Ke Gasolo Aka Faeloa te Alofa Fakataina

“E ‵tau o pule otou olaga ne te alofa, e pelā mo Keliso ne alofa mai ki a tatou.”​—⁠EFESO 5:⁠2.

1. Se a te uiga tāua telā ne fakasino atu ki ei a Iesu me ka fakamailoga ki ei ana soko?

A TE talai atu o te tala ‵lei o te Malo o te Atua mai fale ki fale se iloga o Molimau a Ieova. Kae ne filifili ne Keliso Iesu se fakailoga ‵kese o te Lotu Kelisiano ke fakamailoga ki ei ana soko ‵tonu. Ne fai mai a ia: “E avatu ne au ki a koutou te poloakiga fou: ke fakatau a‵lofa koutou. E pelā mo au e alofa ki a koutou; tela la, e ‵tau mo koutou o fakatau a‵lofa. Tenā te mea e iloa ei ne tino katoa ko oku soko koutou, manafai e fakatau a‵lofa koutou!”​—⁠Ioane 13:​34, 35.

2, 3. Se a te ikuga e maua ne tino kolā e ‵kau mai ki ‵tou fakatasiga Kelisiano ona ko te ‵tou a‵lofa fakataina?

² E seai eiloa se tino e ‵pau tena alofa mo te alofa o te kautaina Kelisiano tonu. E pelā eiloa mo te maneta telā e ‵piki vave ki ei a fiti, e penā foki te mea e fai ne te alofa ki tavini a Ieova ke ‵kau fakatasi mo te fealofani kae fai ei ke tosina atu a tino loto fakamaoni ki te tapuakiga tonu. E pelā mo Marcelino, se tagata i Cameroon telā ne ‵kivi ona ko tena galuega ‵togi. Mai tua o te mea ne tupu ki a ia, ne salalau atu te tala me ne ‵kivi a ia me i a ia se tino fakataulaitu. I lō te tukuatuga o fakamafanafanaga ki a ia, ne fakatea tou tagata ne te faifeau mo nisi tino i tena lotu mai te fakapotopotoga. I te taimi ne ‵kami ei tou tagata ne se Molimau a Ieova ki se fakatasiga, ne fakatalave a Marcelino. Ne seki manako a ia ke se talia a ia ne nisi tino.

³ Ne ofo malosi a Marcelino ki mea ne ‵tupu i te Kingdom Hall. Ne fakatalofa faka‵lei atu a tino ki a ia, kae ne maua ne ia a fakamafanafanaga mai i akoakoga faka-te-Tusi Tapu kolā ne lagona ne ia. Ne kamata o kau atu a ia ki fakatasiga katoa a te fakapotopotoga, ne gasolo atu ki mua i te faiga o tena akoga faka-te-Tusi Tapu, kae ne papatiso i te 2006. Nei la, ko fakaasi atu ne ia te munatonu ki tena kāiga mo tuakoi kae kamata foki a nai akoga faka-te-Tusi Tapu. Ne manako a Marcelino ke maua foki ne tino kolā e suke‵suke mo ia ki te Tusi Tapu a te alofa telā ne maua ne ia mai i tino o te Atua.

4. Kaia e ‵tau ei o faka‵logo tatou ki te fakamalosiga a Paulo ke ‘pule ‵tou olaga ne te alofa’?

⁴ Ko oko loa i te gali a te alofa fakataina tenei, kae e ‵tau eiloa mo tatou katoa o fai ‵tou tusaga ke tumau i ei. Mafaufau la ki se afi e faka‵ka i te po, e fai ei ke fakapilipili atu a tino ki tena mafanafana mo te ula mai. Ka mate atu eiloa te afi tenā seiloga ke tafu faeloa a fafie ne tino kolā e fakamafanafana i ei. E penā foki loa te fesokotakiga gali o te alofa i te fakapotopotoga ka mafai o galo atu seiloga ke fakamalosi aka ne tatou Kelisiano taki tokotasi. E mafai pefea o fai ne tatou a te mea tenei? E fai mai te apositolo ko Paulo: “E ‵tau o pule otou olaga ne te alofa, e pelā mo Keliso ne alofa mai ki a tatou, ne tuku atu foki tona ola mō tatou, ke fai mo taulaga manogi ‵lei, mo taulaga togiola e fiafia ki ei te Atua.” (Efeso 5:⁠2) A te fesili telā e ma‵nako tatou ke mafaufau ki ei ko te, Ne a auala e mafai ei o pule ‵tou olaga ne te alofa?

