Ke Fakatuanaki ki te Muna Fakapelofeta a te Atua!

“Ko sili atu nei te mautinoa o te muna fakapelofeta ki a tatou.”​—⁠2 PETELU 1:​19, NW.

1, 2. Se a te valoaga muamua telā ne tusi ki lalo, kae se a te fesili e tasi telā ne sae mai i ei?

NE MĀFUA mai i a Ieova te valoaga muamua telā ne tusi ki lalo. Ko oti ne agasala a Atamu mo Eva, kae ne fai atu penei te Atua ki te gata: “Ka fai ne au a koulua mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou ulu, kae ka u ne koe [tena] vae.” (Kenese 3:​1-7, 14, 15) Ne ‵teka atu te fia o senitenali a koi tuai o maina ‵lei a tino i pati fakapelofeta konā.

² Ne tuku mai ne te valoaga muamua tenā se fakamoemoega tonu ki tino agasala. Ne fakailoa mai fakamuli ne te Tusi Tapu me i a Satani te Tiapolo ko “te gata taumua.” (Fakaasiga 12:⁠9) Kae ko oi te Fanau a te Atua telā ne folafola mai?

Te Salasalaga ki te Fanau

3. Ne fakatuanaki pefea Apelu ki te valoaga muamua?

³ E se pelā mo tena tamana, ne fakatuanaki te tagata amiotonu ko Apelu ki te valoaga muamua. Kāti ne maina ‵lei a Apelu me e ‵tau o fakamaligi te toto ko te mea ke fakamagalo ei a agasala. Ona ko tena fakatuanaki ne ofo atu ei ne ia se manu pelā me se taulaga kae ne talia ne te Atua te taulaga tenā. (Kenese 4:​2-4) Kae ne seki iloa atu i te taimi tenā me ko oi te Fanau telā ne folafola mai.

4. Se a te folafolaga telā ne fai atu ne te Atua ki a Apelaamo, kae ne a mea ne fakaasi mai i ei e uiga ki te Fanau telā ne folafola mai?

⁴ I te 2,000 tausaga mai tua ifo o Apelu, ne avatu ei ne Ieova a te folafolaga fakapelofeta tenei ki te toeaina mua ko Apelaamo: “Tela ko tauto ei au me ka fakatokouke ne au tou gafa ke pela mo te uke o fetu i te lagi . . . Ka ka‵laga mai katoa a malo ki a au ke fakamanuia atu a latou [“ona ko tau fanau,” NW].” (Kenese 22:​17, 18) Ona ko pati konā, ne fai pelā me ne aofia Apelaamo i te fakataunuga o te valoaga muamua. Ne fakaasi mai i ei me ka sae mai i te gafa o Apelaamo a te Fanau telā ka fakaseai katoa ne ia a galuega a Satani. (1 Ioane 3:⁠8) ‘Ne seki teka eiloa keatea mo Apelaamo tena fakatuanaki,‘ kae penā foki loa mo nisi molimau a Ieova kolā ne ola mai mua o te Keliso faitalia me “ne seki maua ne latou te mea ne folafolagina ne te Atua.” (Loma 4:​20, 21; Epelu 11:39) Kae ne mautakitaki te lotou fakatuanaki ki te muna fakapelofeta a te Atua.

