Ke Tauloto Mai Te Muna a te Atua

E Mafai Pefea o Fakapilipili Atu Koe ki te Atua?

E fakasae aka i te mataupu tenei se fesili ne ‵sili ne koe kae fakaasi mai i ei a te koga telā e mafai ei o maua i tau Tusi Tapu a te tali. Ka fia‵fia eiloa a Molimau a Ieova ke sau‵tala mo koe ki fesili konei.

1. E mata, e fakalogologo eiloa te Atua ki ‵talo katoa?

E ‵kami ne Ieova a tino o fenua katoa ke fakapili‵pili atu ki a ia i ‵talo. (Salamo 65:2) Kae e se fakalogologo a ia ki ‵talo katoa. E pelā me se fakaakoakoga, i te taimi ne fai ei ne tino Isalaelu a amioga ma‵sei, ne seki fakalogologo eiloa te Atua ki olotou ‵talo. (Isaia 1:​15) E mafai foki o se talia a ‵talo a se tagata telā e fai fakamasei ne ia tena avaga. (1 Petelu 3:7) Kae ka lagona ne te Atua a ‵talo a tino agasala māfai e sala‵mo latou.​​—Faitau te 2 Nofoaiga Tupu 33:​9-​13.

2. E ‵talo atu pefea tatou?

A te ‵talo se tauliaga kae se vaega foki o te ‵tou tapuakiga, tela la e ‵tau eiloa mo tatou o ‵talo atu fua ki a Ieova. (Mataio 4:​10; 6:9) Ona ko tatou e sē ‵lei katoatoa, e ‵tau o ‵talo atu tatou i te igoa o Iesu ona ko ia ko te “auala” telā ne filifiligina. (Ioane 14:6) E se manako lele a Ieova ki ‵talo tauloto io me tusi ki lalo kae ke ‵talo atu tatou mai ‵tou loto.​​—Faitau te Mataio 6:7; Filipi 4:​6, 7.

E mafai foki o lagona ne te ‵tou Mafuaga a ‵talo fai lemū. (1 Samuelu 1:​12, 13) E ‵kami ne ia tatou ke ‵talo atu ki a ia i taimi katoa, e pelā mo te kamataga mo te fakaotiga o te aso, i taimi ‵kai, kae māfai ko fe‵paki tatou mo fakalavelave.​​—Faitau te Salamo 55:22; Mataio 15:36.

3. Kaia e ‵kau fakatasi ei a Kelisiano?

A te fakapili‵pili atu ki te Atua e sē se mea faigofie me e ‵nofo atu tatou i va o tino kolā e se lava te lotou fakatuanaki ki te Atua kae fakatauemu atu ki tena folafolaga e uiga ki te filemu i te lalolagi. (2 Timoteo 3:​1, 4; 2 Petelu 3:​3, 13) Tela la, e ‵tau o maua ne tatou se fakamalosiga fakatasi mo taina tali‵tonu.​​—Faitau te Epelu 10:​24, 25.

E mafai o fakapilipili atu koe ki te Atua māfai e fai taugasoa koe mo tino kolā e a‵lofa ki te Atua. E maua ne koe i fakatasiga a Molimau a Ieova a avanoaga ke maua a mea aoga mai te fakatuanaki o nisi tino.​​—Faitau te Loma 1:​11, 12.

4. E mafai pefea o fakapilipili atu koe ki te Atua?

E mafai o fakapilipili atu koe ki a Ieova mai te mafaufau ‵loto ki mea kolā ne tauloto ne koe mai tena Muna. Mafaufau ki ana galuega, tena takitakiga, mo ana folafolaga. A te ‵talo kae mafaufau ‵loto e ati aka ei a te loto fakafetai mō te alofa mo te poto o te Atua.​​—Faitau te Iosua 1:8; Salamo 1:​1-3.

E mafai fua o fakapilipili atu koe ki te Atua māfai e talitonu koe ki a ia, kae fakatuanaki ki ei. A ko te fakatuanaki e pelā eiloa me se mea ola telā e manakogina ke fakatumau. E ‵tau o fagai faeloa tou fakatuanaki mai te mafaufau ‵loto ki te fakavae o au talitonuga.​​—Faitau te 1 Tesalonia 5:​21; Epelu 11:​1, 6.

5. E mafai pefea o aoga ki a koe a te fakapilipili ki te Atua?

E atafai eiloa a Ieova ki tino kolā e a‵lofa ki a ia. E puipui ne ia latou mai so se mea telā e mafai o fakafaigata atu ki te lotou fakatuanaki mo te lotou fakamoemoega ko te ola se-gata-mai. (Salamo 91:​1, 2, 7-​10) E fakailoa mai ne ia ki a tatou a auala o te ola kolā e mafai o fakamataku ki ‵tou ola ‵lei mo te ‵tou fia‵fia. E akoako ne Ieova tatou ki te ‵toe auala ‵lei o te olaga.​​—Faitau te Salamo 73:​27, 28; Iakopo 4:​4, 8.

Mō fakamatalaga tai uke atu, ke onoono ki te mataupu e 17 o te tusi tenei, Ne a Mea e Akoako ‵Tonu Mai i te Tusi Tapu?, telā ne ‵lomi ne Molimau a Ieova.