“Ke Fakalauefa Atu Foki te Alofa”

5, 6. Kaia ne fakamalosi atu ei a Paulo ki Kelisiano i Kolinito ke ‘fakalauefa atu te lotou a‵lofa’?

⁵ Ne tusi atu te apositolo ko Paulo ki Kelisiano i Kolinito mua: “Taugasoa pele i Kolinito! Ne fai‵pati tonu atu matou ki a koutou mo omotou loto katoatoa ki a koutou. Ne a‵lofa atu matou ki a koutou, ka ko koutou ne seki a‵lofa mai ki a matou. Ko faipati atu au penei ki a koutou e pelā eiloa koutou mo ne aku tama: fakaasi mai te lagona tonu telā ne fakaasi atu foki ne matou ki a koutou. [“Ke fakalauefa atu foki te alofa,” NW].” (2 Kolinito 6:​11-​13) Kaia ne fakamalosi atu ei a Paulo ki te kau i Kolinito ke fakalauefa atu te lotou a‵lofa?

⁶ Mafaufau la ki te auala ne kamata aka ei te fakapotopotoga i Kolinito mua. Ne fanatu a Paulo ki Kolinito i te fakaotiotiga o te 50 T.A. E tiga eiloa ne kamata tena galuega i konā i se auala faigata, ne seki ‵tuka vave te loto o te apositolo. I se taimi toetoe fua, ne fakatuanaki ei a tino e tokouke ki te tala ‵lei. Ne fakamāumāu eiloa ne Paulo se “tasi mo te āfa tausaga” ki te akoakoatuga mo te fakamalosiakaga o te fakapotopotoga fou. E manino ‵lei, me ne ati aka ne ia te alofa ‵poko mō Kelisiano i Kolinito. (Galuega 18:​5, 6, 9-​11) Ne ‵tau eiloa o a‵lofa kae āva latou ki a ia. Kae ne olo atu keatea a nisi tino i te fakapotopotoga mai i a ia. Kāti ne seki fia‵fia a nai tino ki ana polopolokiga ‵mafa. (1 Kolinito 5:​1-5; 6:​1-​10) Kāti ne faka‵logo a nisi tino ki pati fakamasei a “apositolo ‵loi.” (2 Kolinito 11:​5, 6) Ne manako eiloa a Paulo ke fakaasi atu ne ana taina mo tuagane katoa a te alofa tonu. Tela la, ne fakamolemole atu a ia ke “fakalauefa atu” te lotou a‵lofa mai i te fakapilipili atu ki a ia mo nisi taina tali‵tonu.

7. E mafai pefea ne tatou o “fakalauefa atu” ‵tou a‵lofa mai i te fakaasiatuga o te alofa fakataina?

⁷ Kae e a tatou? E mafai pefea ne tatou o “fakalauefa atu” ‵tou a‵lofa mai i te fakaasi atu o te alofa fakataina? E mafai eiloa o tosina atu a tino taki tokotasi ki tino kolā e kautama latou io me kolā e ‵pau olotou telega. Kae penā foki a latou kolā e ‵pau a mea e fia‵fia latou ki ei i mea tau fakafiafiaga e mafai o fakamāumāu fakatasi ne latou a taimi e uke. Kae kafai ko mea e fia‵fia tatou ki ei e ‵vae keatea a nisi Kelisiano mai i nisi tino, e ‵tau o “fakalauefa atu” ‵tou a‵lofa. Se mea poto ke fesili ifo tatou: ‘E mata, e se kau atu faeloa au ki te galuega talai io me ko nisi mea aka fakatasi mo taina mo tuagane kolā e se masani ‵lei mo au? I te Kingdom Hall, e mata, e fakatapula ne au toku fesokotaki atu ki tino ‵fou ona ko toku talitonu me e ‵tau o fai taugasoa mai latou ki a au? E mata, e fakatalofa atu au ki tino ma‵tua mo tama‵liki i te fakapotopotoga?’