5. Ko oi te tino telā ne fakataunu mai i ei te folafolaga a te Atua e uiga ki te Fanau, kae kaia e tali mai ei koe penā?

⁵ Ne fakailoa mai ne te apositolo ko Paulo me ko oi te Fanau telā ne folafola mai ne te Atua, i ana pati kolā ne tusi mai penei: “Kae nei, a te folafolaga a te Atua ne fai ki a Apelaamo mo tena fanau; e seki fai mai pela, ‘Ki ana tama,’ e pela me e tokouke, kae ne fai mai, ‘Ki tau tama,’ ko tona uiga e tokotasi eiloa te tino, ko Keliso.” (Kalatia 3:16) Ne seki aofia a tama‵liki katoa a Apelaamo i te Fanau telā ka manuia ei a atufenua. Ne seki fakaaogā a tama‵liki a Isamaeli mo tama‵liki kolā ne fai ne ia i a Ketula ke fakamanuia atu ki tino. Ne maua mai te Fanau o fakamanuiaga e alatu i tena tama ko Isaako mo tena mokopuna ko Iakopo. (Kenese 21:12; 25:​23, 31-34; 27:​18-29, 37; 28:14) Ne fakaasi mai ne Iakopo me ka faka‵logo a tino ki a Sailo mai te matakāiga o Iuta, kae fakamuli ifo ne fai mai me ka maua fua te Fanau tenā i te kāiga o Tavita. (Kenese 49:10; 2 Samuelu 7:​12-16) Ne fakamoe‵moe a tino Iutaia i te senitenali muamua ke vau se tino e tokotasi fua e pelā me ko te Mesia, io me ko te Keliso. (Ioane 7:​41, 42) Kae ne fakataunu mai te valoaga a te Atua e uiga ki te Fanau, i tena Tama ko Iesu Keliso.

Ko Sae Mai te Mesia!

6. (a) Se a te ‵tou malamalama i te valoaga e uiga ki vaiaso e 70? (e) Ko te taimi mo te auala fea ne fakapalele ei ne Iesu “a agasala”?

⁶ Ne tusi ki lalo ne te pelofeta ko Tanielu se valoaga tāua e uiga ki te Mesia. I te tausaga muamua o Taliu te Metai, ne iloa ei ne ia me ko pili o palele atu te vaitaimi o tausaga e 70 e ‵tau ei o tu ateatea Ielusalema. (Ielemia 29:10; Tanielu 9:​1-4) A koi ‵talo atu a Tanielu, kae ne vau te agelu ko Kapilielu o fakaasi mai ne ia me ko oti ne ‘fuafua aka a vaiaso e fitu sefulu ke fakapalele atu ei a agasala.’ Ne ‵tau o tamate te Mesia i te kogāloto o te 70 o vaiaso. Ne kamata a “vaiaso e fitu sefulu o tausaga” i te 455 T.L.M., i te taimi ne ‘fakatonu atu ei’ te tupu Pelesia ko Aletaseta ke toe ati aka Ielusalema. (Tanielu 9:​20-27; Moffatt; Neemia 2:​1-8) Ne ‵tau o oko mai te Mesia māfai ko oti atu a vaiaso e 7 mo vaiaso e 62. Ne kamata a tausaga e 483 konā i te 455 T.L.M. kae ne fakaoti i te 29 T.A., i te taimi ne papatiso ei a Iesu kae ne fakaeke a ia ne te Atua e pelā me ko te Mesia, io me ko te Keliso. (Luka 3:​21, 22) Ne ‘fakapalele’ ne Iesu a agasala mai i te tukuatuga o tena ola e pelā me se taulaga togiola i te 33 T.A. (Maleko 10:45) Mā‵faga o pogai ‵lei ke fakatuanaki ei tatou ki te muna fakapelofeta a te Atua!a

