Mataupu e Fitu

Mea Kolā ko Iloa ne Tatou Ona ko te Taliaga ne te Atua o Amioga Ma‵sei

1, 2. (a) Moi ne tamate fakavave ne Ieova a tino ‵teke i Etena, ne a mea kāti ne mafai o ‵tupu ki a tatou? (e) Ne a fakatokaga a‵lofa ko oti ne fai ne Ieova mō tatou?

NE FAI mai a Iakopo, penei: “E se uke malosi oku tausaga . . . , kae ne tausaga faiga‵ta.” (Kenese 47:9) Ne fai mai foki a Iopu, penei: “E ola katoa tatou” i te “olaga toetoe tenei, kae ‵fonu i fakalavelave.” (Iopu 14:1) E pelā mo laua, ko oti foki ne fe‵paki tatou mo mea faiga‵ta, faifaiga sē fakamaoni mo fakalavelave fakafanoa‵noa. Kae e se fai pelā me ne seki fakamaoni a te Atua ona ko te mea ne talia ne ia ke fa‵nau mai tatou. E tonu, e se ‵lei katoatoa ‵tou mafaufau mo ‵tou foitino kae e se ‵nofo atu foki tatou i te Palataiso e pelā mo Atamu mo Eva i te kamataga. Kae e a, moi ne tamate fakavave atu ne Ieova Atamu mo Eva i te taimi ne ‵teke atu ei laua? Moi ne fai penā, penei ko seai ne masaki, se fanoanoa io me ko te mate kae e se fa‵nau mai foki tatou. Ona ko tena alofa ne talia ei ne te Atua ke fai ne Atamu mo Eva lā tama‵liki, faitalia me ka se ‵lei katoatoa latou. Kae e auala i a Keliso, ne fai ne Ieova se fakatokaga ke toe maua mai ei te mea telā ne galo i a Atamu​—ko te ola se-gata-mai i te lalolagi palataiso.​—Ioane 10:10; Loma 5:12.

² Ko oko eiloa i te fakamalosi loto me e mafai ne tatou o fakamoe‵moe ki te taimi ka ola ei tatou ki te se-gata-mai i te lalolagi fou telā ka fai mo fai se Palataiso. Ka se toe ai se mate, se fanoanoa, se ‵mae io me se masaki. Kae ka palele atu foki a tino ma‵sei! (Faataoto 2:21, 22; Fakaasiga 21:4, 5) E tiga eiloa e fai mai te Tusi Tapu me e tāua te ‵tou fakaolataga ki a tatou, penā foki loa mo Ieova, e isi aka foki se mea e sili atu tena tāua.

Ne Aofia i ei Tena Igoa Sili

3. Ne a mea e aofia i te fakataunuga o fuafuaga a Ieova mō te lalolagi mo tino?

³ E aofia te igoa o te Atua i te fakataunuga o tena fuafuaga e uiga ki te lalolagi mo tino. E fakauiga te igoa tenā, ko Ieova, ki te “E Gasuesue a Ia e ‵Tusa mo Tena Loto.” Tela la, e fakauiga tena igoa ki mea kolā ko oti ne fai ne ia e pelā me ko te Atua Sili, te Tino Fai Fuafuaga Sili, io me ko te Atua o te munatonu. Ona ko te maluga o te tulaga o Ieova, e ‵tau mo tino katoa i te lagi mo te lalolagi o fakaaloalo katoatoa atu ki tena igoa mo mea katoa kolā e aofia i ei ko te mea ke maua ei ne latou te filemu mo te tokagamalie. Kae e ‵tau foki o faka‵logo a tino katoa ki a ia.

4. Ne a mea ne aofia i te fuafuaga a Ieova mō te lalolagi nei?

⁴ Ko oti ne faite ne Ieova a Atamu mo Eva, kae ne tuku atu ne ia se galuega ke fai ne laua. Ne fakaasi faka‵lei atu ne Ia me ne manako a ia ke pule atu laua ki te lalolagi kātoa​—ke fakalauefa atu a tuakoi o te Palataiso​—kae ke fai foki lā tama‵liki ke faka‵fonu ki ei te lalolagi. (Kenese 1:28) E mata, ka se taunu te fuafuaga tenei ona ko te lā agasala? Se mea fakamasiasi ‵ki ki te igoa o Ieova te Atua tafasili i te malosi moi ne seki mafai o fakataunu ne ia tena fuafuaga e uiga ki te lalolagi mo tino katoa i ei!