8, 9. E mafai pefea o fesoasoani mai a pati fakatonutonu a Paulo i te Loma 15:7 ke fakatau fakatalofa atu tatou i se auala telā e fai ei ke momea aka faeloa te ‵tou a‵lofa fakataina?

⁸ I te fakatau fakatalofa atu, e mafai o fesoasoani mai a pati a Paulo ki te kau Loma ke ati aka ne tatou se kilokiloga ‵lei ki ‵tou taina tapuaki. (Faitau te Loma 15:⁠7.) A te pati Eleni telā ne ‵fuli i konei ki te “talia” e fakauiga ki te “atafai atu io me ke talimalo faka‵lei atu, kae ke aofia foki te tino tenā i tou fa‵kai i ou taugasoa.” I te taimi ne avatu ei ne se tino uiga talimalo i aso o te Tusi Tapu a taugasoa ki tena fale, e fakaasi atu ne ia ke iloa ne latou tena fiafia ke fetaui mo latou. Ko oti ne talia ne Keliso tatou i se auala fakatusa i te auala tenā, kae e fakamalosigina tatou ke fakaakoako atu ki a ia i te taliaga o taina tapuaki.

⁹ I te taimi e fakatalofa atu ei tatou ki ‵tou taina i te Kingdom Hall mo nisi koga, e mafai o ‵saga tonu atu tatou ki tino kolā e seki fetaui aka eiloa fakamuli tatou. Kaia e se fakamāumāu ei ne tatou a nai minute ke sau‵tala mo latou? I te suā fakatasiga, e mafai o fai tatou penā ki nisi tino. I se taimi toetoe fua, toeitiiti kae mafai o fai ne tatou a sau‵talaga ‵gali mo ‵tou taina mo tuagane katoa. E se ‵tau o manava‵se tatou māfai e se fai‵pati tatou ki tino katoa i te aso eiloa e tasi. E se ‵tau o ita se tino māfai e seki mafai o fakatalofa atu tatou ki a latou i fakatasiga katoa.

10. Se a te avanoaga tāua e maua ne tino katoa i te fakapotopotoga, kae e mafai pefea o fakaaoga faka‵lei katoatoa ne tatou?

¹⁰ A te fakatalofa atu ki nisi tino ko te mea muamua telā e fakaasi atu me e taliagina latou. Se auala telā e mafai o iku atu ki sau‵talaga ‵gali mo taugasoa tumau. E pelā mo latou kolā e ‵kau atu ki fono i te atufenua mo fono i te fenua e fakatalofa atu latou ki nisi tino kae kamata o sau‵tala, kae e olioli eiloa ko latou ke toe fetaui. A tino kolā e ga‵lue fakavolenitia i fakatū‵tuga o Kingdom Halls mo tino kolā e fesoasoani atu i fakalavelave ‵tupu, e masani o fai mo fai ne taugasoa ‵lei ona ko te iloa ‵lei ne latou a uiga ‵gali o nisi tino i mea kolā e fai ne latou. E maua eiloa a avanoaga mō taugasoa tumau i te fakapotopotoga a Ieova. Kafai e “fakalauefa atu” ‵tou a‵lofa, ka gasolo aka foki eiloa o uke ‵tou taugasoa, kae fakamalosi aka ei te alofa telā e fusi fakatasi ne ia tatou i te tapuakiga tonu.

