MATAUPU 01
E Fesoasoani Atu Pefea te Tusi Tapu?
Toeitiiti ko tatou katoa e isi ne ‵tou fesili e uiga ki te olaga, logo‵maega, te mate, mo aso mai mua. E manava‵se foki tatou ki fakalavelave i aso katoa, e pelā mo te tausiga o te olaga io me ko te mauaga o te fiafia i te kāiga. Ko oti ne iloa aka ne tino e tokouke me ne fesoasoani atu a te Tusi Tapu ki a latou ke tali aka a toe fesili tāua i te olaga kae ke maua foki ne latou a manatu aoga ki te olaga i aso takitasi. E mata, e isi se tino e iloa ne koe ka mafai o aoga ki a ia te Tusi Tapu?
1. Ne a nisi fesili e tali mai i te Tusi Tapu?
E tali mai ne te Tusi Tapu a fesili tāua konei: Ne māfua mai pefea te ola? Se a te aoga o te olaga? Kaia e logo‵mae i ei a tino? Ne a mea e ‵tupu ki se tino māfai ko mate? Kafai e ma‵nako a tino katoa ki te filemu, kaia e uke ‵ki ei a taua? Se a te mea ka tupu ki te lalolagi i aso mai mua? E fakamalosi mai te Tusi Tapu ke ‵sala tatou ki tali o vaegā fesili penei. Kae ko oti ne maua ne te fia miliona o tino a tali fakama‵lie loto.
2. E fesoasoani mai pefea te Tusi Tapu ke maua se olaga fiafia i aso katoa?
E maua i te Tusi Tapu a manatu fesoasoani ‵lei. E akoako i ei a kāiga ke maua te fiafia tonu. E tuku mai i ei a manatu fakatonutonu ki te auala ke fakafesagai atu ki te loto mafatia mo te auala ke fiafia koe ki tau galuega. Ka tauloto koe ki mea e akoako mai i te Tusi Tapu e uiga ki mataupu konei mo mea e uke atu foki māfai ko sau‵tala fakatasi tatou ki te tusi tenei. Kae ka lotomalie koe me i “tusitusiga tapu katoa [ko mea katoa i loto i te Tusi Tapu] . . . e aoga.”—2 Timoteo 3:16.
E se sui ne te tusi tenei a te Tusi Tapu. Kae e fakamalosi atu i ei ke iloilo faka‵lei ne koe a te Tusi Tapu. Tela la, e fakamalosi atu matou ki a koe ke faitau ki tusi fai‵tau katoa i mataupu konei kae ke fakatusatusa ne koe mo au mea e tauloto.
KELI MALOSI IFO
Mafaufau ki te auala ne fesoasoani atu te Tusi Tapu ki tino, ke fiafia koe o faitau ki ei, mo te pogai ‵lei ke ‵sala ki se fesoasoani ke malamalama i ei.
3. E mafai ne te Tusi Tapu o fesoasoani mai
E fai a te Tusi Tapu e pelā me se mainaga lasi. E mafai o fesoasoani mai te Tusi Tapu ke iloa ne tatou o fai a fakaikuga ‵lei kae ke lavea foki ne tatou a mea ka ‵tupu i aso mai mua.
Faitau te Salamo 119:105, ko sau‵tala i ei ki fesili konei:
Se a te kilokiloga a te tino ne tusi ne ia a te salamo tenei ki te Tusi Tapu?
Se a tau kilokiloga ki te Tusi Tapu?
4. E tali mai ne te Tusi Tapu a ‵tou fesili
Ne iloa aka ne se fafine me ne tali mai i te Tusi Tapu a fesili kolā ko leva ne mafaufau a ia ki ei. Pei te VITIO, ko sau‵tala ei ki fesili konei.
I te vitio tenei, ne a vaegā fesili a te fafine tenei?
Ne fesoasoani atu pefea ki a ia a te sukesuke ki te Tusi Tapu?
Ne fakamalosi mai te Tusi Tapu ki a tatou ke fai a fesili. Faitau te Mataio 7:7, ko sau‵tala ei ki te fesili tenei:
Ne a au fesili e mafai o tali mai i te Tusi Tapu?
5. E mafai o fiafia koe o faitau ki te Tusi Tapu
E fia‵fia a tino e tokouke o fai‵tau ki te Tusi Tapu kae maua a mea aoga mai i ei. Pei te VITIO, ko sau‵tala ei ki fesili konei.
I te vitio, e pefea a lagonaga o talavou e uiga ki te fai‵tau?
Kaia ko ‵kese ei te lotou kilokiloga nei e uiga ki te faitau ki te Tusi Tapu?
E fai mai te Tusi Tapu me e tuku mai i ei a akoakoga fakamafanafana mo se fakamoemoega. Faitau te Loma 15:4, ko sau‵tala ei ki te fesili tenei:
E mata, e gali ki a koe a folafolaga fakamafanafana mo te fakamoemoega i te Tusi Tapu?
6. E mafai o fesoasoani mai a nisi tino ke malamalama tatou i te Tusi Tapu
I tafa o te faitau tokotasi ki te Tusi Tapu, ne iloa ne tino e tokouke me e aoga ‵ki te sau‵tala fakatasi mo nisi tino ki ei. Faitau te Galuega 8:26-31, ko sau‵tala ei ki te fesili tenei:
E mafai pefea o malamalama tatou i te Tusi Tapu?—Onoono ki te fuaiupu e 30 mo te 31.
Ne manako a te tagata Aitiope ki se fesoasoani ke malamalama i te Tusi Tapu. Ne iloa ne tino e tokouke i aso nei me aoga te sau‵tala fakatasi mo nisi tino ki te Tusi Tapu
MEA E FAI MAI NE NISI TINO: “A te sukesuke ki te Tusi Tapu e fakamāumāu taimi.”
Se a tau faka‵tau? Kaia?
MANATU AOGA
E tuku mai i te Tusi Tapu a manatu fesoasoani mō te olaga. E tali i ei a fesili tāua kae maua ne tino a fakamafanafanaga mo se fakamoemoega.
Fesili
Ne a manatu fesoasoani e mafai o maua ne tatou i te Tusi Tapu?
Ne a nisi fesili e tali mai i te Tusi Tapu?
Ne a mea e fia iloa ne koe mai te Tusi Tapu?
NISI FAKAMATALAGA
Mafaufau ki te aoga o manatu fesoasoani i te Tusi Tapu mō aso nei.
Onoono ki auala ne fesoasoani ei te Tusi Tapu ki se tagata telā ko leva ne logo‵mae i ana lagonaga talu mai tena folikiga.
Ke sukesuke ki manatu fesoasoani mai te Tusi Tapu mō te olaga i te kāiga.
“Auala e 12 ke Maua ei se Kāiga Manuia” (Ala Mai! Napa 2 2018)
Onoono ki te auala ne faka‵tonu aka ei ne te Tusi Tapu se manatu ‵se e uiga ki te pule o te lalolagi.
Kaia e ‵Tau ei o Sukesuke ki te Tusi Tapu?—Vitio Kātoa (3:14)