Mataupu e Sefulufa

E Takitaki Pefea ne Ieova Tena Fakapotopotoga?

1. Ne a fakamatalaga e uiga ki te fakapotopotoga a Ieova e fakaasi mai ne te Tusi Tapu, kae kaia e tāua ei a mea konā ki a tatou?

E MATA, e isi se fakapotopotoga a te Atua? E fai mai te Tusi Tapu, telā ne tusi mai lalo i te takitakiga a te agaga tapu, me e isi sena fakapotopotoga. E fakamatala mai ne ia i tena Muna se tamā ata foliki fua o te vaega faka-te-lagi o te fakapotopotoga fakaofoofogia tenā. (Esekielu 1:1, 4-14; Tanielu 7:9, 10, 13, 14) E tiga eiloa e se mafai o lavea ne tatou te vaega tenā, e maua ne tino tapuaki ‵tonu i aso nei a mea aogā mai i ei. (2 Tupu 6:15-17) E isi foki se vaega matea o te fakapotopotoga a Ieova i te lalolagi nei. E fesoasoani mai te Tusi Tapu ke malama‵lama tatou i te fakapotopotoga tenā, penā foki loa mo te auala e takitaki ei ne Ieova te mea tenā.

Te Vaega Matea o te Fakapotopotoga a Ieova

2. Se a te fakapotopotoga fou telā ne fakatu aka ne te Atua?

² Ne fai te atufenua o Isalaelu mo fai te fakapotopotoga a te Atua i tausaga e 1,545. (Galuega 7:38) Kae ne seki tumau te kau Isalaelu i te faka‵logo ki tulafono a te Atua kae ne ‵teke atu foki latou ki tena Tama. Ne ‵teke atu ei a Ieova ki te fakapotopotoga tenā kae ne tiakina foki ne ia. Ne fai atu a Iesu ki te kau Iutaia, penei: “Nei la, e maofa valevale te otou fenua.” (Mataio 23:38) Ne fakatu aka ne te Atua se fakapotopotoga fou, telā ne fai ne ia ki ei se feagaiga fou. E aofia te toko 144,000 i te fakapotopotoga tenei. Kae ne filifili aka ne te Atua latou ke ‵kau fakatasi mo tena Tama i te lagi.​—Fakaasiga 14:1-4.

3. Se a te mea ne tupu i te Penitekoso i te 33 T.A., telā ne fai mo fai se fakamaoniga me ko fakaaogā ne te Atua se fakapotopotoga fou?

³ Ne fakaeke ki te agaga tapu o Ieova a tino muamua o te fakapotopotoga fou tenā i te Penitekoso i te 33 T.A. E fai‵tau tatou e uiga ki te tala fakaofoofogia tenā, penei: “Ne maopoopo katoa ki te koga e tasi a tino tali‵tonu, i te okoga ki te Aso Penitekoso. I mo taimi foki eiloa konā, ne lagona ne latou te ‵gulu mai luga i te lagi e pelā eiloa mo se afā ko agi, tofu katoa ei te fale i te laumatagi tenā. Telā, lavea ei ne latou a ulagā afi e foliga mai e pelā mo ne alelo e pa‵tele mai ki a latou takitokotasi. Ko ‵fonu latou katoa i te Agaga Tapu.” (Galuega 2:1-4) Tela la, ne tuku mai ne te agaga o te Atua se fakamaoniga manino, me ko fai nei latou mo fai te potukau o tino kolā e fakaaogā ne te Atua, ke fakataunu tena fuafuaga mai lalo i te takitakiga a Iesu Keliso i te lagi.

4. Ko oi e aofia i te fakapotopotoga matea a Ieova i aso nei?

⁴ I aso nei, se ‵toega fua o te toko 144,000 koi ‵nofo mai i te lalolagi nei. Kae i te fakataunuga o te valoaga i te Tusi Tapu, ko lau nei i miliona a “te vaitino tokouke” o ‘nisi mamoe’ kolā ko ‵kau fakatasi mo te ‵toega fakaekegina. Ko oti ne tuku fakatasi ne Iesu, te Tausi Mamoe ‵Lei, a nisi mamoe konei mo te ‵toega ko te mea ke tasi te lafu mamoe mai lalo i a ia e pelā me ko te lotou Tausi Mamoe e tokotasi. (Fakaasiga 7:9; Ioane 10:11, 16) E fai latou katoa konei mo fai te fakapotopotoga matea a Ieova telā e ‵kau fakatasi.

