Mataupu e Lua

Faka‵malu ki a Ieova e Pelā me ko te Atua Tonu

1. Ko oi la te Atua tonu e tokotasi?

E FAI mai te Tusi Tapu me e tiga eiloa e foliga mai me e tokouke a atua, kae e “tokotasi eiloa a te Atua mō tatou.” (1 Kolinito 8:5, 6) A te Atua “tokotasi” tenā ko Ieova, telā ne faite ne Ia a mea katoa. (Teutelonome 6:4; Fakaasiga 4:11) Ne fai atu a Iesu e uiga ki a Ieova, penei: “Ko toku Atua, ko te otou Atua foki.” (Ioane 20:17) E fetaui ‵lei ana pati mo pati kolā ko leva ne fai atu ne Mose, penei: “Ko ia [ko Ieova] fua ko te Atua kae seai aka foki.” (Teutelonome 4:35) E sili fakafia atu a Ieova i lō so se mea e tapuaki atu a tino ki ei, faitalia me ne tupua, ne tino takutakua io me ko tena fili ko Satani te Tiapolo, ko “te atua masei o te lalolagi nei.” (2 Kolinito 4:3, 4) E ‵kese eiloa Ieova me e pelā mo muna a Iesu ko ia ko “te Atua tonu e tokotasi.”​—Ioane 17:3.

2. Kafai ko iloa ne tatou te Atua, ne a mea e ‵tau o fai ne tatou i ‵tou olaga?

² Kafai ko iloa ne tino loto fakafetai a uiga ‵gali o te Atua, e pelā foki mo mea kolā ko oti ne fai ne ia mo mea kolā ka fai ne ia mō tatou, ka fia fakapili‵pili atu ei latou ki a ia. Kafai ko gasolo aka ki luga te lotou a‵lofa ki a Ieova, ko fakamalosigina i ei latou ke faka‵malu atu ki a ia. E pefea la? E tasi te auala ko te fakamatala atu ki nisi tino a tala e uiga ki a ia. E fai mai te Loma 10:10, penei: “Kafai e molimau foki ona laugutu, e fakaolagina a ia.” A te suā auala ko te fakaakoako atu ki a ia i ‵tou pati mo ‵tou amioga. E fai mai penei te Efeso 5:1: “Ona ko koutou ko fanau atafai a te Atua, e ‵tau ke pelā koutou mo ia.” Kae ke fai faeloa penā tatou, e ‵tau o fakamasani faka‵lei aka tatou ki ana uiga ‵tonu.

3. Ne a uiga masani o te Atua?

³ E uke ‵ki a fakamatalaga i te Tusi Tapu e fakaasi mai i ei a uiga fakaofoofogia o te Atua. Ana uiga masani e fa ko te poto, te fakamaoni, te malosi, mo te alofa. “Ko te Atua e poto.” (Iopu 12:13) “A te otou Atua e fakamaoni.” (Teutelonome 32:4) “A tena mana e se fakatau eiloa i te malosi.” (Isaia 40:26) “Te Atua ko te alofa eiloa a ia.” (1 Ioane 4:8) Kae mai uiga masani e fa konā, se a te ‵toe uiga lauiloa, telā e fakaasi mai i ei me i a ia se vaegā Atua pefea?

“Te Atua ko te Alofa Eiloa a Ia”

4. Se a te uiga o te Atua telā ne fakamalosigina ei a ia ke faite te lagi, te lalolagi, mo tino ola katoa i ei?

⁴ Ke mafaufau aka la ki te mea telā ne fakamalosigina ei a Ieova ke faite ne ia te lagi mo te lalolagi, penā foki mo agelu mo tino. E mata, ko tena poto io me ko tena malosi? Ikai, e tiga eiloa ne fakaaogā ne ia ana uiga konā, ne seki māfua mai fua te faitega o mea katoa i ei. Kae e se fai pelā me ne ‵tau o tuku atu ne ia te meaalofa o te ola ki nisi tino ko te mea ke fakaasi atu ei tena fakamaoni. Kae ne faite eiloa ne te Atua a tino ke fia‵fia ki te ola ona ko tena alofa sili. Tenā foki eiloa te pogai ne fakatoka ei ne ia ke ola a tino faka‵logo ki te se-gata-mai i te Palataiso. (Kenese 1:28; 2:15) Kae ko tena alofa foki telā ne fai ei ne ia se auala ke ave keatea a ikuga ma‵sei kolā ne oko atu ki tino katoa ona ko te agasala a Atamu.

