Te Situati Fakamaoni mo Tena Potukau Pule
“Ko oi la te tavini [“situati,” NW] fakamaoni kae poto, telā ka ‵tofi ne tona pule ke fai mo ulu o te fale katoa, kae ka fakasoa atu foki ne ia ki nisi tavini olotou meakai, i taimi [tonu] e ‵kai ei latou?”—LUKA 12:42.
1, 2. Se a te fesili tāua ne fakasae aka ne Iesu e uiga ki aso fakaoti?
ITE takuatuga o vaega kese‵kese o te fakailoga o aso fakaoti, ne fakasae aka ne Iesu a te fesili tenei: “Ko oi te tavini fakamaoni kae poto? Ko ia telā ko oti ne fili ne tona pule ke pule i isi tavini kae fakasoa atu foki ne ia olotou meakai i te taimi tonu.” Ne fai mai a Iesu me ka maua ne te tavini tenei te taui mō tena fakamaoni kae ka ‵tofi aka ke pule i mea katoa a te Pule.—Mataio 24:45-47.
2 Ko oti foki ne ‵sili atu ne Iesu a te fesili tenā i nāi masina mai mua atu i ei. (Faitau te Luka 12:42-44.) Ne fakaigoa ne ia a te tavini ki te “situati” kae fakasino atu ki “isi tavini” e pelā me ko “nisi tavini” io me se potukau o ana tavini. A te situati ko te menetia io me ko te pule o te fale telā e pule i tavini katoa. Kae ko te situati se tavini foki. Ko oi la te tavini, io me ko te situati tenei kae e fakasoa mai pefea ne ia a “meakai i te taimi tonu”? Se mea tāua ke iloa ne tatou katoa te auala e fakasoa mai i ei a meakai faka-te-agaga.
3. (a) Ne a fakamatalaga ne taumafai a Lotu Kelisiano ‵Se o fai ki pati a Iesu e uiga ki te “tavini”? (e) Ko oi te “situati,” io me ko te “tavini,” kae ko oi a “nisi tavini,” io me ko “isi tavini”?
3 E fakauiga sāle ne Lotu Kelisiano ‵Se a pati konā a Iesu ki tino kolā e ‵nofo i tulaga kolā e ma‵luga atu i nisi Kelisiano. Kae ne seki fai mai a Iesu, te “pule” i te tala fakatusa tenā, me ka isi ne tavini e tokouke kolā e salalau valevale i vaega kese‵kese o Lotu Kelisiano ‵Se. I lō te fai mai penā, ne manino ‵lei tena fakaasiga me e tokotasi fua te “situati,” io me ko te “tavini,” telā ka ‵tofi ne ia ke pule i ana mea katoa. Tela la, e pelā mo te mea ko oti ne fakamatala sāle atu i te mekesini tenei, a te situati tenei e sui ne ia a te “lafu foliki” o soko fakaekegina e pelā me se foitino e tasi, io me se potukau. E ‵tusa mo te Evagelia a Luka, ne fakasino fakamuli atu a Iesu ki a latou konei. (Luka 12:32) E fakasino atu a “nisi tavini,” io me ko “isi tavini,” ki te potukau foki eiloa tenei kae e faka‵mafa mai i ei olotou tulaga taki tokotasi. Tenei la te fesili, E mata, e tofu a tavini taki tokotasi mo olotou tusaga i te tukumaiga o meakai faka-te-agaga i te taimi tonu? E manino ‵lei a te tali māfai e iloilo faka‵lei ne tatou a pati i te Tusi Tapu e uiga ki ei.
Tavini a Ieova i Taimi ko ‵Teka
4. Se a te kilokiloga a Ieova ki te fenua ko Isalaelu i aso mua, kae se a te mea tāua e ‵tau o iloa e uiga ki te fenua tenā?
4 Ne faipati a Ieova e uiga ki ana tino, ko te fenua o Isalaelu i aso mua, e pelā me se tavini. “‘A koutou [ne tino e tokouke] ko aku molimau [ne tino e tokouke],’ ko muna a Ieova, ‘ko taku tavini [se tino e tokotasi] telā ko oti ne filifili ne au.’” (Isaia 43:10, NW) Ne aofia a tino katoa o te fenua i te potukau tenā e pelā me se tavini e tokotasi. Kae se mea tāua ke iloa atu me ko faitaulaga fua mo tino Levi kolā e se ne faitaulaga ne ‵nofo mo te tiute ke akoako ne latou a te Tulafono ki te fenua kātoa.—2 Nofoaiga Tupu 35:3; Malaki 2:7.
