“Kae Sili i Mea Katoa, ke Fakatau a‵loga Fakamaoni Koutou”

“Ko pili mai te gataga o mea katoa. . . . Kae sili i mea katoa, ke fakatau a‵lofa fakamaoni koutou.”​—1 PETELU 4:7, 8.

NE ILOA ne Iesu me ne tāua malosi a nāi itula o ia kolā koi ‵toe mo ana apositolo. Ne iloa ne ia a mea kolā ka ‵tupu ki a latou fakamuli. Ka fai ne latou se galuega lasi ‵ki eiloa, kae ka takalia‵lia kae fakasauā atu ki a latou, e pelā eiloa mo ia. (Ioane 15:18-20) Ne fakamasaua fakafia atu ne ia i te ‵toe po tenā a te manakoga “ke fakatau a‵lofa” latou.​—Ioane 13:34, 35; 15:12, 13, 17.

² Ne maina te apositolo ko Petelu, telā ne nofo atu i konā, i te tāua o te mea tenā. I tena tusi telā ne tusi i te fia tausaga mai tua ifo kae mai mua malie faeloa o te fakamaofaga o Ielusalema, ne faka‵mafa mai ne Petelu i ei a te tāua o te alofa. Ne fautua atu a ia ki Kelisiano: “Ko pili mai te gataga o mea katoa. . . . Kae sili i mea katoa, ke fakatau a‵lofa fakamaoni koutou.” (1 Petelu 4:7, 8) E tāua ‵ki eiloa te uiga o pati a Petelu mō latou kolā e ola “i aso fakaoti” o te olaga masei tenei. (2 Timoteo 3:1) Se a te “a‵lofa fakamaoni”? Kaia e tāua ei ke a‵lofa tatou penā ki nisi tino? Kae e fakaasi atu pefea me e maua eiloa ne tatou te uiga tenā?

Se a​—Te “A‵lofa Fakamaoni”?

³ E ma‵natu a tino e tokouke me i te alofa se lagonaga masani i te tino. Kae ne seki faipati fua a Petelu ki so se vaega o te alofa masani; ne faipati eiloa a ia ki te ‵toe vaega maluga o te alofa. A te pati ko te “a‵lofa” i te 1 Petelu 4:8 ne ‵fuli mai i te pati Eleni ko te a·gaʹpe. E fakauiga te pati tenā ki te alofa sē manatu fakapito, io me e pulea ne talitonuga fakavae o te tino. E penei a pati i se tusi e tasi: “A te a‵lofa ko te agape e mafai o fakatonu atu ki ei ona ko te mea e se se lagonaga masani kae se manakoga eiloa o te tino telā e iku atu ki te faiga o te manakoga tenā.” Ona ko te mea ne togi mai ne Atamu ki a tatou te uiga ko te manatu fakapito, e ma‵nako eiloa tatou ki fakamasauaga ke fakaasi atu te fakatau a‵lofa e tusa mo fakatakitakiga fakavae kolā e tuku mai ne te Atua.​—Kenese 8:21; Loma 5:12.

⁴ E se fakauiga i ei me e fakatau a‵lofa fua tatou ona ko te mea se tiute e ‵tau o fai. E se fakauiga i ei me e seai se lagonaga alofa i te A·gaʹpe. Ne fai mai a Petelu me e ‵tau mo tatou o “fakatau a‵lofa fakamaoni” [ke “fakalauefa atu”].a (Kingdom Interlinear) E tiga te feitu tenā, e manakogina ne taumafaiga ke fai ki ei. E uiga loa ki te pati Eleni telā e ‵fuli ki te “fakamaoni” i te Tusi Tapu Tuvalu, e fai mai penei se tino poto: “E fakaasi mai i ei te ata o se tino tele telā ko fakapalele ana mu malosi koi ‵toe ki te fakaotiotiga eiloa o te fakatau‵telega.”