7. Ke fakaaogā ne koe te Tusi Tapu kae fakasino atu ki te auala ne fakataunu mai ei ne Iesu a valoaga faka-Mesia.

⁷ Ona ko te fakatuanaki ki te muna fakapelofeta a te Atua e mafai ei ne tatou o iloa me ko oi te Mesia. Mai i te fia o valoaga e uiga ki te Mesia kolā ne tusi i Tusitusiga Faka-Epelu, ne fakaaogā ne tino tusitala o Tusitusiga Kelisiano Faka-Eleni a valoaga e uke ke fakauiga tonu ki a Iesu. E penei: Ne fanau mai Iesu i se taupou i Peteleema. (Isaia 7:14; Mika 5:2; Mataio 1:​18-23; Luka 2:​4-11) Ne kalagagina a ia mai Aikupito, kae ne tamate a pepe mai tua ifo o tena fanaumaiga. (Ielemia 31:15; Hosea 11:1; Mataio 2:​13-18) Ne tauave ne Iesu ‵tou masaki. (Isaia 53:4; Mataio 8:​16, 17) E pelā mo te valoaga, ne ulu atu a ia ki Ielusalema i luga i te tama a te asini. (Sakalia 9:9; Ioane 12:​12-15) Ne fakataunu mai a pati a te faisalamo i te taimi ne fakasataulo ei a Iesu, me ne vaevae aka ne sotia ana gatu i a latou eiloa kae ne fai ne latou te vili ke maua ei tena gatu taoloto. (Salamo 22:18; Ioane 19:​23, 24) Ne fakataunu mai a nisi valoaga me ne seki ‵fati ana ivi kae ne ‵suki foki a ia ki te tao. (Salamo 34:20; Sakalia 12:10; Ioane 19:​33-37) Konā eiloa a nāi valoaga mai i valoaga faka-Mesia ne fakauiga eiloa ki a Iesu kae ne fakaaogā ne tino kolā ne fakaosofia ne te Atua ke tusi te Tusi Tapu.b

Ke Tavae Atu ki te Tupu Faka-Mesia!

8. Ko oi te Tino e ola ki te se gata mai, kae ne fakataunu mai pefea te valoaga telā ne tusi ki lalo i te Tanielu 7:​9-14?

⁸ I te tausaga muamua o te tupu Papelonia ko Pelesala, ne talia ne Ieova ke fai ne tena pelofeta ko Tanielu se moemiti mo fakaasiga fakaofoofogia. Ne matea atu muamua ne te pelofeta a manu fe‵kai ‵lasi e fa. Ne fakailoa mai ne te agelu a te Atua me i manu konā ko “malo e fa,” kae ne fakaasi mai i ei me ne fakauiga a manu konā ki se fakasologa o malo o te lalolagi. (Tanielu 7:​1-8, 17) E ‵soko atu ki ei ne matea atu ne Tanielu a Ieova, ko “ia tela e ola ki te se gata mai,” e sagasaga i tena ‵malu i tena nofogaaliki. Ne fakamasino aka ne te Atua a manu konā, ne ave keatea ne ia olotou pulega, kae tamate ne ia te fa o manu. Kae ne tuku atu te pulega ki te “tino ola” ke pule atu ki luga i “tino katoa, malo katoa mo gana kesekese.” (Tanielu 7:​9-14) Ko tafaga la te gali o te valoaga e uiga ki te fakasopoga o “te tino ola” ko Iesu Keliso ki tena nofogaaliki i te lagi i te tausaga ko te 1914!​—⁠Mataio 16:⁠13.

9, 10. (a) Ne a mea e fakasino atu ki ei a vaega kese‵kese o te tupua i te moemiti? (e) E fakamatala mai pefea ne koe te fakataunuga o te Tanielu 2:⁠44?

⁹ Ne iloa ne Tanielu me ‘e fai ne te Atua a tino ke fai mo tupu kae fai foki ne ia ke se tupu.’ (Tanielu 2:21) Ona ko tena fakatuanaki ki a Ieova, telā “e mafai ne ia o fakaasi a mea funa,” ne fakaasi atu ne te pelofeta tenā a te uiga o te moemiti a te tupu o Papelonia ko Nepukanesa e uiga ki te tupua lasi. Ne fakasino atu a vaega i ei ki te ‵tumaiga mo te pa‵kūga foki o vaegā malo o te lalolagi pelā mo Papelonia, Metai-Pelesia, Eleni, mo Loma. Ne fakaaogā foki ne te Atua a Tanielu ke fakaasi mai te fakasologa o mea kolā ka ‵tupu i te lalolagi ke oko eiloa ki ‵tou aso nei, penā foki loa mo aso mai mua nei.​—⁠Tanielu 2:​24-30.