5. (a) I te taimi fea ne ‵mate atu ei te tauavaga muamua i te otiga ne ‵kai ki te lakau telā e iloa ei te ‵lei mo te masei? (e) Ne fakataunu pefea ne Ieova ana pati i te Kenese 2:17 e uiga ki tena fuafuaga mō te lalolagi?

⁵ Ko oti ne fakailoa atu ne Ieova ki a Atamu mo Eva me kafai e se faka‵logo laua kae ‵kai ki te lakau e iloa ei te ‵lei mo te masei, ka ‵mate eiloa laua “i te taimi tenā.” (Kenese 2:17) Ne ‵tonu a pati a Ieova, me i te aso eiloa telā ne agasala ei laua, ne fakamasino aka ne ia laua kae ne fai atu foki me ne ‵tau o fakasala laua ki te mate. Ne ‵mate eiloa Atamu mo Eva i te aso tenā i te kilokiloga a te Atua. Kae ne talia ne Ieova ke fai lā tama‵liki a koi tuai o ‵mate laua ko te mea ke fakataunu ei tena fuafuaga e uiga ki te lalolagi. Kae e ui i ei, a te 1,000 tausaga ne fai pelā me se aso e tasi i te kilokiloga a te Atua. Tela la, i te taimi ne mate atu ei Atamu kae ko 930 ana tausaga, e fai pelā me e seki kātoa te “aso” e tasi. (2 Petelu 3:8; Kenese 5:3-5) Ne fakamaoni aka i ei a te ‵tonu o pati a Ieova e uiga ki te taimi telā ne ‵tau ei o ‵mate laua. Kae ne seki fakagata atu i ei tena fuafuaga e uiga ki te lalolagi. Kae ne talia ne ia ke tumau i te ola mō se vaitaimi toetoe a tino sē ‵lei katoatoa, e aofia i ei a tino ma‵sei.

6, 7. (a) E pelā mo muna i te Esoto 9:15, 16, se a te pogai ne talia ei ne Ieova ke tumau a tino ma‵sei i se vaitaimi toetoe? (e) Ne fakaasi atu pefea ne Ieova tena ‵mana ki a Falao, kae ne takutakua pefea i ei Tena igoa? (i) Ne a mea ka ‵tupu māfai ko oti atu te lalolagi matagā tenei?

⁶ E fakaasi mai foki te pogai ne talia ei ne Ieova ke tumau a tino ma‵sei i te ola i ana pati ki te pule o Aikupito i aso o Mose. I te taimi ne fakatapu ei ne Falao a tino Isalaelu ma olo keatea mai Aikupito, ne seki tamate fakavave a ia ne Ieova. Ne fakaoko atu a Mala e Sefulu ki te fenua tenā kae ne fakaasi atu i ei a te ‵mana o Ieova i auala fakaofoofogia. I te taimi ne fakailoa atu ei ne Ieova me ka oko mai te fitu o mala, ne fai atu a ia ki a Falao me e faigofie fua ki a Ia ke ‵ta fakapalele atu latou mo ana tino. Muna a Ieova: “Ko tuku atu ne au a koe ke ola ko te mea ke lavea ne koe toku malosi; ka ko au foki ke takutakua i te lalolagi kātoa.”​—Esoto 9:15, 16.

