“Ke Salasala Atu ki a Ieova mo Tena Malosi”

“A te Aliki e onoono faka‵lei eiloa ki te lalolagi; e ave ne ia a te malosi ki tino kola e fakamaoni ki a ia.”​—⁠2 NOFOAIGA TUPU 16:⁠9.

1. Se a te uiga o te malosi, kae ne fakaaogā sāle pefea ne tino olotou malosi?

EKESE‵KESE a mea kolā e fakauiga sāle ki ei te pati ko te malosi. E mafai o fakauiga i ei ki te pule ki mea io me ko te pulepule ki tino; me e ‵kafi o fai ne se tino se galuega io me e mafai ne ia o fakatupu aka se mea; te malosi (faka-te-foitino); io me ko te malosi o te mafaufau mo uiga o te tino. E se ‵lei a tala e uiga ki te fakaaogāga ne tino o olotou ma‵losi. Ne fai mai penei a te tino tusitala fakasolopito ko te aliki ko Acton e uiga ki te malosi telā e maua ne tino pule i malo: “Kafai e maua ne se tino te malosi ko fakama‵sei i ei ana uiga, kae kafai ko maua ne se tino te malosi katoatoa ko fakamasei katoatoa i ei ana uiga.” E uke ‵ki a tala i aso nei e fakamaoni mai pelā me e ‵tonu sāle a pati konā a te aliki ko Acton. I te 20 senitenali tenei, a “tino kola e nofo i se tulaga malalo, e nofo puapuaga i te pulega a tino ma‵luga” i se auala ne seki matea atu i aso mua. (Failauga 8:⁠9) Ne sōnafai valevale ne pule fakasauā olotou malosi kae ne tamate i ei te fia miliona o tino. E fakamataku te malosi telā e se pule ki ei te alofa, te poto, mo te fakamaoni.

2. Ke fakamatala mai me e aofia pefea a nisi uiga o te Atua i te auala telā e fakaaogā ei ne Ieova a tena malosi.

² E se pelā mo te tokoukega o tino, e fakaaogā faeloa ne te Atua tena malosi mō mea ‵lei. “A te Aliki [ko Ieova] e onoono faka‵lei eiloa ki te lalolagi; e ave ne ia a te malosi ki tino kola e fakamaoni ki a ia.” (2 Nofoaiga Tupu 16:⁠9) E pule faka‵lei a Ieova ki tena malosi. Ona ko te kufaki e taofi malie aka ne te Atua te fakasalaga o tino ma‵sei ko te mea ke avatu ki a latou se avanoaga ke salamō i ei. Ona ko te alofa, e fakamaina mai ne ia te la ki vaegā tino katoa​—⁠ko tino ‵lei mo tino ma‵sei. Ona ko te fakamaoni ka fakaaogā fakamuli ne ia tena malosi katoatoa ke fakapalele ei te tino telā e pule ki te mate, ko Satani te Tiapolo.​—⁠Mataio 5:​44, 45; Epelu 2:14; 2 Petelu 3:⁠9.

3. Kaia e fai ei pelā me i te malosi katoatoa o te Atua se pogai e mafai ei o tali‵tonu tatou ki a ia?

³ A te malosi fakaofoofogia o te ‵tou Tamana faka-te-lagi e tuku mai i ei se pogai ke tali‵tonu kae fakatuaga atu tatou ki a ia​—⁠ki ana folafolaga mo tena puipuiga. E lagona ne se tamā tamaliki a te tokagamalie māfai e nofo atu a ia i va o tino fakaa‵tea māfai e puke ‵mau a ia ki te lima o tena tamana, ona ko te iloa ne ia me e se mafai o talia ne tena tamana ke tupu se mea masei ki a ia. E penā foki loa te ‵tou Tamana faka-te-lagi, “e i a ia te malosi o fakasao a tino,” kae ka puipui ne ia tatou mai i so se pakiaga tumau māfai e tau‵tali atu tatou ki a ia. (Isaia 63:1; Mika 6:⁠8) Kae e pelā me se Tamana ‵lei, e fakataunu mai faeloa ne Ieova ana folafolaga. Ona ko tena malosi katoatoa, e fakamaoni mai i ei me e ‘fakataunu ne tena muna a te mea tela e fakamoemoe a ia ke fai ne ia.’​—⁠Isaia 55:11; Tito 1:⁠2.

