Mataupu e Sefuluono
“Ke Fakatau A‵lofa Fakamaoni Koutou”
1. Se a te mea telā e ofo sāle i ei a tino ‵fou i fakatasiga a Molimau a Ieova?
KAFAI ko fatoā ‵kau atu a tino ki fakatasiga a Molimau a Ieova, e ofo sāle latou i te alofa telā e fakaasi atu i ei. E lavea atu ne latou te mea tenā i te taimi e fakatalofa atu ei a taina mo te fia‵fia ki a latou mo te fealofani foki o te kau taina. E lavea atu foki ne tino ‵fou kolā e ‵kau mai ki ‵tou fono a te alofa tenei. Ne tusi mai se tino puke tala e uiga ki se fono e tasi, penei: ‘E seai se tino e fakaaogā ‵se ne ia a vailakau tapu io me ko meainu ma‵losi. E seai se tino e sōna pakalaga valevale. E se fakatau teke foki a tino i ei. E se fakatau tuletule foki latou. E seai se tino e pati masei. E seai ne mea fai fa‵kata lai‵lai io me ne tugāpati matagā. E seai ne tino ‵pusi. E seai ne tino kai‵soa. E se ‵pei valevale atu a atigi kāpa i luga i mouku. Ko se faka‵tau eiloa i te fakaofoofogia.’ A mea katoa konei se fakamaoniga o te alofa, ko te atafai telā “e se amio masei io me . . . e se ‵sala ana mea i a ia eiloa.”—1 Kolinito 13:4-8.
2. (a) Se a te mea e ‵tau o fakamaoni aka e uiga ki te alofa telā e fakaasi atu ne tatou i nisi taimi? (e) Se a te vaegā alofa telā e ‵tau o fakamalosi aka ne tatou i te ‵tou fakaakoako atu ki a Keliso?
2 A te alofa fakataina ko te fakailoga tenā o Kelisiano ‵tonu. (Ioane 13:35) Kafai ko gasolo aka o ma‵losi tatou i te feitu faka-te-agaga, e momea aka foki ei te ‵tou a‵lofa ki nisi tino. Ne ‵talo atu te apositolo ko Paulo “ke tuputupu ake faeloa” te a‵lofa o ana taina Kelisiano. (Filipi 1:9) Ne fakaasi mai ne te apositolo ko Ioane me e ‵tau o fa‵ki tatou i nisi mea faiga‵ta ona ko te ‵tou a‵lofa. Ne tusi mai a ia, penei: “Tenei te mea e iloa ei ne tatou me se a te mea e taku ko te alofa: ko te ola o Keliso ne tuku mai mō tatou. Tela la, e ‵tau foki mo tatou o tuku atu o‵tou ola mō o‵tou taina!” (1 Ioane 3:16; Ioane 15:12, 13) E mata, e loto ma‵lie tatou ke ‵mate mō ‵tou taina? E tiga eiloa e se fai sāle penā, e pefea te lasi o te ‵tou fesoasoani ki a latou, faitalia me e faigata ki a tatou ke fai penā?
3. (a) Se a te auala e mafai ei o momea aka te ‵tou a‵lofa ki nisi tino? (e) Kaia e tāua ei ke a‵lofa malosi nei tatou ki ‵tou taina?
3 E ‵tau o fakaasi atu ne tatou te tinā alofa tonu ki ‵tou taina, telā e fakamaoni aka ei me e toka tatou o fa‵ki i mea faiga‵ta. E fakamalosi mai te Muna a te Atua, penei: “Ke fakatau a‵lofa koutou i te alofa fakataina.” (Loma 12:10) E penā loa ‵tou lagonaga ki nisi tino. Kae e mata, e mafai o momea aka te tokouke o tino kolā e a‵lofa tonu tatou ki ei? Ko pili mai te gataga o te olaga masei tenei, tela la, se mea tāua ‵ki ke fakapili‵pili malosi atu tatou ki ‵tou taina Kelisiano. E fai mai te Tusi Tapu, penei: “Ko pili mai te gataga o mea katoa. . . . Kae sili i mea katoa, ke fakatau a‵lofa fakamaoni koutou, me i te alofa e ‵tao ne ia a te ukega o agasala.”—1 Petelu 4:7, 8.