Te Vaegā Fakapotopotoga Telā e Pule ki ei te Atua

5. Ko oi e takitaki ne ia te fakapotopotoga a te Atua, kae e pefea la?

⁵ A te tugāpati “ko te ekalesia a te Atua ola” e fakaasi faka‵lei mai i ei a te tino telā e takitaki ne ia te fakapotopotoga tenā. E pule atu te Atua ki ei. E tuku mai ne Ieova a takitakiga mō ana tino e auala i a Iesu, penā foki loa mo Tena Muna ko te Tusi Tapu. Kae ne ‵tofi aka ne Ia Iesu ke fai mo fai te Ulu sē matea o te fakapotopotoga tenā.​—1 Timoteo 3:14, 15; Efeso 1:22, 23; 2 Timoteo 3:16, 17.

6. (a) Ne fakaasi atu pefea te takitakiga mai te lagi ki te fakapotopotoga i aso o te kau apositolo? (e) Ne a mea e fakaasi mai me koi fai eiloa a Iesu mo fai te Ulu o te fakapotopotoga?

⁶ Ne lavea ‵tonu atu te vaegā takitakiga tenā i te Penitekoso. (Galuega 2:14-18, 32, 33) Ne fakaasi mai te mea tenā i te taimi ne takitaki ei ne agelu a Ieova a te fakasalalauatuga o te tala ‵lei i Afelika, te taimi ne tuku atu ei ne Iesu a takitakiga i te taimi ne ‵fuli ei a Saulo mai i Taso, mo te taimi ne kamata ei ne Petelu te galuega talai ki tino o Fenua Fakaa‵tea. (Galuega 8:26, 27; 9:3-7; 10:9-16, 19-22) Fakamuli loa, ne seki toe lagona atu se leo mai te lagi, ne seki toe lavea atu agelu, kae ne seki toe maua foki a meaalofa fakaofoofogia mai te agaga. Kae ne folafola mai a Iesu, penei: “Kiloke! Au e fakatasi faeloa mo koutou, ke oko eiloa ki te gataga o te lalolagi.” (Mataio 28:20; 1 Kolinito 13:8) I aso nei, e talia ne Molimau a Ieova te takitakiga a Iesu. Moi se maua ne latou te takitakiga tenā, penei ko se mafai eiloa ne latou o folafola atu te fekau o te Malo māfai ko fe‵paki latou mo ‵tekemaiga matagā.

7. (a) Ko oi e aofia i “te tavini fakamaoni kae poto,” kae kaia? (e) Se a te tofiga ne tuku atu ki te “tavini” tenā?

⁷ Mai mua faeloa o tena mate, ne fai atu a Iesu ki ana soko e uiga ki “te tavini fakamaoni kae poto” telā ne tuku atu ne tena Pule, ko Iesu, se tiute fakapito ki a ia. Ne nofo mai te “tavini” tenā i te taimi ne fanaka ei te Aliki ki luga i te lagi. Kae ne ‵tau o tumau eiloa i tena galuega ke oko ki te taimi e foki mai ei a Keliso i tena Malo i te feitu sē matea. E se mafai o fakauiga te fakamatalaga tenā ki se tino e tokotasi. Kae e fakauiga i ei ki te kau fakaekegina, ko te fakapotopotoga a Keliso. Ona ko te mea ne ‵togi ne Iesu a tino konā ki tena toto, ne taku ne ia latou ko tena “tavini.” Ne fakatonu atu a ia ki sui o te fakapotopotoga tenā ke fai a nisi tino mo fai ne soko kae ke fagai sāle latou ki “meakai [faka-te-agaga] i te taimi tonu.”​—Mataio 24:45-47; 28:19; Isaia 43:10; Luka 12:42; 1 Petelu 4:10.

8. (a) Ne a tiute ko maua nei ne te tavini? (e) Kaia e tāua ei ‵tou kilokiloga ki akoakoga kolā e tuku mai ne te Atua?

⁸ Ona ko te mea ne fai eiloa ne te potukau, telā e fai pelā me se tavini, a te galuega a te lotou Pule i tena fokimaiga i te feitu sē matea i te 1914, e maua eiloa a fakamaoniga me ko oti ne tuku atu ki te tavini tenā a nisi tiute e uke i te 1919. Talu mai te taimi tenā, ne fai faeloa te galuega talai e uiga ki te Malo i te lalolagi kātoa, kae ne fakamaopoopo mai i ei se vaitino tokouke o tino tapuaki ki a Ieova kolā e fakamoe‵moe ke ‵sao atu latou i te fakalavelave lasi. (Mataio 24:14, 21, 22; Fakaasiga 7:9, 10) E ‵tau foki o maua ne tino konei a mea‵kai faka-te-agaga, kae e avatu eiloa ne te potukau pelā me se tavini a meakai konā ki a latou. Tela la, e ‵tau o talia ne tatou a akoakoga kolā e tuku mai ne Ieova i te auala tenei kae ke ola foki e ‵tusa mo mea konā, māfai e fia fakafiafia atu tatou ki a Ieova.

