Manatu e 87

Ke Fakatoka ki Aso Mai Mua i te Fakaaogāga o te Poto

NE FATOĀ oti ne fai atu ne Iesu te tala o te tama fakamāumāu mea ki te vaitino telā ne aofia i ei ana soko, tino ao lafoga kolā ne seki fakamaoni, nisi tino lauiloa i olotou agasala, penā foki loa mo faiakoga o te Tulafono mo Falesaio. I konā loa, ne saga atu a ia ki ana soko kae ne taku atu ne ia te tala fakatusa e uiga ki te tagata maukoloa telā ne maua ne ia se lipoti sē ‵lei e uiga ki te menetia io me ko te pule o tena fale.

E pelā mo muna a Iesu, ne kalaga atu te tagata maukoloa ki tena tavini ke na vau kae ne fakailoa atu ki a ia i a ia ka fakatea. Ne mafaufau ifo penei te tavini tenā: “Ko pili au o ­fakapalele ne toku pule mai taku galuega. Se a te mea ka fai ne au? Au nei e se na lo ko malosi o toki lakau, e ma foki au ma akai atu. Ko iloa nei ne au taku mea ka fai, ko te mea ke talia au ne tino i olotou fale, manafai ko fakatea au mai taku galuega.”

Se a te aofaga a te tavini tenā? Ia, ne kalaga atu a ia ki a latou kolā e ‵nofo kai­talafu ki tena pule, ke na o‵mai. Ne fesili atu a ia penei: “E fia tau kai­talafu i toku pule?”

“E 2,200 kalone sinu olive,” ko te tali a te tino muamua.

“Puke ki tau tusi kaitalafu, kae nofo fakavave ki lalo o tusi e 1,100,” ko ana muna ki te tino tenā.

Ne fesili atu penei a ia ki te suā tino: “Kae ko koe, e fia tau kaitalafu?”

“E 22,000 lita o saito,” ko ana muna.

“Puke ki tau tusi kaitalafu o tusi e 18,000.”

E saoloto te tavini tenā ke ‵kati ne ia a kaitalafu konā e ‵tau o fai ki tena pule, me koi tausi ne ia a mea tautupe a tena pule. Tela la, mai i tena faiga ke fakamu‵tana a aofaki konā, ne maua ei ne ia ana taugasoa kolā ka a‵lofa ki a ia māfai ko galo i a ia tena galuega.

I te taimi ne logo ei te pule i te mea telā ne tupu, ne ofo a ia i ei. A te tonuga loa, “ne tavae atu te pule ki te tavini amio­sētonu ona ko te fakaaogāga o tena poto.” Kae ne toe fai mai foki a Iesu penei: “Me i tino o te lalolagi nei e sili atu te lotou ‵poto i olotou kautama i lō tino o te mainaga.”

I konā loa ne fakaasi atu ei ne Iesu te aogā o te tala ki ana soko kae ne fakamalosi atu foki penei: “Ke fai ne taugasoa mō koutou i koloa faka-te-lalolagi, ke talia ei koutou i fale e se gata mai, mana­fai ko se toe aogā a koloa konā.”

Ne seki tavae atu a Iesu ki te tavini tenā ona ko tena amio­sētonu, kae ona ko tena kilokilo ‵mao i te fakaaogāga o tena poto. E fakaaogā sāle ne “tino o te lalolagi nei” olotou tupe io me ko olotou tofi ke fai taugasoa ki a latou kolā ka toe taui atu ki a latou. Tela la, e ‵tau foki mo tavini a te Atua, ko “tino o te mainaga,” o fakaaogā olotou mea faka-te-foitino, ko olotou “koloa faka-te-lalolagi” i se auala telā ka maua mai i ei ne latou a mea aogā.

Kae e pelā mo muna a Iesu, e ‵tau o fakaaogā ne latou a koloa konā ke fai taugasoa ki tino kolā ka talia ei latou “i fale e se gata mai.” E maua a koga konā i te lagi mō tino o te lafu mamoe foliki; kae e maua ne nisi mamoe a koga konā i te lalolagi Palataiso. Me e mafai fua ne Ieova te Atua mo tena Tama o talia a tino ki loto i vaegā koga penā, e ‵tau o fakamaoni tatou i te fakaaogāga o so se “koloa faka-te-lalolagi” telā e maua ne tatou ke ‵lago atu ki mea o te Malo kae ke fai taugasoa foki penā ki a laua. Tela la, kafai ko se toe aogā a koloa faka-te-lalolagi, e pelā mo mea kolā ka ‵tupu fakamuli, ka mautinoa eiloa ki te se-gata-mai ‵tou aso mai mua nei.

Ne toe fai mai a Iesu me kafai e fakamaoni a tino i te tausiga o mea fo‵liki konā, ko koloa faka-te-lalolagi, ka fakamaoni foki latou i te tausiga o mea kolā e sili atu i te tāua. Ana muna: “Kafai foki e se fakamaoni koutou i koloa faka-te-lalolagi, ko oi la te tino ka tuku atu ne ia ki a koutou te tinā koloa tonu ke tausi [ko tena uiga, ko mea faka-te-agaga, io me ko mea o te Malo]? Kafai foki e seki fakamaoni koutou ki mea a te suā tino [ko mea o te Malo kolā ne tuku atu ne te Atua ki ana tavini], ko oi la te tino ka tuku atu ne ia a mea totino a koutou [ko te taui o te ola i koga e se-gata-mai]?”

E se mafai ne tatou o fai mo tavini ‵tonu a te Atua kae e fai foki mo pologa ki koloa faka-te-lalolagi, ko mea faka-te-foitino, e pelā mo pati fakaoti konei a Iesu: “E seai se tavini e mafai o tavini atu ki pule e tokolua; i te mea ka takalialia ki te suā tino kae alofa ki te suā tino; io me galue fakamaoni ki te suā tino kae fakasēaogā ne ia te suā tino. E se mafai ne koutou o tavini fakatasi ki te Atua pelā foki mo koloa faka-te-lalolagi.” Luka 15:1, 2; 16:1-13; Ioane 10:16.

▪ Ne fai taugasoa pefea te tavini i te tala fakatusa a Iesu ki a latou kolā ne fesoasoani fakamuli atu ki a ia?

▪ Se a te uiga o “koloa faka-te-lalolagi,” kae e mafai pefea ne tatou o fakaaogā a mea konā ke fai ei a taugasoa?

▪ Ko oi e mafai ne laua o talia tatou ki “koga e se gata mai,” kae ne a foki la a koga konā?