“‵Teke Atu te Tiapolo” e Pelā mo Iesu

“‵Teke atu te Tiapolo, ko sola ei a ia keatea mai i a koutou.”—IAKOPO 4:7.

1. Ne a ‵tekemaiga ne iloa ne Iesu me ka fepaki mo ia i te lalolagi, kae ne a mea ne iku mai i ei?

NE ILOA ne Iesu Keliso me ka fepaki a ia mo ‵tekemaiga mai te Tiapolo. Ne manino faka‵lei a te manatu tonu tenei i pati a te Atua ki te gata kae ne fakasino tonu atu loa ki te agaga ‵teke kae masei: “Ka fai ne au a koulua mo te fafine [te fakapotopotoga faka-te-lagi a Ieova telā e fai pelā me ko tena avaga] ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine [Iesu Keliso] a tou ulu, kae ka u ne koe olotou vae.” (Kenese 3:14, 15; Fakaasiga 12:9) E fakauiga a te pakiaga o Iesu i tena vae me ka logo‵mae fua a ia mō se vaitaimi e auala i tena mate i te lalolagi nei, me ne toe fakatu aka ne Ieova a ia ki te ‵malu i te lagi. Kae ko te tuki pala o te ulu o te gata e fakauiga ki te tamatega o te Tiapolo ki te se-gata-mai.—Faitau te Galuega 2:31, 32; Epelu 2:14.

2. Kaia ne talitonu katoatoa ei a Ieova me ka manumalo eiloa Iesu i te ‵teke atu ki te Tiapolo?

² Ne talitonu Ieova me ka manumalo eiloa Iesu i te fakataunuga o tena tiute kae ‵teke atu ki te Tiapolo i te taimi koi nofo ei a ia i te lalolagi. Kaia ne talitonu katoatoa ei a Ieova ki te mea tenei? Ona ko te mea ko leva ne faite ne ia Iesu i te lagi, ne lavea ne ia ana mea ne fai, iloa ei ne ia me i te “tagata poto i te fakatutu” tenei kae ko te “uluaki o mea katoa ne faite” ne fakalogo kae fakamaoni foki. (Faataoto 8:22-31; Kolose 1:15) Tela la, i te taimi ne uga mai ei Iesu ki te lalolagi kae ne talia ke tofotofo aka ne te Tiapolo ke oko ki tena mate, ne talitonu eiloa a te Atua me i Tena Tama pele e tokotasi ka manumalo eiloa.—Ioane 3:16.

E Tausi ne Ieova Ana Tavini

3. Se a te kilokiloga a te Tiapolo ki tavini a Ieova?

³ Ne fakasino atu Iesu ki te Tiapolo e pelā me ko “te aliki masei o te lalolagi nei” kae ne fai atu foki ki Ana soko me ka fakasauagina latou, e pelā eiloa mo ia. (Ioane 12:31; 15:20) E takalia‵lia te lalolagi, telā e pule atu ki ei Satani te Tiapolo, ki Kelisiano ‵tonu me e tavini atu latou ki a Ieova kae fai foki mo tino talai o te amiotonu. (Mataio 24:9; 1 Ioane 5:19) E saga malosi atu eiloa te Tiapolo ki te ‵toega o te kau fakaekegina kolā ka pule fakamuli mo Keliso i tena Malo faka-te-lagi. E saga atu foki a Satani ki Molimau a Ieova e tokouke kolā e fakamoe‵moe ke ola ki te se-gata-mai i te lalolagi palataiso. E fai mai te Muna a te Atua ki a tatou: “Te otou fili, telā ko te Tiapolo, e fanofano tele e pelā mo se leona fekai, e salasala ki te tino ke kai ne ia.”—1 Petelu 5:8.

4. Ne a mea e fakamaoni mai i ei me ne manumalo eiloa a tino o Ieova i te ‵teke atu ki te Tiapolo i ‵tou taimi nei?

⁴ E pelā me se fakapotopotoga telā e ‵lago malosi atu ki ei a Ieova te Atua, e manumalo eiloa tatou i te ‵teke atu ki te Tiapolo. Ke mafaufau ki tala ‵tonu konei: I te 100 tausaga ko ‵teka, ne taumafai malosi eiloa a nisi malo pule fakasaua i te lalolagi nei o fakaseai katoatoa atu a Molimau a Ieova. Kae ne gasolo aka loa ki luga te aofaki o Molimau kae ko tai kātoa nei te 7,000,000 i fakapotopotoga e silia atu mo te 100,000 i te lalolagi kātoa. Ne fakaseai atu fua a takitaki pule fakasaua kolā ne fakasaua atu ki tino o Ieova!