¹⁰ E fai mai penei te valoaga tenā: “I te taimi o takitaki kona, kae ka fakatu ne te Atua o te lagi a te malo tela ka se toe gata mai. Ka se toe mafai o takavale a te malo tena. Ka fakatakavale ne ia a malo katoa kona, kae ka tumau ki te se gata mai.” (Tanielu 2:44) I te taimi ne palele atu ei “te taimi e fakataunu ei aso o fenua fakaatea” i te 1914, ne fakatu aka ne te Atua te Malo faka-te-lagi mai lalo i a Keliso. (Luka 21:24; Fakaasiga 12:​1-5) Mai i te malosi o te Atua, ne ‵kati keatea se “fatu” telā ko te Malo o te Mesia mai i “te mauga” o te pulega sili a te Atua i koga katoa. I Amaketo ka pokomālō atu ei “te fatu” tenā ki te tupua kae ka tuki palapala ei te mea tenā. Ka fai te Malo o te Atua mo fai te mauga telā ka pule atu ei ki te ‵tou “lalolagi kātoa” kae ka tumau ki te se-gata-mai.​—⁠Tanielu 2:​35, 45; Fakaasiga 16:​14, 16.c

11. Se a te mea telā ne fakasino atu ki ei te ‵fuliga o foliga o Iesu, kae ne pefea te tāua o te fakaasiga tenā ki a Petelu?

¹¹ Ne mafaufau a Iesu ki te pulega a tena Malo, kae ne fai atu penei ki ana soko: “Me i nisi o koutou konei e ‵tu mai nei, ka koi tuai o ‵mate latou, e matea muamua ne latou au te Tama a te Tagata ko vau i tona malo.” (Mataio 16:28) I te ono o aso mai tua ifo i ei, ne ave ne Iesu a Petelu, Iakopo, mo Ioane ki luga i se mauga maluga kae ne ‵fuli ana foliga i olotou mua. Ne fanake ei te kaumana kena i luga o te kau apositolo, kae ne fai atu penei te Atua: “Ko taku Tama fagasele tenei, tela e fiafia au ki ei, ke faka‵logo koutou ki a ia!” (Mataio 17:​1-9; Maleko 9:​1-9) Mā‵faga o fakaasiga ‵malu telā ka maua ne Keliso i tena Malo! E se tioa eiloa o faipati a Petelu ki te fakaasiga fakaofoofogia tenā penei: “Tela la, e sili atu te talitonu omotou loto ki te talaiga tela ne folafola ne pelofeta.”​—⁠2 Petelu 1:​16-19.d

12. Kaia e fai ei pelā me tenei eiloa te taimi e ‵tau ei o fakaasi atu ne tatou te ‵tou fakatuanaki ki te muna fakapelofeta a te Atua?

¹² Kāti e se aofia fua i “te muna fakapelofeta” a valoaga i Tusitusiga Faka-Epelu e uiga ki te Mesia, kae e aofia foki i ei a pati a Iesu me ka vau a ia “i te mana mo te ‵malu lasi.” (Mataio 24:30) Ne fakamaoni aka ne te ‵fuliga o foliga o Iesu a te muna fakapelofeta e uiga ki te vauga mo te ‵malu o Keliso i tena Malo. Ko pili mai te taimi, ka iku atu tena fakaasimaiga ‵malu ki te fakaseaiga o tino sē fakatuanaki, kae ka aumai ei a fakamanuiaga ki tino fakatuanaki. (2 Tesalonia 1:​6-10) E fakamaoni mai ne te fakataunuga o valoaga i te Tusi Tapu me konei eiloa a “aso fakaoti.” (2 Timoteo 3:​1-5, 16, 17; Mataio 24:​3-14) E pelā me ko te Tino Fakaoko Sala Sili a Ieova, a Mikaele, telā ko Iesu Keliso, ko toka o fakaoko atu te gataga ki te fakanofonofoga matagā tenei i te fakalavelave “tafa sili i te masei.” (Mataio 24:21; Tanielu 12:⁠1) Tenei eiloa te taimi ke fakaasi atu ei ne tatou me e fakatuanaki eiloa tatou ki te muna fakapelofeta a te Atua.

