E Fakamalosi Aka ne Ieova a Tino Kolā e Fi‵ta

“E fakamalosi ne Ieova a latou kolā ko fi’ta kae fakakatoatoa ne ia te malosi o latou kolā e vaivai.”​—ISAIA 40:​29, NW.

1. Fakamatala mai a te malosi telā e maua i mea kolā ne faite ne te Atua.

E SEAI se tapulā ki te malosi o Ieova. Kae e pefea la te ma‵losi o mea kolā ne faite ne ia! I loto i se motigā vai e tasi e tusa mo te selau piliona fatele ki te piliona a tamā vaega fo‵liki (atoms) i ei. A tamā vaega fo‵liki konā ne faite ki ei a mea katoa.a E fakalagolago a mea ola katoa ki te malosi telā e mafua mai i te fepakipakiga o tamā vaega o te la. Kae e pefea te lasi o te malosi mai i te la e ‵tau o maua ke fakaolaola faeloa a mea katoa i te lalolagi nei? E oko mai ki te lalolagi nei ne nāi vaega fo‵liki o te malosi mai i te la. Kae e tiga eiloa te feitu tena, a nāi vaega o te malosi mai i te la kolā e tō mai ki te lalolagi e sili fakafia atu i lō te malosi kātoa telā e fakaaogā ne tino faite mea i te lalolagi kātoa.

2. Se a te manatu taūa i te Isaia 40:26 e uiga ki te malosi o Ieova?

² Faitalia me e mafaufau tatou ki tamā vaega foliki io me e ‵saga atu tatou ki te lalolagi kātoa, e ofo tatou i te malosi fakaofoofogia o Ieova. E se tioa eiloa o fai mai a ia penei: “Kilo ake ki te lagi! Ko oi ne faite ne ia a fetu kona e lavea ne koe? A ia tela e takitaki ne ia latou pela me se kautau, e iloa ne ia te aofaki o latou, kae e isi katoa ne igoa o fetu takitasi ne fakaigoa ne ia! A tena mana e se fakatau eiloa i te malosi​—e se mafai eiloa o galo se fetu i fetu kona!” (Isaia 40:26) E tonu, e isi se “mana” o Ieova ka ko ia foki ko te Mafuaga o te “malosi” telā ne faite ki ei te lagi mo te lalolagi katoa.

E Manakomia te Malosi e Sili Atu i te Masani

3, 4. (a) Ne a nisi mea e mafai o fakavai‵vai mai ki a tatou? (e) Se a te fesili e ‵tau o mafaufau tatou ki ei?

³ E tiga eiloa e seai se tapulā ki te malosi o te Atua, e oko eiloa ki tino te fi‵ta. I kogā koga katoa e olo atu ei tatou, e lavea atu ne tatou a tino kolā e fi‵ta. E ala aka mo te fi’ta, e olo atu ki galuega io me ko te akoga mo te fi‵ta, e toe foki ki te fale mo te fi‵ta, kae kafai e fai o moe latou e se gata fua i te fi‵ta kae vaivai ‵ki loa. E fia olo atu a nisi tino ki se isi koga ko te mea ke malolo latou. E pelā me ne tavini a Ieova e vāi‵vāi foki a tatou ona ko te mea e aofia i te olaga tukugina atu ki te Atua a gasue‵suega e uke. (Maleko 6:​30, 31; Luka 13:24; 1 Timoteo 4:8) Kae e uke aka foki a nisi mea kolā e fakavāivāi mai ki a tatou.

⁴ E tiga eiloa e fai tatou mo fai ne Kelisiano, e se maua ne tatou te puipuiga mai fakalavelave masani kolā e maua foki ne nisi tino. (Iopu 14:1) E mafai o loto vai‵vai tatou ona ko masaki, fakalavelave i mea tautupe mo nisi mea faiga‵ta aka foki. E se gata i ei e fakavāi‵vāi mai foki ki a tatou a tofotofoga kola e oko atu ki tino kolā e fakasauāgina ona ko te ola i se olaga amiotonu. (2 Timoteo 3:12; 1 Petelu 3:14) Ona ko fakalavelave i te lalolagi kolā e taotaomaki mai ki a tatou mo ‵tekemaiga ki te talaiga e uiga ki te Malo, kāti a nisi tino i a tatou e mafai o loto vāi‵vāi ‵ki kae e faifai malie fua te lotou taviniga ki a Ieova. Kae e se gata i ei, e fakaaogā ne Satani a mea kolā e pule a ia ki ei i tena taumafaiga ke fakasēaogā ne ia te ‵tou fakamaoni ki te Atua. Kae e mafai pefea ne tatou o maua te malosi faka-te-agaga telā e manakogina ke se mapu eiloa io me ke se fakagata ‵tou taviniga?

