Ke Fakamaoni ki a Keliso mo Tena Tavini Fakamaoni

“Tona pule . . . e fili ne ia a te tavini tenā, ke pule i ana mea katoa.”​​—⁠MATAIO 24:​45-​47.

1, 2. (a) Ko oi ‵tou Takitaki e ‵tusa mo te mea e fakaasi mai i te Tusi Tapu? (e) Ne a mea e fakaasi mai me e gasuesue malosi eiloa a Keliso i te takitakiga o te fakapotopotoga Kelisiano?

“KE MO A e fakaigoa koutou ki ‘Takitaki’​​—⁠me e tokotasi fua te otou takitaki ko te Keliso!” (Mataio 23:​10) Ne fakamaina faka‵lei atu ne Iesu i pati konei ki ana soko me e seai se tino i te lalolagi nei e ‵tau o fai mo olotou takitaki. A te lotou takitaki fua e tokotasi e nofo i te lagi​​—⁠ko Iesu Keliso. Ko te Atua eiloa ne fakasopo ne ia a Iesu ki te tulaga tenei. Ne fakatu ake ne Ieova a “Keliso mai te mate, . . . kae ne tuku atu foki a ia ki te ekalesia [telā ko tena foitino] ke fai mo Aliki sili o mea katoa.”​​—⁠Efeso 1:​20-​23.

² Ona ko Keliso ko te “Aliki sili o mea katoa” i loto i te fakapotopotoga Kelisiano, e pule atu a ia ki mea katoa kolā e fai i loto i te fakapotopotoga. E seai se mea e fai ke se iloa ne ia i loto i te fakapotopotoga. E onoono faka‵lei a ia ki te tulaga faka-te-agaga o potukau o Kelisiano, io me ko fakapotopotoga. E manino faka‵lei a te mea tenei i te fakaasiga telā ne tuku atu ki te apositolo ko Ioane i te fakaotiga o te senitenali muamua T.A. Ne fai fakalima atu a Iesu ki fakapotopotoga e fitu me e iloa ne ia olotou mea e fai, olotou feitu ‵lei mo olotou vāivāiga, kae polopoloki io me fakamalosi atu ne ia latou e ‵tusa mo mea konā. (Fakaasiga 2:​2, 9, 13, 19; 3:​1, 8, 15) E tali‵tonu katoatoa tatou me ne iloa foki ne Keliso a te tulaga faka-te-agaga o nisi fakapotopotoga i Asia Foliki, Palesitina, Sulia, Papelonia, Eleni, Italia mo nisi koga. (Galuega 1:⁠8) Kae pefea la i aso nei?

Se Tavini Fakamaoni

3. Kaia e fetaui ‵lei ei ke fakatusa a Keliso ki se ulu kae ko tena fakapotopotoga ki se foitino?

³ Mai tua o tena toe fakatuakega kae mai mua malie o tena fanakaga ki tena Tamana i te lagi, ne fai atu a Iesu ki ana soko: “Ko oti ne tuku mai ki a au a te pule kātoa i te lagi mo te lalolagi.” Ne toe fai mai foki a ia: “Kiloke! Au e fakatasi faeloa mo koutou, ke oko eiloa ki te gataga o te lalolagi.” (Mataio 28:​18-​20) Ne tumau eiloa a ia i te fai mo fai te lotou Ulu. I ana tusi ki Kelisiano i Efeso mo Kolose, ne fakatusa ne te apositolo ko Paulo a te fakapotopotoga Kelisiano ki se “foitino,” telā e fai a Keliso mo fai te Ulu i ei. (Efeso 1:​22, 23; Kolose 1:​18) E fai mai The Cambridge Bible for Schools and Colleges me i te fakatusa tenei “e se fakasino atu fua ki te tāua o te ‵kau fakatasi mo te Ulu, kae e fai a mea e loto a te Ulu ki ei e auala i ana tino. A latou ko ana mea faigaluega.” Ko oi a tino ne fakaaogā ne Keliso e pelā me ne ana mea faigaluega talu mai te taimi ne tuku atu ei ki a ia te Malo i te 1914?​​—⁠Tanielu 7:​13, 14.

4. E ‵tusa mo te valoaga a Malaki, ne a mea ne maua aka ne Ieova mo Keliso i te taimi ne o‵mai ei laua o iloilo aka te faletapu faka-te-agaga?