Ke Tumau i te Fakatuanaki ki te Muna Fakapelofeta a te Atua

13. Ne a mea ka fesoasoani mai ki a tatou ke tumau i te ‵tou alofa ki te Atua kae fai ei ke ola te ‵tou fakatuanaki ki tena muna?

¹³ Ne fia‵fia ‵ki eiloa tatou i te taimi ne fatoā maina tatou i te fakataunuga o muna fakapelofeta a te Atua. E mata, ko gasolo o vāivāi nei te ‵tou fakatuanaki io me ko gasolo o galo atu te ‵tou alofa? Ke mo a ma fai tatou e pelā mo te kau Kelisiano i Efeso kolā ‘e seki ‵pau te lotou a‵lofa e pelā mo te lotou a‵lofa i te kamataga.’ (Fakaasiga 2:​1-4) Faitalia me e pefea te leva ne tavini atu ei tatou ki a Ieova, e mafai o galo foki te ‵tou a‵lofa māfai e se ‘sala muamua tatou ki te Malo o te Atua mo tena amiotonu,’ kae fakaputu aka foki a koloa i te lagi. (Mataio 6:​19-21, 31-33) A te sukesuke mo te fakamaoni ki te Tusi Tapu, te ‵kauatuga ki fakatasiga a te fakapotopotoga, mo te ‵kau atu mo te loto finafinau ki te talaiga o te Malo ka fesoasoani mai ki a tatou ke tumau i te ‵tou alofa ki a Ieova, tena Tama, mo te Tusi Tapu. (Salamo 119:105; Maleko 13:10; Epelu 10:​24, 25) Kae ka fai foki i ei ke ola malosi te ‵tou fakatuanaki ki te muna a te Atua.​—⁠Salamo 106:⁠12.

14. E taui atu pefea ki Kelisiano fakaekegina ona ko te lotou fakatuanaki ki te muna fakapelofeta a Ieova?

¹⁴ E pelā mo te fakataunuga o te muna fakapelofeta a te Atua i aso ko ‵teka, e mafai foki ne tatou o fakatuanaki ki mea kolā e folafola mai i ei e uiga ki aso mai mua. E pelā mo te taunu tonu mai o te fakatasi mai o Keliso i te ‵malu o tena Malo, ko maua foki ne Kelisiano fakaekegina kolā ne fakamaoni ke oko eiloa ki te mate a te fakataunuga o te folafolaga fakapelofeta tenei: “Ki a latou kola e manumalo, e tuku atu ne au a te saolotoga o ‵kai ki te fuaga o te lakau o te ola, tela e ola i te Fatoaga a te Atua.” (Fakaasiga 2:​7, 10; 1 Tesalonia 4:​14-17) E talia ne Iesu ke taulia a tino manumalo konā ke “‵kai ki te fuaga o te lakau o te ola” i te palataiso faka-te-lagi o te Atua. I te lotou toetuga kae e alatu i a Iesu Keliso, e maua ne latou te ola telā e se mafai o toe tamate kae e se mafai o pala. Kae e maua ne latou te ola tenā mai i a Ieova, “te Tupu o te se gata mai, tela e ola faeloa, kae se mafai foki o matea, ko te Atua eiloa e tokotasi.” (1 Timoteo 1:17; 1 Kolinito 15:​50-54; 2 Timoteo 1:10) Mā‵faga o taui ‵lei mō te lotou alofa mautakitaki ki te Atua mo te lotou fakatuanaki mautakitaki ki tena muna fakapelofeta!

