Ne Faka‵lei Aka Mai te Fakapatele Atu ki te Gatu o Iesu

Ne salalau atu te tala me ko oti ne foki atu a Iesu mai Tekapoli ki tino Iutaia kolā ne ‵nofo i te tafātai i te feitu ki matū togala o te Tai o Kalilaia. Kāti ko oti foki ne ‵logo a tino e tokouke i te afā fakamuli, telā ne fakamalū ei ne Iesu te matagi mo te tai, kae kāti ko iloa foki ne nisi tino me ko oti ne faka‵lei aka a tāgata kolā ne ulufia ne temoni. Tela la, ne maopoopo atu “se vaitino” ki te tafātai, kāti i kogā koga o Kapanaumi, ke fakafetaui atu ki a Iesu. (Maleko 5:21) I te taimi ne tu atu ei tou tagata ki uta, ne fia‵fia kae ne ‵nofo fakatali‵tali foki latou ki mea ka fai ne ia.

E tokotasi te tino telā ne fia fakafetaui atu ki a Iesu ko Iailo, te ofisa tausi i te sunako, kāti i Kapanaumi. Ne fakasiga a ia ki mua o Iesu kae fakamolemole fakafia atu penei: “A taku tamaliki fafine ko oko eiloa i te masaki. Fakamolemole, vau aka o tuku ou lima ki luga i a ia ko te mea ke toe ‵lei a ia.” (Maleko 5:23) Ne saga atu pefea a Iesu ki te fakamolemole ‵soko atu o Iailo ke fesoasoani atu ki tena tamaliki fafine eiloa e tokotasi, telā ko 12 fua ana tausaga kae pele ‵ki ki a ia?—Luka 8:42.

I tena auala ki te fale o Iailo, ne fakafesagai atu foki a Iesu mo te suā tulaga fakaotia loto. Ne fia‵fia kae mafau‵fau foki a tino e tokouke kolā ne olo atu i a ia, me ka toe lavea ne latou se vavega telā ka fai foki ne ia. Kae e isi se fafine e tokotasi i te vaitino tenā ne mafaufau ki tena masaki.

I tausaga faiga‵ta e 12, ne logo‵mae te fafine Iutaia tenei mai te ‵tafe faeloa o tena sua. Ne ‵sala atu tou fafine ki se fesoasoani mai i tokita e tokouke, kae ne fakaaoga ne ia ana tupe katoa ki vailakau kolā ne taku atu ne latou. Kae ne seki maua eiloa ne ia se fesoasoani. A te ‵tonuga loa, “ne gasolo aka eiloa o masei atu” tena fakalavelave.—Maleko 5:26.

Kāti e mafai o maina koe me e se gata fua i te fakavāivāi atu ki a ia, kae ne fakamā foki tena masaki. E se fai‵pati sāle a tino ki se vaegā masaki penā i mua o nisi tino. Kae mai lalo i te Tulafono a Mose, a te ‵tafe o te sua e fai ei se fafine ke se ‵ma. So se tino telā e patele atu ki se fafine penā io me ko ana gatu kolā e pisipisia i toto, ne ‵tau o koukou kae ka se ‵ma a ia ke oko eiloa ki te afiafi.—Levitiko 15:25-27.

Ne logo te fafine tenei i “mea e uiga ki a Iesu,” kae ne ‵sala atu ei tou fafine ki a ia. Ona ko tena tulaga sē ‵ma, ne fanatu lēmū eiloa a ia i te vaitino tenā, kae ne mafaufau ifo a ia penei: “Ke patele fua au ki tena gatu ko ‵lei ei au.” I te taimi eiloa ne patele ei tou fafine ki te gatu o tou tagata, ne lagona fakavave ei ne ia me ko gata te ‵tafe o tena sua! “Ko oti ne faka‵lei aka te masaki fakalogo‵mae tenā” o tou fafine.—Maleko 5:27-29.

Ne fai atu ei a Iesu: “Ko oi ne patele mai ki a au?” Se a tau faka‵tau ki lagonaga o te fafine i te lagonaga ne ia o pati konā? Ne fai ‵tonu atu a Petelu mo te sē fiafia: “A te vaitino konā eiloa e mumu atu i ou tafa kae e fakatauteke atu i ou tua.” Tela la, kaia ne fesili atu ei a Iesu, “Ko oi ne patele mai ki a au?” Ne fakamatala atu a Iesu: “E isi se tino ne patele mai ki a au me ne iloa ne au te fanoga o te ‵mana keatea mai i a au.” (Luka 8:45, 46) Ao, a te faka‵leiga tenā ne fakaaoga ei te malosi o Iesu.

I te iloaga ne tou fafine me ko se mafai o ‵funa aka ne ia, ne fakasiga atu a ia i mua o Iesu, kae ko polepole eiloa i te mataku. I mua o tino katoa, ne fakaasi ‵tonu atu ne ia te mea tonu e uiga ki tena masaki kae ne fatoa faka‵lei aka ei a tou fafine. Ne fakamafanafana atu ei a Iesu mo te loto alofa ki tou fafine: “Taku tama, ko tou fakatuanaki ne ‵lei ei koe. Fano mo te filemu kae ke ‵lei tou masaki fakalogo‵mae tenā.”—Maleko 5:34.

E manino ‵lei, me i te Tino telā ne filifili aka ne te Atua ke pule ki te lalolagi, se tino alofa kae atafai tonu, telā e se fia tausi atu fua ki tino kae e isi foki sena ‵mana ke fesoasoani atu ki a latou!