Mataupu E 17

Te Akoako Atu ki a Nikotemo

A KOI kau atu a ia ki te Paseka i te 30 T.A., ne fai ne Iesu a fakailoga fakaofoofogia io me ne vavega. Ona ko te mea tenā, ne fakatuanaki a tino e tokouke ki a ia. Ne ofo a Nikotemo, se tino o te Sanetulini, te fono maluga a te kau Iutaia, kae ne fia iloa ne ia a nisi mea. Ne āsi atu a ia ki a Iesu i te pouliga i te po, me kāti ne mataku a ia me ka taku fakamasei a ia ne nisi takitaki Iutaia māfai e matea ne latou a ia.

Ana muna: “Te Faiakoga, e iloa ne matou i a koe ko te faiakoga ne vau mai te Atua, i te mea e seai se tino e mafai o fai ne ia a fakailoga konei ne fai ne koe, seiloga ko i a ia te Atua.” I tena tali, ne fai atu a Iesu ki a Nikotemo me e ‵tau o “toe fanau mai” se tino ko te mea ke ulu atu ei a ia ki te Malo o te Atua.

Kae e mafai pefea o toe fanau mai se tino? Ne fesili atu penei a Nikotemo: “E mafai pefea ne se tino o toe fanau mai māfai ko matua? E mafai o toe ulu a ia ki te tinae o tena mātua ke toe fanau mai?”

Ikai, e se tenā te uiga o te toe fanau mai. Ne fakamatala atu penei a Iesu: “Kafai e se fanau mai se tino i te vai mo te agaga e se mafai eiloa o ulu atu a ia ki te Malo o te Atua.” I te papatisoga o Iesu mo te fanaifoga o te agaga tapu ki luga i a ia, ne fai pelā me ne toe fanau mai a ia “mai te vai mo te agaga.” I te faka‵pulaga telā ne ‵soko atu ki ei mai te lagi, ‘Tenei taku Tama telā e talia ne au’ ne faka‵pula atu ei ne te Atua me ne aumai ne ia se tama faka-te-agaga telā e maua ne ia te fakamoemoega ke ulu atu ki te Malo faka-te-lagi. Fakamuli ifo, i te Penitekoso i te 33 T.A., ne maua foki ne nisi tino kolā ne papatiso a te agaga tapu kae ne toe fa‵nau mai ei latou e pelā me ne tama faka-te-agaga a te Atua.

Kae e tāua ‵ki te tulaga o te Tama faka-te-tagata fakapito a te Atua. Muna a Iesu ki a Nikotemo: “E pelā mo te sikiakaga ne Mose o te gata i te vao, e ‵tau foki eiloa o siki ake penā te Tama a te tagata; ko te mea ke maua ne so se tino e fakatuanaki ki a ia a te ola se gata mai.” E tonu, e pelā mo te kau Isalaelu kolā ne ū ne gata poisini ne ‵tau o ‵kilo atu ki te gata palāsi ke fakaola ei latou, e penā foki loa te manakomia ke fakatuanaki a tino katoa ki te Tama a te Atua ko te mea ke fakaolagina latou mai te lotou tulaga telā ka ‵mate latou i ei.

Ne faka‵mafa mai ne Iesu te faiga alofa a Ieova i te feitu tenā, kae ne toe fai atu a ia penei ki a Nikotemo: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” Tela la, i konā loa i Ielusalema i te ono masina mai tua ifo i te kamataga o tena galuega, ne fakaasi manino atu ne Iesu, me i a ia ko te auala o Ieova te Atua ke fakaola ei a tino.

Ne toe fakamatala atu penei a Iesu ki a Nikotemo: “Kae ne seki uga mai ne te Atua tena Tama ke fakamasino te lalolagi kae ke fakaola te lalolagi.” Ko tena uiga e se ‵tau o fakamalaia ne ia a tino io me ke taku fakamasei ne ia a latou i te faiga ke fakasala a tino katoa ki te fakaseaiga. Kae e pelā mo muna a Iesu, ne uga mai a ia ke “fakaola te lalolagi.”

Ona ko te mataku ne fanatu ei a Nikotemo ki a Iesu i te taimi o te pouliga. Tela la, se manatu tāua me ne fakaoti ne Iesu tena sautalaga fakatasi mo ia ki pati konei: “Kae tenei te fakamasinoga i te mainaga [telā ne fakakātoa mai ne Iesu i tena olaga mo ana akoakoga] ko oti ne oko ki te lalolagi; kae ko tino e sili atu te ma‵nako ki te pouliga i lō te mainaga; i te mea e fai ne latou a galuega ma‵sei. So se tino e fai ne ia a mea masei, e takalialia ki te mainaga, e se fia vau ki te mainaga, i te mea ma iloa ei ana galuega ma‵sei; kae ko te tino e fai mea ‵tonu, e vau eiloa ki te mainaga ko te mea ke fakaasi mai ei ana galuega ne maua mai te Atua.” Ioane 2:23–3:21; Mataio 3:16, 17; Galuega 2:1-4; Numela 21:9.

▪ Se a te pogai o te asiga a Nikotemo, kae kaia ne fanatu ei a ia i te po?

▪ Se a te uiga ke “toe fanau mai”?

▪ Ne fai pefea ne Iesu se tala fakatusa e uiga ki tena tulaga i te ‵tou fakaolataga?

▪ Se a te uiga me ne seki vau a Iesu o fakamasino te lalolagi?