Mataupu e Luasefulutasi

Ka Taunu Eiloa mo te Manuia a Fuafuaga a Ieova

1, 2. (a) Se a te fuafuaga a Ieova mō ana tino? (e) Ko oi ne aofia i te kāiga o te Atua kolā e ‵kau fakatasi i te tapuakiga?

KE ‵KAU fakatasi a tino katoa i te tapuaki atu ki te Atua tonu kae ke maua foki ne latou katoa te saolotoga ‵malu e pelā me ne fanau a te Atua​—⁠tenā eiloa te fuafuaga alofa a Ieova. Tenā foki eiloa te mea e ma‵nako malosi ki ei a tino katoa kolā e fia‵fia ki te amiotonu.

² Ne kamata o fakataunu ne Ieova te fuafuaga sili tenei i te taimi ne faite ei ne ia a mea katoa. A te tino muamua telā ne faite ne ia, ko tena Tama, telā e “maina mai i [a ia] a te ‵malu o te Atua; e foliga foki eiloa ki foliga o te Atua,” talu mai te taimi ne toetu aka ei a ia. (Epelu 1:​1-3) E tu ‵kese te Tama tenei, me ne faite tokotasi eiloa a ia ne te Atua. Tela la, ne faite a nisi mea katoa e auala i te Tama tenei: muamua, ko agelu i te lagi, kae fakamuli ifo ko tino i te lalolagi. (Iopu 38:7; Luka 3:38) E fai latou katoa konei mo fai se kāiga e tasi i te lagi mo te lalolagi. E fai a Ieova te Atua mo fai te Pule Sili o latou, penā foki loa mo te lotou Tamana alofa.

3. (a) Ne a mea ne maua ne tatou mai ‵tou mātua muamua? (e) Se a te fakatokaga alofa telā ne fai ne Ieova mō tama‵liki a Atamu?

³ I te taimi ne fakasala ei ki te mate ‵tou mātua muamua ona ko te lā agasala mo te mata‵fatu, ne ‵tuli keatea laua mai i Etena kae ne fulitua atu foki te Atua ki a laua. Ne seki toe fai laua mo fai ne vaega o tena kāiga. (Kenese 3:​22-24; Teutelonome 32:​4, 5) Ne ‵tupu mai tatou katoa mai i a laua. Tela la, ne fa‵nau mai foki tatou mo ‵tou manakoga fia fai agasala. Kae ne iloa ‵lei ne Ieova me e isi ne tama‵liki a Atamu mo Eva kolā ka fia‵fia eiloa ki te amiotonu. Ona ko tena alofa ne fai ei ne ia se fakatokaga ke mafai o maua ne tino konā “te saolotoga ‵malu o te fanau a te Atua.”​—⁠Loma 8:​20, 21.

Ne Galo Atu i te Kau Isalaelu te Lotou Tulaga Taulia

4. Se a te tulaga taulia telā ne tuku atu ne Ieova ki te kau Isalaelu i aso mua?

⁴ Kāti ko te 2,500 tausaga mai tua o te faitega o Atamu, ne tuku atu ne Ieova ki nisi tino te avanoaga ke maua ne latou se fesokotakiga taulia mo Ia. Ne filifili ne Ieova te kau Isalaelu i aso mua ke fai mo fai ne ana tino kae ne tuku atu foki ana Tulafono ki a latou. (Kenese 12:​1, 2) Ne fakatoka ne ia latou e pelā me se atufenua e ‵tusa loa mo tena fuafuaga. (Teutelonome 14:​1, 2; Isaia 43:⁠1) Kae ne tumau eiloa te lotou ‵nofo pologa ki te agasala mo te mate. Telā ne seki maua ei ne latou te saolotoga ‵malu telā ne maua muamua ne Atamu mo Eva.