5. E ‵tusa loa mo te fakamatalaga i te Tusi Tapu, se a te uiga telā e fakaasi mai ne Ieova i ana faifaiga katoa, kae kaia e ‵kese ei te uiga tenā?

⁵ Tela la, mai uiga katoa o te Atua, a te ‵toe uiga sili ko tena alofa. Tenā eiloa te uiga e iloga ei a ia. Faitalia me e tāua ‵ki tena poto, tena fakamaoni, mo tena malosi, e se fai mai te Tusi Tapu me i a ia ko te poto eiloa, io me ko te fakamaoni io me ko te malosi. Kae e fai mai i ei me i a ia ko te alofa eiloa. Se mea tonu me e fakaasi atu ne Ieova tena alofa i ana faifaiga katoa. E fakavae tena alofa ki te fai mea tonu kae e se ko te pati ‵pole. Ko tena uiga, e takitaki te alofa o te Atua ne akoakoga fakavae o te munatonu mo te amiotonu. A te ‵toe vaegā alofa sili, ko te alofa telā e fakaasi mai eiloa ne Ieova te Atua. A te vaegā alofa tenā e fakaasi katoatoa mai i ei tena sē kaiū kae e fetaui faeloa mo fakamaoniga ‵tonu o tena alofa.

6. Kaia e mafai ei ne tatou o fakaakoako ki te Atua, faitalia me e sili fakafia atu a ia i a tatou?

⁶ Ona ko te alofa fakaofoofogia tenā e mafai ei ne tatou o fakaakoako ki te Atua. Kāti e ma‵natu aka tatou me e se mafai eiloa ne tatou o fakaakoako faka‵lei atu ki a ia me i a tatou ne tino fātauvā, kolā e se ‵lei kae fai mea ‵se. Kae tenei te suā fakamaoniga o te alofa sili o Ieova: E iloa ‵lei ne ia me e isi ne tapulā ki mea kolā e mafai ne tatou o fai kae e iloa foki ne ia me e se katoatoa te ‵lei o tatou. E iloa ne ia me e se tāitāi o oko atu tatou ki se tulaga ‵lei katoatoa. (Salamo 51:5) Tenā te pogai e fai mai ei te Salamo 130:3, 4 penei: “Kafai ne tusitusi ne koe omotou agasala, ko oi la te tino ka mafai o sao mai te fakasalaga? Ka ko matou e fakamagalo faeloa ne koe.” E tonu me i a Ieova “ko te Atua telā e ‵fonu i te alofa mo te kaimalie, e tuai o ita kae lasi tena alofa mo tena fakamaoni.” (Esoto 34:6) A Ieova “e ‵lei kae loto fakamagalo ki a matou.” (Salamo 86:5) E pefea te fakamafanafana loto o te manatu tenā! E pefea te fakafiafia loto ke tavini atu tatou ki te Atua fakaofoofogia telā e tausi ne ia tatou i tena alofa mo tena kaimalie!

7. E lavea pefea ne tatou a te alofa o te Atua i ana mea kolā ne faite?

⁷ E mafai foki o lavea atu te alofa o Ieova i ana mea kolā ne faite. Ke mafaufau aka ki te uke o mea ‵lei ne tuku mai ne Ieova ke fia‵fia tatou ki ei, e pelā mo te ‵gali o mauga, togāvao, namo, mo te tai. Ko oti ne tuku mai ne ia te fia o vaegā meakai kese‵kese ke fia‵fia tatou ki ei kae ke maua foki ne tatou te malosi mai i ei. E se gata i ei, ne tuku mai ne Ieova a vaegā pulalakau kese‵kese kolā e pusaki gali mai, penā foki mo manu kese‵kese katoa. Ne faite ne Ieova a mea kolā e iloa ne ia me ka fia‵fia ki ei a tino, faitalia me e se fakalagolago ‵tou ola ki ei. Kae e tonu, ko se mafai o katoatoa ‵tou fia‵fia ki mea katoa kolā ne faite ne Ieova ona ko te mea e ‵nofo atu nei tatou i se lalolagi masei kae e se ‵lei katoatoa foki tatou. (Loma 8:22) Kae ke na fakaataata i ‵tou mafaufau a mea kolā ka fai ne Ieova mō tatou i te Palataiso! Ne fakatalitonu mai ne te faisalamo penei: “E tuku ne koe ki ei a mea e lava mō latou, kae fakamalie ne koe olotou manako [io me ko manakoga ‵lei].”​—Salamo 145:16.