5. Ne lavea atu pefea te ‵tonu o pati i te Isaia 54:17 i mea ne ‵tupu ki tavini a Ieova?

⁵ I te faipati atu ki te fakapotopotoga o Isalaelu mua e pelā me ko tena “fafine,” ne tauto mai te Atua: “Kae ka seai eiloa se meatau e mafai o fakapakia ne ia a koe; ka isi faeloa se tali a koe ki a latou kolā e taumafai o taku fakamasei koe. Ka ‵pulu ne au aku tavini kae tuku atu ki a latou a te manumalo.” (Isaia 54:1 17) Ne lavea atu te ‵tonu o te tautoga tenei i mea ne ‵tupu ki tino o Ieova i te lalolagi kātoa i “aso fakaoti” konei. (2 Timoteo 3:1-5, 13) E tumau tatou i te ‵teke atu te Tiapolo, kae e se manuia eiloa so se meatau e fakaaoga ne ia ke fakaseai atu a tino o te Atua, me e kau mai eiloa a Ieova ki a tatou.—Salamo 118:6, 7.

6. Se a te mea e fai mai i te valoaga a Tanielu ki a tatou e uiga ki te pulega a te Tiapolo i aso mai mua?

⁶ I te fakaotiga o te olaga masei tenei ko pili ‵ki mai, ka fakaseai katoatoa i ei a vaega katoa o te pulega a Satani. I tena tusi telā ne fakaosofia ne te Atua, ne ‵valo mai te pelofeta ko Tanielu: “I te taimi o takitaki konā [kolā e pule mai nei], kae ka fakatu ne te Atua o te lagi a te malo [i te lagi] telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā [kolā e pule mai nei], kae ka tumau ki te se gata mai.” (Tanielu 2:44) Kafai ko tupu te mea tenā, ka ‵galo atu katoa a pulega a Satani mo pulega a tino sē ‵lei katoatoa. Ka fakaseai katoatoa atu ei a vaega katoa o te pulega a te Tiapolo, kae ka seai se isi malo ka ‵teke atu ki te Malo o te Atua māfai ko pule mai ki te lalolagi kātoa.—Faitau te 2 Petelu 3:7, 13.

7. E iloa pefea ne tatou me e mafai o manumalo a tavini taki tokotasi a Ieova i te ‵teke atu ki te Tiapolo?

⁷ E seai se fakalotolotolua me ka tumau eiloa te fakapotopotoga a Ieova kae ka manuia foki i te feitu faka-te-agaga. (Faitau te Salamo 125:1, 2.) Kae pefea la tatou? E fai mai te Tusi Tapu me e mafai o manumalo tatou i te ‵teke atu ki te Tiapolo, e pelā eiloa mo Iesu. E tonu, a te valoaga ne fai mai ne Keliso e auala i te apositolo ko Ioane e fakaasi mai i ei me faitalia a ‵tekemaiga a Satani, e isi eiloa se “vaitino tokouke” o tino kolā ka fakamoe‵moe ke ola i te lalolagi ka ‵sao atu i te gataga o te olaga tenei. E ‵tusa mo pati i te Tusi Tapu, e ka‵laga mai latou penei: “A te ‵tou fakaolataga e maua mai i te Atua, telā e nofo i tona nofogaaliki; e maua foki te ‵tou fakaolataga i te Tamā Mamoe [ko Iesu Keliso]!” (Fakaasiga 7:9-14) E fakasino atu ki te kau fakaekegina e pelā me e manumalo eiloa latou i a Satani, kae e penā foki eiloa olotou taugasoa, ko ‘nisi mamoe.’ (Ioane 10:16; Fakaasiga 12:10, 11) Kae e manakogina i konei a taumafaiga e uke mo ‵talo kolā e fai mo te loto finafinau ko te mea ke ‘‵sao ei mai te tino masei.’—Mataio 6:13, Tusitapu Tauloto.

Te ‵Toe Fakaakoakoga ‵Lei i te ‵Teke Atu ki te Tiapolo

8. Se a te tofotofoga muamua ne fai ne te Tiapolo ki a Iesu i te koga lavaki, kae se a te tali a Keliso ki ei?

⁸ Ne taumafai te Tiapolo o fakamasei ne ia te fakamaoni o Iesu. Ne tofotofo ne Satani a Iesu i te koga lavaki ko te mea ke se fakalogo a Ia ki a Ieova. Kae ne tuku mai ne Iesu te ‵toe fakaakoakoga ‵lei i te ‵teke atu ki a Satani. Mai tua o aso mo po e 40 ne fakalikiliki ei a ia, kāti ne fiakai malosi a Iesu. “Kafai koe ko te Tama a te Atua,” ko pati a Satani, “fakatonu ake ke liu falaoa a fatu konei.” Kae ne ita Iesu ma fakaaoga ne ia tena ‵mana mai te Atua mō tena ‵lei fua. I lō te fai penā, ne fai atu Iesu: “Muna a te Tusi, ‘E se na ko meakai fua e ola ei te tino, ka ko muna katoa kolā e ‵to mai i te gutu o te Atua.’”—Mataio 4:1-4; Teutelonome 8:3.