5. Ne galo atu pefea i te kau Isalaelu te lotou tulaga taulia i mua o te Atua?

⁵ E tiga eiloa te feitu tenā, ne maua faeloa ne tino Isalaelu se tulaga taulia i mua o te Atua. Ne pānaki tonu mo latou te tiute ke āva ki a Ieova e pelā me ko te lotou Tamana kae ke amio foki latou e ‵tusa loa mo tena fuafuaga. Ne faka‵mafa mai ne Iesu te tāua ke fai ne latou te tiute tenā. (Mataio 5:​43-48) Kae ne fakatamala te fenua o Isalaelu ke fai penā. E tiga eiloa ne fai mai a tino Iutaia konā me e ‘tokotasi te lotou Tamana,’ ne taku ‵tonu atu ne Iesu me ne fakasēaogā ne olotou faifaiga mo olotou uiga a pati konā. (Ioane 8:​41, 44, 47) I te 33 T.A., ne fakagata atu ei ne te Atua te Tulafono, kae ne gata atu foki i ei te tulaga taulia o tino Isalaelu. Kae e mata, e fakauiga te mea tenei me e se mafai o maua ne tino se fesokotakiga ‵lei mo te Atua?

Te Fakamaopoopoga o “Mea i te Lagi”

6. Se a te “fuafuaga” telā ne fakamatala mai ne Paulo i te Efeso 1:​9, 10?

⁶ Ne fakaasi mai ne te apositolo ko Paulo me e mafai o maua ne nisi tino se fesokotakiga fakapito mo te Atua. Ne tusi mai a Paulo e uiga ki te fakatokaga a Ieova ke fai a tino fakatuanaki mo fai ne tino o Tena kaukāiga, penei: “Ne fakaasi mai foki ne [te Atua] ki a tatou tena fuafuaga ‵funa, telā ne fuafua ne ia ke fakakatoatoa i a Keliso. Se fuafuaga mō te fakakatoatoaga o te taimi tonu, telā e tuku fakatasi ei ne ia a mea katoa, ko mea i te lagi mo mea i te lalolagi; ka ko Keliso te ulu o mea katoa.” (Efeso 1:​9, 10) E fakavae te “fuafuaga” tenei ki a Iesu Keliso. Ko maua nei ne nisi tino se tulaga ‵lei i mua o te Atua, e alatu i a Iesu. E maua ne nāi tino i a latou konā te fakamoemoega ke ola i te lagi. Kae e sili atu i te tokouke o tino ka ola i te lalolagi nei ki te se-gata-mai.

7. Ko oi e aofia i “mea i te lagi”?

⁷ Talu mai te Penitekoso i te 33 T.A., ne fakamaopoopo muamua mai ei a “mea i te lagi,” ko latou kolā ka ‵kau fakatasi mo Keliso i te Malo faka-te-lagi. Ona ko te lotou fakatuanaki ki te tāua o te taulaga a Iesu, ne taku amiotonugina ei latou ne te Atua. (Loma 5:​1, 2) Fakamuli ifo, ne aofia a tino Iutaia mo tino o Fenua Fakaa‵tea i tino konā, kae e toko 144,000 te aofaki o tino kolā e aofia i “mea i te lagi.” (Kalatia 3:​26-29; Fakaasiga 14:⁠1) Se ‵toega fua o latou koi ‵nofo mai i te lalolagi nei.

Te Fakamaopoopoga o “Mea i te Lalolagi”

8. Ko oi e aofia i “mea i te lalolagi,” kae se a te lotou fesokotakiga mo Ieova?

⁸ E ‵pau eiloa te fakatokaga o te fakamaopoopoga o “mea i te lalolagi.” Ko fakamaopoopo mai nei te fia miliona o tino kolā e fakamoe‵moe ke ola ki te se-gata-mai i te lalolagi nei. E auala i te lotou ga‵lue fakatasi mo te ‵toega o sui o te Malo, e faka‵malu ei ne latou te igoa o Ieova kae fakamaluga aka foki tena tapuakiga. (Isaia 2:​2, 3; Sefanaia 3:⁠9) E taku foki ne latou a Ieova ko te lotou “Tamana” me e tali‵tonu latou i a Ia ko te pogai o te ola. Kae ne maua foki ne latou se tulaga ‵lei i mua o te Atua ona ko te lotou fakatuanaki ki te toto maligi o Iesu. (Fakaasiga 7:​9, 14) Kae ona ko te mea koi sē ‵lei katoatoa latou, ka fai fakamuli latou mo fai ne fanau a te Atua.

