‵Teke Atu Satani, ko Sola ei a ia Keatea!

“Ke tuku katoatoa atu koutou ki te Atua. ‵Teke atu te Tiapolo, ko sola ei a ia keatea mai i a koutou.”​​—IAKOPO 4:7.

1, 2. (a) Se a te uiga o te Tiapolo telā e lavea atu i se fakamatalaga telā ne fakamau ki lalo i te Isaia, mataupu e 14? (e) Ne a fesili ka sau‵tala tatou ki ei?

A TE Tiapolo ko te ‵toe fakaakoakoga masei eiloa o te fakamaualuga. Ne fakamaoni mai eiloa tena fakamatamata i pati kolā ne fakamau ki lalo ne te pelofeta a te Atua ko Isaia. I tausaga e sili atu i te selau, mai mua o te faiga o Papelonia mo fai te malo malosi i te lalolagi, ne sui a tino o Ieova ne tino kolā ne fai atu ne latou te folafolaga ‵teke tenei ki “te tupu o Papelonia”: “A koe ne taumafai o kake ki te lagi o tuku tou nofogaaliki mai i luga atu o te fetu tafasili i te maluga [tupu mai i te lainā tupu o Tavita]. . . . Ne fai ake koe pelā i a koe ka kake aka ki taulu o kaumana ke fai koe pelā mo te Atua Malosi.” (Isaia 14:​3, 4, 12-​15; Numela 24:17) A te uiga fakamatamata o “te tupu o Papelonia” ne tai ‵pau eiloa mo uiga o Satani, “te atua masei o te lalolagi nei.” (2 Kolinito 4:4) Kae ka iku atu eiloa ki se fakaotiga masei a te fakamaualuga o Satani, e pelā eiloa mo te tulaga fakamasiasi telā ne oko atu ki tupu o Papelonia.

² Kae i te taimi koi ola mai nei te Tiapolo, kāti e mafau‵fau tatou ki vaegā fesili penei: E mata, e ‵tau o ma‵taku tatou ki a Satani? Kaia e fakamalosi ei ne ia a tino ke fakasauā atu ki Kelisiano? E mafai pefea o faka‵mao keatea te Tiapolo mo tena taumafaiga o pule mai ki a tatou?

E Mata, e ‵Tau o Ma‵taku Tatou ki te Tiapolo?

3, 4. Kaia e se ma‵taku ei a Kelisiano fakaekegina mo olotou taugasoa i te Tiapolo?

³ Ko se faka‵tau eiloa i te fakamalosi atu ki Kelisiano fakaekegina a pati konei a Iesu Keliso: “Sa ma‵taku ki so se mea ka puapuagātia ei koe. Kiloke, a te Tiapolo ka tofotofo ne ia koutou i te ‵pei o nisi o koutou ki te fale puipui; e ‵tusa mo te sefulu o aso e puapuagātia ei koutou. Fakamaoni eiloa ke oko ki te mate, ko tuku atu ei ne au ki a koe a te foualiki o te ola.” (Fakaasiga 2:​10) E se ma‵taku ki te Tiapolo a te kau fakaekegina mo olotou taugasoa kolā e fakamoe‵moe ke ola i te lalolagi. E se māfua mai te vaegā sē mataku tenei mai te loto toa telā ne tuku fakasolo mai. E maua mai eiloa i te lotou ma‵taku ki te Atua kae ‘e maua ne latou te ‵lafiga i lalo ifo o te malūga o ana kapa‵kau.’​​—Salamo 34:9; 36:7.

⁴ Ne tumau eiloa i te fakamaoni ke oko ki te ‵mate a soko mua o Iesu Keliso kolā ne seki ma‵taku ki se mea, faitalia a mea kolā ne logo‵mae latou i ei. Ne seki ma‵taku eiloa latou ki mea e mafai o fai ne Satani te Tiapolo, me iloa ‵lei ne latou me e se mafai o tuku tiaki ne Ieova a tino kolā e fakamaoni ki a la. I se aula foki penā, ko oti ne fakaiku aka ne Kelisiano fakaekegina mo olotou taugasoa tukugina atu ke tumau latou i te fakamaoni ki te Atua faitalia te ma‵losi o fakasauāga i aso nei. Kae ne fakaasi mai ne te apositolo ko Paulo me e isi se malosi o te Tiapolo i luga i te mate. E mata, e se ‵tau o fai tatou ne te manatu tenā ke ma‵taku?

