E Fesili Mai ‵Tou Kau Fai‵tau . . .

Ko oi ne uga mai ne ia a te “fetu”?

▪ Kai lavea aka eiloa ne koe se ata e fakaasi mai i ei a tupu e tokotolu, io me ne tāgata ‵poto, e āsi atu ki te pepe fatoa fanau ko Iesu ka koi moe a ia i te tali fagai manu? E ‵tusa mo te tala, ne fakaaoga ne te Atua se fetu ke ‵taki atu latou ki te falemanu i Peteleema. I nisi atufenua, e akoakogina a tamaliki ke fakamasausau ne latou a igoa o tupu e tokotolu konā—ko Melchior, Caspar, mo Baltazar. Kae tiga eiloa te feitu tenā, e mata, e fetaui a te ‵tala tenā mo te mea telā e fakaasi ‵tonu mai i te Tusi Tapu? Ikai. E uke auala e se tonu ei a te ‵tala tenā.

Muamua la, ko oi a tāgata konā? I te ‵gana Eleni mua, e se taku latou ne te Tusi Tapu me ne tupu io me ne tāgata ‵poto. A latou ne makoi, io me ne tino iloilo fetu. E fai ne latou a poto fakataulaitu kolā e fakavae ki luga i fetu. E se fakaasi mai i te Tusi Tapu a igoa mo te aofaki o tino asiasi konā.

Te lua, ne āsi mai anafea a tāgata konā? Ne seki āsi mai i te taimi koi pepe ei a Iesu i loto i te tali fagai manu. E iloa pefea ne tatou a te mea tenā? E fai mai a te tino fai Evagelia ko Mataio: “I te taimi ne ulu atu ei latou ki loto i te fale ne matea ne latou te tamaliki mo Malia tena mātua.” (Mataio 2:11) Onoono la me i a Iesu ko sē fai pelā me se pepe fatoā fanau mai, kae se “tamaliki.” Ko sē ‵moe a Malia mo Iosefa i te falemanu i te po; ko ‵nofo loa latou i loto i te fale.

Te tolu, ko oi ne uga mai ne ia a te “fetu” tenā ke takitaki ki ei a tino iloilo fetu? E masani o akoako ne takitaki lotu i aso nei me ne uga mai ne te Atua a te “fetu.” E mata, ne uga mai eiloa ne ia? Masaua la, me ne seki ‵taki muamua ne te “fetu” a latou konā ki Peteleema. I lō te ‵taki atu ki konā, ne takitaki atu latou ki te tupu ko Helota i Ielusalema. Ne fakaasi atu ne latou a te fanau mai o Iesu ki te tino tatino malosi kae loto masei tenā, ko fai ei mo pogai ke takalialia malosi ei tou tagata ki te tamaliki telā ka fai mo “tupu o Iutaia.” (Mataio 2:2) I se auala fai togafiti, ne fai atu a Helota ki ou tāgata ke toe ‵foki mai o fakailoa mai ki a ia a te koga tonu e nofo i ei a te tamaliki tenei, me i a ia e manako o fakaaloalo atu ki ei. Tenā ne ‵taki atu ei ne te “fetu” a tino iloilo fetu ki a Malia mo Iosefa. Tela la, a te mea telā ne fai ne tino iloilo fetu ne mafai o iku atu ki te mate o te tamaliki moi fai ne seki aofia te Atua i ei. Se mea fakafiafia me ne aofia a ia i ei. Ona ko te lasi o te kaitaua o Helota ki tino iloilo fetu konā e seki toe ‵foki mai ki a ia, tenā ne fakatonu atu ei tou tagata ke tamate a tamaliki tāgata katoa mai te lua tausaga ki lalo i loto mo tafatafa o Peteleema.—Mataio 2:16.

Ne fakasino fakamuli atu a Ieova ki a Iesu e pelā me ko “taku Tama, ko taku fagasele telā ko oti ne talia ne au.” (Mataio 3:17) Mafaufau la: E mata, ka filifili aka ne te Tamana alofa kae amiotonu a tino iloilo fetu fapaupau—tino kolā e fai ne latou a faifaiga kolā e fakatapu i tena Tulafono—e pelā me ne ana avefekau? (Teutelonome 18:10) E mata, ka fakaaoga ne ia se fetu ke ‵taki atu ei latou ki te ‵toe tino tatino malosi kae fakamataku i te fenua, e avatu ei se fekau telā ka fakaoso malosi aka i ei a te takalialia o Helota? E mata, ka fakaaoga ne te Atua a te fetu mo tino iloilo fetu eiloa konā ke fakaasi atu a te koga telā e takato i ei a tena tama?

Ke fai se fakatusa: E uga atu ne se takitaki kautau ‵lei a tena toe sotia ‵lei i se malaga fakamataku ki loto i te kogā koga o te fili. E mata, ka fakaasi atu ne ia ki te fili a te koga e maua ei ne latou a te sotia tenā māfai e seai sena puipuiga? Ailoga loa! E penā foki loa, ne uga mai ne Ieova a tena Tama ki te lalolagi fakamataku tenei. E mata, ka fakaasi atu ne Ia ki te tupu masei ko Helota a te koga e moe i ei a Tena Tama e pelā me se tamaliki telā e seai sena puipuiga? E se mafai lele eiloa!

Ko oi la ne uga mai ne ia te “fetu,” io me se mea pelā me se fetu? Ko oi telā e fiafia malosi o kilo ki te tamaliki ko Iesu e tamate, ko te mea ke sē fakataunu a tena galuega i te lalolagi? Ko oi e taumafai o takitaki ‵se ne ia a tino kae fakamaluga aka a te loi, fakasauaga, mo te tatino? Ne fakaasi mai ne Iesu me i te “tino loi a ko te tamana foki o te loi,” a ia “se tino tatino i te kamataga”—ko Satani te Tiapolo.—Ioane 8:44.