Taimi Kolā e ‵Sae Aka ei a Fakalavelave
4. (a) Kaia e mafai ei o ‵sae aka a fakalavelave i va o tino i te fakapotopotoga? (e) Ne a ikuga ‵lei e mafai o maua māfai e fakagalue aka ne tatou a manatu fakatonutonu i te Tusi Tapu, faitalia me e se ma‵nako tatou ki ei?
4 E tonu, ona ko te ‵tou sē ‵lei katoatoa, e isi ne taimi ka fai ei ne tatou a mea kolā e se fia‵fia ki ei a nisi tino. E mafai foki o agasala mai ‵tou taina ki a tatou i auala kese‵kese. (1 Ioane 1:8) Kafai e nofo atu koe i se vaegā tulaga penā, ne a au mea e ‵tau o fai? E tuku mai ne te Tusi Tapu a takitakiga kolā e ‵tau o maua. Kae kāti e se ‵pau a mea kolā e ma‵nako tatou o fai mo pati i te Tusi Tapu ona ko te sē ‵lei katoatoa o tatou. (Loma 7:21-23) Kafai e fakagalue faka‵lei aka ne tatou a manatu fakatonutonu kolā e maua i te Tusi Tapu, ka tuku mai i ei a fakamaoniga me e ma‵nako tonu eiloa tatou o fakafiafia atu ki a Ieova. Kae ka momea aka ei te lasi o ‵tou a‵lofa ki nisi tino.
5. Kafai e fakalogo‵mae tatou ne se tino, kaia e se ‵tau ei mo tatou o toe taui atu ki a ia?
5 Kafai ko logo‵mae a tino, e taumafai sāle latou o ‵sala aka ne auala e mafai ei o toe taui atu ki te tino telā ne fakalogo‵mae atu. Kae ka momea aka fua i ei te masei o te fakalavelave. Kafai e ‵tau o fakasala te suā tino, e ‵tau o tuku atu ne tatou te mea tenā ki te Atua. (Faataoto 24:29; Loma 12:17-21) Kāti e taumafai a nisi tino ke ‵kalo keatea mai te tino fai mea ‵se. Kae e se ‵tau o fai tatou penā ki ‵tou taina tapuaki, me i nisi taimi, e fakalagolago atu eiloa te talia o ‵tou tapuakiga ki te ‵tou a‵lofa ki ‵tou taina. (1 Ioane 4:20) Tela la, ne tusi mai a Paulo, penei: “Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te suā tino ki te suā tino. E pelā mo te Aliki ko oti ne fakamagalo ne ia koutou, e ‵tau foki mo koutou o fakatau fakamagalo.” (Kolose 3:13) E mata, e mafai ne koe o fai penā?
6. (a) E ‵tau o fakamagalo fakafia ne tatou ‵tou taina? (e) Se a te mea e ‵tau o fakatāua ne tatou, telā ka fesoasoani mai ke ‵teu aka ei se agasala telā ne fai ki a tatou?
6 Kae e a māfai ko agasala ‵soko atu faeloa se tino ki a koe kae e se ko vaegā agasala matagā kolā e mafai o fakatea ei a ia mai te fakapotopotoga? Ne manatu aka te apositolo ko Petelu me kāti e ‵lei ke fakamagalo “fakafitu” a vaegā agasala fo‵liki penā. Kae ne fai atu a Iesu, penei: “Ikai, e se fakafitu kae fakafitu-sefulu-fitu.” Ne faka‵mafa mai ne ia te lasi o ‵tou kaitalafu ki te Atua māfai e fakatusa ki so se mea ‵se telā e fai ne se tino ki a tatou. (Mataio 18:21-35, NW) E agasala tatou ki te Atua i auala e uke i aso katoa kae e se iloa atu me ko agasala tatou—i nisi taimi, kāti se uiga kaiū, se pati io me se manatu, io me se mea ko fakata‵mala tatou ki ei. (Loma 3:23) Kae e tumau eiloa te alofa o te Atua ki a tatou. (Salamo 103:10-14; 130:3, 4) E manako a ia ke fai foki tatou penā ki nisi tino. (Mataio 6:14, 15; Efeso 4:1-3) Kafai e fai tatou penā, ka fakaasi atu ei ne tatou a te vaegā alofa telā e se “fakamasausau ne ia a mea ‵se a se tino.”—1 Kolinito 13:4, 5; 1 Petelu 3:8, 9.