4, 5. (a) Ne a mea ne ‵tupu i te taimi ne fakatuaga katoatoa atu ei te tupu ko Asa ki a Ieova? (e) Ne a mea kāti ka ‵tupu māfai e fakalago‵lago atu fua tatou ki te fesoasoani o tino ke faka‵lei ei ‵tou fakalavelave?

⁴ Kaia e tāua ei ke mo a ma puli i a tatou te puipuiga mai i te ‵tou Tamana faka-te-lagi? Me e mafai o taotaomaki mai a fakalavelave, kae ko puli ei i a tatou te tino telā e maua mai i ei te ‵tou tokagamalie tonu. E matea atu te mea tenā i te tala o te tupu ko Asa, se tagata telā ne fakatuaga sāle atu ki a Ieova. I te taimi o te pulega a Asa, ne oso atu a kautau o sotia Aitiope e toko miliona ki te kau Iuta. Ne iloa ne ia me e ma‵losi atu ana fili, telā ne ‵talo atu ei a ia penei: “Te Aliki [ko Ieova], e mafai faeloa ne koe o fesoasoani ki se kautau vaivai, pela foki ki se kautau malosi. Te Aliki te motou Atua, fesoasoani mai nei ki a matou, me i a matou e fakalagolago atu ki a koe, ka ko matou e o‵mai nei o taua ki te kautau lasi tenei i tou igoa. Te Aliki, a koe ko te motou Atua; e seai se tino e mafai ne ia o fakatakavale a koe.” (2 Nofoaiga Tupu 14:11) Ne talia ne Ieova te fakamolemole tenā a Asa kae ne avatu ne ia te manumaloga lasi ki a ia.

⁵ Ko oti atu te fia tausaga o tena taviniga fakamaoni, kae ne kamata o fakalotolotolua Asa i te malosi faka‵sao tino o Ieova. Ne fakamolemole atu a ia ki te kau Sulia ke fesoasoani atu ki a ia, me ne fakamatakutaku mai ki a ia a kautau mai i te malo ki mātū, ko Isalaelu. (2 Nofoaiga Tupu 16:​1-3) E tiga eiloa ne magoi te ‵togi fakakolekole telā ne avatu ne ia ki te tupu Sulia ko Peniata kae ne seki oso atu te kau Isalaelu ki tino Iuta, ne fakaasi mai ne te feagaiga a Asa mo te kau Sulia me ne seki lava tena talitonu ki a Ieova. Ne fesili tonu atu penei te pelofeta ko Hanani ki a ia: “Masaua ne koutou a kautau lasi eiloa a Sutana mo Lipia, mo olotou kaliota e uke, mo tagata i solofanua e tokouke? Ne manumalo koutou i a latou, me i a koutou ne fakalagolago ki te Aliki [ko Ieova].” (2 Nofoaiga Tupu 16:​7, 8) Kae ne seki talia ne Asa a pati polopoloki konā. (2 Nofoaiga Tupu 16:​9-12) Kafai e fe‵paki tatou mo fakalavelave, ke mo a ma fakalago‵lago atu fua tatou ki te fesoasoani o tino. I lō te mea tenā, ke na fakatuaga atu ki te Atua, me ka ma‵vale fua tatou māfai e fakalago‵lago atu eiloa tatou ki te malosi o tino.​—⁠Salamo 146:​3-5.