⁷ I te taimi ne faka‵sao ei ne Ieova a tino Isalaelu, ne takutakua malosi tena igoa. (Iosua 2:1, 9-​11) Ne seki puli atu eiloa a mea kolā ne ‵tupu i te taimi tenā, faitalia me ne ‵tupu a mea konā i te 3,500 tausaga ko ‵teka atu nei. Ne lauiloa i ei te igoa o Ieova kae ne fakaasi atu foki i ei a mea ‵tonu e uiga ki te Atua e o ia te igoa ko Ieova. Ne fakamautinoa aka i ei a te ‵tonu o tala e uiga ki a Ieova me ne fakataunu ne ia tena feagaiga kae ne fesoasoani atu foki ki ana tavini. (Iosua 23:14) Ne fakaasi atu foki me e seai se mea e mafai o taofi aka i ei te fakataunuga o tena fuafuaga ona ko tena malosi katoatoa. (Isaia 14:24, 27) E mafai eiloa o tali‵tonu tatou me ko pili o fesoasoani atu a ia ki ana tavini fakamaoni me ka fakaseai atu ne ia te lalolagi matagā kātoa a Satani. Ka se mafai lele eiloa o puli atu te fakaasiga tenā o tena malosi katoatoa mo te faka‵maluga o te igoa o Ieova. Ka aogā eiloa ki te se-gata-mai a te fakaasiga tenā ki tino.​—Esekielu 38:23; Fakaasiga 19:1, 2.

‘Ko Oko Eiloa te ‵Poko te Poto o te Atua!’

8. Ne a mea ne fakamalosi mai ne Paulo ke mafaufau faka‵lei tatou ki ei?

⁸ Ne fakasae aka ne te apositolo ko Paulo a te fesili tenei i tena tusi ki te kau Loma: ‘E se fai mea tonu te Atua?’ Ne tali atu a ia mo te mautinoa: “Ikai, e se penā!” Kae ne faka‵mafa atu foki ne ia te alofa fakamagalo o te Atua me ne fakasino atu a ia ki pati a Ieova e uiga ki te taimi ne talia ei ne ia ke ola Falao i se vaitaimi toetoe. Ne fakaasi mai foki ne Paulo me e fai tatou pelā me ne kele i lima o te tino fai ipu kele. Ana muna: “Kafai ko te Atua ko loto o fakaasi atu tona kaitaua, kae fakailoa atu foki a tona ‵mana ke iloa, ne kufaki ne ia mo te lotomau a te ipu o te kaitaua telā ne fai mō te fakamalepega, ko te mea ke fakaasi ei te lasi o tona ‵malu mō te ipu o te alofa ‵nau telā ko leva ne fakatoka mō tena ‵malu. Kae penei la mo tatou kolā ne ana kalagagina, e se mai i tino Iutaia fua kae pelā foki mai tino o fenua fakaa‵tea.”​—Loma 9:14-24.

9. (a) Ko oi e aofia i te “ipu o te kaitaua telā ne fai mō te fakamalepega”? (e) Kaia ne kufaki ei a Ieova i amioga a tino ‵teke, kae ne iku atu pefea tena kufaki ki te mauaga o mea ‵lei mō tino kolā e a‵lofa ki a ia?

⁹ Talu mai te ‵tekeatuga i Etena, e fai so se tino telā ne ‵teke atu ki a Ieova mo ana tulafono mo fai se “ipu o te kaitaua telā ne fai mō te fakamalepega.” Talu mai te taimi tenā, ko leva eiloa ne kufaki a Ieova. Ne fakatauemu atu a tino ma‵sei ki ana faifaiga, ne fakasauā atu ki ana tavini, kae ne tamate atu foki tena Tama. Ne fa‵ki a Ieova i ei, kae ne tuku mai ne ia se avanoaga mō tino katoa ke lavea atu a ikuga ma‵sei o te ‵teke atu ki te Atua mo te ‵tu tokotasi o tino pule mai i a ia. E auala i te mate o Iesu, ne mafai foki ei o fakaola a tino faka‵logo kae “fakamalepe a te galuega a te Tiapolo.”​—1 Ioane 3:8; Epelu 2:14, 15.