5. Kaia e ‵tau ei o maua te malosi telā e sili atu i lō te malosi masani ke fai ei ne Kelisiano te lotou galuega?

⁵ E ‵tau mo tatou o fakalagolago ki a Ieova ke maua mai i ei te malosi i te feitu faka-te-agaga me i a ia ko te ‵tou Atua tafasili i te malosi. Ne fakamatala mai ne te apositolo ko Paulo me e manakogina ne tino te malosi e sili atu i lō te malosi masani ke fai ne Kelisiano te lotou galuega. Ne tusi atu a ia penei: “Tela la, e ui eiloa me ko maua ne tatou te koloa faka te Agaga tenei, e pau tatou mo fagu kele i te ma‵fa gofie. Ne fai ne te Atua penei o fakaasi i te mana e o ia, kae se e o tatou.” (2 Kolinito 4:7) E fai ne Kelisiano fakaekegina a “te galuega o te faka‵leiga o tino” fakatasi mo te fesoasoani o olotou taugasoa kolā e fakamoemoe ke ola i te lalolagi. (2 Kolinito 5:​18; Ioane 10:16; Fakaasiga 7:9) E se mafai ne tatou o fakalagolago fua ki ‵tou malosi i te faiga o te galuega a te Atua me i a tatou ne tino vāi‵vāi kae e fe‵paki sāle tatou mo fakasauāga. E fesoasoani mai a Ieova ki a tatou e alatu i tena agaga tapu. Kae e auala i ‵tou vai‵vaiga e fakaasi faka‵lei mai i ei a tena malosi. Kae e pefea te fakamafanafana mai o pati fakamalosi loto me “e puipui ne Ieova a tino amio lei.”​—Salamo 37:17.

A Ieova ko te Mafuaga o te ‵Tou Malosi

6. E fakamaoni mai pefea ne te Tusi Tapu me i a Ieova ko te Mafuaga o te ‵tou malosi?

⁶ A te ‵tou Tamana faka-te-lagi “e se fakatau eiloa i te malosi” kae e mafai foki ne ia o fakamalosi tatou. A te ‵tonuga loa, e fakailoa mai ki a tatou me “e fakamalosi ne ia [Ieova] a latou kola ko fi‵ta kae fakakatoatoa ne ia te malosi o latou kola e vaivai. Ke oko foki eiloa ki a latou kola koi talavou ko vaivai; a tamataene ko siga sale fua i te fi‵ta. Ka ko latou kola e fakatuaga ki a Ieova mō se fesoasoani ka fakafougina te lotou malosi. Ka eva latou i olotou kapakau e pela me ne aeto; ka tele latou kae se mafai o fi‵ta; ka sasale latou kae se mafai o vaivai.” (Isaia 40:​29-31, NW) I nisi taimi e fai tatou pelā me se tino tele telā ko gaegae kae ko se mafai ne ia o toe tele atu. Kae ko pili o oko atu tatou ki te fakaotiga o te fakatautelega telā e maua ei te taui, kae e se ‵tau eiloa o mapu tatou.(2 Nofoaiga Tupu 29:11) Te ‵tou Fili, te Tiapolo, e fanofano sāle e pelā me se “leona fekai” ke taofi aka ne ia te ‵tou taviniga. (1 Petelu 5:8) Ke masaua faeloa ne tatou me i a Ieova “e puipui kae fakalafi ne ia” tatou, kae ko tuku mai foki ne ia a mea e uke ke ‘fakamalosi te tino vaivai kae fita.’​—Salamo 28:7.

7, 8. Ne a fakamaoniga e fakaasi mai me ne fakamalosi aka ne Ieova a Tavita, Sapakuka mo Paulo?