5. Ne a mea e tauloto ne tatou mai i te Epelu 2:​14, 15?

⁵ Ne fai mai a Paulo me i te fai o Iesu mo tama a te foitino mo te toto, “ne fai ne ia e alatu i tona mate, ko te mea ke fakatakavale ne ia a te Tiapolo, telā e isi sena pule i te mate, kae fakasaoloto ei a latou kolā ne fai mo pologa i olotou olaga kātoa ona ko te ma‵taku ki te mate.” (Epelu 2:​14, 15) E pelā me ko te tino “telā e isi sena pule i te mate,” ne ulu atu Satani ki a Iuta te Isikaliota kae fakaaogā foki ne ia a takitaki Iutaia mo te kau Loma ke tamate a Iesu. (Luka 22:3; Ioane 13:​26, 27) Kae e auala i tena mate e pelā me se taulaga, ne fakasaoloto ei ne Iesu a tino agasala mai te pulega a Satani kae ne mafai ei o maua ne tatou te ola se-gata-mai.​​—Ioane 3:​16.

6, 7. E pefea te lasi o te malosi o Satani ki luga i te mate?

⁶ E pefea te lasi o te malosi o te Tiapolo ki luga i te mate? Ia, mai te kamataga o taumafaiga ma‵sei a Satani, ne fai ne ana loi mo ana takitakiga ke ‵mate a tino. Ne tupu te mea tenei me ne agasala a Atamu kae faka‵pisi atu ei ne ia te agasala mo te mate ki te kāiga o tino katoa. (Loma 5:​12) E se gata i ei, ne fakasauā atu foki a tavini a Satani i te lalolagi nei ki tino tapuaki ki a Ieova, ke oko foki eiloa ki te tamate o latou i nisi taimi, e pelā eiloa mo te mea ne fai ne latou ki a Iesu Keliso.

⁷ E tiga eiloa te feitu tenā, e se ‵tau o mafau‵fau tatou me e mafai fua o tamate ne te Tiapolo so se tino telā e fia tamate a ia ki ei. E puipui ne te Atua Ana tino kae ka se talia lele eiloa ne ia ke ‵solo faka‵ma ne Satani a tino tapuaki ‵tonu katoa i te lalolagi. (Loma 14:8) E tonu, e talia ne Ieova ke oko atu a fakasauāga ki ana tino katoa, kae e talia ne ia ke ‵mate a nisi tino o tatou e pelā me ko te ikuga o osomaiga a te Tiapolo. Kae e tuku mai eiloa i te Tusi Tapu a te fakamoemoega gali o te toetuga mō tino kolā e isi ne olotou igoa i te “tusi” a te Atua​​—kae e seai lele eiloa se mea e mafai o fai ne te Tiapolo ke taofi aka ei te ‵toe fakafokiatuga tenā o tino ki te ola!​​—Malaki 3:​16; Ioane 5:​28, 29; Galuega 24:15.

Kaia e Fakasauā ei Tatou ne Satani?

8. Kaia e fakasauā ei ne te Tiapolo a tavini a te Atua?

⁸ Kafai e fai tatou mo tavini a‵lofa fakamaoni a te Atua, e isi eiloa se pogai fakavae e fakaoko mai ei ne te Tiapolo a fakasauāga ki a tatou. A tena fakamoemoega ko te faiga ke gutugutulua tatou i te ‵tou fakatuanaki. E maua ne tatou se fesokotakiga tafasili i te gali mo te ‵tou Tamana faka-te-lagi, kae e manako Satani o fakamasei te mea tenā. E se ‵tau o ‵poi tatou i te mea tenei. I te fatoaga o Etena, ne ‵valo atu ne Ieova me ka fai fili tena “fafine” fakatusa mo te “gata,” penā foki loa mo lā “fanau.” (Kenese 3:​14, 15) E fakasino atu te Tusi Tapu ki te Tiapolo e pelā me ko “te gata taumua” kae e fakaasi mai foki i ei me ko toetoe fua nei tena taimi kae ko gasolo aka foki eiloa te lasi o tena kaitaua. (Fakaasiga 12:​9, 12) I te taimi e tumau ei te fai fili tenei i vā o “fanau” e tokolua konei, e mafai eiloa o fakamoe‵moe a tino kolā e tavini atu mo te fakamaoni ki a Ieova me ka fe‵paki latou mo fakasauāga. (2 Timoteo 3:​12) E mata, ko iloa nei ne koe te pogai e fakasauā mai ei a Satani?

