E maua pefea ne tatou se olaga fiafia i te kāiga?

FAKAMATALAGA MAI TE TUSI TAPU

“E fia‵fia a latou kolā e lagona ne latou te muna a te Atua kae tausi ki ei!”​—Luka 11:28, Te Tusi Tapu o te Lalolagi Fou.

MEA AOGA MAI TE FAKAMATALAGA TENĀ

E maua i ei a te alofa tonu.​—Efeso 5:28, 29.

E maua te āva tonu.​—Efeso 5:33.

E maua foki i ei te tokagamalie tonu.​—Maleko 10:6-9.

E MATA, E MAFAI EILOA O TALI‵TONU TATOU KI FAKAMATALAGA MAI TE TUSI TAPU?

Ao, ona ko pogai konei e lua:

• A te Atua ko te Mafuaga o te kāiga. E fai mai te Tusi Tapu me “ne māfua mai” i a Ieova te Atua “a kāiga katoa.” (Efeso 3:14, 15) I nisi tugapati, ne fai eiloa ne Ieova a te fakatokaga o te kāiga. Kaia e tāua ei te mea tenā?

  Mafaufau ki te mea tenei: Kafai ne kai koe ki se meakai gali ‵ki kae e fia iloa ne koe me ne ‵kuka pefea, ko oi ka fesili koe ki ei? A te ‵tonuga loa, ko te tino telā ne kuka ne ia.

  E penā foki loa, ke iloa a mea e manakogina mō se kāiga fiafia, se mea ‵lei ke ‵kilo atu tatou ki a Ieova, te Mafuaga o te kāiga.​—Kenese 2:18-24.

• E atafai te Atua ki a koe. E ‵poto eiloa a kāiga kolā e ‵sala atu ki a Ieova mō pati fakatonutonu, kolā e tuku mai ne ia e auala i tena Muna. Kaia? “Me e atafai eiloa a ia ki a koutou.” (1 Petelu 5:6, 7) E manako eiloa a Ieova ki te ‵toe mea ‵lei mō koe—kae e aoga faeloa ana pati fakatonutonu!—Faataoto 3:5, 6; Isaia 48:17, 18.