9. Se a te folafolaga mō tino i te Loma 8:⁠21?

⁹ Ko fakatali‵tali nei mo te loto finafinau a tino kolā e fakamoe‵moe ke ola i te lalolagi ki te taimi telā “ka fakasaoloto [ei] a mea katoa ne faite mai te pologa mo te iku vale.” (Loma 8:21) Ka kamata te fakasaolotoga tenā māfai ko palele atu te fakalavelave lasi telā ko pili o fakaoko mai ne Keliso mo tena kautau faka-te-lagi i Amaketo. Ka fakaseai atu i ei a mea katoa i te lalolagi masei a Satani, kae ‵soko atu ki ei a fakamanuiaga mai i te Pulega a Keliso i tena Malo i te Afe Tausaga.​—⁠Fakaasiga 19:​17-21; 20:⁠6.

10. Se a te pese o tavaega ka usu atu ne tavini a Ieova?

¹⁰ Ko oko eiloa i te fakafiafia loto māfai ko ‵kau fakatasi a tavini a Ieova i te lalolagi kae fakaakoako atu ki pati a ana tavini i te lagi, kolā e folafola atu mo te fia‵fia, penei: “Te Aliki, te Atua e o koe te Malosi Katoatoa, ko oko eiloa i te lasi mo te fakaofoofogina au galuega! Te tupu o fenua katoa, ko oko eiloa i te ‵tonu mo te ‵sao ou auala! Ko oi ka se mataku ki a koe, e te Aliki? Ko oi ka ‵teke ne ia te folafola atu o tou sili? Me ko koe fua e tapu. E o‵mai a fenua katoa o tapuaki i ou mua, me ko matea ‵lei ne tino katoa au faiga amio‵tonu.” (Fakaasiga 15:​3, 4) E tonu, ka ‵kau fakatasi a tavini katoa a Ieova i te tapuaki atu ki te Atua tonu e tokotasi. Ka toe faka‵tu aka a tino ‵mate kae ka maua ne latou te avanoaga ke ‵kau atu ki te usuatuga o tavaega ki a Ieova.​—⁠Galuega 24:⁠15.

Ko Pili Mai te Saolotoga Fakaofoofogia

11. Se a te saolotoga fakaofoofogia telā ka maua ne tino kolā e ‵sao atu i te fakalavelave lasi?

¹¹ Kafai ko oti ne ave katoatoa kea‵tea a tino ma‵sei mai te lalolagi i te fakalavelave lasi telā e fakaoti ki Amaketo, ka se toe fai Satani te Tiapolo mo fai “te atua masei o te lalolagi nei.” Ka se toe ‵tau o ‵teke atu a tino tapuaki o Ieova ki fakamalosiga ma‵sei a Satani. (2 Kolinito 4:4; Fakaasiga 20:​1, 2) Ka se toe akoako atu ne lotu ‵se a fakamatalaga ‵loi e uiga ki a Ieova kae ka se toe fai foki ne latou ke ‵nofo mavae‵vae a tino. Ka se toe fakaa‵lofa a tavini a te Atua tonu i faifaiga sē fakamaoni a tino pule. Ko tafaga la te fakaofoofogia o te saolotoga telā ka maua atu i te taimi tenā!

12. Ka fakasaoloto pefea a tino katoa mai te agasala mo mea kolā e iku mai i ei?

¹² E pelā me ko “te Tamā Mamoe a te Atua [telā] ka ave ne ia keatea a agasala a te lalolagi,” ka fakaaogā ne Iesu te tāua o tena taulaga ke ‵solo keatea ei a agasala a tino. (Ioane 1:29) I te taimi ne nofo ei a Iesu i te lalolagi nei kae ne fakamagalo sāle ne ia a agasala a tino, ne faka‵lei foki ne ia a ma‵saki o tino konā e pelā me se fakamaoniga me ko magalo olotou agasala. (Mataio 9:​1-7; 15:​30, 31) Ka faka‵lei fakavavega aka foki ne Keliso Iesu, e pelā me ko te Tupu o te Malo o te Atua, a tino ‵kivi, tino gūgū, tino ‵tuli, mo tino vae ma‵sei, tino fakavale‵vale, mo tino kolā e pokotia i nisi ma‵saki. (Fakaasiga 21:​3, 4) Ka fakagata katoatoa atu “te tulafono o te agasala” ko te mea ke mafai ei o fia‵fia a tino faka‵logo katoa, penā foki loa mo te Atua, ki olotou mafaufauga mo olotou faifaiga. (Loma 7:​21-23) I te fakaotiga o te Afe Tausaga, ka ‵lei katoatoa latou e ‵tusa loa mo “foliga” o te Atua tonu e tokotasi.​—⁠Kenese 1:⁠26.