5. Se a te ‵fuliga lasi ne fai e ‵tusa mo pati a Iesu?
5 E mata, a te tavini telā ne faipati ki ei a Iesu ko te fenua ko Isalaelu? Ikai. E iloa ne tatou a te mea tenā ona ko pati a Iesu ki tino Iutaia i aso konā: “Te Malo o te Atua e ave keatea mai i a koutou, kae tuku atu ki se fenua telā e fakaasi mai i ei ne fua ‵lei.” (Mataio 21:43) E manino ‵lei me ne ‵tau o fai se ‵fuliga. Ne fakaaoga ne Ieova se fenua fou. E tiga eiloa te feitu tenā, i te faiga o akoakoga faka-te-agaga, e tai ‵pau eiloa a galuega a te tavini i te tala fakatusa a Iesu mo galuega a te “tavini” a te Atua i te fenua ko Isalaelu i aso mua.
Ne Sae Mai a te Tavini Fakamaoni
6. Se a te fenua fou telā ne kamata i te Penitekoso, i te 33 T.A., kae ko oi ne aofia i ei?
6 E aofia i te fenua fou, “te Isalaelu a te Atua,” a tino Isalaelu faka-te-agaga katoa. (Kalatia 6:16; Loma 2:28, 29; 9:6) Ne kamata a te fenua tenā i te ‵ligiifoga o te agaga o te Atua i te Penitekoso, i te 33 T.A. Mai tua ifo i ei, ne fai a Kelisiano fakaekegina katoa mo fai ne vaega o te fenua telā ne tavini atu e pelā me se potukau telā ne ‵tofi aka ne te Pule, ko Iesu Keliso. Ne tuku atu ki tino taki tokotasi o te fenua tenei a te galuega ke talai atu te tala ‵lei kae fai foki a soko. (Mataio 28:19, 20) Kae e mata, ne aofia a tino taki tokotasi o te potukau tenā i te tukumaiga o meakai faka-te-agaga i te taimi tonu? Ke onoono aka tatou ki te tali a te Tusi Tapu e uiga ki te fesili tenei.
7. Se a te galuega muamua a te kau apositolo, kae ne fakalauefa atu pefea a te galuega tenā fakamuli ifo?
7 I te taimi ne filifili ei ne Iesu ana apositolo e toko 12, ne aofia i te lotou galuega muamua ko te lotou ugaatuga ke talai atu te tala ‵lei ki nisi tino. (Faitau te Maleko 3:13-15.) Ne fetaui ‵lei a te galuega tenā mo te uiga fakavae o te pati Eleni ko te apostolos, telā ne māfua mai i se veape e fakauiga ki te “uga atu.” Kae fakamuli ifo, i te taimi ko pili ei o fakatu aka te fakapotopotoga Kelisiano, ne fai ei a te tulaga o te apositolo mo fai se “ovasia.”—Galuega 1:20-26, NW.
8, 9. (a) Se a te ‵toe mea tāua telā ne manava‵se ki ei a apositolo e toko 12? (e) Ko oi a nisi tino ne tuku atu ki ei a nisi tiute kolā ne talia mai ne te potukau pule?
8 Se a te mea ne manava‵se malosi ki ei a apositolo e toko 12 ? E maua te tali i mea kolā ne ‵tupu mai tua ifo o te Penitekoso. I te taimi ne sae aka ei se kinauga e uiga ki te tufaatuga o meakai i aso takitasi ki fafine ko ‵mate olotou avaga, ne fakamaopoopo ne te toko 12 apositolo a soko kae fai atu: “E se ‵tau mo matou o tuku . . . te muna a te Atua, kae ‵saga o tufatufa a tupe mo koloa.” (Faitau te Galuega 6:1-6.) Ne filifili ei ne apositolo a nisi taina kolā ko ma‵tua faka-te-agaga ke ‘tufatufa ne latou a meakai,’ ko te mea ke ‵saga tonu atu a apositolo o ‘folafola atu te tala ‵lei.’ Ne iku atu te fakatokaga tenei ki fakamanuiaga a Ieova. “Ko salalau atu eiloa te muna a te Atua. E fakaopoopo faeloa te aofaki o te kau soko i Ielusalema.” (Galuega 6:7) Tela la, a te tiute tāua i te tukuatuga o meakai faka-te-agaga ne panaki eiloa mo te kau apositolo.—Galuega 2:42.
