Mataupu e 67

Ne Seki Puke Fakapagota ne Latou a Ia

A KOI fai te ‵Kaiga o Fale Fakamalumalu, kae ne uga atu ne takitaki lotu a pulisimani ke puke fakapagota ne latou a Iesu. Ne seki taumafai a ia o muni. Ne tumau eiloa a Iesu i te akoako atu i mua o tino, ana muna: “Ne mo aso fua koi ‵toe e ‵nofo ei tatou, ko fano ei au ki a ia telā ne uga mai ne ia au. Ka salasala koutou ki a au, kae ka se maua au ne koutou.”

Ne seki malamalama te kau Iutaia, telā ne fakatau fesilisili ei latou i a latou eiloa: “Tefea te koga ka fano a ia ki ei, telā ka se mafai o iloa ne tatou a ia? Ka fano a ia ki tino Iutaia kolā e sala­lau valevale i Eleni, o fakaakoako atu a tino Eleni? Se a te uiga o tena pati telā ne fai mai, ‘E salasala koutou ki a au, kae ka se maua au ne koutou; ko te koga foki e nofo au i ei, e se mafai ne koutou o oko ki ei?” A te tonuga loa, ne faipati a Iesu e uiga ki tena mate telā ko pili mai, mo tena toetuga ki te lagi, ko te koga telā e se mafai o tau‵tali atu ki ei ana fili.

Ne oko atu ki te ‵toe aso o te ‵kaiga tenā, ko te fitu o aso. I taeao katoa o te ‵kaiga tenā, ne ‵ligi ifo sāle ei ne te faitaulaga a vai kolā ne asu mai ne ia mai te vai koukou o Siloama, ko te mea ke tafe ifo ki lalo ki te fakavae o te fatafaitaulaga. Kāti ne masaua ne tino a te sauniga telā ne fai i aso katoa, i te taimi ne kalaga atu ei a Iesu penei: “Kafai se tino e fia inu, ke vau ki a au o inu. E pelā mo muna a te Tusi, ‘Ko te tino e talitonu ki a au, ka tafe mai i tona loto a te vai o te ola.’”

A te tonuga loa, ne faipati atu a Iesu i konā e uiga ki ikuga ‵gali kolā ka oko mai māfai ko ‵ligi ifo te agaga tapu. I te suā tausaga ne ‵ligi ifo ei te agaga tapu tenā i te Penitekoso. Tela la, ne tafe atu a vai ola i te taimi ne kamata ei o tavini atu a soko e toko 120 ki tino. Kae ke oko eiloa ki te taimi tenā, ne seki ai se agaga, me koi tuai o fakaeke a soko o Keliso ki te agaga tapu kae kalagagina foki latou ki te olaga faka-te-lagi.

Ona ko akoakoga a Iesu, ne kamata o fai atu a nisi tino penei: “E tonu eiloa, tenei te Pelofeta,” kae kāti ne fakauiga latou ki te pelofeta e sili atu i a Mose telā ne folafola mai me ka vau. Muna a nisi tino: “Tenei te Keliso.” Kae ne ‵teke atu a nisi tino ki ei penei: “E se tupu mai Kalilaia te Keliso! E a, ne seki fai mai te Tusi i te Keliso e tupu mai i te gafa o Tavita, kae e fanau mai foki i Peteleema, i te fa‵kai ne nofo i ei a Tavita?”

Tela la, ne kese‵kese a manatu o tino. Nisi tino ne ma‵nako ke puke fakapagota a Iesu, kae e seai se tino ne puke ki a ia. I te taimi ne ‵foki atu ei a pulisimani kae e galo a Iesu, ne fesili atu penei a faitaulaga sili mo Falesaio: “Kaia ne seki aumai ei ne koutou a Iesu?”

“E seki ai eiloa se tagata ne faipati pelā mo te tagata tenei!” ko te tali a ofisa konā.

Ne fakalau‵kena latou i te kaitaūa, telā ne kamata ei a ­takitaki lotu o fakatauemu atu, o fakauiga ‵se ne latou a pati, kae ne fakalīlī atu foki ki a latou. E penei olotou pati fakatauemu: “E a, a koutou foki ko faka‵segina? Kai iloa eiloa ne koutou se tino pule tokotasi o tatou, io me se Falesaio ko talitonu ki a ia? A tino konei, e se iloa ne latou te Tulafono a Mose; tela la, ka malaia latou.”

I konā loa, ne loto toa a Nikotemo o ‵lago atu ki a Iesu, a ia se Falesaio kae se tino pule foki o te kau Iu­taia (ko tena uiga, se tino o te Fono Maluga). Kāti e ma­saua ne koe me i te lua mo te āfa tausaga mai mua atu i ei, ne fanatu eiloa a Nikotemo ki a Iesu i te po kae ne fakaasi atu ne ia tena fakatuanaki ki a ia. I konā loa, ne fai atu penei a Nikotemo: “E mafai o fakasala se tino i te ‵tou Tulafono, kae seki fakamasino muamua a ia, ke iloa ei ana mea ne fai?”

Ne sili atu te kaitaūa o te kau Falesaio me e isi se tino i a latou e kau ki a Iesu. “A koe foki se Kalilaia?” ko te lotou tali fakatauemu. “Sukesuke ki Tusi, ka iloa ei ne koe, me e seai eiloa se pelofeta e tupu mai i Kalilaia.”

E tiga eiloa e se fai tonu mai te Tusi Tapu me ka vau se pelofeta mai Kalilaia, e fakaasi mai i ei me ka vau te Keliso mai konā, i muna kolā ne fai mai me ka matea atu ne tino “se mainaga lasi” i te koga tenā. Kae e se pelā mo olotou manatu ‵se, ne fanau mai a Iesu i Peteleema, kae ko ia foki ko te fanau a Tavita. E tiga eiloa kāti ne iloa ne te kau Falesaio a te mea tenā, ne faka‵pa atu ne latou ki tino a manatu ‵se o latou e uiga ki a Iesu. Ioane 7:32-52; Isaia 9:1, 2; Mataio 4:13-17.

▪ Ne a mea ne ‵tupu i taeao katoa o te ‵kaiga, kae kāti ne fakauiga pefea a Iesu ki te mea tenā?

▪ Kaia ne seki puke fakapagota ei ne pulisimani a Iesu, kae ne a mea ne fai ne takitaki lotu i ei?

▪ Ko oi a Nikotemo, se a tena kilokiloga ki a Iesu, kae ne a mea ne fai ne te kau Falesaio ki a ia?

▪ Ne a fakamaoniga e fakaasi mai i ei me e ‵tau o oko mai te Keliso mai Kalilaia?