‵Teke te Tiapolo

1, 2. Se a te mea e ‵tau o malamalama tatou i ei e uiga ki a Satani mo ana temoni?

KA GALI te olaga i te lalolagi fou a Ieova. Fakamuli loa, ka ola tatou i te auala ne manako te Atua ke ola tatou i ei. Kae i te vaitaimi tenei e ola tatou i se lalolagi telā e pule ki ei Satani mo ana temoni. (2 Kolinito 4:4) E tiga eiloa e se lavea ne tatou a latou, e ola eiloa latou kae ma‵losi ‵ki.

² I te mataupu tenei, kae sau‵tala tatou ki te auala e mafai ei o fakapili‵pili atu tatou ki a Ieova kae puipui tatou mai i a Satani. Ne tauto mai a Ieova me ka fesoasoani mai a ia ki a tatou. Kae ‵tau mo tatou o malamalama i auala o Satani mo ana temoni ke fakatogafiti kae taua mai ki a tatou.

“E PELĀ ME SE LEONA FEKAI”

3. Se a te mea e manako te Tiapolo ke fai ki a tatou?

³ Ne ‵losi atu Satani i tino e tapuaki fua ki a Ieova ona ko manakoga kaima‵nako o latou, kae ka fakagata aka te ‵tou tavini atu ki a Ia māfai ko fe‵paki mo mea faiga‵ta. (Faitau te Iopu 2:4, 5.) Kafai ko fakaasi atu ne se tino i a ia ko manako ke tauloto ki a Ieova, e lavea ne Satani mo ana temoni te mea tenā kae taumafai o taofi aka a ia. E ita latou māfai ko tukugina atu se tino ki a Ieova kae papatiso. Ne fakatusa ne te Tusi Tapu a te Tiapolo ki ‘se leona fekai, e salasala ke folo ne ia se tino.’ (1 Petelu 5:8) E manako a Satani o fakamasei te ‵tou fesokotakiga mo Ieova.—Salamo 7:1, 2; 2 Timoteo 3:12.

4, 5. (a) Se a te mea e se mafai ne Satani o fai? (e) Se a te uiga ke “‵teke te Tiapolo”?

⁴ Kae e se ‵tau mo tatou o ma‵taku i a Satani mo ana temoni. Ne fakatapulā ne Ieova a mea e mafai ne latou o fai ki a tatou. Ne tauto mai a Ieova me ka ‵sao atu se “vaitino e tokouke” o Kelisiano ‵tonu i te “fakalavelave lasi.” (Fakaasiga 7:9, 14) E seai loa se mea e mafai ne te Tiapolo o fai ke taofi ei te mea tenā, me i a Ieova e puipui ne ia Ana tino.

⁵ Kafai e fakapili‵pili faeloa tatou ki a Ieova, e se mafai eiloa ne Satani o ofa te fesokotakiga o tatou mo Ia. Ne fakatalitonu mai te Muna a te Atua: “A Ieova e fakatasi mo koutou māfai e tumau koutou i a ia.” (2 Nofoaiga Tupu 15:2; faitau te 1 Kolinito 10:13.) E tokouke a tāgata mo fāfine fakamaoni i aso mua, e pelā mo Apelu, Enoka, Noa, Sala, mo Mose, ne ‵teke ne latou te Tiapolo mai te fakapili‵pili atu ki a Ieova. (Epelu 11:4-40) E mafai foki o fai tatou penā. Ne folafola mai te Muna a te Atua: “‵Teke te Tiapolo, kae ka tele a ia kea‵tea mai i a koutou.”—Iakopo 4:7.

“ME I A TATOU E TAUA”

6. E taua mai pefea Satani ki a tatou?

⁶ E tiga eiloa e iloa ne Satani me ko oti ne fakatapulā ne Ieova ana mea e mafai o fai ki a tatou, e tumau eiloa a ia i te taumafai o fai so se mea ke fakavāivāi te ‵tou fesokotakiga mo te Atua. I aso nei, e taua mai a te Tiapolo ki a tatou i auala kese‵kese e uke, kae fakaaoga ne ia aofaga kolā ko oti ne fai ne ia i se fia afe o tausaga. Ne a aofaga konā?

7. Kaia e taua mai ei a Satani ki tino o Ieova?

⁷ Ne tusi mai te apositolo ko Ioane: “Te lalolagi kātoa ko nofo mai lalo i te pule a te tino masei.” (1 Ioane 5:19) Ko nofo te lalolagi masei tenei i lalo i te pule a Satani kae manako a ia ke pule foki ki tino o Ieova. (Mika 4:1; Ioane 15:19; Fakaasiga 12:12, 17) E iloa ne te Tiapolo me toetoe fua tena taimi koi ‵toe, tela la, e taumafai malosi a ia o fakaosooso a tatou taki tokotasi ke se fakamaoni ki te Atua. I nisi taimi e oso ‵tonu mai a te Tiapolo, kae i nisi taimi e taua mai a ia i se auala fai lēmū.