⁴ Ne ‵valo mai a Malaki me i a Ieova, “te Aliki [tonu],” fakatasi mo tena “ave fekau” o te feagaiga, ko tena Tama, ko Keliso Iesu telā ne fatoā fakasopo aka mo fai te tupu, ka o‵mai o fakamasino kae iloilo a Tena “Faletapu,” io me ko tena fale tapuaki fakatusa. A te “taimi” tonu mō te kamataga o te ‘fakamasinoga o te fale o te Atua’ ne oko mai eiloa i te 1918.a (Malaki 3:1; 1 Petelu 4:​17) A tino kolā ne fai mai me ne sui ne latou te Atua mo te tapuakiga tonu i te lalolagi nei ne iloilo faka‵lei aka. Ne seki talia a lotu Kelisiano ‵Se kolā ne akoako atu ne latou i te fia o senitenali a akoakoga faka-sē-āva e uiga ki te Atua, kae kolā ne aofia malosi foki i te fakatau tamatega o tino i te Taua Muamua a te Lalolagi. Ne tofotofo aka i ei te ‵toega o Kelisiano fakamaoni, ne faka‵ma kae taliagina ke fai latou e pelā me ne “faitaulaga ko te mea ke aumai ne latou ki [a Ieova] a taulaga ‵lei.”​​—⁠Malaki 3:⁠3.

5. E ‵tusa mo te valoaga a Iesu e uiga ki tena ‘fakatasi mai,’ ko oi ne fai mo fai te “tavini” fakamaoni?

⁵ E ‵tusa mo te valoaga a Malaki, e aofia i te fakailoga telā ne tuku atu ne Iesu ki ana soko ke iloa ne latou te taimi o ‘tena fakatasi mai mo te gataga o te lalolagi’ ne aofia i ei te fakailoga ke matea ne latou te “tavini” e pelā me se potukau. Ne fai mai a Iesu: “Ko oi te tavini fakamaoni kae poto? Ko ia telā ko oti ne fili ne tona pule ke pule i isi tavini, kae fakasoa atu foki ne ia olotou meakai i te taimi tonu. Amutia a te tavini tenā, manafai e foki mai tena pule e galue faeloa a ia. Au e fai ‵tonu atu ki a koutou, a te pule e fili ne ia a te tavini tenā, ke pule i ana mea katoa.” (Mataio 24:​3, 45-​47) I te taimi ne “foki mai” ei ke iloilo aka te “tavini” tenā i te 1918, ne maua ne Keliso se ‵toega o soko fakaekegina ki te agaga tapu kolā ne fakaaogā ne latou te mekesini tenei fakatasi mo nisi tusi faka-te-Tusi Tapu talu mai te 1879 ke fakasoa atu i ei a ‘meakai faka-te-agaga i te taimi tonu.’ Ne talia ne ia latou e pelā me se mea faigaluega, io me se “tavini,” kae tuku atu ne ia ke fakagalue ne latou ana mea katoa i te lalolagi.

Te Fakagaluega o Mea a Keliso i te Lalolagi

6, 7. (a) Ne a nisi tugāpati tai ‵kese ne fakaaogā ne Iesu e uiga ki te “tavini” fakamaoni? (e) Se a te uiga o te pati “situati” telā ne fakaaogā ne Iesu?

⁶ I nāi masina mai mua o tuku atu ne Iesu te valoaga e uiga ki te fakailoga o tena fakatasi mai, e aofia i ei te “tavini” telā ko tena sui i te lalolagi nei, ne faipati a ia e uiga ki te “tavini” tenei mai te fakaaogāga o nisi tugāpati tai ‵kese kolā ne fakamaina mai i ei a tiute o te tavini tenā. Ne fai mai a Iesu: “Ko oi la te [“situati,” NW] fakamaoni kae poto, telā ka ‵tofi ne tona pule ke fai mo ulu o te fale kātoa, kae ka fakasoa atu foki ne ia ki nisi tavini olotou meakai, i te taimi e ‵kai ei latou? E tonu, au e fai atu ki a koutou, i te pule ka fai ne ia a te tavini tenā, ke pule i ana mea katoa.”​​—⁠Luka 12:​42, 44.

⁷ E taku i konei a te tavini tenā ki te situati, se pati telā ne ‵fuli mai te pati Eleni kae e fakauiga ki “te menetia o se kāiga io me se laufenua.” A te potukau tenei, telā ko te situati, e se se potukau fua o tino ‵poto kolā e fakamatala mai ne latou a manatu fakafia‵fia mai te Tusi Tapu. I tafa o te fakatoka ne latou a meakai faka-te-agaga aogā “i te taimi tonu,” ne fili aka a “te tavini poto” tenei ke pule i tavini katoa a Keliso kae tausi atu ki mea katoa a Keliso i te lalolagi, ko “ana mea katoa.” Ne a la mea e aofia i ei?