Ke ‵Sala Aka te Malosi Telā e Tuku Mai ne Ieova

6. Kaia e ‵tau ei mo tatou o “salasala atu ki te Aliki mō se fesoasoani”?

⁶ E mafai ne Ieova o tuku mai ne ia te malosi ki ana tavini kae puipui foki ne ia latou. E fakamalosi mai te Tusi Tapu ke “salasala atu ki te Aliki [ko Ieova] mō se fesoasoani.” (Salamo 105:⁠4) Kaia? Me kafai e fai ne tatou a mea mai lalo i te malosi o te Atua, ka fakaaogā ei te ‵tou malosi ke aogā ki nisi tino kae ke se pa‵kia latou i ei. E seai aka foki se isi fakaakoakoga e ‵lei atu i te feitu tenei, i lō Iesu Keliso, telā ne fai ne ia a vavega e uke i “te mana o te Atua.” (Luka 5:17) Moi manako a ia ki ei, e mafai ne Iesu o fakaaogā ana taimi ke maukoloa io me ke lauiloa a ia, kae ke fai foki a ia mo fai se tupu malosi. (Luka 4:​5-7) Kae ne fakaaogā ne ia te malosi telā ne tuku mai ne te Atua ki a ia ke fakamasani aka a nisi tino, ke akoako atu ki a latou kae ke faka‵lei aka foki a ma‵saki. (Maleko 7:37; Ioane 7:46) Ko tafaga la te gali o te fakaakoakoga tenā mō tatou!

7. Se a te uiga tāua telā e fakamalosi aka ne tatou māfai e fakalago‵lago atu tatou ki te malosi o te Atua i lō ‵tou malosi?

⁷ Kae kafai e fai foki ne tatou a mea katoa “i te malosi ne tuku atu ne te Atua,” ka fai ei ke loto mau‵lalo tatou. (1 Petelu 4:11) A tāgata kolā e fia maua se lotou malosi e gasolo o fakamata‵mata. E tasi te tala penā ko te tupu mai Asulia ko Esa-hatoni, telā ne gutu fakamatamata penei: “Au e malosi ‵ki, au e malosi katoatoa. Au se toa lauiloa. Au e maluga kae mafi ‵ki.” Kae e ‵kese mai te mea tenā, a Ieova “ne filifili ne ia a tino va‵lea . . . , ke fakamasiasi ei a tino ‵poto, mo tino ma‵luga.” Tela la, kafai e fakamatamata se Kelisiano, e fakamatamata fua a ia e uiga ki a Ieova, me e iloa ne ia me seki mafai ne ia o fai ana mea i tena malosi eiloa. Kafai ‘e loto ma‵lalo tatou mai lalo o lima ‵mafi o te Atua,’ ka fakamaluga ‵tonu aka i ei tatou.​—⁠1 Kolinito 1:​26-31; 1 Petelu 5:⁠6.

8. Ne a ‵tou mea e ‵tau o fai muamua ke maua ei te malosi o Ieova?

⁸ E mafai pefea ne tatou o maua te malosi mai te Atua? Muamua la, e ‵tau o akai atu tatou e uiga ki ei i te faiga o ‵talo. Ne fakatalitonu atu a Iesu ki ana soko me ka avatu ne tena Tamana te agaga tapu ki a latou kolā e a‵kai atu ki ei. (Luka 11:​10-13) Ke mafaufau me ne maua pefea ne soko o Keliso a te malosi i te taimi ne filifili aka ei latou ke faka‵logo ki te Atua i lō te faka‵logo ki takitaki lotu kolā ne fakatonu atu ke taofi aka ne latou te lotou molimauatuga e uiga ki a Iesu. I te taimi ne ‵talo atu ei latou ke maua te fesoasoani mai i a Ieova, ne talia te lotou ‵talo fakamaoni tenā, kae ne fakamalosi atu te agaga tapu ki a latou ke tumau i te talaiatuga o te tala ‵lei mo te loto toa.​—⁠Galuega 4:​19, 20, 29-31, 33.

9. Ke taku mai te lua o auala e maua i ei te malosi faka-te-agaga, kae ke taku mai se tala mai te Tusi Tapu ke fakaasi mai ei tena aogā.

⁹ A te lua o mea, e mafai o maua ne tatou te malosi faka-te-agaga mai te Tusi Tapu. (Epelu 4:12) E matea atu te malosi o te Muna a te Atua i aso o te tupu ko Iosia. E tiga eiloa ko oti ne ave keatea ne te tupu Iutaia tenā a tupua fapaupau mai i tena fenua, i te taimi ne maua fakapoi ei te Tulafono a Ieova ne fakamalosigina a ia i ei ke momea aka te polokalame tenā ke faka‵mapakipakigina ei te tapuakiga.a Ko oti ne faitau atu ne Iosia te Tulafono ki ana tino, kae ne fai ne te fenua kātoa se feagaiga fakatasi mo Ieova. Ne kamata mai i ei te lua o taumafaiga telā e lasi atu ke fakagata ei te ifo ki tupua. E tasi te ikuga ‵lei o te galuega tenā a Iosia ne fai pelā me ne “tumau te lotou tavini ki te Aliki, te Atua o olotou tupuga, i aso ne ola ei a ia.”​—⁠2 Nofoaiga Tupu 34:⁠33.