9 Fakamuli ifo ne tuku atu a nisi tiute ‵mafa ki nisi tino. Mai te takitakiga a te agaga tapu, ne uga atu ei ne te fakapotopotoga i Anitioka a Paulo mo Panapa e pelā me ne misionale. Ne fai foki lāua mo fai ne apositolo, e tiga eiloa ne seki aofia lāua i te toko 12 muamua. (Galuega 13:1-3; 14:14; Kalatia 1:19) Ne talia ne te potukau pule i Ielusalema a la tulaga konā. (Kalatia 2:7-10) Mai tua malie ifo i ei, ne fai foki te tusaga o Paulo i te tukuatuga o meakai faka-te-agaga. Ne tusi ne ia tena tusi muamua telā ne fakaosofia.
10. E mata, ne aofia a Kelisiano fakaekegina katoa i te fakatokaga o meakai faka-te-agaga i te senitenali muamua? Fakamatala mai.
10 Kae e mata, ne aofia a Kelisiano fakaekegina katoa i te fakatonutonuga o te galuega talai mo te fakatokaga o meakai faka-te-agaga? Ikai. E fai mai a te apositolo ko Paulo: “E se ne apositolo katoa latou. E se ne pelofeta katoa latou. E se ne faiakoga katoa latou. E se fai vavega katoa latou.” (1 Kolinito 12:29) E tiga eiloa ne ga‵lue a Kelisiano fakaekegina katoa i te galuega talai, ne nāi tino fua—e tokovalu fua a tagata—ne fakaaoga ke tusi ne latou a tusi e 27 i te Tusi Tapu i te ‵gana Eleni.
Te Tavini Fakamaoni i Aso Nei
11. Ne a “mea” ne fakasopo aka ei a te tavini ke pule atu ki ei?
11 E manino ‵lei a pati a Iesu i te Mataio 24:45 me ka isi se potukau e pelā me se tavini fakamaoni kae poto i te lalolagi i te taimi o te gataga. E fakasino atu a te Fakaasiga 12:17, i te Tusi Paia, Samoa ki tino konā me ko “te ‵toega” o te fanau a te fafine. E pelā me se potukau, ko oti ne fakasopo aka te ‵toega tenei ke pule i mea katoa a Keliso i te lalolagi. A “mea” kolā ne fakasopo aka te situati fakamaoni ke pule atu ki ei ko manakoga fakatupu i te lalolagi nei a te Pule, kolā e aofia i ei a tino o te Malo i te lalolagi mo kope kolā e fakaaoga i te talaiga o te tala ‵lei.
12, 13. E iloa pefea ne se Kelisiano me ko kalagagina a ia ki te lagi?
12 E iloa pefea ne se Kelisiano me e maua ne ia a te fakamoemoega i te lagi kae e aofia a ia i te ‵toega o tino Isalaelu faka-te-agaga konei? E maua a te tali i pati a te apositolo ko Paulo ki tino kolā e ‵pau te lotou fakamoemoega ke ola i te lagi: “Ko latou kolā e takitaki ne te Agaga o te Atua, ko tama konā a te Atua. Me i te Agaga telā ne tuku atu ne te Atua ki a koutou, e se fakapologa ne ia koutou io me fakamatakutaku ne ia koutou, kae ne fai ne ia koutou ke fai mo tamapuke a te Atua, kae i te ‵mana o te Agaga e ka‵laga ei tatou ki te Atua penei, ‘Tamana! toku Tamana!’ Ko te agaga eiloa telā e molimau mai ki agaga o tatou, me i a tatou ko fanau a te Atua. Ona ko tatou ko ana fanau, ka maua ne tatou a fakamanuiaga ne tausi ne ia mo ana tino, kae ka maua foki fakatasi ne tatou mo Keliso a mea kolā ne tausi ne te Atua mō Keliso, i te mea, kafai e ‵kau fakatasi tatou mo fi‵taga o Keliso, ka ‵kau fakatasi foki tatou mo ia i tona ‵malu.”—Loma 8:14-17.