8. Se a te mea e ‵tau o masaua ne Kelisiano taki tokotasi?

⁸ E fai‵tau tatou penei i te Efeso 6:12: “Me i a tatou e taua . . . mo agaga ma‵sei i te lagi.” E taua atu eiloa a Kelisiano taki tokotasi i te lotou taua ki te Tiapolo mo ana temoni. E ‵tau o masaua ne tatou me i tino katoa kolā ko oti ne tukugina atu ki a Ieova e aofia i te taua tenei. I tena tusi ki te kau Efeso, ne fakamalosi fakatolu atu te apositolo ko Paulo ki Kelisiano “ke tu ‵mautakitaki.”—Efeso 6:11, 13, 14.

9. Ne a mea e taumafai a Satani mo ana temoni o fai ki a tatou?

⁹ E taumafai a Satani mo ana temoni o faka‵se tatou i auala kese‵kese. E se fakauiga i ei me kafai ko oti ne ‵teke atu tatou ki se tofotofoga e tasi a Satani ko mafai o manumalo tatou i te suā tofotofoga. E taumafai te Tiapolo ke iloa ne ia ‵tou vāivāiga ko te mea ke mafai ne ia o fakaaoga a auala kolā ka ‵poa ne ia tatou. Kae e se ‵tau o ‵poa ne ia tatou, me ko oti ne akoako mai ne te Tusi Tapu a togafiti a te Tiapolo. (2 Kolinito 2:11; onoono ki te Fakamatalaga Fakaopoopo i te 31.) E tasi mai ei ko faifaiga fakatemoni.

FAKA‵MAO KEA‵TEA MAI I TEMONI

10. (a) Ne a faifaiga fakatemoni? (e) Se a te kilokiloga a Ieova ki faifaiga fakatemoni?

¹⁰ A faifaiga fakatemoni e aofia i ei a malosi fai fakaa‵tea kolā e fakaaoga ke fesokotaki atu ei a tino ki temoni, e pelā mo te fakamatalaga o mea ‵tupu i aso mai mua, faifaiga fakataulaitu, faiga o pati ‵lau io me ko te taumafai o fai‵pati mo tino ‵mate. E fai mai te Tusi Tapu ki a tatou me i faifaiga fakatemoni e “fakatakalia‵lia” kae e se ‵tau o aofia tatou i faifaiga fakatemoni kae tapuaki atu foki ki a Ieova. (Teutelonome 18:10-12; Fakaasiga 21:8) E ‵tau mo Kelisiano o ‵kalo katoatoa kea‵tea mai i so se vaega o faifaiga fakatemoni.—Loma 12:9.

11. Se a te mea e tupu māfai e fia iloa ne tatou a mea e uiga ki malosi fai fakaa‵tea?

¹¹ E iloa ne Satani me kafai e fia‵fia tatou ki malosi fai fakaa‵tea, ka faigofie i ei ke ‵taki atu tatou ki faifaiga fakatemoni. So se vaega o faifaiga fakatemoni ka fakamasei ei te ‵tou va mo Ieova.

E TAUMAFAI A SATANI O FAKATOGAFITI TATOU

12. E faka‵se pefea ne Satani a ‵tou mafaufauga?

¹² E taumafai a Satani o faka‵numi a mafaufauga o tino. E fakamāfua malielie ne ia a manatu fakalotolotolua, ke oko loa ki te taimi e mafau‵fau ei a tino me “i te mea ‵lei e masei kae ko te mea masei e ‵lei.” (Isaia 5:20) E taumafai te Tiapolo o fakamalosi aka te manatu me i pati fakatonutonu mai te Tusi Tapu e se aoga ki a tatou kae ka fia‵fia malosi atu tatou māfai e se faka‵logo tatou ki te Atua.

13. Ne a taumafaiga ne fai ne Satani ke fakamāfua a manatu fakalotolotolua?

¹³ A te fakasalalau atu o manatu fakalotolotolua, se tasi o toe auala magoi a Satani. Ko leva ‵ki ne fakaaoga ne ia te auala tenei. I te fatoaga i Etena, ne taumafai a ia ke maua ne Eva a manatu fakalotolotolua mai te fesili atu: “E tonu eiloa i te Atua ne fai atu ke mo a ma ‵kai koulua ki so se lakau i te fatoaga?” (Kenese 3:1) Fakamuli ifo i taimi o Iopu, ne fesili atu a Satani ki a Ieova i mua o agelu: “E a, ka mataku eiloa a Iopu ki te Atua māfai e seai ne ana mea?” (Iopu 1:9) Mai tua o te papatisoga a Iesu, ne tofotofo ne Satani a ia mai te fai atu: “Kafai koe ko te tama a te Atua, fai atu ki fatu konei ke liu falaoa.”—Mataio 4:3.