13. I te fakaotiga o te Pulega i te Afe Tausaga, ne a mea ka fai ne Keliso, kae ne a nisi mea ka iku mai i ei?

¹³ Kafai ko oti ne fesoasoani atu Keliso ki tino ke ‵lei katoatoa latou, ka toe fakafoki atu ne ia ki tena Tamana a te pulega telā ne tuku atu ki a ia ke fai ne ia te galuega tenei: “Tela la, ka oko mai te fakaotiga; ka fakatakavale ne Keliso a pule katoa fakatemoni, kae tuku atu a te Malo o te Atua ki te Atua te Tamana.” (1 Kolinito 15:​24, 25) Ka fakataunu katoatoa mai i ei a fuafuaga a te Pulega o te Malo i te Afe Tausaga. Tela la, ka se toe manakogina ei se malo ke sui ne ia te pulega a Ieova ki tino. Kae ona ko te mea ka ave katoatoa keatea te agasala mo te mate kae ka saoloto ei a tino, ka palele atu foki i ei te galuega a Iesu e pelā me ko te Fakaola. E fakamatala mai te Tusi Tapu, penei: “Kafai ko palele ne tuku mea katoa mai lalo i a ia, tela la, ka nofo foki mai lalo a te Tama i a ia telā ne tuku ne ia mea katoa mai lalo i a ia, ko pule te Atua i mea katoa.”​—⁠1 Kolinito 15:⁠28.

14. Se a te mea ka oko atu ki tino ‵lei katoatoa konā, kae kaia?

¹⁴ E ‵soko atu ki ei, ka tuku atu te avanoaga ki tino ‵lei katoatoa konā ke fakaasi atu me ko filifili aka latou ke tavini atu ki te Atua tonu ki te se-gata-mai. Tela la, a koi tuai o fai katoatoa latou mo fai ne ana fanau, ka talia ne Ieova ke fai te ‵toe tofotofoga ki tino ‵lei katoatoa konā. Ka toe fakasaoloto Satani mo ana temoni mai i te lua ‵poko. Ka seai se mea masei ka oko atu ki tino kolā e a‵lofa tonu ki a Ieova. Kae ka fakaseai atu ki te se-gata-mai so se tino telā e ‵teke atu ki a Ieova, fakatasi mo te tino ‵teke mua mo ana temoni.​—⁠Fakaasiga 20:​7-10.

15. Se a te tulaga telā ka toe maua ne tino katoa o Ieova?

¹⁵ Ka talia ne Ieova a tino ‵lei katoatoa kolā ka ‵lago atu ki tena pulega sili i te ‵toe tofotofoga tenā ke fai mo fai ne ana tama ‵tonu. Mai te taimi tenā, ka maua katoatoa foki ei ne latou te saolotoga ‵malu o fanau a te Atua e pelā me se vaega o te kaukāiga o te Atua i te lagi mo te lalolagi. Ka toe ‵kau fakatasi ei a tino katoa i te tapuaki atu ki a Ia e pelā me ko te Atua tonu e tokotasi. Ka taunu eiloa mo te manuia a fuafuaga a Ieova! E mata, e manako koe ke fai mo fai se vaega o te kaukāiga fiafia telā ka tumau ki te se-gata-mai i te lagi mo te lalolagi? Kafai e penā loa, e fakamalosi atu matou ki a koe ke fakalogo ki pati i te Tusi Tapu i te 1 Ioane 2:​17, penei: “A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.”

Ke Toe Sau‵tala ki Manatu Konei

• A koi tuai o tupu te ‵tekeatuga i Etena, se a te fesokotakiga telā ne maua ne tino katoa kolā ne tapuaki ki a Ieova?

• Se a te tiute e maua ne tino kolā e fai mo fai ne tavini a te Atua?

• Ko oi ka fai fakamuli mo fai ne fanau a te Atua, kae e fetaui pefea te mea tenei mo te fuafuaga a Ieova e uiga ki te tapuakiga?

[Fakamatalaga o te Ata i te itulau e 190]

Ka ola a tino faka‵logo i te palataiso i te lalolagi kātoa