8, 9. Ne a “mea” ne ‵tofi aka te tavini fakamaoni ke tausi atu ki ei?

⁸ E aofia i tiute o te tavini ko te tausiga o kope faka-te-foitino kolā e fakaaogā ne soko o Keliso ke fai ei te lotou galuega faka-Kelisiano, e pelā mo te laumua o Molimau a Ieova mo olotou ofisa lagolago, e pelā foki mo olotou koga tapuaki​​—⁠Kingdom Halls mo Assembly Halls​​—⁠i te lalolagi kātoa. E sili atu i mea konā, e fakatoka foki ne te tavini a polokalame faka-te-agaga o sukesukega faka-te-Tusi Tapu i vaiaso takitasi mo fono fo‵liki mo fono ‵lasi kolā e fai i nisi taimi. E tuku mai i vaegā maopoopoga penei, a fakamatalaga e uiga ki te fakataunuga o valoaga i te Tusi Tapu, mo fakatonutonuga e uiga ki te fakaaogāga o fakatakitakiga i aso takitasi o te olaga.

⁹ E aofia foki i tiute o te situati te tausi atu ki te ‵toe galuega tāua ko te talaiatuga o te “Tala ‵Lei tenei e uiga ki te Malo” mo te faiga o ‘soko mai tino o fenua katoa.’ E aofia i ei te akoakoga o tino ke fai a mea katoa kolā ne fakatonu mai a Keliso, te Ulu o te fakapotopotoga ke fai i te taimi tenei o te gataga. (Mataio 24:14; 28:​19, 20; Fakaasiga 12:17) Ona ko te galuega ko te talai mo te akoako atu, ne maua mai i ei te “vaitino tokouke” o taugasoa fakamaoni o te ‵toega o te kau fakaekegina. E mautinoa eiloa me ka aofia a ‘koloa tāua o malo katoa’ i “mea” tāua a Keliso kolā e tausi ne te tavini fakamaoni.​​—⁠Fakaasiga 7:9; Hakai 2:⁠7.

Te Potukau Pule Telā ko Tena Sui

10. Se a te potukau fai fakaikuga i te senitenali muamua, kae ne pokotia pefea i ei a fakapotopotoga?

¹⁰ E manino ‵lei me i tiute ‵mafa o te tavini e aofia i ei te faiga o fakaikuga e uke. I te kamataga o te fakapotopotoga Kelisiano, ne sui ne apositolo mo toeaina i Ielusalema a te tavini i te faiga o fakaikuga mō te fakapotopotoga Kelisiano kātoa. (Galuega 15:​1, 2) Ne fakaoko atu a ikuga a te potukau pule i te senitenali muamua ki fakapotopotoga e auala i tusi mo sui faima‵laga. Ne fia‵fia a Kelisiano i aso mua ke maua ne latou a fakatonuga ma‵nino penei, kae ko te lotou ‵kau fakatasi mo te potukau pule i mea konei ne ati aka i ei te filemu mo te fealofani i a latou.​​—⁠Galuega 15:​22-​31; 16:​4, 5; Filipi 2:⁠2.

11. Ko oi e fakaaogā ne Keliso i aso nei ke takitaki ei tena fakapotopotoga, kae e ‵tau o pefea te ‵tou kilokiloga ki te potukau o Kelisiano fakaekegina konei?

¹¹ E pelā mo taimi o Kelisiano i aso mua, e aofia i te Potukau Pule o soko o Keliso i te lalolagi i aso nei, se tamā potukau o ovasia kolā ne fakaeke ki te agaga tapu. E auala i te malosi o “tona lima fakaatamai,” e takitaki ne Keliso, te Ulu o te fakapotopotoga, a tāgata fakamaoni konei i te faiga o te galuega o te Malo. (Fakaasiga 1:​16, 20) I te tala o tena olaga, ne tusi mai a Albert Schroeder, se tokotasi telā ne aofia i te Potukau Pule i se taimi leva kae ne fatoā palele atu tena taviniga i te lalolagi nei, penei: “E fono faeloa a te Potukau Pule i Aso Tolu katoa, kae e kamata ki se ‵talo telā e fakamolemole atu ei ki a Ieova mō te takitakiga o tena agaga tapu. E fai a taumafaiga katoa ko te mea ke fetaui so se mea mo so se fakaikuga e fai mo te Muna a te Atua ko te Tusi Tapu.”b E mafai eiloa o tali‵tonu tatou ki Kelisiano fakaekegina kae fakamaoni konei. E uiga ki a latou, e ‵tau o tau‵tali tatou ki te fakatonuga a te apositolo ko Paulo: “Faka‵logo ki otou takitaki kae sasale foki i olotou fakatonuga. E se mapu eiloa latou i te tausiga o otou agaga.”​​—⁠Epelu 13:17.

