Mataupu e 46
Ne Fakapatele Atua Ia ki Tena Gatu
NE ‵PA atu te tala i Kapanaumi me ko oti ne foki atu a Iesu mai Tekapoli, kae ne maopoopo mai se vaitino tokouke i te tafatai ke fakafetaui atu ki a ia. Kāti e se taumate, ko oti ne lagona ne latou me ne fakamalū ne ia te afā kae ne faka‵lei aka foki a tāgata kolā ne ulufia ne temoni. I konā loa, ne tu atu a ia ki uta, kae ne mumu atu a tino ki a ia, ne fia‵fia kae ne ‵nofo fakatali‵tali foki latou ki mea kolā ka fai ne ia.
E tokotasi te tino telā ne fia fakafetaui atu ki a Iesu ko Iailo, te tino pule i te sunako. Ne fakasiga a ia ki mua vae o Iesu kae ne akai atu fakafia penei: “A taku tamaliki fafine ko oko eiloa i te masaki. Au e fakatagi ki a koe me e mafai o fanatu koe o fakaeke ake ou lima ki luga i a ia, ko te mea ke ola!” Me ko tena tamaliki tokotasi tenā kae ko 12 fua ana tausaga, ko oko eiloa i te pele o tou fafine ki a Iailo.
Ne talia ne Iesu te fekau, kae ne olo atu latou mo te vaitino ki te fale o Iailo. Kāti e maina tatou i te pole‵pole o tino konā i te fiafia, me ne fakamoe‵moe latou me ka toe fai foki se isi vavega. Kae ko mafaufau fua te fafine e tokotasi i te vaitino tenā ki tena fakalavelave faigata.
I tausaga faiga‵ta e 12, ne logo‵mae ei te fafine tenā me ne tafe faeloa tena sua. Ne āsi ‵soko atu a ia ki te fia o tokitā, kae ne fakamāumāu ne ia ana tupe katoa ki faiga o togafiti ki tena masaki.Kae ne seki maua eiloa ne ia se fesoasoani; kae ne tai momea aka te masei o tena fakalavelave.
Kāti ko maina koe i ei, me e se gata fua i te fakavāivāi atu i ei ki a ia, kae ne ma foki a ia i tena masaki. E se ti fai‵pati sāle a tino ki vaegā masaki penā i mua o nisi tino. Kae i Tulafono a Mose ko se ‵ma foki te fafine telā e tafe tena sua, kae ko so se tino telā e fakapatele atu ki se fafine penā io me ko ana gatu kolā e pisipisia i toto ne ‵tau o koukou kae ka sē ‵ma ke oko eiloa ki te afiafi.
Ne logo te fafine tenā i vavega a Iesu, kae ne sala aka ne tou fafine a ia. Ona ko tena tulaga sē ‵ma, ne fanatu lēmū eiloa a ia i te vaitino tenā, kae ne mafaufau ifo a ia penei: “Ko au fua ke patele ki te gatu o Iesu, ko ‵lei ei au.” I tena faiga penā, ne lagona fakavave ei ne ia me ko ‵lei tena masaki!
“Ko oi te tino ne fakapatele mai ki a au?” Ne pefea te fakapoi mai o pati konā a Iesu ki a ia! Ne iloa pefea ne ia? Ne fai atu a Petelu penei: “Te Aliki, a koe ko mumu ne tino kae fakatauteke atu ki a koe, kae fai mai koe, Ko oi ne fakapatele atu ki a koe?”
Ne ‵sala aka ne Iesu te fafine tenā, ana muna: “E isi eiloa se tino ne fakapatele mai ki a au, me ne iloa ne au te tekaga keatea o te ‵mana mai i a au.” A te tonuga loa, e se ko te fakapatele atu e pelā mo te masani, me i te faka‵leiga tenā ne fakaaogā ei te malosi o Iesu.
Ne lavea ne te fafine me ko iloa aka tena faiga, ne fanatu eiloa a ia kae ne fakasiga i mua o Iesu, ko polepole i te mataku. I mua o tino katoa konā, ne fakaasi tonu atu ne ia te tala kātoa e uiga ki tena masaki mo te auala foki ne fatoā faka‵lei aka ei a ia.
Ne fakaosofia te loto o Iesu ona ko te mea ne fakaasi tonu mai ne te fafine a te mea tenā. Telā ne fakamafanafana atu ei a ia mo te alofa ki tou fafine: “Taku tama, ko tou fakatuanaki ko ola ei koe. Na fano la mo te manuia, i a koe ko ‵lei.” E pefea te gali ke iloa aka ne tatou me i te Tino telā ne filifili aka ne te Atua ke pule ki te lalolagi, se tino alofa tonu, telā e atafai eiloa ki tino kae e isi foki sena malosi ke fesoasoani atu ki a latou! Mataio 9:18-22; Maleko 5:21-34; Luka 8:40-48; Levitiko 15:25-27.
▪ Ko oi a Iailo, kae kaia ne fanatu ei a ia ki a Iesu?
▪ Se a te fakalavelave o te fafine e tokotasi, kae kaia ne faigata ei ki a ia ke fanatu ki a Iesu?
▪ Ne faka‵lei aka pefea te masaki o te fafine tenā, kae ne fakamafanafana atu pefea a Iesu ki a ia?