7. Ne a ‵tou mea e ‵tau o fai māfai e isi se mea e se fiafia ei ‵tou taina ki a tatou?
7 Kāti e isi ne taimi e iloa fakamuli aka ei ne tatou me e isi se mea e se fiafia ‵tou taina ki ei e uiga ki a tatou faitalia me e se kaitāua tatou ki a latou. E mafai o filifili aka tatou ke ‘‵tao ifo te mea tenā i te alofa,’ e pelā mo te manatu fesoasoani i te 1 Petelu 4:8. Io me e mafai o olo atu muamua tatou o fai‵pati ki a ia kae taumafai ke toe maua se va fealofani.—Mataio 5:23, 24.
8. Kafai e fai ne se taina talitonu se mea telā e se fia‵fia tatou ki ei, ne a mea e mafai o fai ki ei?
8 Kāti e fai ne se taina talitonu se mea telā e se fiafia koe ki ei, penā foki loa mo nisi tino. Se mea ‵lei ke faipati atu ki a ia, i ne? Kāti la. Kafai e fakamatala faka‵lei atu ne koe te fakalavelave tenā i se auala alofa, kāti e mafai ei o manuia au taumafaiga. Kae e ‵tau o fesili ifo muamua koe, penei: ‘E mata, e fai eiloa ne ia se mea telā e se fetaui mo akoakoga i te Tusi Tapu? Io me e māfua mai te fakalavelave tenā i te ‵kese o mā telega mo ‵tupuakaga?’ Fakaeteete ke mo a ma fai ne koe au tulafono ke fakamasino aka ei ne koe te tino tenā. (Iakopo 4:11, 12) E talia katoatoa ne Ieova a tino mai i vaegā telega kese‵kese kae e fakaasi atu ne ia te kufaki i te taimi e ga‵solo atu ei latou ki mua i te feitu faka-te-agaga.
9. (a) Ko oi e ‵tau o fakailoa atu ki ei māfai ko fai ne se tino i te fakapotopotoga se agasala masei? (e) Ko te taimi fea e ‵tau ei o gasuesue te tino telā ne fai ki ei te agasala, kae se a te fakamoemoega e ‵tau o taumafai ki ei?
9 Kafai e fai ne se tino se amioga masei, e pelā mo te finalalolagi, e ‵tau o ‵saga fakavave atu ki ei. Ko oi e ‵tau o fakailoa atu ki ei? Ko toeaina. (Iakopo 5:14, 15) Kae kafai ne agasala se tino ki te suā tino, kāti i mea tau pisinisi io me ko te faiga o se tala fakamasei, ko ‵tau ei o fanatu te tino telā ne fai ki ei te agasala o faipati mo te tino telā ne fai ne ia te mea ‵se, i a laua eiloa tokolua. (Mataio 18:15) Kafai e se ‵lei te fakalavelave tenā, ko ‵tau ei o fai a nisi mea kolā e fakaasi mai i te Mataio 18:16, 17. Ka fesoasoani mai te alofa ki ‵tou taina mo te fia fakamalosi atu ki a ia ke fai foki ne tatou a te mea tenei i se auala telā e talia ei ne ia.—Faataoto 16:23.
10. Kafai ko sae aka se fakalavelave, ne a mea ka fesoasoani mai ki a tatou ke maua se kilokiloga ‵lei ki ei?
10 Kafai ko sae aka se fakalavelave, faitalia me se mea foliki io me se mea lasi, ka fesoasoani malosi mai ki a tatou a te taumafai ke malamalama i te kilokiloga a Ieova ki ei. E se fiafia a ia ki so se vaegā agasala, kae e faka‵tea sāle a tino fai amioga ma‵sei mai tena fakapotopotoga i tena taimi tonu. Kae ke mo a ma puli i a tatou me e agasala tatou katoa i tamā mea fo‵liki, telā e ‵tau ei o kufaki kae alofa fakamagalo mai te Atua. Ne tuku mai ne Ieova se fakaakoakoga ke tau‵tali tatou ki ei māfai ko agasala mai a nisi tino ki a tatou. Kafai e a‵lofa fakamagalo tatou, e fakaakoako atu ei tatou ki tena alofa.—Efeso 5:1, 2.