10. Kaia ne fa‵ki ei a Ieova i amioga a tino ma‵sei i te 1,900 tausaga ko ‵teka atu nei?

¹⁰ Talu mai te toetuga o Iesu i te 1,900 tausaga ko ‵teka, ne fa‵ki eiloa a Ieova i “ipu o te kaitaua,” kae ne seki tamate fakavave atu latou. Kaia? A te pogai e tasi ne fai ei penā, me ko fakatoka ne ia a tino kolā ka ‵kau fakatasi mo Iesu Keliso i tena Malo faka-te-lagi. E toko 144,000 a tino ko fai mo fai ne “ipu o te alofa tauanoa” kolā ne faipati ki ei a te apositolo ko Paulo. Ne filifili muamua a nisi tino Iutaia ke ‵kau atu ki te potukau faka-te-lagi tenā. Fakamuli ifo, ne ‵kami atu ei ne te Atua a tino mai Fenua Fakaa‵tea. Ne seki faimālō ne Ieova a tino katoa konā ke tavini atu ki a ia. Ne tuku atu ne ia ki nisi tino kolā ne fakaasi atu te lotou loto fakafetai ki ana meaalofa, a te tofiga taulia ke pule fakatasi mo tena Tama i tena Malo faka-te-lagi. Ko tai oti atu nei te fakatokatokaga o te potukau faka-te-lagi tenā.​—Luka 22:29; Fakaasiga 14:1-4.

11. (a) Se a te potukau telā ko manuia nei ona ko te kufaki o Ieova? (e) Ka manuia pefea a tino ‵mate?

¹¹ Kae se a te fakamoemoega mō tino kolā ka ‵nofo atu i te lalolagi? Ona ko te kufaki o Ieova, ne tuku mai foki i ei se avanoaga ke fakamaopoopo mai “te vaitino tokouke” mai fenua katoa. Ko lau nei latou i miliona. Ne tauto mai Ieova me ka tumau te potukau faka-te-lalolagi tenei i te ola māfai ko fakaseai atu te lalolagi tenei kae e fakamoe‵moe latou ke ola ki te se-gata-mai i te lalolagi palataiso. (Fakaasiga 7:9, 10; Salamo 37:29; Ioane 10:16) I te taimi tonu o te Atua, ka toe fakaola ne ia a tino ‵mate kae ka avatu ki a latou te avanoaga ke fai mo fai ne tino kolā ka ‵nofo atu i te lalolagi mai lalo i tena Malo faka-te-lagi. Ne ‵valo mai penei te Muna a te Atua i te Galuega 24:15: “Me i tino ‵lei mo tino sē ‵lei, ka faka‵tu mai katoa mai te mate.”​—Ioane 5:28, 29.

12. (a) Se a te mea ko iloa ne tatou e uiga ki a Ieova ona ko tena fa‵ki i amioga ma‵sei? (e) E pefea ou lagonaga e uiga ki mea kolā ne fai ne Ieova?

¹² E mata, ne seki fakamaoni a Ieova i ana faiga konā? Ne fakamaoni eiloa, me i te fakatalave o te fakaseaiga o tino ma‵sei, io me ko “ipu o te kaitaua,” ko fakaasi atu ei ne ia tena alofa ki nisi tino, e ‵tusa loa mo ana fuafuaga. E fakaasi mai i ei tena alofa fakamagalo mo tena alofa ‵nau. E se gata i ei, ko lava loa te taimi ke lavea atu ei te fakataunuga o ana fuafuaga kae ko uke foki ‵tou mea e iloa e uiga ki a Ieova. E ofo tatou i vaega kese‵kese o ana uiga kolā e fakaasi mai​—ko tena fakamaoni, tena alofa fakamagalo, tena loto kufaki, mo tena poto telā e fakaasi atu i auala kese‵kese. Ka tumau ki te se-gata-mai te fakamaoniga me e sili atu te ‵lei o te pulega a Ieova i lō nisi pulega ona ko te auala ne ‵teu aka ei ne ia te kinauga tenei e uiga ki tena pulega sili. E lotoma‵lie tatou ki pati konei a te apositolo ko Paulo: “Tapa! Ko oko eiloa i te ‵poko o te maukoloa, mo te poto mo te malamalama o te Atua! E faigata o sukesukegina ana fakamasinoga, e faigata foki o iloa ona auala.”​—Loma 11:33.