8. Se a te ‵toe fakaasiga sili o te alofa o te Atua mō tatou?

⁸ Se a te ‵toe fakaasiga sili o te alofa o Ieova mō tino katoa? Ne fakamatala mai ne te Tusi Tapu penei: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se-gata-mai.” (Ioane 3:16) E mata, ne fai ne Ieova te mea tenā ona ko te ‵lei o tino? E tali mai penei te Loma 5:8: “Ka ko te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mō tatou!” E seai se fakalotolotolua i ei, me ne uga mai ne te Atua tena Tama ‵lei katoatoa ke mate e pelā me se togiola ke faka‵sao ei tatou mai te fakasalaga o te agasala mo te mate. (Mataio 20:28) Ne ‵tala mai i ei te avanoaga mō tino kolā e a‵lofa ki te Atua ke maua ne latou te ola se-gata-mai. E ‵tau o maua ne tatou te loto fakafetai me e oko mai te alofa o te Atua ki tino katoa kolā e fia fai ne latou tena loto. E fai mai te Tusi Tapu penei: “Se mea tonu i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”​—Galuega 10:34, 35.

9. Ona ko te mea ne tuku mai ne Ieova tena Tama ke fai mo fai se togiola, e ‵tau o ‵fuli pefea ‵tou olaga i ei?

⁹ E ‵tau o ‵fuli pefea a mea kolā e fai ne tatou i ‵tou olaga ona ko te tukumaiga ne Ieova tena Tama e pelā me se togiola ke ‵tala mai i ei te avanoaga ke maua te ola se-gata-mai? E ‵tau o gasolo o lasi atu te ‵tou alofa ki te Atua tonu ko Ieova. Kae e ‵tau foki o ma‵nako malosi tatou ke faka‵logo ki a Iesu, me i a ia ko te sui o te Atua. “Ne mate [a Iesu] mō tino katoa, ko te mea ko tino kolā e ola ke se ola mō latou, kae ke ola mō ia telā ne mate kae ne toetu ake.” (2 Kolinito 5:15) E pefea te gali ke tau‵tali atu tatou ki kalafaga o Iesu, me ne fakaakoako atu faeloa a ia ki te alofa mo te atafai o Ieova! Ko lavea atu te mea tenei i ana pati ki tino loto maulalo, penei: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malōlōga. Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga. Me amogofie taku amoga, kae māmā foki.”​—Mataio 11:28-30.

Fakaasi Atu te Alofa ki Nisi Tino

10. Ne a auala e mafai ei ne tatou o fakaasi atu te alofa ki ‵tou taina Kelisiano?

¹⁰ E mafai pefea ne tatou o fakaasi atu me e ‵pau eiloa ‵tou a‵lofa mo te vaegā alofa telā e fakaasi mai ne Ieova mo Iesu ki a tatou? Onoono malie aka ki auala e uke e mafai ei ne tatou o fai penā: “A te alofa, e kufaki kae kaimalie; e se kaisano io me fakamatamata; e se amio masei io me se āva. A te alofa e se ‵sala ana mea i a ia eiloa; e se kaitaua vave io me e fakamasausau ne ia a mea ‵se a se tino; e se fiafia ki mea ma‵sei kae fiafia ki te mea ‵lei. A te alofa e fakamalosi ne ia mea katoa, e talitonu ki mea katoa, e fakamoemoe ki mea katoa, e kufaki ki mea katoa. E se mafai o gata a te alofa.”​—1 Kolinito 13:4-8; 1 Ioane 3:14-​18; 4:7-​12.

