Mataupu e 102

Ne Ulu Atu a Keliso mo te Manumalo ki Ielusalema

I TE suā taeao, ko te Aso Sa, o Nisani po 9, ne tiakina ei ne Iesu a Petania fakatasi mo ana soko kae ne ui atu latou i te Mauga o Olive ki Ielusalema. Ne seki leva kae ne oko atu latou ki Petefake, telā e tu i te Mauga o Olive. Ne fakatonu atu penei a Iesu ki ana soko e tokolua:

“Olo ki te fa‵kai tenā mai mua. E lavea ne koulua i ei se asini e tukau, mo tena tama foki e tu i ana tafa. ‵Tala o aumai ki a au. Kafai la e isi se tino e fesili atu ki a koulua, fai ki ei, ‘E manako ki ei te Aliki,’ ko te mea eiloa ko tuku atu ne ia.”

E tiga eiloa ne seki maina muamua te kau soko me ne fetaui te fakatonuga tenā mo te fakataunuga o valoaga i te Tusi Tapu, fakamuli loa ne maina latou i ei. Ne ‵valo mai ne te pelofeta ko Sakalia me ka sopo te Tupu telā ne folafola mai ne te Atua i luga i te asini, e tonu, “i te tamā asini, ko te tama a te asini.” Ne sopo foki penā te tupu ko Solomona i te tama a te asini i te taimi ne fakaeke ei a ia.

I te taimi ne oko atu ei te avā soko konā ki Petefake kae ne puke ki te tamā asini mo tena mātua, a nisi tino kolā ne ‵tu pili mai ne fai atu penei: “Ne a lua mea e fai?” Kae i te faiatuga me e ave ne laua a manu konā ki te Aliki, ne talia ne tāgata konā ke ave ne soko a manu konā ki a Iesu. Ne ‵fola ne te kau soko olotou gatu i luga i te asini matua mo tena tama, kae ne sopo aka fua a Iesu ki luga i te tamā asini.

I te teleatuga a Iesu ki Ielusalema, ne gasolo o tokouke a tino kolā ne maopoopo mai. A te tokoukega o tino konā ne ‵fola ne latou olotou gatu ki luga i te auala, kae ko nisi tino ne ‵kati ne ­latou a kaula mō fola te auala. Ne ka‵laga atu latou penei: “Ke manuia te Tino telā e vau pelā me ko te Tupu i te igoa o Ieova! Ke maua te filemu i te lagi, mo te ‵malu i toe koga ma‵luga!”

Ne kaitaūa a nisi Falesaio ki te vaitino ona ko pati konā kae ne fāmeo foki latou penei ki a Iesu: “Te Faiakoga, ‵liko atu ki ou soko.” Kae ne tali atu penei a Iesu: “Au e fai atu ki a koutou, kafai e se ka‵laga latou, ko fatu ka ka‵laga.”

I te piliatuga a Iesu ki Ielusalema, ne kilo atu a ia ki te fakai kae ne kamata ei a ia o tagi, ana muna: “Moi iloa ne koe i te aso nei a mea e manakogina ne koe mō tou manuia i aso mai mua kae nei ko se mafai o matea ne koe.” Ona ko te lotou sē faka‵logo mo te mata‵fatu, ne ‵tau o fakasala a Ielusalema, e pelā mo te valoaga tenei a Iesu:

“Ka ati aka ne ou fili [ko te kau Loma mai lalo i te Takitaki Kautau ko Tito] te olo e nikoi ei koe. E alai foki eiloa koe ne latou, ko tolo mai ei koe ki loto i feitu katoa. Ka tukipalapala ne latou koe, pelā foki mo tino kolā i loto i ou ‵pui: e seai se fua­fatu e tasi ka ‵toe i luga i te suā fuāfatu.” A te fakamaofaga tenā o Ielusalema telā ne ‵valo mai ne Iesu, ne taunu tonu mai eiloa i te 37 tausaga mai tua ifo i ei, i te 70 T.A.

I ne nāi vaiaso mai mua atu i ei, ne matea atu ne tino e tokouke i te vaitino tenā a te toe fakatumaiga ne Iesu o Lasalo. I konā loa ne faka‵pā atu faeloa ne tino konā a te tala o te ­vavega tenā ki nisi tino. Tela la, i te okoatuga a Iesu ki Ielusalema, ne ua‵te valevale i ei te fa‵kai kātoa. “Ko oi te tino tenei?” ne fia iloa ne latou. Kae ne fai atu faeloa penei te vaitino tenā: “Ko Iesu tenei, ko te pelofeta mai Nasaleta i Kalilaia!” I te ‵kiloatuga ki te mea telā ne tupu, ne fanoa‵noa te kau Falesaio me e se ma‵goi olotou taumafaiga, olotou muna: “Ki­loke, a te lalolagi kātoa ko tau‵tali atu ki a ia.”

E pelā mo tena masani māfai e āsi atu a ia ki Ielusalema, ne fanatu eiloa a Iesu ki te faletapu ke akoako atu i konā. Ne olo atu a tino ‵kivi mo tino ‵pili ki a ia, kae ne faka‵lei ne ia olotou masaki! Ne kaitaūa malosi a faitaulaga pule mo faiakoga o te Tulafono i te mateaga ne latou o mea fakaofoofogia kolā ne fai ne Iesu mo te lagonaga foki ne latou me ne ka‵laga atu penei a tama‵liki tāgata i te faletapu: “Ke vikia te Tama a Tavita!” Telā mui‵mui ei latou penei: “E lagona ne koe olotou pati ne fai?”

“Ao,” ko te tali a Iesu. “Kae seki fai‵tau eiloa koutou ki pati konei, ‘Ko oti ne akoako ne koe a tama‵liki mo pepe ke tuku atu ne latou a vikiga tonu ki a koe’?”

Ne tumau eiloa a Iesu i te akoako atu, kae ne kilokilo atu a ia ki mea katoa i te faletapu. Ne seki leva kae ko po. Telā ne tiakina ei ne ia te koga tenā fakatasi mo te toko 12, kae ne faima‵laga atu latou i te lua maila tupu ki Petania. Ne nofo atu a ia i konā i te po o te Aso Sa, kae kāti ne ‵nofo fakatasi a ia mo tena taugasoa ko Lasalo. Mataio 21:1-11, 14-17; Maleko 11:1-11; Luka 19:29-44; Ioane 12:12-19; Sakalia 9:9.

▪ I te taimi fea kae e pefea foki la ne oko atu ei a Iesu pelā me se Tupu ki Ielusalema?

▪ Ne pefea te tāua ke ‵viki atu a te vaitino ki a Iesu?

▪ Ne pefea te lagonaga o Iesu i tena kiloatuga ki Ielusalema, kae se a te valoaga telā ne taku atu ne ia?

▪ Ne a mea ne ‵tupu i te fanatuga a Iesu ki te faletapu?