15. Ko oi e fakavae ki ei te “lalolagi fou,” kae ko oi olotou taugasoa?

¹⁵ Mai tua malie ifo o te ‵toe faka‵tuakaga o tino fakaekegina kolā ne ‵mate i te fakamaoni ki te palataiso o te Atua i te lagi, ne fakasaoloto foki te ‵toega o te Isalaelu faka-te-agaga i te lalolagi nei mai i Papelonia te Sili, te emupaea o lotu ‵se i te lalolagi kātoa. (Fakaasiga 14:8; Kalatia 6:16) Ne fakavae “te lalolagi fou” ki a latou. (Fakaasiga 21:⁠1) Ne tu mai i ei se “fenua” fou, kae ne ati aka i ei se palataiso faka-te-agaga telā e ola malosi nei i te lalolagi kātoa. (Isaia 66:⁠8) Ko ua‵lolo atu ki ei te fia o taugasoa o te Isalaelu faka-te-agaga kolā e fai pela me ne mamoe, i aso fakaoti konei.​—⁠Isaia 2:​2-4; Sakalia 8:23; Ioane 10:16; Fakaasiga 7:⁠9.

Ne ‵Valo Mai a Mea Kolā ka ‵Tupu ki Tino i te Muna Fakapelofeta a te Atua

16. Se a te fakamoemoega mō tino fakamaoni kolā e ‵lago atu ki te kau fakaekegina?

¹⁶ Se a te fakamoemoega mō tino fakamaoni kolā e fesoasoani atu ki te kau fakaekegina? E fakatuanaki foki latou ki te muna fakapelofeta a te Atua, kae e fakamoe‵moe eiloa latou ke ulu atu ki te lalolagi Palataiso. (Luka 23:​39-43) I konā loa, ka inu ei latou ki “te vaitafe o te vai ola” telā ka fakaolaola ei a tino kae ka ‵lei olotou ma‵saki i “lau” o lakau kolā e ‵toki i tafa o te vaitafe tenā. (Fakaasiga 22:​1, 2) Kafai tenā loa tou fakamoemoega fakaofoofogia, ke na tumau loa koe i te fakaasiatuga o tou alofa ‵loto ki a Ieova mo tou fakatuanaki ki tena muna fakapelofeta. Ke aofia koe i a latou kolā ka maua ne latou te fiafia sē fuafuagina ko te ola se-gata-mai i te lalolagi Palataiso.

17. Ne a fakamanuiaga ka aofia i te olaga i te lalolagi Palataiso?

¹⁷ E se mafai eiloa ne tino sē ‵lei katoatoa o fakamatala faka‵lei atu te olaga telā ka maua māfai ko oko mai te lalolagi Palataiso, kae e tuku mai eiloa ne te muna fakapelofeta a te Atua te mainaga e uiga ki fakamanuiaga kolā ka maua ne tino faka‵logo i ei. Kafai ko pule mai te Malo o te Atua e aunoa mo se fili e ‵teke ki ei, kae fai foki te loto o te Atua i te lalolagi nei e pelā mo te faiga i te lagi, “ka seai eiloa se mea fakamataku” ka fakamasei i ei te mea tenā faitalia me ne tino fakasauā io me ne manu fe‵kai. (Isaia 11:9; Mataio 6:​9, 10) Ka maua ne tino loto mau‵lalo a te lalolagi, “kae ka maua ne latou te manuia mo te filemu katoatoa” i ei. (Salamo 37:11) Ka se toe ai ne tino e tokouke kolā e fia‵kai, me ka “fakamaumea te fenua i saito; ko mauga foki ke fonu i fuagalakau.” (Salamo 72:16) Ka se toe ‵sofi mai ne loimata ona ko te fanoanoa. Ka ‵galo atu a masaki, kae ka se toe ai se mate. (Isaia 33:24; Fakaasiga 21:⁠4) Ke na mafaufau faka‵lei ki ei​—⁠ka se toe ai ne tokitā, ne vailakau, io me ne fa‵kaimasaki. E seai foki ne tanuga o tino ‵mate. Ko tafaga la te gali o te fakamoemoega tenā!

