Mataupu e Fa

Te Tino Telā ne Molimau ki ei a Pelofeta Katoa

1. Se a te mea e fakaasi mai ne te olaga o Iesu a koi tuai o fanau mai a ia i te lalolagi e uiga ki te va o laua mo Ieova?

“E ALOFA te Tamana ki te Tama, kae fakaasi atu foki ki a ia a mea katoa kolā e fai ne ia.” (Ioane 5:20) Ko oko eiloa i te gali te va fealofani o te Tama mo tena Tamana ko Ieova! Ne kamata eiloa te va fealofani tenā i te taimi ne faite ei te Tama i te fia o tausaga a koi tuai o fanau mai a ia ki te lalolagi nei. A ia ko te Afutasi eiloa a te Atua, me ko ia fua tokotasi telā ne faite ne Ieova e aunoa mo te fesoasoani. Ne faite a nisi mea katoa i te lagi mo te lalolagi e alatu i tena Toekimua fagasele tenā. (Kolose 1:15, 16) Ne fai foki a ia mo fai te Muna a te Atua, io me ko te Tino Fakaokomuna, telā ne fakailoa atu ne ia ki nisi tino te loto o te Atua. A te Tama tenei a te Atua, telā ko te ‵toe tino pele ki a ia, ne fai fakamuli mo fai te tagata, ko Iesu Keliso.​—Faataoto 8:22-30; Ioane 1:14, 18; 12:49, 50.

2. E pefea te uke o taimi ne fakasino atu ei a valoaga i te Tusi Tapu ki a Iesu?

² E uke ‵ki a valoaga mai te Atua ne tusi ki lalo e uiga ki te Tama toekimua tenā a te Atua a koi tuai o fanau fakavavega mai a ia e pelā me se tino. Ne fakamaoni atu ne te apositolo ko Petelu ki a Konelio, penei: “Ne fai‵pati katoa a pelofeta e uiga ki a ia.” (Galuega 10:43) Ona ko te lauiloa o te tulaga o Iesu i te Tusi Tapu ne mafai ei ne se agelu o fai atu penei ki te apositolo ko Ioane: “Me i te mea tonu telā ne fakaasi mai ne Iesu, ko te mea tenā ne fai‵pati fakapelofeta ki ei a pelofeta.” (Fakaasiga 19:10) Ne fakailoa faka‵lei mai ne valoaga konā me i a ia ko te Mesia. Ne fakasino atu foki i ei ki tulaga kese‵kese kolā ne ‵tau o aofia a ia i ei i te fakataunuga o fuafuaga a te Atua. E ‵tau o fia‵fia malosi tatou ki mea katoa konā i aso nei.

Mea Kolā e Fakaasi Mai ne Valoaga

3. (a) I te valoaga i te Kenese 3:15, ko oi e fakauiga ki ei te gata, “te fafine,” mo te ‘fanau a te gata’? (e) Kaia e fia iloa ei ne tavini a Ieova a te uiga tonu o te ‘tuki palapala o te ulu o te gata’?

³ Ne taku atu te valoaga muamua i valoaga penā mai tua o te ‵tekeatuga i te fatoaga o Etena. Ne fai atu a Ieova ki te gata, penei: “Ka fai ne au a koulua mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou ulu, kae ka ū ne koe [tena] vae.” (Kenese 3:15) Ne fakauiga tonu te valoaga tenā ki a Satani, telā ne fakaata mai i te gata. A “te fafine” tenā, ko te fakapotopotoga fakamaoni a Ieova i te lagi, telā e fai pelā me ko tena avaga fakamaoni. E aofia i te ‘fanau a te gata’ a agelu mo tino katoa kolā e fakaasi atu a uiga pelā mo Satani, ko tino kolā e ‵teke atu ki a Ieova mo Ana tino. E fakauiga te ‘tuki pala o te ulu o te gata’ ki te tamatega fakamuli o te tino ‵teke ko Satani. Ko ia telā ne taku fakamasei ne ia a Ieova kae ne aumai foki i ei te fia o mea fakafanoa‵noa ki tino katoa i te lalolagi. Kae ko oi la e fakauiga ki ei te ‵toe tino tāua i te “fanau” telā ka tuki palapala ne ia a Satani? Ne “funa” aka te tali ki te fesili tenā i te fia selau o tausaga.​—Loma 16:20, 25, 26.