Ke Fakaasi Atu te Āva ‵Tau ki te Tavini Fakamaoni

12, 13. Ne a pogai faka-te-Tusi Tapu e ‵tau ei o fakaasi atu ne tatou te āva ki te tavini fakamaoni?

¹² A te pogai tāua e tasi e ‵tau ei o fakaasi atu te āva ‵tau ki te tavini fakamaoni me kafai e fai penā, ko fakaasi atu i ei ne tatou a te āva ki te Pule, ko Iesu Keliso. Ne tusi mai a Paulo e uiga ki tino fakaekegina: “A te tino saoloto telā ko fai mo Kelisiano, se tavini a Keliso. A te Atua ne fakasaoloto ne ia koutou ki te mate o Iesu.” (1 Kolinito 7:​22, 23; Efeso 6:⁠6) Tela la, kafai e fakamaoni tatou o faka‵logo ki te fakatakitakiga a te tavini fakamaoni mo tena Potukau Pule, ko faka‵logo eiloa tatou ki a Keliso, te Pule o te tavini tenā. A te fakaasi atu o te āva ki te mea faigaluega a Keliso telā e fakaaogā ke tausi atu ki ana mea i te lalolagi se auala e tasi telā e “takutonu ne [tatou] katoa i a Iesu Keliso ko te Aliki, mō te vikiga o te Atua te Tamana.”​​—⁠Filipi 2:11.

¹³ A te suā pogai faka-te-Tusi Tapu e ‵tau o fakaasi atu ei te āva ki te tavini fakamaoni me e fakamatala mai i se auala fakatusa a Kelisiano fakaekegina i te lalolagi e pelā me se “faletapu” telā e faka‵fonu ne Ieova ki “tona Agaga.” Ona ko te mea tenā, e “tapu” latou. (1 Kolinito 3:​16, 17; Efeso 2:​19- ​22) Ko te potukau tapu eiloa tenei ne tuku atu ne Iesu ke tausi ne latou ana mea i te lalolagi, ko tena uiga e isi ne aiā mo tiute i loto i te fakapotopotoga Kelisiano e pule katoatoa atu ki ei te tavini tenei. Ona ko te pogai tenei, e ‵kilo atu a tino katoa i te fakapotopotoga ki te mea tenā, e pelā me se tiute ‵malu ke tau‵tali kae ‵lago ki te fakatakitakiga e maua mai te tavini fakamaoni mo tena Potukau Pule. E tonu, e ‵kilo atu a ‘nisi mamoe’ ki ei e pelā me se tauliaga tonu ke fesoasoani atu ki te tavini tenei i te tausi atu ki mea a tena Pule.​​—⁠Ioane 10:⁠16.

Ke ‵Lago Atu mo te Fakamaoni

14. E pelā mo te valoaga a Isaia, e sa‵sale atu pefea a nisi mamoe mai tua o te tavini fakaekegina e pelā me ne “pologa”?

¹⁴ A te loto maulalo o nisi mamoe o faka‵logo ki tino fakaekegina o te Isalaelu faka-te-agaga ne ‵valo mai i te valoaga a Isaia: “Muna a te Aliki ki a Isalaelu, ‘A te maumea o Aikupito mo Sutana ka puke ma koe; a tagata loa o Sepa ka fai mo au pologa; ka tautali atu i a koe, mo olotou vae e saisai ki seni. Ka ifo atu latou ki a koe kae fai atu penei, “A te Atua e fakatasi atu ki a koe, ko ia tokotasi ko te Atua.” ’ ” (Isaia 45:14) I se auala fakatusa, e sa‵sale atu nei a nisi mamoe mai tua o te tavini fakaekegina mo tena Potukau Pule, kae tautali atu latou i te lotou takitakiga. E pelā me ne “pologa,” e fakaaogā ne nisi mamoe mo te loto fiafia te lotou malosi faka-te-foitino mo olotou kope ke ‵lago atu ki te galuega talai i te lalolagi kātoa, telā ne tuku mai ne Keliso ke fai ne ana soko fakaekegina i te lalolagi.​​—⁠Galuega 1:8; Fakaasiga 12:⁠17.