10. Se a te tolu o auala e maua ei ne tatou te malosi mai i a Ieova, kae kaia e tāua ei te mea tenā?

¹⁰ A te tolu o mea, e mafai o maua ne tatou te malosi mai i a Ieova mai i te ‵kau sāle atu ki nisi Kelisiano. Ne fakamalosi atu Paulo ki Kelisiano ke olo sāle atu ki fakatasiga ko te mea ‘ke fakatau fesoasoani o fakaasi te alofa mo te fai mea ‵lei,’ kae ke fakatau fakamalosi foki latou i ei. (Epelu 10:​24, 25) I te ‵talamaiga fakavavega o Petelu mai te falepuipui, ne manako a ia ke kau atu ki ana taina kae ne fanatu tonu a ia ki te fale o te mātua o Ioane Maleko. “Kae e tokouke a tino e maopoopo i ei e ‵talo.” (Galuega 12:12) E tonu, ne mafai ne latou o ‵nofo atu i olotou fale kae ‵talo i ei. Kae ne fakaiku aka ke maopoopo fakatasi latou o ‵talo kae fakatau fakamalosi i te taimi faigata tenā. Ne tai oti te malaga loa kae fakamataku a Paulo ki Loma, kae ne fetaui latou mo nisi taina i Puteoli kae fakamuli ifo ne fetaui foki latou mo nisi tino kolā ne olo atu ki a ia. Ne a ana mea ne fai i ei? “I te mateaga ne Paulo a latou, siki ei tena fakafetai ki te Atua, malosi ei mo tena loto.” (Galuega 28:​13-15) Ne maua ne ia te loto malosi me ne toe fetaui latou mo ana taina Kelisiano. E mafai foki ne tatou o maua te loto malosi mai i te ‵kau sāle atu ki nisi taina Kelisiano. Kafai koi saoloto tatou ke maopoopo fakatasi sāle, e se ‵tau o sasale tokotasi atu koe i te auala i‵tia telā e tau atu ki te ola.​—⁠Faataoto 18:1; Mataio 7:⁠14.

11. Ke taku mai a nisi taimi e ‵tau ei o maua “te malosi telā e sili atu i te malosi masani.”

¹¹ Mai i te ‵talo sāle, te sukesuke ki te Muna a te Atua, mo te ‵kau atu ki ‵tou taina tali‵tonu, ‘e ati ake ei te ‵tou malosi i te kau fakatasi mo te Aliki i tena mana malosi.’ (Efeso 6:10) E seai se fakalotolotolua me e ‵tau o maua ne tatou katoa te “mana malosi” mai te Aliki. E logo‵mae malosi a nisi tino i masaki faiga‵ta, te vāivāi o te olaga matua, io me ko te mate o se avaga. (Salamo 41:⁠3) E kufaki a nisi tino i ‵tekemaiga mai olotou avaga kolā e se tali‵tonu. Kāti e faigata ‵ki ki mātua, kae maise eiloa ko mātua kolā e seai ne olotou avaga, te lotou tiute ke ga‵lue tumau i se galuega ‵togi kae ke tausi foki latou ki olotou kāiga. E ‵tau o maua ne Kelisiano talavou a te malosi ke ‵teke atu ei latou ki fakamalosiga mai nisi talavou, kae ke ‵teke atu latou ki vailakau tapu mo te finalalolagi. E se ‵tau o ma se tino ke akai atu ki a Ieova ke maua “te malosi telā e sili atu i te malosi masani” ke manumalo i vaegā mea faiga‵ta konā.​—⁠2 Kolinito 4:​7, NW.