⁵ Telā la, e se ‵tau o fakapitoa fua te ‵tou a‵lofa ki mea faigo‵fie io me ki nāi tino fua. E manakogina i te alofa faka-Kelisiano ke “fakalauefa” atu te alofa, ke oko foki eiloa ki tulaga faiga‵ta. (2 Kolinito 6:11-13) E maina ‵lei me tenei eiloa te vaegā alofa telā e ‵tau o maua kae fakagalue ne tatou, e pelā loa mo te tino tele telā e galue malosi ke momea aka tena masani. E tāua malosi ‵ki ke maua te vaegā alofa tenā i te va o tatou. Kaia? Ona ko nisi pogai e tolu.

Kaia e ‵Tau ei o Fakatau A‵lofa Tatou?

⁶ Muamua la, “me i te alofa e vau mai i te Atua.” (1 Ioane 4:7) A Ieova, telā ko te Māfuaga o te uiga gali tenei, ne mua o alofa mai. Muna a te apositolo ko Ioane: “Tenei te auala ne fakaasi mai ei a te alofa o te Atua: ne uga mai ne ia tena Tama e tokotasi ki te lalolagi, ko te mea ke maua ne tatou a te ola e alatu i a ia.” (1 Ioane 4:9) “Ne uga mai” ne te Atua a tena tama ke liu tino, ke fakataunu tena galuega, kae ke mate i luga i te sataulo​—“ko te mea ke maua ne tatou a te ola.” E ‵saga atu pefea tatou ki te fakaasiga sili tenei o te alofa o te Atua? E fai mai a Ioane: “Kafai ne alofa mai penei a te Atua, e ‵tau mo tatou o fakatau a‵lofa.” (1 Ioane 4:11) Onoono ki pati a Ioane, ‘Kafai ne alofa mai penei a te Atua ki a tatou,’​—ne seki alofa fua ki a koe kae ki a tatou. E manino ‵lei te manatu tāua i konei: Kafai e alofa te Atua ki ‵tou taina tapuaki katoa, e ‵tau foki o a‵lofa tatou ki a latou.

⁷ Te lua o mea, e tāua malosi atu nei ke fakatau a‵lofa tatou ko te mea ke tuku atu ei ki ‵tou taina te fesoasoani e manakogina me “ko pili mai te gataga o mea katoa.” (1 Petelu 4:7) Ko ola nei tatou i “taimi faiga‵ta i aso fakaoti.” (2 Timoteo 3:1) E logo‵mae tatou ona ko tulaga ma‵sei o te lalolagi, fakalavelave o te natula, mo ‵tekemaiga. Mai lalo i tulaga faiga‵ta penei, e manakogina eiloa ke ‵pili te va fealofani o tatou. E ‵sai fakatasi tatou ne te lasi o te alofa fakamaoni kae e fakamalosi mai ke “fakatau fesoasoani” tatou te suā tino ki te suā tino.​—1 Kolinito 12:25, 26.

⁸ Te tolu o mea, e manakogina ke fakatau a‵lofa tatou ke mo a e tuku atu “se avanoa mō te Tiapolo” ke fakamasei ne ia tatou. (Efeso 4:27) E vave o fakaaogā ne Satani te tulaga sē ‵lei katoatoa o taina tali‵tonu​—ko olotou vāivāiga mo olotou mea ‵se​—ke ‵siga ei latou. E mata, ka fai ne se pati sē ‵lei a se tino ke tiakina ne tatou te fakapotopotoga? (Faataoto 12:18) Ka sē fai eiloa penā māfai e fakatau a‵lofa fakamaoni tatou! E fesoasoani mai te vaegā alofa tenā ke fakatumau te filemu kae ke ‵kau fakatasi tatou o tavini atu ki te Atua.’​—Sefanaia 3:9.

Te Auala e Fakaasi Atu ei Tou Alofa ki Nisi Tino

⁹ E ‵tau o kamata i te kāiga te fakaasiatuga o te alofa. Ne fai mai a Iesu me e mailoga ana soko ‵tonu i te lotou fakatau a‵lofa. (Ioane 13:34, 35) E ‵tau o matea atu a te alofa tenā e se i te fakapotopotoga fua kae e pelā foki i te kāiga​—i te va o te tauavaga e pelā foki mo mātua ki tama‵liki. E se gata fua i te mauaga o se lagonaga alofa ki tino o te kāiga; e ‵tau o fakaasi atu te mea tenā i au faiga.