Ke Toka o Fesoasoani Atu ki Nisi Tino i so se Taimi

11. E pelā mo te mea e fakaasi mai i te Maleko 10:​13-​16, se a te fakaakoakoga ‵lei ne tuku mai ne Iesu?

¹¹ E mafai o taumafai a Kelisiano katoa ke faigofie o olo atu a tino ki a ia, e pelā mo Iesu. Mafaufau ki te auala ne saga atu ei a Iesu i te taimi ne taumafai ei ana soko o taofi aka a mātua mai i te avatuga o olotou tama‵liki ki a ia. Ana muna: “Tuku tama‵liki ke o‵mai ki a au! Sa taofigina latou, me e o tino penei a te Malo o te Atua.” Oti aka, “ne kopi ne ia a tama‵liki, kae puke atu ona lima ki a latou taki tokotasi o fakamanuia atu latou.” (Maleko 10:​13-​16) Mafaufau la ki te fia‵fia o tama‵liki konā i te fakaasiatuga ne te Faiakoga Sili a te alofa atafai penā!

12. Se a te mea e faigata ei ke sau‵tala tatou mo nisi tino?

¹² E ‵tau mo Kelisiano taki tokotasi o fesili ifo, ‘E mata, e toka au i so se taimi o fesoasoani atu ki nisi tino, io me e fakafoliga atu ne au me i a au ko tō fakalavelave?’ A faifaiga kolā e se ‵se e mafai o fakagata aka ei a sau‵talaga. Kafai e fakaaoga faeloa ne tatou a selefoni io me fakalogologo ki pese i mua o nisi tino, e mafai o fakaasi atu ne tatou me e se ma‵nako tatou ke fakalavelave mai latou. Kafai e lavea ne nisi tino me e ‵saga atu faeloa tatou ki se mea pelā me se komupiuta i ‵tou lima, e mafai o fakaiku aka ne latou me e se fia fai‵pati atu tatou ki a latou. E tonu, e isi se taimi “o te ‵nofo ‵mu.” Kae kafai e ‵nofo mai a tino i ‵tou tafa, e masani eiloa o fai te taimi tenā mo “taimi o te faipati.” (Failauga 3:⁠7) Kāti e mafai o fai atu a nisi tino, “E ‵lei atu eiloa ke nofo tokotasi au” io me “E se fia faipati au ki se tino i te taeao.” E tiga eiloa te feitu tenā, a te kau atu ki sau‵talaga fakataugasoa ke oko foki ki taimi kolā e se fia fai‵pati atu ei tatou se fakamaoniga o te alofa telā “e se ‵sala ana mea i a ia eiloa.”​—⁠1 Kolinito 13:⁠5.

13. Se a te kilokiloga e uiga ki taina mo tuagane Kelisiano ne fakamalosi atu Paulo ki a Timoteo ke maua ne ia?

¹³ Ne fakamalosi atu a Paulo ki te talavou ko Timoteo ke fakaasi atu ne ia te āva ki tino katoa i te fakapotopotoga. (Faitau te 1 Timoteo 5:​1, 2.) E ‵tau foki o ‵kilo atu tatou ki Kelisiano ma‵tua e pelā me ko ‵tou mātua mo tamana kae ko tamaliki e pelā me ko ‵tou tama‵liki, e pelā me ko tama‵liki a ‵tou mātua. Kafai e maua ne tatou te kilokiloga tenā, ka seai eiloa se tino i ‵tou taina mo tuagane pele e mafaufau i a ia se tino fakaa‵tea.

14. Ne a nisi mea aoga e maua mai i sau‵talaga fakamalosi loto mo nisi tino?

¹⁴ I te taimi e aofia ei tatou i sau‵talaga fakamalosi loto, e fesoasoani atu tatou ki te atiakaga o latou i te feitu faka-te-agaga mo te feitu tau lagonaga. E masaua ne se taina galue i se ofisa lagolago a nai tino ma‵tua i te kāiga Peteli kolā ne fakaavanoa faeloa ne latou olotou taimi ke sau‵tala mo latou i aso koi fou ei a ia ki te Peteli. Ne fai eiloa olotou pati fakamalosi ke lagona ne ia i a ia se tino tonu i te kāiga Peteli. Nei la, ko taumafai a ia ke fakaakoako atu ki a latou mai i te sau‵tala mo ana taina ga‵lue i te Peteli.