9. Kaia e ‵tau ei o ‵teke ne tatou a taumafaiga a te Tiapolo ke fakaaoga ne ia ‵tou manakoga faka-te-foitino?

⁹ I aso nei, e fakaaoga eiloa ne te Tiapolo a manakoga faka-te-foitino o tavini a Ieova. Tela la, e ‵tau eiloa mo tatou o ‵teke atu a tofotofoga ke aofia i faifaiga fakatauavaga sē ‵tau, kolā ko lauiloa i te lalolagi telā e ‵fonu i amioga fai valevale. E fai ‵tonu mai te Muna a te Atua: “Ko iloa ne koutou me i Kelisiano kolā e fai ne latou amioga konei, e se mafai o talia ne latou te Atua ke fai mo olotou tupu. Sa fakavale‵vale koutou. A latou kolā e amio ma‵sei; io me kolā e tapuaki ki tupua, io me kolā e mulilua, io me kolā e amio fakasotoma, . . . e seai eiloa se tino o latou e talia ne ia te Atua ke fai mo olotou tupu.” (1 Kolinito 6:9, 10) E manino ‵lei me i tino kolā e ola i se olaga fai valevale kae e se ma‵nako ke ‵fuli ka se talia eiloa ke ola i te lalolagi fou a te Atua.

10. E ‵tusa mo te Mataio 4:5, 6, se a te suā tofotofoga ne fakaaoga ne Satani i ana taumafaiga ke fakamasei ei te fakamaoni o Iesu?

¹⁰ E fai mai te Tusi Tapu e uiga ki se tofotofoga ne fepaki mo Iesu i te koga lavaki: “Ne toe ave ne te Tiapolo a Iesu ki te Fa‵kai Tapu, kae tuku a ia i te koga tafa maluga o te Fale Tapu, kae muna mai ki a ia, ‘Kafai koe ko te Tama a te Atua, lele ki lalo i te laukele; me i muna a te Tusi, “E fakatonu ne te Atua ana agelu mō koe: E sapo ake a koe ne latou i olotou lima, ko te mea ke se mafai o pa‵kia ou vae i fatu.”’” (Mataio 4:5, 6) Ne fakauiga a Satani me ka iku atu te mea tenei ki te fakaasiatuga fakaofoofogia o te tulaga faka-Mesia o Iesu. A te ‵tonuga loa, a te mea tenā se faifaiga sē tonu kae fakamaualuga telā e se taitai eiloa o talia io me ‵lago atu ki ei te Atua. Ne tumau foki a Iesu i te fakamaoni ki a Ieova i konei, kae ne tali atu mai te sikiatuga ne ia o pati i te Tusi Tapu. Ne fai atu tou tagata: “Kae ne muna mai foki a te Tusi, ‘E se ‵tau mo koe o tofotofo a te Aliki tou Atua.’”—Mataio 4:7; Teutelonome 6:16.

11. E mafai pefea o tofotofo ne Satani tatou, kae ne a mea e mafai o iku mai i ei?

¹¹ E mafai o tofotofo ne Satani tatou ke ‵sala atu ki auala kese‵kese ke maua ei a tavaega. Kāti e taumafai a ia ke fakamalosi aka tatou ke fakaakoako ki vaegā gatu mo teuga o te lalolagi io me ke aofia i fakafiafiaga sē ‵lei. Kae kafai e fakaseaoga ne tatou a fakatakitakiga mai te Tusi Tapu kae tau‵tali ki te lalolagi, e mata, e ‵tau o fakamoe‵moe tatou ke puipui ne agelu tatou mai ikuga ma‵sei o ‵tou faifaiga? E tiga eiloa ne salamo te tupu ko Tavita i ana agasala kolā ne aofia i ei a Patisepa, ne seki maua ne ia te puipuiga mai i ikuga o ana faifaiga. (2 Samuelu 12:9-12) Ke mo a eiloa e tofotofo ne tatou a Ieova i auala sē ‵lei, kāti mai te fai taugasoa mo tino o te lalolagi.—Faitau te Iakopo 4:4; 1 Ioane 2:15-17.