⁷ Ne tuku atu ne Ieova te malosi ki a Tavita ke mafai ne ia o fai faeloa tena taviniga māfai ko fe‵paki a ia mo fakalavelave. Ona ko tena fakatuanaki mo tena loto talitonu, ne tusi mai ei penei a Tavita: “E manumalo matou manafai e kau te Atua i a matou; ka fakatakavale ne ia omotou fili.” (Salamo 60:12) Ne fakamalosi aka foki ne Ieova a Sapakuka ko te mea ke fakaoti faka‵lei ne ia a tena galuega fakapelofeta. E fai mai Sapakuka 3:19: “E aumai ne te Aliki ki au te malosi. E fai ne ia au ke makini pela me se tia, kae tausi faka‵lei ne ia au i luga o mauga.” E tāua foki te fakaakoakoga a Paulo telā ne fai mai ei a ia penei: “E mafai ne au o fai a mea katoa kona, ona ko te fakamalosi mai o [te Atua] ki a au.”​—Filipi 4:13.

⁸ E pelā mo Tavita, Sapakuka mo Paulo, e ‵tau mo tatou o fakatuanaki ki te Atua ke fakamalosi tatou kae ke faka‵sao foki ne ia a tatou. Nei la, ko malamalama tatou me i a Ieova te Aliki Sili ko te Mafuaga o tou “malosi,” ke na mafaufau aka tatou ki nisi auala e mafai ei ne tatou o maua te malosi i te feitu faka-te-agaga mai i mea e uke kolā e tuku mai ne te Atua ki a tatou.

Fakatokaga Faka-te-Agaga Kolā e Fakamalosigina ei Tatou

9. E fakamalosi mai pefea ki a tatou a tusi faka-Kelisiano?

⁹ E mafai ne te sukesuke malosi ki te Tusi Tapu fakatasi mo tusi mō Kelisiano o fakamalosi kae fai foki tatou ke tumau i te fakatuanaki. Ne usu atu a te tino faisalamo penei: “Amutia latou kola . . . e fia‵fia o fai‵tau ki Tulafono a te Aliki, kae mafaufau ‵loto foki ki ei i te ao mo te po. A latou e pela mo ne lakau e ola i tafa o se vaitafe, e fua mai i taimi tonu o te taukai, e se magemage olotou lau. E manuia foki i mea katoa e fai ne latou.” (Salamo 1:​1-3) Se mea taūa mo tatou ke maua a meakai faka-te-agaga kolā e tuku mai ne te Atua e auala i tena Muna mo tusi faka-Kelisiano ke tumau i te malosi i te feitu faka-te-agaga, e pelā eiloa mo te tāua ke ‵kai sāle tatou ko te mea ke tumau i te malosi faka-te-foitino. Tena la, e tāua ‵ki eiloa te sukesuke faka‵lei e pelā foki mo te mafaufau ‵loto.

10. Ko taimi fea e mafai ei ne tatou o fai a sukesukega kae mafaufau ‵loto ki ei?

¹⁰ E uke a mea aogā e maua mai i te mafaufau ‵loto ki “fuafuaga ‵loto a te Atua.” (1 Kolinito 2:10) Kae i taimi fea e mafai ei ne tatou o mafaufau ‵loto? Ne fanatu te tama a Apelaamo ko Isaako “i te afiafi o sasale i malae fatoaga ko te mea ke mafaufau ‵loto a ia.” (Kenese 24:​63-67, NW) Ne “mafaufau foki” te tino faisalamo ko Tavita ki te Atua “i te po katoa.” (Salamo 63:6) E mafai ne tatou o sukesuke kae mafaufau ‵loto ki te Muna a te Atua i te tafataeao, i te afiafi io me ko te po​—ko tena uiga i so se taimi. E mafai o takitaki atu tatou ne vaegā sukesukega penā mo te maufaufau ‵loto ki ei ki se isi mea telā ne tuku mai ne Ieova ke fakamalosi aka ei tatou​—ko te faiga o ‵talo.

11. Kaia e ‵tau ei o fakatāua ne tatou a talosaga kolā e fai sāle?

¹¹ E fakamalosi mai ki a tatou a talosaga kolā e fai sāle. Ke na “talo [tatou] i taimi katoa.” (Loma 12:12) I nisi taimi e ‵tau mo tatou o fai se fakamolemole totino ke maua te poto mo te malosi ke fa‵ki i se tofotofoga faigata. (Iakopo 1:​5-8) Ke na tavae kae fakafetai atu foki ki te Atua māfai e lavea ne tatou me ko taunu ana folafolaga io me kafai ko iloa ne tatou me ne fakamalosi ne ia a tatou ko te mea ke tavini atu ki a ia. (Filipi 4:​6, 7) Kafai e fakapili‵pili atu faeloa tatou ki a Ieova i te faiga o talosaga, e se mafai ne ia o tuku tiaki tatou. Ne usu ne Tavita te pese penei: “Te Atua ko toku fesoasoani.”​—Salamo 54:4.

