Mataupu e 7
Iesu mo te Kau Makoi
NE O MAI a nisi tāgata mai te Saegāla. A latou ne makoi—ko tino kolā e fai mai me e mafai ne latou o fakamatala te uiga o te ‵tuga o fetu. A koi ‵nofo atu latou i te lotou fenua i te Saegāla, ne matea atu ne latou se fetu fou, kae ne tau‵tali atu latou ki ei i te fia selau maila ki Ielusalema.
I te okoga a te kau makoi ki Ielusalema, ne fesili atu latou penei: “Tefea te tamaliki ne fanau mai telā ka fai mo tupu o tino Iutaia? Me ne matea ne matou a tena fetu i te sopogāla; tenei te mea ne o‵mai ei matou o fakaaloalo ki a ia.”
I te taimi ne logo ei te tupu ko Helota i Ielusalema i te tala tenā, ne kaitaua malosi a ia i ei. Tela la, ne kalaga atu a ia ki faitaulaga sili ke o‵mai kae ne fesili atu ki a latou me tefea te koga ne ‵tau o fanau ei te Keliso. Ne fakavae ne latou te lotou tali ki te Tusi Tapu, olotou muna: “I Peteleema.” I konā loa, ne fai atu a Helota ke o‵mai te kau makoi ki a ia kae ne fai atu penei ki a latou: “Olo o sala‵sala faka‵lei a te tamaliki, kafai ko maua fakailoa mai, ko te mea ke fanatu foki au o fakaaloalo ki a ia.” Kae ko te tonuga loa, e fia ‵sala aka fua ne Helota te tamaliki ke tamate!
I te lotou ologa, ne tupu se mea fakaofoofogia. A te fetu telā ne matea atu ne latou a koi ‵nofo latou i te Saegāla ne faimalaga atu i mua o latou. E manino mai i ei me i te mea tenā e se se fetu e pelā mo te masani, kae ne tuku mai eiloa te fetu tenā ke takitaki ei latou. Ne tau‵tali atu eiloa te kau makoi ki ei ke oko ki te taimi ne tu tonu ei te mea tenā i luga i te fale ne ‵nofo ei a Iosefa mo Malia.
I te taimi ne ulu atu ei te kau makoi ki te fale, ne maua atu ne latou me i a Malia ne ‵nofo fakatasi mo tena tamaliki tagata, ko Iesu. I konā loa ne to‵tuli ifo latou i ana mua. Ne ‵tala ne latou ki tua mai i olotou taga a meaalofa o aulo, pululipano mo te pulumulo. Kae fakamuli ifo, i te taimi ka ‵foki atu ei latou ki a Helota ke fai atu ki a ia te koga ne nofo i ei te tamaliki, ne fakailoa atu ne te Atua ki a latou i se moemiti ke se fai penā. Tela la, ne toe ‵foki atu latou ki te lotou fenua i te suā auala.
Se a tau faka‵tau me ko oi la ne tuku mai ne ia te fetu telā ne gasuesue i te lagi ke takitaki ei te kau makoi? Masaua la, ne seki takitaki ‵tonu atu latou ne te fetu ki a Iesu i Peteleema. Kae ne takitakigina latou ki Ielusalema ko te mea ke fesokotaki atu latou ki te tupu ko Helota, telā ne fia tamate ki a Iesu. Moi sē fai ne te Atua se mea ke fakailoa atu ki te kau makoi ke mo a ma taku atu ki a Helota te koga ne nofo ei a Iesu, penei ko tamate ne ia a Iesu. Ko te fili o te Atua ko Satani te Tiapolo telā ne fia tamate ki a Iesu, kae ne fakaaogā ne ia te fetu tenā ke taumafai o fakataunu tena loto. Mataio 2:1-12; Mika 5:2.
▪ Ne a mea ne fakaasi mai me i te fetu telā ne matea ne te kau makoi e se se fetu pelā mo te masani?
▪ Tefea te koga ne nofo ei a Iesu i te taimi ne maua atu ei a ia ne te kau makoi?
▪ E iloa pefea ne tatou me ne tuku mai ne Satani te fetu ke takitaki ei te kau makoi?