Avanoaga ke Fakaasi Atu ‵Tou Fakamaoni

13. Kafai e logo‵mae tatou i ‵tou fakalavelave, se a te avanoaga ko maua ne tatou i ei, kae se a te mea ka fesoasoani mai ke fai ei tatou ke ‵poto?

¹³ E logo‵mae sāle a tavini e tokouke a te Atua i olotou fakalavelave. Koi logo‵mae latou me e seki tamate ne te Atua a tino ma‵sei kae seki fakafou aka foki ne ia te olaga e pelā mo mea kolā ko oti ne ‵valo mai. E mata, e ‵tau o loto ma‵sei tatou i ei? Io me e ma‵natu aka tatou me konā loa avanoaga ke fakaasi atu ei ne tatou me i te Tiapolo se tino loi? E mafai o fakamalosigina tatou ke fai penā māfai e masaua faeloa ne tatou te fakamolemole tenei: “Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino telā e fakamasei ne ia au.” (Faataoto 27:11) Ne fakaitaita atu Satani ki a Ieova, kae ne fai atu me kafai e ‵galo a kope o tino io me ko ma‵saki latou, ka ‵losi atu latou ki te Atua kae ka muna ma‵sei foki latou ki a ia. (Iopu 1:9-​11; 2:4, 5) E fakafia‵fia atu tatou ki te loto o Ieova māfai e fakamaoni faeloa tatou ki a ia faitalia a mea faiga‵ta kolā e oko mai, me e fakaasi atu ei a te sē ‵tonu o pati konā a Satani.

14. Kafai e fakalago‵lago atu tatou ki a Ieova i taimi e tofotofogina ei tatou, ne a mea aogā ka maua ne tatou i ei?

¹⁴ Kafai e fakalago‵lago atu tatou ki a Ieova i te taimi e fe‵paki ei tatou mo tofotofoga, e mafai o fakamalosi aka i ei ne tatou a nisi uiga tāua. Ne fatoā ‘tauloto ne Iesu te olaga fakalogo muna’ ona ko mea kolā ne logo‵mae a ia i ei. E mafai foki ne tatou o maua te loto ‵mau mo te loto kufaki mai i tofotofoga kolā e oko mai ki a tatou, kae ka sili atu foki te loto fakafetai o tatou ki faifaiga amio‵tonu a Ieova.​—Epelu 5:8, 9; 12:11; Iakopo 1:2-4.

15. Se a te aogā ki nisi tino māfai e fa‵ki tatou i tofotofoga?

¹⁵ Ka matea foki ne nisi tino a mea kolā e fai ne tatou. Kafai ko lavea ne latou a mea kolā e fa‵ki tatou i ei ona ko te fia‵fia o tatou ki te amiotonu, kāti e mafai ei o iloa ne nisi tino me ko oi a Kelisiano ‵tonu i aso nei. Kae kafai e ‵kau mai latou ki a tatou i te faiga o te tapuakiga, e mafai ei ne latou o fakamoe‵moe ke maua a fakamanuiaga o te ola se-gata-mai. (Mataio 25:34-​36, 40, 46) E ma‵nako a Ieova mo tena Tama ke maua ne tino te avanoaga tenā.

16. E fetaui ‵lei pefea te ‵tou kilokiloga ki ‵tou fakalavelave mo te ‵tou ‵kau fakatasi?

¹⁶ E pefea te ‵lei ke ‵kilo atu tatou ki fakalavelave faiga‵ta e pelā me ne avanoaga ke fakaasi atu ei ‵tou loto fakamaoni ki a Ieova kae ke fai foki ‵tou tusaga i te fakataunuga o tena loto! Ka fakaasi atu ne tatou i ei me ko kamata o ‵kau fakatasi tatou mo te Atua mo Keliso. Ne ‵talo atu a Iesu ki a Ieova e uiga ki Kelisiano ‵tonu katoa, penei: “E se fakapito fua taku ‵talo mō latou konei [ko ana soko kolā ne ‵kau atu ki a ia i te taimi tenā], kae mō latou foki kolā e fakatuanaki ki a au ona ko te talaiga a latou. Ko te mea ke tasi latou katoa, e pelā mo koe te Tamana e i loto i a au, mo au foki e i loto i a koe, ke tasi foki latou i loto i a taua; ko te mea ke tali‵tonu te lalolagi me ne uga mai ne koe au.”​—Ioane 17:20, 21.