¹⁰ E mafai pefea o fakatau fakaasi atu ne se tauavaga a te alofa i te va o laua? E fakaasi atu ne te tagata telā e alofa tonu ki tena avaga a te mea tenā i ana pati mo ana faiga​—i koga e ‵nofo ei a tino e pelā foki mo laua aka eiloa​—me e alofa tonu a ia ki ei. E āva tonu a ia ki ei kae e fakatāua ne ia ana mafaufauga, manatu, mo ana lagonaga. (1 Petelu 3:7) E fakamuamua ne ia a manakoga o tena avaga i lō a ia, kae e fai ne ia a mea katoa ke tausi atu ki ana manakoga faka-te-foitino, faka-te-agaga mo ana lagonaga. (Efeso 5:25, 28) A te fafine telā e alofa tonu ki tena avaga e ‵tau o “āva” malosi ki a ia faitalia te sē fetaui o ana uiga i nisi taimi mo te mea e fakamoemoe a ia ki ei. (Efeso 5:22, 33) E ‵lago kae fakalogo foki a ia ki tena avaga, e se manako lasi, kae e fesoasoani atu ki ei ke fakamuamua faeloa a manakoga faka-te-agaga.​—Kenese 2:18; Mataio 6:33.

¹¹ Mātua, e fakaasi atu pefea ne koulua te alofa ki aulua tama‵liki? A te ga‵lue malosi ke tausi atu ki a latou i te feitu faka-te-foitino se fakamaoniga tenā o te lua a‵lofa. (1 Timoteo 5:8) Kae e uke atu a mea e ma‵nako ki ei a tama‵liki i lō meakai, gatu, mo se fale. Kafai e ‵tupu aka latou ke a‵lofa kae tavini atu ki te Atua tonu, e ma‵nako loa ke maua ne latou a akoakoga faka-te-agaga. (Faataoto 22:6) Ko tena uiga e ‵tau o fakaavanoa ne taimi ke sukesuke ki te Tusi Tapu, ‵kau ki te galuega talai mo fakatasiga a Kelisiano, e pelā me se kāiga. (Teutelonome 6:4-7) E se faigofie ke fakatumau a faifaiga konā, maise eiloa i taimi faiga‵ta konei. A te amanaia mo te taumafai malosi o koulua ke tausi atu ki manakoga faka-te-agaga o aulua tama‵liki se fakaasiga tenā o te alofa, mo te ma‵nako tonu o koulua ke maua ne latou a fakamanuiaga tutumau.​—Ioane 17:3.

¹² E tāua foki ke fakaasi atu ne mātua te alofa mai te amanaia ki lagonaga o olotou tama‵liki. E faigatā te tulaga o tama‵liki; e manakogina ke matea ‵tonu ne latou te a‵lofa o koulua. Faipati atu me a‵lofa loa koulua ki a latou, fakaasi atu a faiga e uke o te alofa, me e fakamaoni atu i ei i a latou e alofagina kae amanaiagina foki. Fakaasi atu te alofa mai te fakamālō atu, me e matea i ei ne latou te tāua ki a koulua o olotou taumafaiga. Polopoloki atu mo te a‵lofa ki a latou, me e fakaasi atu i ei i a koulua e ma‵nako malosi ke maua ne latou a uiga ‵lei. (Efeso 6:4) E fesoasoani atu a fakaasiga katoa penā o te alofa ke ati aka ei se kāiga fiafia kae fealofani telā e toka ‵lei o fakafesagai atu ki mea faiga‵ta i aso fakaoti konei.