9, 10. (a) I aso o te kau apositolo, ne tali pefea a fesili e uiga ki akoakoga mo te faiga o fakatokaga i te talaiatuga o te tala ‵lei? (e) Se a te fakatokaga telā e fakaaogā i te faiga o galuega a tino o Ieova i aso nei?

⁹ I nisi taimi, e ‵sae aka a fesili e uiga ki akoakoga mo faifaiga a te fakapotopotoga. Ne a mea e ‵tau o fai ki ei? E fakaasi mai i te Galuega, te mataupu e 15, a te auala ne faka‵lei aka ei se kinauga e uiga ki tino mai Fenua Fakaa‵tea kolā ne ‵fuli ki te Lotu Kelisiano. Ne avaka te mataupu tenā ki te kau apositolo mo toeaina i Ielusalema, kolā ne aofia i te potukau pule. E tiga eiloa ne seki ‵lei katoatoa a tāgata konā, kae ne fakaaogā eiloa latou ne te Atua. Ne mafau‵fau faka‵lei latou ki tusi siki e uiga ki te mataupu tenā mo fakamaoniga o te gasuesuega a te agaga o te Atua i te ‵talaatuga o te avanoaga ki tino o Fenua Fakaa‵tea. Oti aka, ne fai ei ne latou se fakaikuga. Ne fakamanuia ne Ieova te faiga tenā. (Galuega 15:1-29; 16:4, 5) Ne ‵tofi aka foki ne te potukau pule a tino ke fai ne latou te galuega talai o te Malo i nisi fenua.

¹⁰ I aso nei, e aofia a taina fakaekegina mai fenua kese‵kese i te Potukau Pule o te fakapotopotoga matea a Ieova, kae e ‵nofo atu latou i te laumua o Molimau a Ieova. Mai lalo i te takitakiga a Iesu Keliso, e fesoasoani atu te Potukau Pule ki te faiga o te tapuakiga tonu ke gasolo atu ki mua i fenua katoa. Kae e fakatoka foki ne latou te galuega talai a Molimau a Ieova i te fia sefulu afe o fakapotopotoga. E ‵pau te kilokiloga a tino i te Potukau Pule mo te kilokiloga a te apositolo ko Paulo, telā ne tusi atu penei ki ana taina Kelisiano: “E se ko tona uiga i a au e manatu o fia pule mālō atu ki te otou talitonuga, i te mea e ‵mautakitaki te otou fakatuanaki.”​—2 Kolinito 1:24.

11. (a) E ‵tofi aka pefea a toeaina mo tavini fakafaifeau? (e) Kaia e ‵tau ei o fia‵fia tatou ke ga‵lue fakatasi mo tino kolā ko oti ne ‵tofi aka?

¹¹ E fakalago‵lago atu a Molimau a Ieova i te lalolagi kātoa ki te Potukau Pule, ke filifili aka a taina kolā e fetaui ‵lei, ke ‵tofi aka ne latou a toeaina mo tavini fakafaifeau ko te mea ke tausi atu ki fakapotopotoga takitasi. E fakaasi mai i te Tusi Tapu me ko oi a tāgata e ‵tau o ‵tofi aka, faitalia me e se ‵lei katoatoa latou kae fai mea ‵se foki. I mua o te Atua, e ‵mafa ‵ki eiloa te tiute o tino kolā e avaka ne latou a igoa o tāgata ke ‵tofi aka, penā foki loa mo tino kolā e ‵tofi aka ne latou a tāgata konā. (1 Timoteo 3:1-10, 12, 13; Tito 1:5-9) Tela la, e ‵talo atu latou mō te fesoasoani o te agaga tapu o te Atua kae ‵sala atu foki ki takitakiga mai te Muna a te Atua. (Galuega 6:2-4, 6; 14:23) Ke na fakaasi atu ne tatou te ‵tou loto fakafetai mō “meaalofa” konei, me e fesoasoani mai latou ke ‘tasi tatou i te ‵tou fakatuanaki.’​—Efeso 4:8, 11-16.

12. E fakaaogā pefea ne Ieova a fāfine i tena fakapotopotoga?

¹² E fai mai te Tusi Tapu me e ‵tau fua o tausi ne tāgata te fakapotopotoga. E se fakasēaogā i ei a fāfine, me e aofia a nisi fāfine i sui o te Malo faka-te-lagi, kae e ga‵lue malosi foki latou i te galuega talai. (Salamo 68:11) Mai te tausi atu foki mo te fakamaoni ki olotou tiute faka-te-kāiga, e fesoasoani atu a fāfine ki te faiga ke momea aka te ‵lei o te ata o te fakapotopotoga. (Tito 2:3-5) Kae e fai fua ne tāgata kolā ko oti ne ‵tofi aka a te faiga o akoakoga i loto i te fakapotopotoga.​—1 Timoteo 2:12, 13.