14. E fai pefea ne Satani ke fakalotolotolua a tino ki te fakamataku o faifaiga fakatemoni?

¹⁴ I aso nei, koi tumau eiloa te Tiapolo i te fakamāfua ne ia a manatu fakalotolotolua. E taumafai a ia o fai ke fakafesili ne tino me e mata, e ma‵sei ‵ki a faifaiga fakatemoni, ona ko nisi vaega o latou e foliga ‵lei eiloa. Ke oko foki loa ki nisi Kelisiano e se lavea ne latou te fakamataku o te mea tenā. (2 Kolinito 11:3) Tela la, ne a ‵tou mea e mafai o fai ke puipui ei tatou? E mafai pefea o mautinoa i a tatou me seki faka‵segina tatou ne togafiti a Satani? Ke onoono tatou ki feitu e lua kolā e mafai ei o fakatogafiti tatou: ko fakafiafiaga mo te faka‵leiga o masaki.

E FAKAAOGA NE SATANI ‵TOU MANAKOGA TOTINO KE ‵TEKE MAI KI A TATOU

15. E mafai pefea ne ‵tou fakafiafiaga o fai ke aofia tatou i faifaiga fakatemoni?

¹⁵ I aso nei, a tamunei, vitio, polokalame i televise, tafaoga i komupiuta mo te Itaneti e fakaasi mai ei a ma‵losi o temoni, mea fakataulaitu mo nisi malosi fai fakaa‵tea. E ‵kilo a tino e tokouke ki mea konei e pelā me e se fakama‵taku, kae e puli i a latou te fakamataku o te talia ne latou o temoni ki loto i olotou olaga. E mafai foki o aofia se tino i faifaiga fakatemoni e auala i fakamatalaga o fetū, alofilima, vaegā lāmi, mo pōlo kilasi. E ‵funa ne te Tiapolo te fakama‵taku o mea penā kae taumafai a ia o fakafoliga atu me ne mea ‵fou, ‵gali kae fakafiafia. E mafai foki o mafaufau se tino me seai se fakamataku ki te onoono ki ata agaga io me ko malosi fai fakaa‵tea, te mea tāua fua ke se fai ne ia. Kaia e fakamataku ei te vaegā mafaufauga tenā?—1 Kolinito 10:12.

16. Kaia e ‵tau ei o ‵kalo kea‵tea tatou mai fakafiafiaga kolā e fakamalosi aka ei a malosi fai fakaa‵tea?

¹⁶ E se mafai ne Satani mo ana temoni o fai‵tau ‵tou mafaufau. Kae e mafai o iloa ne latou a mea e ma‵nako kae e mafau‵fau tatou ki ei, mai te onoono mai ki filifiliga e fai ne tatou mō tatou eiloa mo ‵tou kāiga, e aofia i ei te filifiliga o ‵tou fakafiafiaga. Kafai e filifili ne tatou a ata vitio, pese, tusi e uiga ki tino kolā e fesokotaki mo agaga o tino ‵mate, mea fakataulaitu, tino faka‵leo, agaga fāfine, agaga ‵kai tino, io me ne mea tai ‵pau penā, ka iloa ei ne Satani mo ana temoni i a tatou e fia iloa ne tatou a mea e uiga ki a latou. Tenā ko taumafai ei latou ke aofia malosi tatou i faifaiga fakatemoni.—Faitau te Kalatia 6:7.

17. E mafai pefea o fakaaoga ne Satani a te manakoga i a tatou ke tumau i te ola ‵lei?

¹⁷ E mafai foki o fakaaoga ne Satani a te manakoga i a tatou ke tumau i te ola ‵lei. I aso nei, e tokouke a tino ko pokotia ne masaki. E mafai o tofotofo ne se tino a togafiti kese‵kese kae e se iku manuia. (Maleko 5:25, 26) E mafai o manavase malosi a ia kae talia fua ke fai so se mea ki a ia. Kae e pelā me ne Kelisiano, e ‵tau mo tatou o fakaeteete ke mo a ma filifili ki togafiti kolā e fakaaoga i ei a “mea fakataulaitu.”—Isaia 1:13.