9, 10. Se a te kinauga telā ne fakasae aka ne te Tiapolo, kae e aofia pefea i ei a amioga a tino?

⁹ Ne fakasae aka ne te Tiapolo te kinauga e uiga ki te pulega sili i te lagi mo te lalolagi. E ‵tusa mo te mea tenā, ne fakafesili foki ne ia te fakamaoni o tino ki te Tino telā ne faite ne ia latou. Ne fakaoko atu ne Satani a fakasauāga ki te tagata amiotonu ko Iopu. Kaia? Ko te mea ke fakamasei ne ia te fakamaoni o Iopu ki a Ieova. Ne fakataunu ne te avaga o Iopu mo ana ‘tino fakamafanafana’ e tokotolu a te fuafuaga a te Tiapolo i te taimi tenā. E pelā mo te mea e fakaasi mai i te tusi o Iopu, ne kinau atu te Tiapolo ki te Atua, mai te fai atu me e seai eiloa se tino ka tumau i te fakamaoni ki a Ia māfai e talia ne ia a Satani ke tofotofo aka te tino tenā. Kae ne tumau eiloa a Iopu i tena fakamaoni, telā ne fakamaoni atu ei me i a Satani se tino loi. (Iopu 1:8–​2:9; 16:2; 27:5; 31:6) E fakasauā ne te Tiapolo a Molimau a Ieova i aso nei i tena taumafai ke fakamasei te lotou fakamaoni kae ke fakatalitonu atu ei me e ‵tonu ana pati ‵toa.

¹⁰ A te iloaga me e aumai ne te Tiapolo a fakasauāga ki a tatou ona ko te fia fakamasei ne ia te ‵tou fakamaoni ki te Atua, e mafai o fesoasoani mai ki a tatou ke loto ‵toa kae loto ma‵losi. (Teutelonome 31:6) A te ‵tou Atua ko te Pule Sili i te lagi mo te lalolagi, kae ka fesoasoani mai a ia ke fakatumau ne tatou ‵tou fakamaoni. Ke na taumafai faeloa tatou o fai te loto o Ieova ke fiafia, mai te tumau i te fakamaoni, ko te mea ke mafai o tuku atu ne ia se tali ki te ‵toe tino fakaitaita sili, ko Satani te Tiapolo.​​—Faataoto 27:11.

‘Faka‵sao Mai Matou Mai te Tino Masei’

11. Se a te uiga o te fakamolemole tenei, “Sa takitakigina matou ki se tofotofoga”?

¹¹ A te tumau i te fakamaoni e se se mataupu faigofie fua; se mea telā e manakogina i ei a taumafaiga e uke fakatasi mo te faiga o ‵talo. E fesoasoani malosi mai eiloa a pati i te ‵talo fakaakoako. Ne fai mai Iesu i se vaega i ei, penei: “Sa takitakigina matou ki se tofotofoga, kae faka‵sao mai matou mai te [tino] masei.” (Mataio 6:​13) E se fakaosooso ne Ieova tatou ke agasala. (Iakopo 1:​13) Kae kafai e fakasino atu te Tusi Tapu ki a ia e pelā me e fai ne ia io me e faka‵tupu ne ia a mea, e fakauiga i ei me e talia ne ia. (Luta 1:​20, 21) Mai te ‵talo atu e pelā mo te mea ne fakaasi mai ne Iesu, e fakamolemole atu eiloa tatou ki a Ieova ke mo a ma taliagina tatou ke ‵tō atu ki fakaosoosoga. Kae ka lagona eiloa ne ia tatou, me e maua ne tatou te fakatalitonuga tenei i te Tusi Tapu: “Me i te Atua e tausi tena folafolaga, kae se mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga; kae i te taimi e fakaosoosogina ei koutou, ka tuku atu ne ia a te malosi e kufaki ei ne koutou, kae fai foki ne ia se ala e ‵sao ei koutou.”​​—1 Kolinito 10:13.