11. Ko oi foki e ‵tau o a‵lofa tatou ki ei, kae e mafai pefea ne tatou o fai penā?

¹¹ Ko oi foki la e ‵tau o a‵lofa tatou ki ei, kae e mafai pefea ne tatou o fai penā? Ne fai mai Iesu penei: “Olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kolā ne fakatonu atu ne au ki a koutou.” (Mataio 28:19, 20) E aofia i ei, a te folafolaatuga ki tino kolā e seki fai pelā me ne taina Kelisiano, a te tala ‵lei e uiga ki te palataiso i te lalolagi fou a te Atua. Ne fakaasi manino mai ne Iesu me e se ‵tau o fakaasi atu fua te ‵tou a‵lofa ki tino kolā e ‵pau ‵tou talitonuga, me ne fai mai a ia penei: “Me kafai koutou e a‵lofa atu [fua] ki tino kolā e a‵lofa mai ki a koutou, se a la te taui e maua i ei? E a, e se fai foki ne tino ao lafoga a te mea tenā? Kafai e fakapito fua a te otou atafai ki otou taugasoa, e a, e isi se mea e sili atu ne fai ne koutou i lō tenā? E a, e se fai foki penā ne tino o fenua fakaa‵tea?”​—Mataio 5:46, 47; 24:14; Kalatia 6:10.

“Sa‵sale Atu i te Igoa o Ieova”

12. Kaia e fai ei pelā me ko te Atua tonu fua tokotasi e mafai o fakaigoa ki a Ieova?

¹² A te suā mea telā e aofia i te faka‵malu atu ki te Atua tonu e fai penei, ke iloa, ke fakaaogā, kae ke akoako atu foki ne tatou ki nisi tino tena igoa totino, ko Ieova. Ne fakamatala mai ne te faisalamo tena manakoga tonu, penei: “Ko te mea ke iloa ne tino me ko tou igoa ko Ieova, ko koe fua te Atua Tafasili i te Maluga i te lalolagi kātoa.” (Salamo 83:18, NW) E fakauiga te igoa o Ieova penei: “E Gasuesue a Ia e ‵Tusa Loa mo Tena Loto.” A ia ko te Atua telā e fai ne ia a Fuafuaga Sili, kae e fakataunu faeloa ne ia ana fuafuaga konā. Kae ko te Atua tonu fua e mafai o fakaigoa ki te igoa eiloa tenā. E se ‵tau lele eiloa o fakaigoa a nisi tino aka ki te igoa tenā me e se mafai o mautinoa olotou taumafaiga pelā mo taumafaiga a te Atua. (Iakopo 4:13, 14) Ko Ieova fua tokotasi e mafai o fai atu me ‘e fai eiloa ne [ana muna] a mea kolā ne fai ne ia ki ei ke fano o fai.’ (Isaia 55:11) E fia‵fia malosi a tino e tokouke i te taimi ne fatoā lavea ei ne latou te igoa o te Atua i olotou Tusi Tapu kae ko malamalama foki i te uiga o te igoa tenā. (Esoto 6:3, NW) Kae e aogā fua ki a latou a te iloaga tenei māfai e “sa‵sale atu [latou] i te igoa o Ieova ke oko eiloa ki te se-gata-mai.”​—Mika 4:5, NW.

13. Ne a mea e aofia i te iloaga o te igoa o Ieova mo te sasale atu i ei?

¹³ E fai mai penei te Salamo 9:10 e uiga ki te igoa o te Atua: “A latou kolā e iloa ne latou tou igoa, ka fakatuanaki ki a koe.” (Salamo 9:10, NW) E fakauiga i ei me e se lava fua te iloaga o te igoa o Ieova ko te mea ke fakatuanaki a tino ki a ia. E aofia i te iloaga o te igoa o te Atua a te amanaia ki uiga o Ieova te Atua, te āva ki tena pulega, te faka‵logo ki ana tulafono mo te fakatuanaki foki ki a ia i mea katoa. (Faataoto 3:5, 6) E fakauiga foki ‘te sasale atu i te igoa o Ieova’ ki te tukuatuga eiloa ne te tino tena ola ki a Ieova kae ke fai a ia mo fai sena sui e pelā me se tino tapuaki ki a ia. E fakauiga foki te sasale atu i tena igoa ki te ola o tatou e ‵tusa eiloa mo te loto o te Atua. (Luka 10:27) E mata, e fai koe penā?

