Mataupu e 75

Te Pogai o Fiafiaga

I TENA galuega i Kalilaia ne fai ei ne Iesu a vavega, kae ne toe fai foki ne ia a vaegā mea penā i Iutaia. E pelā mo te tuli keateaga ne ia o te temoni telā ne fai ei se tagata ke gūgū. Ne ofo malosi i ei a te vaitino, kae ne avaka ne tino mata onoono a te manatu ‵teke telā ne avaka foki i Kalilaia. “Ko te ‵mana o Pele­sepulo te aliki o temoni, e afuli ei ne ia a temoni mai i tino,” ko te lotou fakamatalaga. Ne ma‵nako foki a nisi tino ki nisi fakamaoniga me ko oi a Iesu, kae ne fakaosooso atu latou ki a ia mai te fakamole‵mole atu ke aumai se fakailoga mai te lagi.

Me ne iloa ne Iesu olotou manatu, ne avatu ei ne ia te tali ki tino mata onoono i Iutaia telā ko oti ne tuku atu foki ne ia ki tino kolā ne ‵teke atu ki a ia i Kalilaia. Ana pati me i so se malo telā e nofo mavaevae i a ia eiloa ka takavale. Ne fai atu a ia penei: “Kafai foki a Satani e fai taua i a ia eiloa, ka mafai la pefea o tumau tena malo?” Ne fakaasi atu ne ia te tulaga fakamataku o tino mata onoono ki a ia i ana pati konei: “Kae kafai ko te ‵mana o te Atua e afuli ei ne au temoni; ko tena uiga ko oko mai ki a koutou te Malo o te Atua.”

Ne ‵tau o amio a latou kolā ne ‵kilo atu ki vavega a Iesu e pelā mo amioga a tino kolā ne ‵kilo atu ki a Mose i te taimi ne fai ei ne ia se vavega i te fia selau o tausaga mai mua atu i ei. Olotou muna: “Ko te lima eiloa tenā o te Atua!” Ko te “lima eiloa o te Atua” telā ne tusi ei a Tulafono e Sefulu i papa ma. Kae ko “te lima o te Atua”​—ko tena agaga tapu, io me ko tena malosi galue—​telā ne fai ei ke mafai ne Iesu o tuli keatea a temoni kae ke faka‵lei aka foki a masaki. Tela la, ne oko tonu atu te Malo o te Atua ki tino ‵teke konā, me i te tino telā ne filifili aka ke fai fakamuli mo fai te Tupu o te Malo, ko Iesu, ne nofo tonu atu i a latou.

Telā ne fai ei ne Iesu se tala fakatusa ke fakaasi atu i ei me i tena ‵mana telā e tuli ei a temoni ko te fakamaoniga me e sili atu tena malosi i a Satani, e pelā me se tagata e sili atu i te mafi e vau o fakatakavale ne ia te tagata mafi telā e leoleo ne ia tena palesi. Ne toe taku atu foki ne ia tena tala fakatusa telā ne taku atu ne ia i Kalilaia e uiga ki te agaga sē ‵ma. Kafai e tiakina ne te agaga se tagata, kae e se fakaaogā ne te tagata te avanoaga tenā, ko ‵foki mai ei te agaga tenā fakatasi mo nisi agaga e tokofitu, kae ko sili atu te masei o te tulaga o te tagata tenā i lō tena tulaga muamua.

A koi fakalogologo se fafine i te vaitino tenā ki akoakoga konā, kae ne fakaosofia a ia ke kalaga atu penei: “E manuia te tinae telā ne fanau mai ei koe, mo ū kolā ne ū ei koe!” Me ne ma‵nako a fāfine Iutaia katoa ke fai mo fai te mātua o se pelofeta, kae maise eiloa ko te Mesia, e se tioa eiloa o fai ne te fafine tenā a pati konā. Kāti ne manatu aka a ia me e ‵tau o fiafia ‵ki a Malia me i a ia ko te mātua o Iesu.

Kae se mea vave o toe fakatonu aka te manatu tenā o te fafine e uiga ki te pogai tonu o fiafiaga. “Ikai,” ko tena tali, “e sili atu te manuia o tino kolā e faka‵logo ki te muna a te Atua, kae tausi ki ei!” Kae ne seki fakauiga foki ne Iesu me e ‵tau o fakaaloalo atu ki tena mātua i se auala fakapito. Kae ne fakaasi atu ne ia me e maua te fiafiaga tonu mai te faiga e pelā me se tavini fakamaoni a te Atua, kae e se maua i so se fesokotakiga faka-te-foitino io me ko galuega aogā e fai.

E pelā eiloa mo tena faiga i Kalilaia, ne toe ‵liko atu a Iesu ki tino Iutaia me ne ma‵nako latou ki se fakailoga mai te lagi. Ana muna ki a latou me ka se tuku atu ki a latou se isi fakailoga kae na ko te fakailoga o Iona. Ne fai a Iona mo fai se fakailoga i tena nofoga i aso e tolu i te tinae o te ika, penā foki loa mo tena talaiga mo te loto toa, telā ne iku atu ei ki te faiga o te kau Nineva ke sala‵mō. Muna a Iesu: “Kae kiloke, ko nofo i konei a te tino telā e sili atu i a Iona.” Kae ne ofo foki te tupu fafine mai Seepa i te poto o Solomona. Kae ne fai atu foki a Iesu, penei: “Kae kiloke! Ko nofo mai i konei te tino telā e sili atu i a Solomona.”

Ne fakamatala atu ne Iesu me kafai e fa‵ka ne se tino se molī, e se ‵funa aka ne ia te mea tenā i se koga pouli io me mai lalo i se kumete, kae e tuku atu eiloa ne ia ki luga i se tugāmoli ko te mea ke matea atu ne tino te mainaga. Kāti ne fakauiga ne ia ana pati pelā me i tena akoako atu mo tena faiga o vavega i mua o vaegā tino loto ‵fika penā i te kau fakalogo‵logo e fai pelā me e ‵funa aka te mainaga o se molī. E se ‵kilo faka‵lei atu, io me e se ‵lei a mata o tino maimoa konā, telā ne seki magoi i ei te pogai ne fai ei ne ia ana vavega.

Ne fatoā ‵tuli keatea ne Iesu se temoni kae ne fai foki ne ia ke faipati se tagata gūgū. E ‵tau o fakamalosi aka i ei a tino kolā e ‵lei olotou mata, io me e manino te lotou ‵kiloatuga, ke tavae atu te faiga fakaofoofogia tenā kae ke folafola atu te tala ‵lei tenā! Kae ne seki fai penā a tino ‵teke konā. Telā ne fakaoti penei ne Iesu ana pati: “Tela la, fakaeteete o tausi tou mainaga, i te mea ma ­pouli. Kae kafai e maina katoa tou foitino, e seai lele se koga e ­pouli i ei, ka katoatoa eiloa tena mainaga, e pelā eiloa mo te molī i tena maina atu ki a koe.” Luka 11:14-36; Esoto 8:18, 19; 31:18; Mataio 12:22, 28.

▪ Ne a mea ne fai ne tino i te faka‵leiga ne Iesu o te tagata?

▪ Se a te “lima o te Atua,” kae ne oko tonu atu pefea te Malo o te Atua ki tino kolā ne fakalogo‵logo ki a Iesu?

▪ Se a te pogai o fiafiaga ‵tonu?

▪ E mafai pefea ne se tino o fai ke ‵lei ana mata?