“E Fakamalosi ne Ia a Latou Kola ko Vaivai Kae Fi‵ta”

12. E fakamalosi mai pefea ne Ieova a tatou i te faiga o te galuega talai faka-Kelisiano?

¹² Kae e tuku atu ne Ieova te malosi ki ana tavini māfai e fai ne latou te lotou galuega fakafaifeau. E fai‵tau tatou penei i te valoaga a Isaia: “E fakamalosi ne ia a latou kola ko vaivai kae fi‵ta. . . . . Ka ko latou kola e fakatuaga ki te Aliki [ko Ieova] mō se fesoasoani ka fakafougina te lotou malosi. Ka eva latou i olotou kapakau e pela me ne aeto; ka tele latou kae se mafai o fi‵ta; ka sasale latou kae se mafai o vaivai.” (Isaia 40:​29-31) Ne maua eiloa ne te apositolo ko Paulo te malosi ke fakataunu ne ia tena galuega. Ne magoi i ei tena galuega fakafaifeau. Ne tusi atu a ia penei ki Kelisiano i Tesalonia: “Me i te avatuga ne matou a te Tala ‵Lei ki a koutou, ne seki avatu fua ne matou na ko muna, kae ne avatu i te mana mo te Agaga Tapu.” (1 Tesalonia 1:⁠5) Ne malosi tena talaiga mo ana akoakoga telā ne ‵fuli malosi ei a olaga o tino kolā ne fakalogo‵logo ki a ia.

13. Ne a mea ne fakamalosi atu ki a Ielemia ke tumau faitalia a ‵tekemaiga?

¹³ Kāti ka loto vāi‵vāi tatou, māfai ko se fia ‵saga mai a tino i te ‵tou koga talai​—⁠ko te koga talai telā ne talai ‵soko tatou i ei i te fia o tausaga. Ne penā loa a lagonaga o Ielemia me ne loto vāivāi a ia ona ko ‵tekemaiga, fakatauemuga mo te sē fia saga mai o tino ki a ia. Ne faipati ifo a ia ki a ia eiloa penei: “Ka fakapuli ne au a te Aliki kae se toe faipati i tena igoa.” Kae ne seki mafai o nofo mu a ia. A tena fekau ne “ka pela me se afi i loto i a [ia].” (Ielemia 20:⁠9) Se a te mea telā ne toe fakamalosi atu ki a ia ke fe‵paki mo vaegā mea faiga‵ta penā? Muna a Ielemia: “Ka ko koe e [Ieova] e kau i a au, koe e mafi kae malosi.” (Ielemia 20:11) Me ne iloa ne Ielemia te tāua o tena fekau mo tena tofiga mai te Atua, ne talia ei ne ia a fakamalosiga mai i a Ieova.

Te Malosi Telā e Fakapakia Atu mo te Malosi Telā e Fakamalosi Atu

14. (a) E pefea te malosi o ‵tou gutu? (e) Ke taku mai ne tala kolā e fakaasi mai i ei te fakamataku o ‵tou gutu.

¹⁴ E se ko malosi katoa o tatou e māfua tonu mai i te Atua. E pelā mo te gutu, e isi sena malosi ke fakapakia atu io me ke fakamalosi atu. Ne fakailoa mai ne Solomona: “A te muna tela e fai ne koe e mafai o fakasao ne ia tou ola, e mafai foki o fakamasei ne ia.” (Faataoto 18:21) A mea kolā ne ‵tupu ona ko te sau‵talaga toetoe a Satani mo Eva e fakaasi mai i ei me e pefea te ‵lasi o fakamaseiga e mafai o māfua mai i pati. (Kenese 3:​1-5; Iakopo 3:⁠5) E ‵lasi foki a fakamaseiga e mafai o ‵tupu ona ko ‵tou gutu. A pati fakatauemu e uiga ki te ‵mafa o se tamāfine e mafai ei o fai ke se kai faka‵lei a ia. A te toe taku atu mo te sē mafaufau o se tala fatufatu e mafai ei o fakamasei te va o tino kolā ko leva ne fai mo fai ne taugasoa. Ao, e ‵tau o pule faka‵lei atu ki ‵tou gutu.