13 A tino taki tokotasi konei e fakaeke ne te Atua ki te tena agaga tapu kae ne “kalagagina,” io me ne ‵kamigina ki te lagi. (Epelu 3:1) A te ‵kamiga tenei i a te Atua. E tali fakavave atu latou ki ei e aunoa mo te fakalotolotolua io me ko te mataku ke fai pelā me ne tamapuke a te Atua. (Faitau te 1 Ioane 2:20, 21.) Tela la, e se filifili ne latou a te fakamoemoega tenei mō latou eiloa, kae e tuku atu ne Ieova tena fakamailoga, io me ko te agaga tapu, ki luga i a latou.—2 Kolinito 1:21, 22; 1 Petelu 1:3, 4.
Te Kilokiloga Tonu
14. E pefea te kilokiloga a te kau fakaekegina ki te lotou kalagaga ki te lagi?
14 E ‵tau o pefea te kilokiloga a tino fakaekegina konei ki a latou eiloa i te taimi e fakatali‵tali ei latou ki te lotou taui i te lagi? E iloa ne latou me e tiga eiloa ko oti ne maua ne latou se ‵kamiga tafasili i te gali, a te mea tenā—se ‵kamiga fua. E ‵tau o tumau latou i te fakamaoni ke oko ki te mate ko te mea ke maua ne latou a te failoga. Ona ko te loto maulalo, e fai eiloa latou pelā mo Paulo telā ne fai mai penei: “Taina, au e taofi pelā me seki oko eiloa au ki ei; e tasi fua te mea e fai ne au, ko te fakapuli ne au a mea kolā i oku tua, kae taumafai malosi eiloa au ke maua ne au a te mea telā e i oku mua.Tela la, au e tele tonu eiloa ki te tapula ke maua ne au a te failoga, telā ko te kalaga a te Atua e alatu i a Keliso Iesu ki te ola i te lagi.” (Filipi 3:13, 14) E ‵tau o fakapalele a mafi o te ‵toega o te kau fakaekegina ko te mea ke ‘sa‵sale e ‵tusa mo te lotou kalagaga i te loto maulalo,’ kae ke fai penā “mo te mataku mo te polepole.”—Efeso 4:1, 2; Filipi 2:12; 1 Tesalonia 2:12.
15. Se a te kilokiloga e ‵tau o maua ne Kelisiano ki tino kolā e fakaaoga ne latou a mea fakatusa i te Fakamanatuga, kae e ‵tau o pefea te kilokiloga a tino fakaekegina ki a latou eiloa?
15 I te suā feitu, e ‵kilo atu pefea a nisi Kelisiano ki se tino telā e fai mai me ko oti ne maua ne ia a te kalagaga tenei kae ko kamata o fakaaoga ne ia a mea fakatusa i te Fakamanatuga? E se ‵tau o fakamasino atu ki ei. A te mea tenā se mea loa i te vā o te tino tenā mo Ieova. (Loma 14:12) Kae ko Kelisiano kolā ko maua ne latou a te kalagaga tenei e se ‵tau o ‵sala atu ke maua ne latou ne faifaiga fakapito. E se tali‵tonu latou me i te lotou fai mo fai ne tino fakaekegina ko maua ei ne latou se poto fakapito telā e lasi atu i te poto telā ko oti ne maua ne nisi tino ma‵tua o te “vaitino tokouke.” (Fakaasiga 7:9) E se tali‵tonu latou me uke atu olotou mea e maua mai te agaga tapu i lō olotou taugasoa ko ‘nisi mamoe.’ (Ioane 10:16) E se fakamoemoe latou ke maua ne faifaiga fakapito; io me ona ko te fakaaogaga o mea fakatusa i te Fakamanatuga ko ma‵luga atu ei latou i toeaina i te fakapotopotoga.
16-18. (a) E mata, e aofia a tino fakaekegina katoa i te tukumaiga o muna‵tonu ‵fou faka-te-agaga? Fakamatala mai. (e) Kaia e se manakogina i ei ke ‵sala atu a te Potukau Pule ki manatu o tino katoa kolā e fai mai i a latou ne tino fakaekegina?
16 E mata, a tino fakaekegina katoa konei ne vaega o se potukau i te lalolagi kātoa kolā e aofia i te fakaasimaiga o muna‵tonu ‵fou faka-te-agaga? Ikai. E tiga eiloa i o te tavini e pelā me se potukau a te tiute o fagai a te kāiga o soko fakaekegina o Keliso, e se ‵pau a tiute io me ko galuega a tino taki tokotasi i te potukau tenā. (Faitau te 1 Kolinito 12:14-18.) E pelā mo te mea ko oti ne fakaasi atu, ne aofia a latou katoa i te galuega talai i te senitenali muamua. Kae ne nāi tino fua ne fakaaoga ke tusi ne latou a tusi i te Tusi Tapu kae fakatonutonu a te fakapotopotoga Kelisiano.