4. Ne fakamautinoa aka pefea ne te gafa o Iesu me i a ia ko te Fanau telā ne folafola mai?

⁴ I te 2,000 tausaga mai tua ifo i ei kae ne toe tuku mai ne Ieova a nisi fakamatalaga e uiga ki ei. Ne fakaasi atu ne ia me e ‵tau o sae mai te Fanau tenā i te gafa o Apelaamo. (Kenese 22:15-18) Kae ne filifili ne te Atua te gafa telā e ‵tau o sae mai i ei te Fanau, kae ne seki fakalagolago fua ki telega o tino. E tiga eiloa ne alofa malosi Apelaamo ki tena tama ko Isamaeli telā ne fanau mai i a Hakala, ne fai mai a Ieova, penei: “Kae ka tausi eiloa taku feagaiga mo tau tama ko Isaako, telā ka fanau ne Sala i te taimi penei i te suā tausaga.” (Kenese 17:18-21) Fakamuli loa, ne seki toe fai te feagaiga tenā mo te tama toekimua a Isaako, ko Esau, kae ne tuku atu ki a Iakopo, telā ne ‵tupu mai i ei a matakāiga e 12 o Isalaelu. (Kenese 28:10-14) Kae ne fakaasi fakamuli mai me ka vau te Fanau tenā i te matakāiga o Iuta, i te gafa o Tavita.​—Kenese 49:10; 1 Nofoaiga Tupu 17:3, 4, 11-14.

5. I te taimi ne kamata ei ne Iesu tena galuega talai i te lalolagi, se a te mea ne fakaasi manino mai me i a ia ko te Mesia?

⁵ Ne a nisi fakamatalaga ne maua fakamuli ke iloa aka ei me ko oi te Fanau tenā? Ne fakailoa mai ne te Tusi Tapu me e ‵tau o fanau mai i Peteleema te Fanau telā ne folafola mai i te 700 tausaga mai mua atu i ei. Ne fakaasi mai foki ne te Tusi Tapu me i te Fanau tenā ne ola “mai aso mua eiloa,” talu mai te taimi ne faite ei a ia i te lagi. (Mika 5:2) Ne ‵valo tonu mai foki te taimi telā ka sae mai ei te Mesia i te lalolagi e alatu i te pelofeta ko Tanielu. (Tanielu 9:24-26) I te taimi ne fakaeke ei a Iesu ki te agaga tapu, ne fai ei a ia e pelā me ko te Tino ne Fakasopo aka ne Ieova, kae ne fakailoa mai eiloa ne te Atua mai te lagi me i a Iesu ko Tena Tama. (Mataio 3:16, 17) Ne fakaasi manino mai i ei me ko oi te Fanau tenā! Tenā te pogai ne mafai ei o fai atu a Filipo mo te loto talitonu, penei: “Ko oti ne maua ne matou a ia telā ne tusi mai ne Mose i te Tulafono, pelā foki mo pelofeta. Ko Iesu.”​—Ioane 1:45.

6. (a) E pelā mo te fakamatalaga i te Luka 24:27, se a te mea ne iloa fakamuli aka ne soko o Iesu? (e) Ko oi te ‵toe tino tāua i ‘te fanau a te fafine,’ kae se a te mea e fakauiga ki ei a te ‵tuki palapala ne ia o te ulu o te gata?

⁶ E seki leva kae ne malamalama a soko o Iesu me ne aofia i te Tusi Tapu a te fia o pati fakavaloaga e uiga ki a ia. (Luka 24:27) Ne manino foki i ei me i a Iesu ko te ‵toe tino tāua i te ‘fanau a te fafine,’ telā ka tuki palapala ne ia te ulu o te gata, kae ka fakaseai katoatoa atu i ei a Satani. E alatu i a Iesu, ka fakataunu mai ei a folafolaga katoa a te Atua ki tino i te lalolagi, ko mea katoa kolā ko leva ne fakamoe‵moe tatou ki ei.​—2 Kolinito 1:20.

7. E se gata i te malamalama e uiga ki te Tino telā e fakasino atu ki ei a valoaga konā, se a te suā mea telā e ‵tau o fai ne tatou?