E Fesoasoani Mai te Loto Maulalo ke Maua se Va Filemu

15. Se a te mea e fakaasi mai me e se mafai o ‵sao tatou mai i kinauga?

¹⁵ Kāti e isi se fakalavelave ne tupu i te va o Evotia mo Sunetui, ne tuagane Kelisiano e tokolua i te fa‵kai o Filipi, kae ne tai faigata eiloa ke faka‵lei aka. (Filipi 4:​2, 3) Ne tupu se kinauga lasi eiloa i te va o Paulo mo Panapa i mua o tino e tokouke kae ne iku atu i ei ki te ma‵vae o lāua. (Galuega 15:​37-​39) E fakaasi mai i tala konei me i tino tapuaki ‵tonu e se mafai o ‵sao mai i kinauga. E tuku mai ne Ieova ki a tatou a te fesoasoani ke faka‵lei a kinauga kae toe faka‵lei aka foki a va fakataugasoa. Kae e isi se mea e manako a ia ke fai ne tatou.

16, 17. (a) E pefea te tāua o te loto maulalo i te faka‵leiga o kinauga? (e) E fakaasi mai pefea i te tala e uiga ki te fanatuga a Iakopo ki a Esau a te tāua o te loto maulalo?

¹⁶ Mafaufau la me ka fai ne koulua mo tou taugasoa se malaga i te motoka. A koi tuai o kamata te lū malaga, e ‵tau o faulu te kī kae kamata o fakaola te motoka. A te faka‵leiga foki o se kinauga e kamata foki ki se kī. A te kī ko te loto maulalo. (Faitau te Iakopo 4:​10.) E pelā mo te mea e fakaasi mai i se fakaakoakoga i te Tusi Tapu, e fai ne te kī tenā ke mafai ne lāua kolā ne kinau o kamata o fakagalue aka a akoakoga fakavae i te Tusi Tapu.

¹⁷ Ko oti ne ‵teka atu te lua sefulu tausaga talu mai te taimi ne kaitaua ei a Esau i te galoatuga o tena tofi toekimua ki tena taina, ko Iakopo, kae ne fia tamate atu foki ki a ia. Ko pili nei o toe fetaui a te masaga tenei, kae “ne tai poi te loto o Iakopo.” Ne mafaufau a ia me e mafai eiloa o taua atu a Esau ki a ia. Kae i te fetauiga, ne fai ne Iakopo se mea telā ne seki fakamoemoe a Esau ki ei. Ne “punou ifo ki te laukele” i te taimi ko pili atu ei a ia ki tena taina. Se a te mea ne tupu? “Ka ko Esau ne tele atu o fakafetaui ki a ia, ‵sai atu kae sogi atu ki a ia, ‵tagi ei lāua tokolua.” Ne ‵fuli ei te tulaga o se taua ki te ‵lei. Ne fesoasoani atu a te loto maulalo o Iakopo ke fakagalo atu te takalialia telā ne maua ne Esau.​—⁠Kenese 27:41; 32:​3-8; 33:​3, 4.

18, 19. (a) Kafai ko ‵sae aka a kinauga, kaia e tāua ei ke gasue‵sue muamua tatou i te fakagaluegaga o pati fakatonutonu i te Tusi Tapu? (e) Kaia e se ‵tau ei o loto vāi‵vai tatou māfai e se talia vave ne te suā tino ke faka‵lei fakavave aka koulua i te taimi muamua?

¹⁸ E aofia i te Tusi Tapu a toe pati fakatonutonu ‵lei e uiga ki te faka‵leiga o kinauga. (Mataio 5:​23, 24; 18:​15-​17; Efeso 4:​26, 27)a Kae ka faigata faeloa te faka‵leiga o kinauga seiloga ke fakagalue aka mo te loto maulalo a pati fakatonutonu konā. A te faka‵tali ki te suā tino ke fakaasi atu ne ia te loto maulalo e se ko te faka‵leiga māfai e taofi fua ne tatou te kī i ‵tou lima.