13. (a) Se a te fakatonuga i te Tusi Tapu ki toeaina e uiga ki olotou tulaga? (e) Se a te tulaga taulia e mafai o maua ne tatou katoa?

¹³ I te lalolagi nei, e tāua ‵ki eiloa te tino telā e maluga tena tulaga. Kae tenei te tulafono i te fakapotopotoga a te Atua: “A te tino telā e se taulia i a koutou katoa, ko te tino tenā e sili i te maluga.” (Luka 9:46-48; 22:24-26) E fakatonu atu te Tusi Tapu ki toeaina ke mo a ma pule fakasauā atu ki tino o te Atua kae ke fai latou mo fai ne fakaakoakoga ‵lei ki te lafu mamoe. (1 Petelu 5:2, 3) E maua ne Molimau katoa a Ieova te tulaga taulia ke fai latou mo fai ne sui o te Pule Tafasili i te Maluga, mai te fai‵pati atu i tena igoa mo te fakamatala atu foki ki tino i koga katoa a mea e uiga ki tena Malo. Kae e se ko nāi tino fua ne filifili aka ke fai penā.

14. Mai te fakaaogāga o tusi siki konei, ke sau‵tala ki fesili kolā e maua i te fakaotiga o te palakalafa.

¹⁴ Se mea ‵lei ke fesili ifo tatou penei: ‘E mata, e fakatāua malosi ne au te auala e takitaki ei ne Ieova tena fakapotopotoga matea? E mata, e fakaasi atu te mea tenā i oku uiga, aku pati, mo aku faifaiga?’ A te mafaufau ‵loto ki manatu mai lalo nei e mafai o fesoasoani mai ki a tatou taki tokotasi ke tali faka‵lei a fesili konā.

Kafai e fakalogo tonu eiloa au ki a Keliso, e pelā me ko te Ulu o te fakapotopotoga, ne a aku mea ka fai e ‵tusa loa mo tusi siki konei? (Mataio 24:14; 28:19, 20; Ioane 13:34, 35)

Kafai e talia ne au mo te loto fiafia a fakatokaga faka-te-agaga kolā e tuku mai e auala i te potukau, telā e fai pelā me se tavini, fakatasi mo tena Potukau Pule, ko oi e āva tonu atu au ki ei? (Luka 10:16)

E ‵tau o pefea a faifaiga a tino katoa i te fakapotopotoga ki nisi tino, kae maise eiloa a toeaina? (Loma 12:10)

15. (a) E auala i ‵tou manatu e uiga ki te fakapotopotoga matea a Ieova, se a te mea e fakaasi atu ne tatou? (e) Ne a avanoaga e maua ne tatou ke fakamaoni atu ei me i te Tiapolo se tino loi kae ke fakafiafia foki ne tatou i ei te loto o Ieova?

¹⁵ E takitaki ne Ieova tatou i aso nei e auala i tena fakapotopotoga matea telā e pule ne Keliso. E fakaasi mai ne ‵tou manatu e uiga ki te fakatokaga tenei me e ‵kau atu tatou ki a ai i te kinauga e uiga ki te pulega sili. (Epelu 13:17) E fai atu Satani me e fakamuamua fua ne tatou ‵tou manakoga. Kae kafai e lotoma‵lie tatou ke tavini atu i so se auala kae ‵kalo keatea foki mai i te fia lauiloa, e fakamaoni atu ei ne tatou me i te Tiapolo se tino loi. Kafai e a‵lofa kae āva tatou ki tino kolā e fai ne latou te takitakiga i a tatou, kae e ‵teke atu foki ki te ‘tavae fakaloiloi ko te mea ke maua mai ne ‵tou mea,’ e fai ei ne tatou a Ieova ke fiafia. (Iuta 16; Epelu 13:7) Mai te fakamaoni ki te fakapotopotoga a Ieova, e fakaasi atu ei ne tatou me i a Ieova ko te ‵tou Atua, kae e ‵kau fakatasi foki tatou i te tapuaki atu ki a ia.​—1 Kolinito 15:58.

Ke Toe Sau‵tala ki Manatu Konei

• Se a te fakapotopotoga matea a Ieova i aso nei? Se a tena aogā?

• Ko oi ne ‵tofi aka mo fai te Ulu o te fakapotopotoga, kae ne a fakatokaga matea e fakaaogā sāle ne ia ke takitaki ei tatou mo te alofa?

• Ne a uiga ‵gali e ‵tau o fakaasi atu ne tatou ki tino i te fakapotopotoga a Ieova?

[Fakamatalaga o te Ata i te itulau e 133]

E takitaki ne Ieova tatou e auala i tena fakapotopotoga matea telā e pule ne Keliso