17 Ke fai se fakatusa: I nisi taimi e faipati loa te Tusi Tapu me e fai ne “te ekalesia [fakapotopotoga]” a nisi mataupu kolā e ‵tau o fai se fakamasinoga ki ei. (Mataio 18:17) A ko te ‵tonuga loa, ko toeaina fua e fai ne latou a te mea tenei i te lotou tulaga e pelā me ne sui o te fakapotopotoga. E se ‵kami ne toeaina a tino katoa i te fakapotopotoga ke fai mai olotou manatu a koi tuai o fai se lotou fakaikuga. E fai fua ne latou a te galuega telā ko oti ne tuku atu ki a latou; e fai ne latou mō te fakapotopotoga kātoa.
18 E penā foki i aso nei, ne nāi tagata fakaekegina fua e maua ne latou a te tiute ke sui ne latou a te potukau e pelā me se tavini. A latou konā ko tino i te Potukau Pule o Molimau a Ieova. A tagata fakaekegina ki te agaga konei e fakatonutonu ne latou a te galuega o te Malo mo te polokalame o te tukumaiga o meakai faka-te-agaga. Kae e pelā eiloa mo te faifaiga i te senitenali muamua, e se ‵sala atu te Potukau Pule ki manatu o tino taki tokotasi i te potukau e pelā me se tavini a koituai o fai olotou fakaikuga. (Faitau te Galuega 16:4, 5.) Kae e aofia malosi a molimau fakaekegina katoa i te ‵toe galuega tāua o te ‵katigā saito telā e fai nei. E pelā me se potukau, a “te tavini fakamaoni kae poto” se foitino e tasi, kae e pelā me ne tino taki tokotasi, e kese‵kese olotou galuega e fai.—1 Kolinito 12:19-26.
19, 20. Se a te kilokiloga paleni e ‵tau o maua ne te vaitino tokouke e uiga ki “te tavini fakamaoni kae poto” mo tena Potukau Pule?
19 E pokotia pefea a te vaitino tokouke kolā e gasolo aka faeloa o tokouke kae kolā e fakamoe‵moe ke ola ki te se-gata-mai i te lalolagi i fakamatalaga konei? E pelā me ne vaega o mea a te Tupu, e fia‵fia latou o faka‵logo katoatoa ki fakatokaga kolā e fai ne te Potukau Pule, telā e sui ne ia a “te tavini fakamaoni kae poto.” E maua ne tino o te vaitino tokouke a te loto fakafetai mō meakai faka-te-agaga kolā e tuku mai i lalo i te takitakiga a te Potukau Pule. E tiga eiloa e āva latou ki te tavini e pelā me se potukau, e fakaeteete a tino i te vaitino tokouke ke mo a ma fakamaluga ne latou se tino telā e fai mai i a ia se vaega o te tavini. E seai se Kelisiano telā e fakaekegina tonu ki te agaga o te Atua e fakamoemoe ke maua ne ia se vaegā tulaga penā.—Galuega 10:25, 26; 14:14, 15.
20 Faitalia me e aofia tatou i “isi tavini” kolā ne vaega o te ‵toega, io me ne vaega o te vaitino tokouke, ke na fakaiku aka ne tatou ke faka‵logo katoatoa tatou ki te situati fakamaoni mo tena Potukau Pule. Ke na “matapula‵pula” kae tumau tatou i te fakamaoni ke oko eiloa ki te gataga.—Mataio 24:13, 42.
E Masaua ne Koe?
• Ko oi a “te tavini fakamaoni kae poto,” kae ko oi a isi tavini?
• E iloa pefea ne se tino me ko kalagagina a ia ki te lagi?
• Ko oi e maua ne ia a te tiute tāua ke fakatoka a meakai ‵fou faka-te-agaga?
• E pefea te kilokiloga e ‵tau o maua ne se tino fakaekegina ki a ia eiloa?
[Ata i te itulau e 30]
E sui ne te Potukau Pule a te tavini fakamaoni kae poto i aso nei. E penā foki a te fakatokaga i te senitenali muamua