Ke Taumafai o “Fakalauefa Atu” Tou Alofa
11. Kaia ne fakamalosi atu ei a Paulo ki te kau Kolinito ke “fakalauefa atu” te lotou a‵lofa?
11 Ne fakamāumāu ne Paulo te fia o masina ke fakamalosi aka ei ne ia te fakapotopotoga i Kolinito, i Eleni. Ne galue malosi tou tagata ke fesoasoani atu ki taina i konā, kae ne alofa malosi foki a ia ki a latou. Kae ne seki a‵lofa tonu a nisi tino ki a ia. Ne mataonoono faeloa latou ki a ia. Ne fakamalosi atu tou tagata ki a latou ke “fakalauefa atu” te lotou a‵lofa. (2 Kolinito 6:11-13, NW; 12:15) Se mea ‵lei ke mafau‵fau tatou katoa ki te lasi o ‵tou a‵lofa ki nisi tino mo auala e mafai ei o fakalauefa atu te alofa tenā.—1 Ioane 3:14.
12. E mafai pefea o gasolo aka te ‵tou a‵lofa ki tino katoa i te fakapotopotoga?
12 E mata, e isi ne tino i te fakapotopotoga kolā e faigata ke fakapilipili atu koe ki a latou? Kafai e se fia ‵saga atu tatou ki olotou vāivāiga—e pelā mo te mea e ma‵nako tatou ke fai mai ne latou—e mafai o fesoasoani mai te mea tenei ke maua ne tatou se va fealofani. E mafai o momea aka te ‵lei o ‵tou lagonaga ki tino konā māfai e onoono faeloa tatou ki olotou uiga ‵lei kae ‵saga malosi atu fua ki ei. Ka fai ne te mea tenei ke momea aka ‵tou a‵lofa ki a latou.—Luka 6:32, 33, 36.
13. E mafai pefea o fakalauefa atu te ‵tou a‵lofa ki tino i te ‵tou fakapotopotoga?
13 E tonu, e isi ne tapulā ki mea kolā e mafai ne tatou o fai mō nisi tino. Kāti e se mafai ne tatou o fakatalofa atu ki tino katoa i fakatasiga katoa. Kāti e se mafai foki o ‵kami atu a tino katoa māfai ko ‵kami ne tatou ‵tou taugasoa ki se ‵kaiga. Kae e mata, e mafai o fakalauefa atu ‵tou a‵lofa mai te fakamāumāu o nāi minute ke iloa faka‵lei ne tatou se tino i te ‵tou fakapotopotoga? E mata, e ‵kami ne tatou i nisi taimi a tino kolā e se masani ‵lei mo tatou ke ga‵lue fakatasi tatou i te galuega talai?
14. Kafai e ‵kau fakatasi tatou mo Kelisiano kolā e se masani ‵lei tatou, e mafai pefea o fakatau fakaasi atu ne tatou te alofa lasi?
14 E maua sāle a avanoaga ‵lei i fono a Kelisiano ke fakalauefa atu ei ‵tou a‵lofa ki nisi tino. Kāti e lau i afe a tino e ‵kau atu ki ei. E se mafai ne tatou o fetaui mo tino katoa, kae e mafai o amio tatou i se auala telā e fakaasi atu ei me e fakamuamua ne tatou te ‵lei o nisi tino i lō tatou. I taimi o malōlōga, e mafai ne tatou o fakaasi atu te fiafia mai te fakatalofa atu muamua ki nisi tino i ‵tou tafa. E isi se aso ka fai ei a tino katoa i te lalolagi nei mo fai ne taina mo tuagane, kolā e ‵kau fakatasi o tapuaki atu ki te Atua tonu telā ko te Tamana o tino katoa. Ko tafaga la te gali ke mafai o fakamasani faka‵lei tatou ki tino katoa! Ka fakamalosi tatou ne te alofa lasi ke fai ne tatou te mea tenā. Kaia e se kamata nei koe o fai penā?
Ke Toe Sau‵tala ki Manatu Konei
• Kafai ko ‵sae aka a fakalavelave i va o Kelisiano, e ‵tau o faka‵lei aka pefea a mea konei, kae kaia?
• Kafai ko gasolo aka o ma‵losi tatou i te feitu faka-te-agaga, ne a auala e ‵tau ei o momea aka te lasi o ‵tou a‵lofa?
• E mafai pefea o fakaasi atu ne tatou te alofa ki nisi tino i lō ‵tou taugasoa pele fua?
[Fakamatalaga o te Ata i te itulau e 148]
E kese‵kese auala e fakaasi atu ei te alofa faka-Kelisiano, e pelā mo mea e fai sāle i fakatasiga a te fakapotopotoga