⁷ Ne a ‵tou mea e ‵tau o fai ona ko te iloaga tenā? E fakamatala mai ne te Tusi Tapu te tala e uiga ki te ofisa Aitiope telā ne faitau ki nisi valoaga e uiga ki te Fakaola, io me ko te Mesia. Ne seki malamalama tou tagata, telā ne fesili atu ei a ia ki te tino talai ko Filipo, penei: “Taku mai ki a au me ko oi te tino tenei e faipati ki ei te pelofeta.” Kae ne seki gata atu fua i konā a mea ne fai ne te ofisa tenā i te taimi ne maua ei ne ia te tali ki tena fesili. Ko oti ne fakalogologo faka‵lei a ia ki te fakamatalaga a Filipo kae ko maina a ia me e isi ne mea e ‵tau o fai ne ia ko te mea ke fakaasi atu ei tena loto fakafetai ki te valoaga telā ko oti ne fakataunu mai. Ne maina foki a ia me e ‵tau mo ia o papatiso. (Galuega 8:32-38; Isaia 53:3-9) E mata, e fai foki tatou penā?

8. (a) Se a te mea ne fakaata mai i te taumafaiga a Apelaamo ke ofo atu a Isaako? (e) Kaia ne fai atu ei Ieova ki a Apelaamo me ka fakamanuia ne fenua katoa a latou eiloa e alatu i te Fanau tenā, kae e aogā pefea te mea tenā ki a tatou i aso nei?

⁸ Mafaufau foki la ki te tala fakamalosi loto e uiga ki te taumafaiga a Apelaamo ke ofo atu a Isaako, ko tena tamaliki eiloa e tokotasi i a Sala. (Kenese 22:1-18) Ne fakaata mai i ei a mea kolā ka fai ne Ieova​—ko te ofoatuga o tena Tama e tokotasi: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se-gata-mai.” (Ioane 3:16) Ko fakatalitonu mai i ei me kafai e mafai o tuku mai ne Ieova tena Afutasi ke fakataunu ei Ana fuafuaga, ko tena uiga ka tuku mai foki ne ia “a mea katoa mo tona loto fiafia.” (Loma 8:32) Ne a mea e ‵tau o fai ne tatou i ei? E ‵tusa loa mo te tala i te Kenese 22:18, ne fai atu a Ieova ki a Apelaamo me ka fakamanuia ne fenua katoa a latou eiloa e alatu i te Fanau tenā, kae ‘e pogai a mea katoa i te fakalogo [o Apelaamo] ki fakatonuga [a te Atua].’ E ‵tau foki mo tatou katoa o faka‵logo ki a Ieova mo tena Tama: “A te tino telā e talitonu ki te Tama, ko i a ia te ola se-gata-mai; ka ko te tino telā e se fakalogo ki te Tama, ka se lavea ne ia te ola, kae ka tumau eiloa i a ia te fakasalaga a te Atua.”​—Ioane 3:36.

9. Kafai e loto fakafetai tatou ki te fakamoemoega ki te ola se-gata-mai telā ne fakavae ki te taulaga a Iesu, ne a mea ka fai ne tatou?

⁹ Kafai e loto fakafetai tatou ona ko te fakamoemoega ki te ola se-gata-mai telā e fakavae ki te taulaga a Iesu, ka fia fai ne tatou a mea kolā ne fakatonu mai ne Ieova e alatu i a Iesu. E fakavae a fakatonuga konā ki te ‵tou a‵lofa ki te Atua mo ‵tou tuakoi. (Mataio 22:37-39) Ne fakaasi atu ne Iesu me ka fakamalosi tatou ne te ‵tou a‵lofa ki a Ieova ke akoako atu ki nisi tino “ke faka‵logo ki mea katoa kolā ne fakatonu [mai] ne [Iesu].” (Mataio 28:19, 20) Kae e fia fakaasi atu foki ne tatou te alofa tenā ki nisi tino kolā e tavini atu ki a Ieova mai i te “maopoopo sāle o tatou.” (Epelu 10:25; Kalatia 6:10) E se gata i ei, e se ‵tau o ma‵natu aka tatou me e ma‵nako te Atua mo tena Tama ke ‵lei katoatoa tatou i te faka‵logo atu ki a laua. E fai mai te Epelu 4:15 me “e kau fakatasi mai ki [‵tou] puapuaga” a Iesu e pelā me ko te ‵tou Faitaulaga Sili. E pefea te fakamafanafana loto o te manatu tenā i te taimi e ‵talo atu ei tatou ki te Atua e alatu i a Keliso ke fesoasoani mai ki a tatou ke manumalo i ‵tou vāivāiga!​—Mataio 6:12.