15. E mafai pefea ne tatou o fakaaogā ‵tou gutu ke fakamalosi kae ati aka ei a nisi tino?

¹⁵ E se gata fua i te fakamasei atu, e mafai foki ne ‵tou gutu o fakamalosi atu. E fai mai penei te faataoto mai te Tusi Tapu: “A muna kola e sona fai fua e mafai o fakapakia ne ia te tino e pela mo te pelu, ka ko muna kola e fai mo te mafaufau e mafai o fakasao ne ia te tino.” (Faataoto 12:18) E fakaaogā ne Kelisiano ‵poto olotou gutu ke fakamafanafana atu ki tino loto māfatia mo tino kolā ko ‵mate olotou tino pele. E mafai ne pati a‵lofa o fakamalosi atu ki talavou kolā e taumafai o ‵teke atu ki fakaosoosoga mai i nisi talavou. Kafai e mafaufau faka‵lei tatou, e mafai ne ‵tou gutu o fakatalitonu atu ki toeaina mo lomatua me koi aogā kae alofagina latou. A pati ‵lei e mafai o fakafiafia malie aka ki tino ma‵saki. Kae e sili atu i mea katoa, e mafai o fakaaogā ne tatou ‵tou gutu ke taku atu te fekau ‵mana o te Malo ki tino katoa kolā e fia fakalogo‵logo mai. E mafai ne tatou o folafola atu te Muna a te Atua māfai e fai ne tatou te mea tenā mo te loto katoatoa. Muna a te Tusi Tapu: “Fai a faiga lei ki tino fakaalofa i so se taimi e toka ei koe.”​—⁠Faataoto 3:⁠27.

Te Fakaaogāga ‵Tau o te Malosi

16, 17. Kafai e fakaaogā ne latou te lotou malosi telā ne tuku mai ne te Atua, e fakaakoako atu pefea a toeaina, mātua, tāgata a‵vaga mo fāfine a‵vaga ki a Ieova?

¹⁶ E tiga eiloa e malosi katoatoa a Ieova, e pule atu a ia ki te fakapotopotoga i te alofa. (1 Ioane 4:⁠8) I te fakaakoako atu ki a ia, e tausi atu mo te alofa ne ovasia Kelisiano a te lafu mamoe a te Atua​—⁠e fakaaogā faka‵lei ne latou olotou tofiga, kae e se sōnafai a mea konā. E tonu, e ‵tau ei mo ovasia o “fakatonu atu, o akoako atu, o fakamalosi atu” ki nisi tino, kae e ‵tau o fai a mea katoa konā i “te akoako atu foki fakatasi mo te kufaki katoatoa.” (2 Timoteo 4:⁠2) Tela la, e mafaufau ‵mafa faeloa a toeaina ki pati kolā ne tusi atu ne te apositolo ko Petelu ki tino kolā e isi ne olotou tofi i te fakapotopotoga: “Ke fai koutou mo tausi mamoe o te lafu a te Atua tela ne tuku atu ne ia ki a koutou, kae tausi faka‵lei ki ei mo te loto fiafia, me tena te mea e manako ki ei te Atua. Fai otou galuega . . . mai te loto lagona o tavini atu mo te fakamaoni. Sa taumafai o pule fakasaua ki tino kola ko tuku atu ke tausi ne koutou, ka ke fai koutou mo fakaakoakoga ki te lafu mamoe.”​—⁠1 Petelu 5:​2, 3; 1 Tesalonia 2:​7, 8.

¹⁷ Ne avatu foki ne Ieova a pulega ki mātua mo avaga tāgata, kae e ‵tau o fakaaogā ne latou te malosi tenā ke fesoasoani atu, ke fakapelepele kae fakamalosi atu. (Efeso 5:​22, 28-30; 6:⁠4) E fakaasi mai ne te fakaakoakoga a Iesu me e mafai o fakaaogā faka‵lei a pulega i se auala alofa. Kafai e ‵lei kae ‵pau faeloa a polopolokiga, ka se loto vāi‵vāi i ei a tama‵liki. (Kolose 3:21) E mafai o fakamalosi aka te fakaipoipoga māfai e ata‵fai atu a tāgata Kelisiano i olotou tofiga e pelā me ko te ulu kae e āva malosi a fāfine avaga ki olotou ulu, i lō te sōna pule atu o latou ki mea kolā ne seki ‵tofi aka ne te Atua ke fai ne latou io me ko te faimālō o nisi tino ke fai a mea kolā e ma‵nako latou ki ei.​—⁠Efeso 5:​28, 33; 1 Petelu 3:⁠7.