¹³ E fakaosofia tatou ne te alofa ke sē ‵saga atu ki mea ‵se a nisi tino. Ke masaua me i te fakamalosiatuga “ke fakatau a‵lofa fakamaoni latou,” ne taku mai ne Petelu te pogai e tāua malosi ei ke fai penā: “Me i te alofa e ‵tao ne ia a te ukega o agasala.” (1 Petelu 4:8) Ke ‘‵tao a agasala’ e se fakauiga i ei ki te ‘‵funa aka’ o agasala matagā. E ‵tau o lipoti a vaegā agasala penā ke fai a ikuga ki ei ne tino taulia i te fakapotopotoga. (Levitiko 5:1; Faataoto 29:24) Se mea tafasili i te sē alofa​—kae sē tonu i mua o te Atua​—ke fakalogo‵mae faeloa ne tino fai agasala matagā a tino ‵lei.​—1 Kolinito 5:9-13.

¹⁴ A te ukega o mea ‵se a ‵tou taina tali‵tonu ne mea fo‵liki fua. E fai mea ‵se katoa tatou i ‵tou pati mo ‵tou faiga i nisi taimi, e fakatau fakalogo‵mae atu ei tatou. (Iakopo 3:2) E mata, ka fakasalalau fakavave atu ne tatou a tamā mea ‵se a nisi tino? E faka‵tupu fua ne vaegā mea penā a fakalavelave i loto i te fakapotopotoga. (Efeso 4:1-3) Kafai e pulea tatou ne te alofa, ka sē “taumafai foki koe o salasala ne mea e ‵se ei” ou taina tapuaki. (Salamo 50:20) E pelā loa mo te ‵funa aka ne te palasitā mo te pēni a mea sē ‵lei o te ‵pui o se fale, e penā foki te ‵funa ne te alofa a mea ‵se a nisi tino.​—Faataoto 17:9.

¹⁵ E fai ne te alofa ke fesoasoani atu tatou ki tino kolā e ma‵nako ki ei. I te gasolo ifo o ma‵sei a tulaga o mea i aso fakaoti konei, kāti e isi ne taimi ka ma‵nako ei a ‵tou taina tali‵tonu ki se fesoasoani i mea faka-te-foitino. (1 Ioane 3:17, 18) E mata, ko fepaki se tino i te fakapotopotoga mo se fakalavelave i mea tau tupe io me ko seai sena galuega? Kae kāti e mafai o tuku atu ne tatou se fesoasoani, e ‵tusa mo te mea e mafai ne tatou. (Faataoto 3:27, 28; Iakopo 2:14-17) E mata, e manakogina ke fakafou te fale o se lomatua ko mate tena avaga? Kāti e mafai o fesoasoani atu tatou ke faka‵fou aka a nisi mea i ei.​—Iakopo 1:27.

¹⁶ E se fakapito fua te fakaasiatuga o te alofa ki tino i ‵tou fenua. Kāti ka lagona ne tatou a lipoti e uiga ki te pokotia o tavini a te Atua i nisi fenua i afā, mafuie, mo taua i loto eiloa i olotou atufenua. Kāti ka ma‵nako malosi latou ki meakai, gatu, mo nisi mea. E se afaina loa olotou telega mo olotou itukāiga. E a‵lofa loa tatou “ki o‵tou taina tali‵tonu” katoa. (1 Petelu 2:17) Telā la, e ‵lago atu eiloa tatou mo te fia‵fia ki fesoasoani kolā ko oti ne fakatoka mō fakalavelave ‵tupu, e pelā eiloa mo fakapotopotoga i te senitenali muamua. (Galuega 11:27-30; Loma 15:26) Kafai e fakaasi atu ne tatou te alofa i auala katoa penā, ka fakamalosi aka ei ne tatou te fusi telā e ‵sai fakatasi ne ia tatou i aso fakaoti konei.​—Kolose 3:14.