Fakaasi atu te Fakatuanaki ki a Keliso

10. Kaia e maua fua ei te fakaolataga i a Iesu Keliso?

¹⁰ Ko oti ne fakamatala atu ne te apositolo ko Petelu ki te fono maluga i Ielusalema me ne fakataunu a nisi valoaga i te Tusi Tapu ki a Iesu, kae ne fakaoti ne ia tena fakamatalaga, penei: “E se maua te fakaolataga i so se tino, me e seai ake foki se igoa i lalo o te lagi ne tuku mai ki tino ke maua i ei ne tatou a te ola.” (Galuega 4:12) Ona ko te mea ko agasala a tama‵liki katoa a Atamu, e se mafai eiloa o ‵mate latou e pelā me se togiola mō nisi tino. Ne ‵lei katoatoa a Iesu kae ne fakaaogā ne ia tena ola ke fai mo fai te togiola. (Salamo 49:6-9; Epelu 2:9) Ne tuku atu ne ia ki te Atua te togiola telā ne fetaui tonu eiloa mo te tāua o te ola ‵lei katoatoa telā ne galo atu i a Atamu. (1 Timoteo 2:5, 6) Ne ‵tala atu i ei te avanoaga ke maua ne tatou te ola se-gata-mai i te lalolagi fou a te Atua.

11. Fakamatala aka te auala e aogā ei te taulaga a Iesu ki a tatou.

¹¹ Ne ‵tala aka foki ne te togiola te avanoaga ke maua ne tatou a nisi mea aogā i te taimi eiloa tenei. E pelā mo te mea tenei: E tiga eiloa e agasala sāle tatou, e mafai ne tatou o maua se loto lagona ‵mā me e mafai o fakamagalo ‵tou agasala ona ko te taulaga a Iesu. E sili fakafia atu a mea aogā konā i lō mea kolā ne maua ne te kau Isalaelu e auala i taulaga manu kolā ne fakatonu atu ne te Tulafono a Mose. (Galuega 13:38, 39; Epelu 9:13, 14; 10:22) Kae ko te mea ke maua ne tatou te fakamagaloga tenā, e ‵tau o iloa tonu atu a te lasi o te aogā o te taulaga a Keliso ki a tatou: “Kafai e fai ake tatou pelā me e seai ne o‵tou agasala, ko faka‵se tatou ne tatou eiloa, e seai foki se mea tonu i loto i a tatou. Kae kafai e takutonu atu o‵tou agasala ki te Atua, e fakamaoni a ia mo te amiotonu o fakamagalo ne ia o‵tou agasala, kae faka‵mā foki ne ia tatou mai i o‵tou mea ‵se katoa.”​—1 Ioane 1:8, 9.

12. Kaia e tāua ei te papatisoga ki te vai ke maua te loto lagona ‵lei i mua o te Atua?

¹² E mafai pefea ne tino agasala o fakaasi atu te fakatuanaki ki a Keliso mo tena taulaga? I te taimi ne fai ei a tino kolā ne ola i te vaitaimi o te kau apositolo mo fai ne tino tali‵tonu, ne fakaasi atu te lotou talitonuga tenā i mua o tino e tokouke. E pefea la? Ne papatiso latou. Kaia? Me ne fakatonu atu a Iesu ke papatiso ana soko katoa. (Mataio 28:19, 20; Galuega 8:12; 18:8) Kafai e loto fakafetai se tino ki te meaalofa tenā mai i a Ieova e alatu i a Iesu, ka se fakatamala a ia ke fai so se mea e ‵tau o fai. Ka ‵fuli ne ia tena olaga, ka tuku atu tena ola ki te Atua e alatu i te ‵talo, kae ka fakaasi atu foki ne ia tena tukuatuga mai i te papatisoga ki te vai. Kafai e fakamaoni aka ne ia tena fakatuanaki i te auala tenei, ko fakamolemole atu ei a ia ki te Atua ke maua te “loto lagona ‵lei.”​—1 Petelu 3:21, NW.