18. (a) Se a te mea telā ne fakatalitonu atu ki a Tanielu? (e) Ne a mea ka maua ne Tanielu i ei?

¹⁸ Ka se toe ai ne tino ‵mate i tanuga, me ka toe‵tu mai a tino ‵mate. Tenā loa te fakamoemoega o te tagata amiotonu ko Iopu. (Iopu 14:​14, 15) E penā foki loa mo te pelofeta ko Tanielu, me ne fakatalitonu atu penei te agelu a Ieova ki a ia: “Ka ko koe e Tanielu, ke tumau eiloa tou fakamaoni ke oko ki te gataga. Ka mate koe, kae ka toe tu mai koe o puke te taui lei o koe i te taimi o te gataga.” (Tanielu 12:13) Ne tavini atu a Tanielu mo te fakamaoni ki te Atua ke oko eiloa ki te fakaotiga o tena olaga. Ko malōlō nei a ia i te mate, kae ka “toe tu mai” a ia māfai ko ‘toe‵tu mai a tino amiotonu mai te mate’ i te Pulega a Keliso i te Afe Tausaga. (Luka 14:14) Ne a mea ka maua ne Tanielu i ei? Ia, i tena fakataunuga i te Palataiso, e fakaasi mai ne te valoaga a Esekielu me ka tofu te tino mo tena koga nofo, me ka vaevae aka te fenua i se auala tonu kae tokagamalie. (Esekielu 47:13–48:35) Tela la, ka maua ne Tanielu se koga nofo i te Palataiso, kae ka se maua fua ne ia se laumanafa i konā. Ka aofia foki i ei tena vaega i fuafuaga a Ieova.

19. Ne a mea e ‵tau o fai ke maua ei te ola i te lalolagi Palataiso?

¹⁹ E a koe, ne a au mea ka maua i ei? Kafai e fakatuanaki koe ki te Muna a te Atua, ko te Tusi Tapu, kāti e manako malosi koe ke ola i te lalolagi Palataiso. Kāti e fakaataata ne koe i tou mafaufau i a koe e nofo atu i konā, e maua ne koe a fakamanuiaga i ei, e tausi ne koe te lalolagi, kae e talimālō ne koe mo te fiafia a tino kolā ka toe ola mai. Me i te Palataiso ko te koga telā e ‵tau o ‵nofo i ei a tino. Ne faite ne te Atua te tauavaga muamua ke ‵nofo i se vaegā koga penā. (Kenese 2:​7-9) Kae e manako foki a ia ke ola a tino faka‵logo ki te se-gata-mai i te Palataiso. E mata, ka amio koe e tusa loa mo te Tusi Tapu ko te mea ke aofia koe i te fia piliona o tino kolā ka ola fakamuli i te lalolagi Palataiso? Ka nofo atu koe i konā māfai e alofa tonu koe ki te ‵tou Tamana faka-te-lagi, ko Ieova, kae e mautakitaki foki tou fakatuanaki ki te muna fakapelofeta a te Atua.

[Fakamatalaga fakaopoopo]

Ka Tali Mai Pefea ne Koe?

• Se a te valoaga muamua, kae ko oi te Fanau telā ne folafola mai?

• Ne a nisi valoaga e uiga ki te Mesia kolā ne fakataunu mai i a Iesu?

• Ka fakataunu mai pefea te Tanielu 2:​44, 45?

• Ne a mea e fakaasi mai ne te muna fakapelofeta a te Atua e uiga ki mea kolā ka ‵tupu ki tino faka‵logo?

[Ata i te itulau e 16]

E mata, e fakamoemoe koe ke ola koe i te lalolagi Palataiso?