¹⁷ E fakaosofia tatou ne te alofa ke fakaasi atu te tala ‵lei o te Malo o te Atua ki nisi tino. Mafaufau ki te fakaakoakoga a Iesu. Kaia ne talai kae akoako atu ei a ia? Ona ko tena “alofa ki a latou” e uiga ki te lotou tulaga fakaalofa i te feitu faka-te-agaga. (Maleko 6:34) Ne tuku tiaki kae takitaki‵segina latou ne tausi mamoe ‵loi fakalotu, kolā ne ‵tau o akoako atu ne latou a muna‵tonu faka-te-agaga kae tuku atu foki te fakamoemoega. Telā la, ona ko te lasi o tena alofa, ne fakamafanafana atu ei ne Iesu a tino ki te “Tala ‵Lei o te Malo o te Atua.”​—Luka 4:16-21, 43.

¹⁸ Ko tō tokouke a tino i aso nei e tuku tiaki i te feitu faka-te-agaga kae faka‵segina e aunoa mo se fakamoemoega. E pelā mo Iesu, kafai e lasi te ‵tou amanaia ki manakoga faka-te-agaga o tino kolā e seki iloa ne latou te Atua tonu, ka fakaosofia eiloa tatou ne te alofa ke fakaasi atu te tala ‵lei o te Malo o te Atua ki a latou. (Mataio 6:9, 10; 24:14) Ona ko te toetoe o te taimi koi ‵toe, tenei eiloa te ‵toe taimi tāua ke tuku atu ei te fekau o te fakaolataga.​—1 Timoteo 4:16.

“Ko Pili Mai te Gataga o Mea Katoa”

¹⁹ Ke masaua me ne fakatomua ne Petelu a tena fautuaga ke fakatau a‵lofa te suā tino ki te suā tino ki pati konei: “Ko pili mai te gataga o mea katoa.” (1 Petelu 4:7) Ko pili o sui a te lalolagi matagā tenei ki te lalolagi fou kae amiotonu a te Atua. (2 Petelu 3:13) E se tenei te taimi o te manatu māmā. Ne polopoloki mai a Iesu: “Fakaeteete koutou! Ke mo a ma tō fai ‵kaiga kae ko‵nā sāle, io me manava‵se ki mea o te olaga nei, i te mea manafai e fakapoi mai te aso tenā ki a koutou.”​—Luka 21:34, 35.

²⁰ Telā la, ke na “matapula‵pula” tatou e uiga ki te taimi telā ko ‵nofo ei tatou nei. (Mataio 24:42) Ke matapula‵pula tatou ki so se tofotofoga telā e fakaaogā ne Satani ke ‵taki ei tatou keatea. Ke mo a eiloa e talia ne tatou te lalolagi sē alofa tenei ke fakagata ne ia te fakaasiatuga o te alofa ki nisi tino. Kae e sili i mea katoa, ke sinā fakapili‵pili atu eiloa tatou ki te Atua tonu, ko Ieova, ko tena Malo faka-Mesia telā ko pili o fakataunu ne ia tena fuafuaga e uiga ki te lalolagi tenei.​—Fakaasiga 21:4, 5.

[Fakamatalaga mai lalo]

FESILI MO TE SUKESUKEGA

• Ne a fautuaga fakamavae a Iesu ki a ana soko, kae se a te mea e fakaasi mai me ne maina a Petelu i ei? (Pala. 1-2)

• Se a te “a‵lofa fakamaoni”? (Pala. 3-5)

• Kaia e ‵tau ei o fakatau a‵lofa tatou, te suā tino ki te suā tino? (Pala. 6-8)

• E fakaasi atu pefea me e alofa eiloa koe ki nisi tino? (Pala. 9-18)

• Kaia e se tenei ei te taimi o te manatu māmā, kae se a te mea e ‵tau o fakaiku aka ne tatou ke na fai? (Pala. 19-20)

[Ata i te itulau e 29]

E toka faeloa te kāiga telā e fealofani ‵lei o ‵teke atu a fakalavelave i aso fakaoti konei

[Ata i te itulau e 30]

E fakamalosi tatou ne te alofa ke fesoasoani atu ki tino kolā e ma‵nako malosi ki ei

[Ata i te itulau e 31]

A te fakaasiatuga o te tala ‵lei o te Malo o te Atua ki nisi tino se faifaiga alofa