12. Kaia e ‵talo atu ei tatou penei: “Kae faka‵sao mai matou mai te [tino] masei”?

¹² Mai tua o te takuatuga o fakaosoosoga, ne fetaui ‵lei eiloa a nisi pati a Iesu, e ‵tusa mo te ‵fuliga i te ‵gana Eleni: “Ke faka‵sao mai matou mai te tino masei.” E fai‵tau tatou penei i nisi ‵fuliga o te Tusi Tapu: “Faka‵sao mai matou mai te masei” (Tusi Tapu, Tuvalu) io me “Puipui matou mai te masei.” (Contemporary English Version) Kae i te Tusi Tapu, a te tugāpati ko te “faka‵sao mai” e fakaaogā sāle loa ki tino, kae ko te Evagelia a Mataio e fakasino tonu atu eiloa ki te Tiapolo e pelā me ko te tino ‘fakaosooso.’ (Mataio 4:​3, 11) Telā la, se mea tāua ‵ki ke ‵talo atu mō te faka‵saoga mai “te [tino] masei,” ko Satani te Tiapolo. E taumafai a ia o ‵fuli tatou ke agasala ki te Atua. (1 Tesalonia 3:5) Kafai e fakamolemole atu, “Faka‵sao mai matou mai te tino masei,” e fakamolemole atu eiloa tatou ki te ‵tou Tamana faka-te-lagi ke takitaki kae fesoasoani mai ko te mea ke faka‵mao keatea te Tiapolo mo ana taumafaiga o pule mai ki a tatou.

Ke Faka‵mao Keatea te Tiapolo Mai i a Koe

13, 14. Kaia ne ‵tau ei o ‵fuli ne te kau Kolinito olotou faifaiga ki se tagata i te fakapotopotoga telā ne amio masei?

¹³ I te taimi ne fakamalosi atu ei a Paulo ki Kelisiano i Kolinito ke loto fakamagalo, ne tusi atu a ia: “Kafai ne fakamagalo ne koutou se tino e ‵tusa mo tena mea ‵se ne fai, e fakamagalo foki ne au. Ne fai ne au te mea tenā i mua o Keliso ona ko koutou, ko te mea ke faka‵mao Satani mo tena taumafaiga o pule ki a tatou, me i a tatou e maina ‵lei i ana fuafuaga.” (2 Kolinito 2:​10, 11) E mafai eiloa o pule mai te Tiapolo i auala kese‵kese, kae kaia ne fai ei ne Paulo se fakamatalaga pelā mo te mea ne siki mai i luga nei?

¹⁴ Ne fatoā polopoloki ne Paulo a Kelisiano i Kolinito me ne talia ne latou se tagata amio masei ke tumau i te fakapotopotoga. Kāti ne fakafiafia atu eiloa te mea tenei ki a Satani, me ne taku fakamasei ei te fakapotopotoga mō te taliaga o amioga finalalolagi kolā “ne vaegā amioga e se fai ne tino pouliuli.” Fakamuli ifo, ne fakatea ei te tino fai mea ‵se. (1 Kolinito 5:​1-5, 11-​13) Ne salamō fakamuli te tagata tenā. Kafai e ita fitifiti a te kau Kolinito ma fakamagalo kae toe fakafoki mai te tagata tenā, ko mafai ei o pule atu te Tiapolo ki a latou i te suā auala. E pefea la? Me ka tō faiga‵ta kae sē a‵lofa fakamagalo latou, e pelā eiloa mo Satani. Kafai ‘ko ‵mae te loto o te tagata tenā ona ko te loto vāivāi,’ e iku loa o fakagata katoatoa tena tapuaki atu ki te Atua, kae ka pānaki eiloa latou mo te fakasalaga i mua o te Atua alofa, ko Ieova, maise eiloa te kau toeaina. (2 Kolinito 2:7; Iakopo 2:​13; 3:1) E tonu, e seai eiloa se Kelisiano tonu e manako o tautali atu ki a Satani mai te fakaasi atu o uiga ma‵sei, uiga faiga‵ta, kae sē alofa fakamagalo.