14. E se gata i te faiga o te taviniga pelā me se tiute, ne a nisi mea e ‵tau o fai ne tatou māfai e fia tavini atu tatou ki a Ieova ke oko ki te se-gata-mai?

¹⁴ Kafai e tavini atu tatou ki a Ieova ki te se-gata-mai, e se ‵tau o fai fua te taviniga tenā pelā me se tiute. Ne tavini atu a Timoteo ki a Ieova i te fia o tausaga, kae ne fakamalosi atu te apositolo ko Paulo ki a ia, penei: “Fakamasani ki te olaga amio Atua.” (1 Timoteo 4:7) E māfua mai te faiga tenā i te loto fakafetai ki te tino telā e tapuaki atu tatou ki ei. Kafai e “amio Atua” tatou, ka fakaasi atu ei ne tatou te āva mo te fakaaloalo ki a Ieova. E fakaasi mai i ei te alofa tumau ki a ia ona ko te alofa ‵nau ki a ia mo ana tulafono. E fakamalosi aka i ei ‵tou manakoga ke faka‵malu atu foki a tino katoa ki tena igoa. E ‵tau o fakatāua ne tatou te amio Atua i ‵tou olaga ko te mea ke sa‵sale atu tatou i te igoa o Ieova, ko te Atua tonu e tokotasi, ki te se-gata-mai.​—Salamo 37:4; 2 Petelu 3:11.

15. E mafai pefea ne tatou o tapuaki katoatoa atu ki te Atua?

¹⁵ Ke talia ne te Atua ‵tou taviniga, e ‵tau eiloa mo tatou o tapuaki katoatoa atu ki a ia, me e se ‵tau o ifo tatou ki so se isi mea aka. (Esoto 20:5) E se mafai ne tatou o a‵lofa atu ki te Atua, kae fia‵fia malosi foki ki te lalolagi masei telā e atua ki a Satani. (Iakopo 4:4; 1 Ioane 2:15-17) E iloa ne Ieova a uiga ‵tonu o tatou taki tokotasi. (Ielemia 17:10) Kafai e fia‵fia malosi tatou ki te amiotonu, ka lavea ne Ieova a te mea tenā kae ka fesoasoani malosi mai a ia ki a tatou ke fa‵ki i fakalavelave i aso takitasi. E ‵lago mai a ia ki a tatou e auala i tena agaga tapu telā e malosi ‵ki, kae ka mafai ei ne tatou o manumalo i faifaiga ma‵sei i te lalolagi nei. (2 Kolinito 4:7) Ka fesoasoani mai foki a ia ke tumau te malosi o te ‵tou fakamoemoega ki te ola se-gata-mai i te lalolagi palataiso. E pefea te gali o te fakamoemoega tenā! E ‵tau mo tatou o loto fakafetai ki ei kae tavini atu ki te Atua tonu, ko Ieova mo te loto fiafia me ko ia telā e tuku mai ne ia ki a tatou te ola se-gata-mai tenā.

16. Se a te mea e ‵tau o manako koe o fai fakatasi mo te fia miliona o nisi tino?

¹⁶ Ko oti ne talia mo te fiafia ne te fia miliona o tino i te lalolagi kātoa a te ‵kamiga a te faisalamo telā ne tusi mai penei: “Ke takutaku fakatasi atu ne tatou te ‵malu o te Aliki; ke tavae foki fakatasi tatou ki tena igoa!” (Salamo 34:3) E ‵kami foki ne Ieova a koe ke kau atu ki tino tokouke kolā e tavae kae faka‵malu atu foki ki a Ieova.

Ke Toe Sau‵tala ki Manatu Konei

• A Ieova se vaegā Atua pefea? E aogā pefea ki a tatou ke maua se iloaga manino e uiga ki ana uiga masani?

• E mafai pefea ne tatou o fesoasoani atu ki nisi tino ke iloa ne latou te munatonu e uiga ki te Atua?

• Ne a mea e aofia i te iloaga e uiga ki te igoa o Ieova mo te sasale atu i tena igoa?

[Fakamatalaga o te Ata i te itulau e 14]

Ona ko te lasi o te alofa o Ieova ka ‘fakama‵lie’ ne ia a manakoga o mea ola katoa