12. Se a te tofotofoga e fakaasi mai i te Mataio 4:8, 9, kae ne saga atu pefea te Tama a te Atua ki ei?

¹² A te suā tofotofoga telā ne fakaaoga ne te Tiapolo i te koga lavaki ko te faiga ke talia ne Iesu a pulega fakapolitiki. Ne fakaasi atu ne Satani ki a Iesu a malo katoa o te lalolagi mo olotou ‵malu kae fai atu: “E avatu katoa ne au ki a koe a mea konei, manafai koe e totuli ifo o tapuaki mai ki a au.” (Mataio 4:8, 9) Ko tafaga la te matagā o ana taumafaiga ne fai ke maua ne ia te mea telā e ‵tau fua o maua ne Ieova mo te faiga foki ke se fakamaoni a Iesu ki te Atua! Mai te mafaufau faeloa ki te manakoga ke tapuaki atu a tino ki a ia, ne fai a te agelu telā ne fakamaoni muamua mo fai se tino agasala, kaimanako kae matagā ‵ki ko Satani te Tiapolo, te tino fakaosooso. (Iakopo 1:14, 15) E ‵kese ‵ki mo te mea tenā, ko oti ne fakaiku aka ne Iesu ke tumau a ia i te fakamaoni ki tena Tamana faka-te-lagi kae ne fai atu penei: “Fano keatea e Satani! Muna a te Tusi, ‘Tapuaki ki te Aliki tou Atua, me ko ia fua e tavini koe ki ei!’” Tela la, ne toe ‵teke katoatoa atu a Iesu ki te Tiapolo i se auala manino kae mautinoa. Ne seki manako a te Tama a te Atua ke fai mo fai se vaega o te lalolagi a Satani kae ka se tapuaki atu lele eiloa a ia ki te tino masei tenā!—Mataio 4:10; Teutelonome 6:13; 10:20.

“‵Teke Atu te Tiapolo, ko Sola ei a ia Keatea Mai i a Koutou”

13, 14. (a) Mai te fakaasi atu ki a Iesu a malo katoa o te lalolagi, se a te mea ne ofo atu ne te Tiapolo ki a ia? (e) Ne a taumafaiga a Satani e fai ke fakamasei ei tatou?

¹³ Mai te fakaasiatuga ki a Iesu a malo katoa o te lalolagi, ne ofo atu ne te Tiapolo ki a ia a te ‵mana telā e seki maua aka loa ne se isi tino aka. Ne mafaufau Satani me ka fiafai a Iesu ki mea ne lavea ne ia kae fakatalitonu atu ki a ia me ka fai a ia mo fai te ‵toe takitaki fakapolitiki malosi ‵ki i te lalolagi. E se ofo mai ne te Tiapolo ki a tatou i aso nei a malo, kae e taumafai a ia o fakamasei ‵tou loto mai te fakaaogaga o ‵tou mata, taliga mo ‵tou mafaufau.

¹⁴ E pule eiloa te Tiapolo ki te lalolagi nei. E pule atu foki a ia ki mea fakasalalau tala i ei. Tela la, e se ‵tau o ‵poi tatou me i ata, pese mo tusi fai‵tau a te lalolagi e ‵fonu eiloa i faifaiga finalalolagi kae fakasaua. A fakapulaga fakapisinisi a te lalolagi nei e fakamalosi aka ei i loto i a tatou a te manakoga ke fia‵fai ki mea kolā e se manakogina ne tatou. Ona ko mea konā, e fakaosooso faeloa tatou ne te Tiapolo ki mea faka-te-foitino kolā e ‵gali ki ‵tou mata, taliga, mo ‵tou mafaufau. Kafai e ita tatou ma ‵kilo, faka‵logo kae fai‵tau ki mea kolā e se fetaui mo te Tusi Tapu, ko fai atu eiloa tatou penei: “Fano keatea, e Satani!” Tela la, e fakaakoako eiloa tatou ki a Iesu i te tu ‵mautakitaki i te ‵teke atu ki te lalolagi sē ‵ma a Satani. A te ‵tou sē fai mo fai se vaega o te lalolagi a Satani e lavea atu i te auala e fakaasi atu ne tatou mo te loto toa i a tatou ne Molimau a Ieova kae ne soko o Keliso i ‵tou koga ga‵lue, i te akoga, i ‵tou fa‵kai mo ‵tou kāiga.—Faitau te Maleko 8:38.