¹⁹ Kafai ne seki iku manuia ‵tou taumafaiga muamua ona ko nisi pogai, e se ‵tau o loto vāivāi tatou. Kāti e manakogina se taimi mō te suā tino ke faka‵lei aka tena loto. Ne amio ma‵sei a taina o Iosefa ki a Iosefa. Ne leva ‵ki eiloa te taimi ke oko ki te taimi ne fetaui ei latou kae ko oti ne fai a ia mo fai te ulu o te malo o Aikupito. Kae fakamuli ifo, ne ‵fuli te tulaga o olotou loto kae akai atu mō se fakamagaloga. Ne fakamagalo ne Iosefa latou, kae ne fai a tama tagata a Iakopo mo fai se atufenua telā ne maua ne latou te tauliaga ke tauave te igoa o Ieova. (Kenese 50:​15-​21) Mai i te fakatumauga o se va filemu mo ‵tou taina mo tuagane, e fesoasoani atu ei tatou ki te fakamalosiakaga o te fealofani mo te fiafia o te kāiga.​—⁠Faitau te Kolose 3:​12-​14.

Ke na Fakaasi Atu ne Tatou te Alofa ‘i Pati mo Faiga’

20, 21. Se a te akoakoga e mafai o maua ne tatou mai i te ‵fuluga ne Iesu a vae o ana apositolo?

²⁰ Mai mua faeloa o tena mate, ne fai atu a Iesu ki ana apositolo: “Ko avatu ne au te fakaakoakoga mō koutou. Tela la, e ‵tau mo koutou o fai pelā mo te mea ko oti ne fai ne au ki a koutou.” (Ioane 13:15) Ne fatoa oti atu eiloa ne ‵fulu ne ia a vae o latou e toko 12. A te mea ne fai ne Iesu e seki fai fua pelā me se faifaiga masani io me se faifaiga atafai foki. A koi tuai o taku mai ne ia te tala e uiga ki te ‵fuluga o vae, ne tusi mai a Ioane: “Ne lagona ne [Iesu] te alofa ki ona tino i te lalolagi, kae alofa foki eiloa a ia ki a latou ke oko ki te fakaotiga.” (Ioane 13:⁠1) Ko tena alofa ki ana soko ne fakaosofia ei a Iesu ke fai ne ia se galuega telā e fai sāle ne se pologa. Nei la, e ‵tau foki mo latou o loto maulalo ke fai a faifaiga a‵lofa te suā tino ki te suā tino. E tonu, e ‵tau o fakamalosi aka tatou ne te alofa fakataina ke fakaasi atu te atafai mo te manavase ki ‵tou taina mo tuagane Kelisiano katoa.

²¹ A te apositolo ko Petelu, telā ne ‵fulu ana vae ne te Tama a te Atua, ne malamalama ‵lei i te uiga o te mea ne fai ne Iesu. Ne tusi mai a ia: “Kae nei ko oti ne faka‵magina koutou i te faka‵logo ki te mea tonu, ke a‵lofa fakamaoni foki koutou ki otou taina Kelisiano; tela la, ke fakatau a‵lofa fakamaoni koutou mo otou loto kātoa.” (1 Petelu 1:​22) A te apositolo ko Ioane, telā ne ‵fulu foki ana vae ne te Aliki, ne tusi mai: “Aku tama! A te ‵tou a‵lofa e se fai fua ki pati mo muna; e ‵tau o tonu te alofa, ka ke fakaasi tonu atu i faiga.” (1 Ioane 3:​18) Ke na fakamalosi ‵tou loto o fakamaoni atu te ‵tou a‵lofa fakataina e auala i faiga.

[Fakamatalaga mai lalo]

E Masaua ne Koe?

• Ne a auala e mafai ei ne tatou o “fakalauefa atu” ‵tou a‵lofa ki nisi tino?

• Ne a mea ka fesoasoani mai ke toka tatou i so se taimi o fesoasoani atu ki nisi tino?

• Se a te aoga o te loto maulalo i te faka‵leiga o kinauga?

• Se a te mea e ‵tau o fakamalosi aka ei tatou ke fakaasi atu te alofa atafai ki taina tali‵tonu?

[Ata i te itulau e 25]

Ke fakatalofa atu mo te alofa ki taina tali‵tonu

[Ata i te itulau e 27]

Ke mo a ma faka‵seke a avanoaga ke fesoasoani atu ki nisi tino