵tala.” I konā loa, ne toe ‵logo ei a taliga o te tagata tenā, kae ne mafai foki ne ia o faipati faka‵lei. Ne seki manako a Iesu ke fakasalalau atu te mea tenei, me ne ‵lei atu ki a ia ko tino ke tali‵tonu ona ko mea ne lavea kae lagona tonu ne latou.—Maleko 7:32-36.

Ne otia malosi a tino kolā ne maimoa atu ki te ‵mana o Iesu ke fai a faka‵leiga penā o masaki, me ne “ofo malosi eiloa a latou.” Ne fai mai latou: “Ko oti ne fai ne ia a mea katoa ke ‵lei. Ke oko ki tino taliga ‵tuli ko ‵logo mo tino gūgū ko fai‵pati faka‵lei.”—Maleko 7:37.