13. Kafai ko iloa ne tatou me ne agasala tatou, se a te mea e ‵tau o fai i ei, kae kaia?

¹³ Faitalia me ko oti ne papatiso se tino, e mafai eiloa o ‵sae fakamuli mai a vāivāiga fia fai agasala. Ne a au mea e ‵tau o fai i ei? Ne fai atu te apositolo ko Ioane, penei: “Aku tama, ko tusi atu ne au ki a koutou a te mea nei, ke se agasala koutou; kae kafai e isi se tino e agasala, e iai i a tatou a Iesu Keliso, ko te tino amiotonu, telā e fautua mō tatou ki te Tamana. Me i a Keliso, ko ia tenā ko te auala e fakamagalo ei o‵tou agasala.” (1 Ioane 2:1, 2) E mata, e fakauiga te tusi siki tenā me kafai e ‵talo atu tatou ki te Atua ka fakamagalo faeloa ne ia ‵tou agasala faitalia me ne a ‵tou mea e fai? E se fai penā i taimi katoa. A te fakavae mō te fakamagaloga ko te salamō tonu. Kāti e ‵tau o maua foki te fesoasoani mai nisi tino ma‵tua i te fakapotopotoga Kelisiano kolā e sili atu te lotou ata‵mai. E ‵tau o maina tatou i te masei o te mea telā ne fai ne tatou kae ke na fakaasi atu te salamō tonu mai i te taumafai malosi ke se toe fai se vaegā mea penā. (Galuega 3:19; Iakopo 5:13-16) Kafai e fai ne tatou penā, e mautinoa eiloa me ka fesoasoani mai a Iesu kae ka toe ‵lei foki te va o tatou mo Ieova.

14. (a) Fakamatala mai aka se auala tāua e tasi telā e aogā ei te taulaga a Iesu ki a tatou. (e) Kafai e fakatuanaki ‵tonu tatou, ne a mea ka fai ne tatou?

¹⁴ Ne ‵tala mai foki ne te taulaga a Iesu te avanoaga ke maua ne te “lafu foliki,” io me ko te lua o vaega o te fanau telā ne faipati ki ei te Kenese 3:15, a te ola se-gata-mai i te lagi. (Luka 12:32; Kalatia 3:26-29) Ko ‵tala mai foki i ei te avanoaga mō te fia piliona o tino ke maua ne latou te ola se-gata-mai i te lalolagi palataiso. (Salamo 37:29; Fakaasiga 20:11, 12; 21:3, 4) A te ola se-gata-mai ko “te meaalofa faivasaga a te Atua” e alatu “i a Keliso Iesu te ‵tou Aliki.” (Loma 6:23; Efeso 2:8-10) Kafai e fakatuanaki tatou ki te meaalofa tenā, ka fakaasi atu i ei te ‵tou loto fakafetai ki te auala ne fakaavanoa mai ei a te meaalofa tenā. Kafai ko maina tatou i te auala fakaofoofogia ne fakaaogā ei ne Ieova a Iesu i te fakataunuga o Tena loto mo te tāua foki ke tautali fakapilipili atu ki kalafaga o Iesu, ka fakamuamua ei ne tatou te galuega faka-Kelisiano i ‵tou olaga. Ka fakaasi atu te ‵tou fakatuanaki i te auala mautinoa e fakamatala atu ei ne tatou ki nisi tino a te meaalofa fakaofoofogia tenā mai te Atua.​—Galuega 20:24.

15. E fakamalosi aka pefea ne te fakatuanaki ki a Iesu Keliso te ‵tou loto tasi?

¹⁵ Ko oko eiloa te fakamalosi mai o te vaegā fakatuanaki tenā ke loto tasi tatou! E auala i te fakatuanaki tenā, e mafai ei ne tatou o fakapili‵pili atu ki a Ieova, ki tena Tama, mo tino katoa i te fakapotopotoga faka-Kelisiano. (1 Ioane 3:23, 24) E fai ei tatou ke fia‵fia ona ko te mea ne tuku faka‵lei atu ne Ieova ki tena Tama “a te igoa telā e sili atu i igoa katoa [kae e se aofia i ei te igoa o te Atua]. Tela la, ona ko te ‵malu o te igoa o Iesu, ko ‵tau o to‵tuli ki ei a tino katoa i te lagi, mo tino i te lalolagi, mo tino mai lalo ifo o te lalolagi, kae ka taku‵tonu ne tino katoa i a Iesu Keliso ko te Aliki, mō te vikiga o te Atua te Tamana.”​—Filipi 2:9-11.

Ke Toe Sau‵tala ki Manatu Konei

• I te taimi ne sae mai ei te Mesia, kaia ne iloa tonu ei ne tino kolā ne tali‵tonu ki te Muna a te Atua me ko ia tenā?

• Ne a nisi mea e ‵tau o fai ne tatou ke fakaasi atu ei ‵tou loto fakafetai ki te taulaga a Iesu?

• I auala fea ne aogā ei ki a tatou a te taulaga a Iesu? E fesoasoani mai pefea a mea konā māfai ko ‵talo atu tatou ki a Ieova ke fakamagalo ne ia ‵tou agasala?

[Ata i te itulau e 36]

Ne fai atu a Iesu ki ana soko me e ‵tau mo latou o akoako atu a nisi tino ke faka‵logo ki tulafono a te Atua