15. E ‵valo mai pefea ne te valoaga i te Isaia 61:​5, 6 e uiga ki te fesokotakiga i te va o nisi mamoe mo te Isalaelu faka-te-agaga?

¹⁵ E fia‵fia eiloa a nisi mamoe ke tavini atu latou ki a Ieova mai lalo i te takitakiga a te tavini mo tena Potukau Pule. E ‵kilo atu latou ki tino fakaekegina e pelā me ko “te Isalaelu a te Atua!” (Kalatia 6:​16) E pelā me ne “tino fakaa‵tea” kolā e ‵kau fakatasi mo te Isalaelu faka-te-agaga, e tavini atu latou mo te fia‵fia e pelā me ne ‘tino tausi manu’ mo ‘tino ‵toki togavine’ mai lalo i te takitakiga a te kau fakaekegina, ko te ‘faitaulaga a Ieova’ mo te ‘tavini a te Atua.’ (Isaia 61:​5, 6) E ‵kau atu latou mo te loto finafinau ki te talaiatuga o te tala ‵lei o te Malo mo te faiga o soko mai fenua katoa. E fesoasoani atu latou mo te loto kātoa ki te tavini i te tausiga mo te putiakega o mamoe ‵fou.

16. Se a te mea ne fakamalosi atu ki nisi mamoe ke ‵lago atu mo te fakamaoni ki te tavini fakamaoni kae poto?

¹⁶ E iloa ne nisi mamoe me ne maua ne latou a mea aogā e uke mai galuega e uke ne fai ne te tavini fakamaoni, ke fagai ei latou ki mea faka-te-agaga i te taimi tonu. E fakaasi ‵tonu atu ne latou mo te loto maulalo, me e aunoa mo te tavini fakamaoni kae poto, e foliki io me seai eiloa se lotou mea e iloa e uiga ki muna ‵tonu tāua mai te Tusi Tapu, e pelā mo te pulega a Ieova, te fakamalugāga o tena igoa, te Malo, te lagi fou mo te lalolagi fou, te solu, te tulaga o tino ‵mate, mo te iloga tonu o Ieova, tena Tama, mo te agaga tapu. Ona ko te loto fakafetai mo te alofa fakamaoni, e ‵lago atu eiloa mo te alofa a nisi mamoe ki “taina” fakaekegina o Keliso i te lalolagi i te vaitaimi tenei o te gataga.​​—⁠Mataio 25:​40.

17. Se a te mea ne iloa ne te Potukau Pule me e ‵tau o fai, kae se a te mea ka sau‵tala ki ei i te suā mataupu?

¹⁷ Ona ko te gasolo ifo o foliki te lotou fuainumela, e se mafai o oko atu a te kau fakaekegina ki fakapotopotoga katoa ke fakamautinoa aka ei te tausiga o mea a Keliso. Tela la, e fakasopo aka ne te Potukau Pule a tāgata mai nisi mamoe ke tausi atu ki ofisa lagolago, kogā koga ‵lasi, kogā koga fo‵liki, mo fakapotopotoga o Molimau a Ieova. E mata, e pokotia ‵tou fakamaoni ki a Keliso mo tena tavini fakamaoni ona ko ‵tou kilokiloga ki ana tausi mamoe lagolago konei? Ka sau‵tala tatou ki te mea tenei i te suā mataupu.

[Fakamatalaga mai lalo]

Ke Toe Mafau‵fau ki ei

• Ko oi te ‵tou Takitaki, kae se a te mea e fakaasi mai me e iloa ne ia a tulaga katoa i loto i fakapotopotoga?

• I te taimi ne fai ei te iloiloga o te “faletapu,” ko oi ne maua atu me e fai pelā me ko te tavini fakamaoni, kae ne a mea ne tuku atu ke tausi ne latou?

• Ne a pogai faka-te-Tusi Tapu e maua ne tatou ke ‵lago atu ei mo te fakamaoni ki te tavini fakamaoni?

[Fakamatalaga o te Ata i te itulau e 26]

E aofia i “mea” kolā e tausi atu ki ei te “situati” ko kope faka-te-foitino, polokalame faka-te-agaga, mo te galuega talai

[Fakamatalaga o te Ata i te itulau e 28]

E ‵lago atu a nisi mamoe ki te tavini fakamaoni mai te talai atu mo te loto finafinau