17. Kafai e fakamaoni tatou ki a Ieova, se a te mea e tali‵tonu tatou me ka tupu?

¹⁷ Kafai e fakamaoni tatou ki a Ieova, ka gali ‵ki ‵tou taui. Ne fai mai tena Muna, penei: “Tela la e oku taina fagasele, ke ‵mautakitaki koutou, sa gasue‵sue, kae ke ga‵lue malosi koutou i te galuega a te Aliki, me ko iloa ‵lei ne koutou me se mafai o māumāu otou galuega i te Aliki.” (1 Kolinito 15:58) “Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia.” (Epelu 6:10) E fai mai foki penei te Iakopo 5:11: “E taku ne tatou latou me e fia‵fia, i te mea e loto kufaki latou. Ko oti ne lagona ne koutou te kufaki o Iopu, ka ko iloa foki ne koutou i te Aliki ne fesoasoani atu ki a ia i te fakaotiga. Me i te Aliki e ‵fonu i te alofa ‵nau mo te alofa fesoasoani.” Se a te mea ne tupu ki a Iopu? “Ne fakamanuia ne te Aliki te vaega fakaoti o te olaga o Iopu, e silia atu i te fakamanuiaga muamua.” (Iopu 42:10-16) E “tuku atu foki ne ia [ko Ieova] te taui ‵lei ki tino kolā e salasala ki a ia.” (Epelu 11:6) Ko tafaga la te gali o te taui e fakamoe‵moe tatou ki ei​—ko te ola se-gata-mai i te lalolagi palataiso!

18. E mata, ka toe masaua ne tatou a mea kolā ne logo‵mae tatou i ei i aso mua?

¹⁸ Ka faka‵lei aka ne te Malo o te Atua a fakama‵seiga katoa kolā ne fai ki tino i te lalolagi i te fia tausaga ko ‵teka atu. Ka sili fakafia atu a mea kolā ka fia‵fia tatou ki ei i lō logo‵maega kolā ko oko mai nei ki a tatou. Ka se toe fakamakosu te tokagamalie o tatou ona ko te mafau‵fau ki mea kolā ne logo‵mae tatou i ei i aso mua. Ka ‵fonu a aso takitasi i manatu mo faifaiga fakamalosi loto i te lalolagi fou kae ka fai ei ke puli i a tatou a mea ma‵sei kolā ko oti ne ‵tupu. Muna a Ieova: “Ko toe faite nei ne au se lalolagi fou [se potukau o tino amio‵tonu] mo [te] lagi fou [se Malo fou faka-te-lagi telā ka pule mai ki tino katoa]. A mea ne ‵tupu i aso ko ‵teka ka se toe manatua eiloa. Ke ‵lifu kae fia‵fia koutou ki te se gata mai i mea ne faite ne au.” E tonu, ka taku atu ne tino amio‵tonu a pati konei i te lalolagi fou a Ieova: “Nei, ko fatoā filemu te lalolagi kātoa, mo tino katoa foki ko usu pese mo te fia‵fia.”​—Isaia 14:7; 65:17, 18.

Ke Toe Sau‵tala ki Manatu Konei

• E tiga eiloa ne talia ne Ieova a amioga ma‵sei, ne fakaasi atu foki pefea ne ia te āva ki tena igoa?

• Ne aogā pefea te fa‵ki o te Atua i “ipu o te kaitaua” ko te mea ke oko mai foki ki a tatou tena alofa fakamagalo?

• Ne a mea e ‵tau o taumafai tatou ke maina i ei māfai ko logo‵mae tatou?

[Ata i te itulau e 67]

“Ne fakamanuia” ne Ieova “te vaega fakaoti o te olaga o Iopu, e silia atu i te fakamanuiaga muamua”