18. Ne a faka‵leiga o ma‵saki e ‵tau o fakaeteete i ei a Kelisiano?

¹⁸ I Isalaelu mua, e isi ne tino ne fakaaoga ne latou a “mea fakataulaitu.” Ne fai atu a Ieova ki a latou: “Kafai ko ‵fola mai otou lima, e ‵funa oku mata mai i a koutou. Faitalia me ofo mai ne koutou a ‵talo e uke, e se fakalogologo au ki ei.” (Isaia 1:15) Mafaufau aka la—ka se fakalogo eiloa a Ieova ki olotou ‵talo! E se ma‵nako tatou ke fai se mea ke fakamasei ei te ‵tou fesokotakiga mo Ieova kae fai ei ke se maua ne tatou te fesoasoani mai i a ia, maise loa māfai ko ma‵saki tatou. (Salamo 41:3) Tela la, e ‵tau mo tatou o iloilo muamua me i te togafiti tenā e isi sena sokoga ki faifaiga fakatemoni io me ko malosi fai fakaa‵tea. (Mataio 6:13) Kafai e mafai o isi se sokoga i ei, e ‵tau mo tatou o ‵kalo kea‵tea mai ei!—Onoono ki te Fakamatalaga Fakaopoopo i te 32.

TALA E UIGA KI TEMONI

19. Ne fai pefea ne te Tiapolo ke ma‵taku a tino e tokouke?

¹⁹ E tiga eiloa e mafau‵fau a nisi tino i te Tiapolo mo temoni e se ne mea ‵tonu, kae ko nisi tino e tali‵tonu me ‵tonu eiloa ona ko mea ko oti ne ‵tupu ki a latou. E tokouke a tino e ‵nofo ma‵taku ki agaga ma‵sei kae pologa ki tuu sē mautinoa. Nisi tino e fai ne latou ke ma‵taku a nisi tino mai te faiatuga o tala e uiga ki mea fakama‵taku ne fai ne temoni ki tino. E gali ki nisi tino a vaegā tala penā kae fia‵fia o fakamatala atu ki nisi tino. Kae fai ne vaegā tala penā ke ma‵taku a tino i te Tiapolo.

20. E mafai pefea o fesoasoani atu tatou ki te fakasalalauatuga a loi a Satani?

²⁰ Mafaufau ki te mea tenei—e manako a Satani ko tino ke ma‵taku i a ia. (2 Tesalonia 2:9, 10) A ia se tino loi telā e iloa ne ia te auala ke faka‵se ei a mafaufau o tino kolā e fia‵fia ki mea fakatemoni kae fai ke tali‵tonu ki mea kolā e se ‵tonu. E fai ne tino konā a tala ki mea kolā e mafau‵fau latou me ne lavea kae lagona foki ne latou. Ko te lasi o te fai faeloa ne tino a vaegā tala penā, ko te fakalasi‵lasi foki ne latou a tala konā. E se ma‵nako tatou o fesoasoani ki a Satani i te faiga ke ma‵taku a tino mai te fai atu faeloa o vaegā tala penā.—Ioane 8:44; 2 Timoteo 2:16.

21. I lō te sau‵tala ki tala o temoni, ne a mea e ‵tau o fai‵pati tatou ki ei?

²¹ Kafai e isi se tino o Ieova e isi sena tala e uiga ki temoni, e se ‵tau mo ia o fakamatala atu faeloa te tala tenā ki nisi tino. E se ‵tau mo tino o Ieova o ma‵taku ki so se mea e mafai o fai ne te Tiapolo mo ana temoni. Kae e ‵tau mo tatou o ‵saga tonu atu ki a Iesu mo te malosi telā ko oti ne tuku atu ne Ieova ki a ia. (Epelu 12:2) Ne seki sau‵tala a Iesu ki ana soko ki tala e uiga ki temoni. Ne fakatāua eiloa ne ia te fekau o te Malo e uiga ki “galuega fakaofoofogia a te Atua.”—Galuega 2:11; Luka 8:1; Loma 1:11, 12.

22. Ne a mea e taumafai malosi koe o fai?

²² Ke mo a e puli i a tatou me taumafai a Satani o fakamasei a te ‵tou fesokotakiga mo Ieova. E taumafai a ia o fai so se mea ke taunu te mea tenā. Kae e iloa ‵lei ne tatou a auala o te Tiapolo kae taumafai malosi tatou o ‵teke atu ki so se vaega o faifaiga fakatemoni. Ka se tuku atu ne tatou “se avanoaga ki te Tiapolo” ke fakavāivāi i ei ‵tou fakamoemoega. (Faitau te Efeso 4:27.) Ao, kafai e ‵teke atu ne tatou te Tiapolo, ka ‵sao ei tatou i ana togafiti ma‵sei kae ka saogalemu tatou i te puipuiga a Ieova.—Efeso 6:11.