18. (a) E ‵tau o fakaakoako atu pefea tatou ki a Ieova i te pule faka‵lei ki te kaitaua? (e) Se a te mea e ‵tau o fakamalosi aka ne tino kolā e isi ne olotou tofi ki tino kolā e ‵nofo mai lalo i olotou tausiga?

¹⁸ E ‵tau mo latou kolā ko maua olotou pulega i te kāiga mo te fakapotopotoga o fakaeteete malosi i te kaitaua, me i te kaitaua e fakamalosi aka fua te ma‵taku kae e se ko te alofa. Ne fai mai penei te pelofeta ko Nauma: “A te Aliki [ko Ieova] e se vave ita kae e i a ia te mana malosi.” (Nauma 1:3; Kolose 3:19) Kafai e pule tatou ki te kaitaua e fakaasi mai ei te malosi o te tino, kae ko te takavale i te kaitaua e fakamaoni mai i ei me vāivāi te tino. (Faataoto 16:32) A te mea telā e taumafai ki ei i te kāiga, penā foki loa mo te fakapotopotoga ko te fakamalosiakaga o te alofa​—⁠ko te alofa ki a Ieova, te alofa o te suā tino ki te suā tino, mo te amanaia ki fakatakitakiga ‵tonu. A te alofa ko te ‵toe mea malosi ke ‵mau ei te loto tasi mo te ‵toe fakamalosiga sili ke fai ei te mea tonu.​—⁠1 Kolinito 13:​8, 13; Kolose 3:⁠14.

19. Se a te fakatalitonuga fakamafanafana telā e tuku mai ne Ieova, kae ne a ‵tou mea e ‵tau o fai i ei?

¹⁹ Kafai e iloa ne tatou a Ieova e ‵tau foki o amanaia tatou ki tena malosi. Ne fai mai penei a Ieova e alatu i a Isaia: “E a, e se iloa ne koe? E seki lagona ne koe? A te Aliki ko te Atua ki te se gata mai; ne faite ne ia a te lalolagi katoa. E se mafai o vaivai io me fi‵ta.” (Isaia 40:28) E se mafai o gata atu te malosi o Ieova. Kafai e fakalago‵lago atu tatou ki a ia kae e se fakalago‵lago fua ki a tatou eiloa, ka se tiakina ne ia tatou. E fakatalitonu mai a ia penei: “Sa mataku​—⁠au e fakatasi mo koe! Au ko tou Atua​—⁠sa mataku i se mea! Ka fesoasoani atu au ki a koe, kae fai koe ke malosi, ka puipui kae fakasao ne au a koe.” (Isaia 41:10) Ne a ‵tou mea e ‵tau o fai ona ko tena tausiga alofa? E pelā mo Iesu, ke na fakaaogā faeloa ne tatou so se malosi telā e tuku mai ne Ieova ke fesoasoani kae fakamalosi atu ki nisi tino. Ke na pule faka‵lei tatou ki ‵tou gutu, ko te mea ke fakamalosi atu kae ke se fakapa‵kia atu ki nisi tino. Ke na matapula‵pula faeloa tatou i te feitu faka-te-agaga, ke ‵tu mautakitaki tatou i te fakatuanaki, kae ke fai pelā me se tino malosi ona ko te malosi o te ‵tou Mafuaga Sili, ko Ieova te Atua.​—⁠1 Kolinito 16:⁠13.

[Fakamatalaga fakaopoopo]

E Mafai ne Koe o Fakamatala Mai?

• E fakaaogā pefea ne Ieova tena malosi?

• Ne a auala e mafai ei o maua ne tatou te malosi mai i a Ieova?

• E ‵tau o fakaaogā pefea ne tatou te malosi o ‵tou gutu?

• E mafai pefea o fai a malosi kolā e tuku mai ne te Atua mo fai se fakamanuiaga?

[Ata i te itulau e 29]

Ne fakaaogā ne Iesu te malosi mai i a Ieova ke fesoasoani atu ki nisi tino

[Ata i te itulau e 31]

E isi se ‵tou malosi ke folafola atu te muna a te Atua, māfai e fai ne tatou te mea tenā mo te loto kātoa