Ke Puipui ki te Gatutau Mai te Atua

15. Se a te taua telā e aofia tatou i ei, kae se a te mea e fakalagolago ki ei te ‵tou manumalo?

¹⁵ Kafai e fia saoloto tatou mai te Tiapolo, e ‵tau o taua atu tatou i te taua faka-te-agaga ki malosi ma‵sei faka-te-agaga. E fakalagolago eiloa te manumalo o tatou i malosi ma‵sei faka-te-tiapolo ki te ‵pei o tatou ki “meatau katoa kolā ne tuku atu ne te Atua.” (Efeso 6:​11-​18) E aofia i te gatutau tenei “a te amiotonu ke fai mo otou ufifatafata.” (Efeso 6:​14) Ne seki fakalogo a te Tupu o Isalaelu mua ko Saulo kae ne logo‵mae ei a ia ona ko te sē ‵lago atu o te agaga tapu. (1 Samuelu 15:​22, 23) Kae kafai e amio‵tonu tatou kae fakapei ki luga i a tatou te gatutau kātoa faka-te-agaga, ka maua ei ne tatou te agaga tapu o te Atua mo te puipuiga ‵tau mai i a Satani mo ana agelu ma‵sei, ko temoni.​​—Faataoto 18:10.

16. E mafai pefea o maua ne tatou se puipuiga tumau mai malosi ma‵sei faka-tiapolo?

¹⁶ Ke tumau faeloa i te puipuiga mai i malosi ma‵sei faka-te-tiapolo, e ‵tau o aofia i nisi mea kolā e ‵tau o fai ne tatou, a te faitau mo te sukesuke faeloa ki te Muna a te Atua, mai te fakaaogā faka‵lei o tusi kolā ne tuku mai ne “te tavini fakamaoni kae poto.” (Luka 12:42) Ka faka‵fonu ei ‵tou mafaufau ki mea faka-te-agaga, e ‵tusa mo pati fakatonutonu a Paulo: “Taina, konei aku toe muna, ke faka‵fonu otou mafaufau ki mea kolā e ‵lei kae maua mai i ei a te vikiga, e pelā mo mea konei: ko mea ‵tonu, ko mea tāua, ko mea ‵lei, ko mea ‵ma, ko mea ‵gali mo mea ‵malu.”​​—Filipi 4:8.

17. Se a te mea ka fesoasoani mai ki te faiga o tatou e pelā me ne tino talai ma‵goi o te tala ‵lei?

¹⁷ E fesoasoani mai a Ieova ke toka tatou o “takutaku atu a te Tala ‵Lei o te Filemu, ke pelā mo ne taka mō otou vae.” (Efeso 6:​15) A te faiga faeloa o ‵tou tusaga i fakatasiga Kelisiano e fakatoka ei tatou ke folafola atu te tala ‵lei o te Malo o te Atua. Ko oko eiloa i te lasi o te fiafia e maua mai te fesoasoani atu ki nisi tino ke tauloto ki te munatonu a te Atua kae ke maua foki ne latou te saolotoga faka-te-agaga! (Ioane 8:​32) A “te muna a te Atua ke fai mo pelu, e pelā eiloa mo te tukuatuga ne te Agaga ki a koutou,” e puipui ei tatou mai akoakoga ‵se “kae fakatakavale kātoa mafaufauga sē ‵lei.” (Efeso 6:​17; 2 Kolinito 10:​4, 5) A te apo i te fakaaogāga o te Muna tusia a te Atua, ko te Tusi Tapu, e fesoasoani mai ke akoako atu ne tatou te munatonu kae puipui foki ei tatou mai i auala faitogafiti a te Tiapolo.

18. E mafai pefea ne tatou o “agai atu ki auala ma‵sei o te Tiapolo”?

¹⁸ Ne kamata ne Paulo tena fakamatalaga e uiga ki ‵tou gatutau faka-te-agaga, penei: “Ke ati ake te otou malosi i te ‵kau fakatasi mo te Aliki i tona ‵mana malosi. Ke fakaeke ki luga i a koutou a meatau katoa [gatutau] kolā ne tuku atu ne te Atua, ko te mea ke mafai ne koutou o agai atu ki auala ma‵sei [“auala faitogafiti,” fakamatalaga fakaopoopo, NW] o te Tiapolo.” (Efeso 6:​10, 11) A te pati Eleni telā ne ‵fuli ki te “agai atu” e fakasino atu ki se sotia telā e ‵mautakitaki i tena tulaga. E ‵mautakitaki tatou i ‵tou tulaga i te taua faka-te-agaga, faitalia me e fakaaogā ne Satani a togafiti valevale i ana taumafaiga ke fakamasei ‵tou tulaga fealofani, ‵tou akoakoga, io me ko ‵tou fakamaoni ki te Atua. Kae ne seki iku manuia eiloa a osomaiga a te Tiapolo​​—kae ka se iku manuia foki eiloa!a