15. Kaia e fakauiga ei te ‵teke atu ki a Satani ki te tumau i te matapula‵pula?

¹⁵ Mai tua o te tolu o taumafaiga se aogā a te Tiapolo ke se fakamaoni Iesu ki te Atua, “ne tiakina a Iesu ne te Tiapolo.” (Mataio 4:11) Kae ne seki gata eiloa a taumafaiga a Satani ke fakaosooso ne ia Iesu, me ne fai mai penei ki a tatou: “I te otiga ne fakaosooso a Iesu ne te Tiapolo [i te koga lavaki] i ala kese‵kese, tiakina ei ne ia ke oko ki se isi aso.” (Luka 4:13) E ‵tau o fakafetai atu tatou ki a Ieova māfai e manumalo tatou i te ‵teke atu ki te Tiapolo. E ‵tau foki o ‵sala tatou ki te fesoasoani tumau o te Atua, me ka toe foki mai eiloa te Tiapolo i se isi taimi telā e ‵lei ki a ia—kae e se ko taimi fua kolā e fakamoe‵moe ei tatou ki se fakaosoosoga. Tela la, e ‵tau mo tatou i taimi katoa o matapula‵pula, kae toka faeloa o tavini atu ki a Ieova faitalia so se tofotofoga e fepaki mo tatou.

16. Se a te ‵mana malosi telā e tuku mai ne Ieova, kae kaia e ‵tau ei o ‵talo tatou mō te mea tenā?

¹⁶ Ke fesoasoani mai i ‵tou taumafaiga ke ‵teke atu te Tiapolo, e ‵tau o ‵talo tatou ke maua te ‵toe ‵mana malosi i te lagi mo te lalolagi kātoa—ko te agaga tapu o te Atua. Ka fai i ei ke fai ne tatou a mea kolā e se mafai o fai ne tatou i ‵tou malosi eiloa. Ne fakamaoni atu ne Iesu ki ana soko me e avanoa faeloa te agaga o te Atua, i ana pati: “Kafai koutou e [se ‵lei katoatoa kae] ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te agaga tapu ki tino kolā e fakamolemole atu ki a ia?” (Luka 11:13) Ke na tumau tatou i te ‵talo atu faeloa ki a Ieova mō tena agaga tapu. Fakatasi mo te ‵lago mai o te ‵toe ‵mana malosi tenei ki ‵tou taumafaiga ke ‵teke te Tiapolo, ka manumalo eiloa tatou. I tafa o te ‵talo malosi i taimi katoa, e ‵tau o ‵pei tatou ki te gatu tau faka-te-agaga kātoa mai te Atua ‘ko te mea ke mafai o ‵teke atu ki auala ma‵sei o te Tiapolo.’—Efeso 6:11-18.

17. Se a te fiafia ne fesoasoani atu ki a Iesu ke ‵teke te Tiapolo?

¹⁷ A te suā mea telā ne fesoasoani ki a Iesu ke ‵teke atu te Tiapolo e mafai foki o fesoasoani mai ki a tatou. E fai mai te Tusi Tapu: “Ne kufaki ne [Iesu] te sataulo ona ko te fiafia telā e fakatalitali mai ki a ia, kae ne seki fia saga foki ki tona mate fakalumalumagina i luga i te sataulo, ka ko nofo nei i te koga tāua, ko te feitu fakaatamai o te nofogaaliki o te Atua.” (Epelu 12:2) E mafai foki o maua ne tatou te fiafia penā mai te ‵lago atu ki te pulega sili a Ieova, faka‵malu tena igoa tapu, mo te mafaufau faeloa ki te taui ko te ola se-gata-mai i ‵tou mua. Ko tafaga la te fiafia ka maua ne tatou māfai ko fakaseai atu ki te se-gata-mai a galuega katoa a Satani kae ‘ko tino loto maulalo fua ka ola i te lalolagi kae maua ne latou te manuia mo te filemu katoatoa’! (Salamo 37:11) Tela la, ke na tumau i te ‵teke atu te Tiapolo, e pelā eiloa mo Iesu.—Faitau te Iakopo 4:7, 8.

Ka Tali Mai Pefea ne Koe?

• Se a te fakamaoniga me e tausi ne Ieova ana tino?

• Ne tuku mai pefea ne Iesu se fakaakoakoga ‵lei i te ‵teke atu ki a Satani?

• I auala fea e mafai o ‵teke atu ne koe te Tiapolo?

[Fakamatalaga o te Ata i te itulau e 26]

A te fai taugasoa mo te lalolagi e fai ei ke fai fili tatou mo te Atua

[Fakamatalaga o te Ata i te itulau e 28]

Ne ‵teke ne Iesu a malo katoa o te lalolagi kolā ne ofo atu ne Satani