‵Teke Atu te Tiapolo, ko Sola ei a Ia Keatea

19. Se a te auala e tasi e mafai ei o tumau te ‵tou ma‵losi i te ‵teke atu ki te Tiapolo?

¹⁹ E mafai eiloa o manumalo tatou i te ‵tou taua faka-te-agaga i te ‵teke atu ki te Tiapolo mo ana agelu ma‵sei kolā e pule atu a ia ki ei. E seai eiloa se pogai e ‵tau ei o pole‵pole tatou i te ma‵taku, me ne tusi mai te soko ko Iakopo: “Ke tuku katoatoa atu koutou ki te Atua. ‵Teke atu te Tiapolo, ko sola ei a ia keatea mai i a koutou.” (Iakopo 4:7) E tasi te auala e mafai o tumau tatou i te malosi o ‵teke atu ki a Satani mo ana agelu ma‵sei kolā e ga‵lue fakatasi, ko te faka‵mao keatea mai i faifaiga faivailakau io me ko mea fakataulaitu mo tino kolā e fai ne latou. E fakaasi manino mai ne te Tusi Tapu me e ‵tau eiloa o ‵teke atu a tavini a Ieova ki te salasalaga ki fakailoga io me ko te matematega o fetu, te ‵valo atu o mea ka ‵tupu i aso mai mua, mo te faivailakau. Kafai e fakalavelave kae ma‵losi foki tatou i te galuega faka-Kelisiano, e se ‵tau o ma‵taku tatou ki se tino telā ka fakavailakau ne ia tatou.​​—Numela 23:23; Teutelonome 18:​10-​12; Isaia 47:​12-​15; Galuega 19:​18-​20.

20. E mafai pefea o ‵teke atu tatou ki te Tiapolo?

²⁰ E ‘‵teke atu ne tatou te Tiapolo’ mai te faka‵logo ki tulafono mo te munatonu i te Tusi Tapu kae mai te tumau foki i te ‵teke atu ki a ia. E fetaui ‵lei eiloa te lalolagi mo uiga o Satani me i a ia ko te atua i ei. (2 Kolinito 4:4) Telā la, e ‵teke atu tatou ki uiga o te lalolagi e pelā mo te fakamatamata, uiga kaiū, amioga ma‵sei, amioga fakasauā, mo te fia maumea. E iloa ne tatou me ne sola keatea te Tiapolo i te taimi ne ‵teke atu ei a Iesu ki ana fakaosoosoga mai te fakaaogāga o te Tusi Tapu i te taimi o te tofotofoga i te koga lavaki. (Mataio 4:​4, 7, 10, 11) E penā foki loa, ka ‘sola keatea’ a Satani mai i a tatou māfai e faka‵logo katoatoa tatou ki a Ieova kae ‵talo atu mō Tena fesoasoani. (Efeso 6:​18) Fakatasi mo te fesoasoani o Ieova te Atua mo tena Tama fagasele, e seai eiloa se tino e mafai o fakalogo‵mae ne ia tatou i se auala tumau​​—ke oko foki eiloa ki te Tiapolo!​​—Salamo 91:​9-​11.

[Fakamatalaga mai lalo]

Se a Tau Tali?

• E mata, e ‵tau o ma‵taku tatou ki a Satani te Tiapolo?

• Kaia e fakasauā ei ne Satani a Kelisiano?

• Kaia e ‵talo atu ei tatou ke faka‵sao mai “te [tino] masei”?

• E mafai pefea o manumalo tatou i te taua faka-te-agaga?

[Ata i te itulau e 18]

E mata, e ‵talo atu koe ke fakasao koe mai ‘te tino masei’?