12. Kaia e ‵tau ei o fakamolemole atu ki te Atua ke maua tena agaga tapu?

¹² E fakamalosi mai ne te ‵tou Tamana faka-te-lagi a tatou e auala i tena agaga tapu, io me ko tena malosi galue. Ne tusi mai penei Paulo: “Ko totuli ei au o ‵talo i mua o te Tamana mō koutou, . . . ke tuku atu ne ia ki a koutou mai te maumea o tona ‵malu, a te mana e alatu i tona Agaga, ko te mea ke fakamalosigina otou foitino i loto.” (Efeso 3:​14-16) E ‵tau mo tatou o ‵talo atu ke maua te agaga tapu, mo te loto talitonu me ka tuku mai ne ia tena agaga tenā. Ne fai ne Iesu te fesili: E mata, e mafai ne se tamana alofa o tuku atu se gata ki tena tama manafai e fakamolemole mai ki se ika? E se mafai lele eiloa. Tena la, ne fakaiku aka a ia penei: “Kafai koutou e ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te Agaga Tapu ki tino kola e fakamolemole atu ki a ia?” (Luka 11:​11-13) Ke na ‵talo atu tatou mo te vaegā loto talitonu penā kae ke masaua faeloa me ko tavini fakamaoni a te Atua e mafai o “fakamalosigina” e auala i te ‵mana mai i tena agaga.

A te Fakapotopotoga se Fesoasoani Fakamalosi Loto

13. Se a te kilokiloga e ‵tau o maua ne tatou ki fakatasiga faka-Kelisiano?

¹³ E fakamalosi mai ne Ieova a tatou e auala i fakatasitasiga kolā e fai sāle ne te fakapotopotoga Kelisiano. Ne fai mai Iesu penei: “Me so se koga e fakapotopoto ei se tokolua, io me se tokotolu i toku igoa, e iai foki au i kona.” (Mataio 18:20) I te taimi ne fai ei ne Iesu te folafolaga tenā, ne faipati a ia e uiga ki mea e ‵tau o saga atu ki ei a tino kolā e fakatoka ne latou a mea i te fakapotopotoga. (Mataio 18:​15-19) Kae ko ana pati kolā ne fai mai ne fai mo fai se fakatakitakiga fakavae mō fakatasiga katoa, mo fono fo‵liki mo fono ‵lasi, kolā e kamata kae fakaoti foki ki te faiga o talosaga i tena igoa. (Ioane 14:14) Faitalia me e tokotimomo io me e lau i afe te aofaki o tino kolā e ‵kau atu ki maopoopoga faka-Kelisiano penā, e taulia tatou ke ‵kau atu ki ei. Tena la, ke na fakaasi atu ne tatou te loto fakafetai mo maopoopoga penā, kolā e fakamalosi mai ki a tatou i te feitu faka-te-agaga kae e fai ei tatou ke fakatau fakaasiasi te alofa mo te fai mea ‵lei.​—Epelu 10:​24, 25.

14. Ne a mea aogā e maua ne tatou mai i galuega kolā e fai ne toeaina Kelisiano?

¹⁴ E tuku mai ne toeaina Kelisiano te fesoasoani i te feitu faka-te-agaga pelā foki mo fakamalosiga. (1 Petelu 5:​2, 3) Ne fesoasoani kae ne fakamalosi atu foki a Paulo ki fakapotopotoga kolā ne tavini atu a ia i ei, e pelā eiloa mo mea kolā e fai ne toeaina asiasi i aso nei. Kae ne kausaki a ia ke ‵kau fakatasi mo ana taina tali‵tonu ko te mea ke fakatau fakamalosi latou. (Galuega 14:​19-22; Loma 1:​11, 12) Ke na fakaasi atu ne tatou ‵tou loto fakafetai ki toeaina i te ‵tou fakapotopotoga mo nisi ovasia Kelisiano aka foki kolā e fai olotou tusaga lasi ‵ki i te fakamalosiakaga o tatou i te feitu faka-te-agaga.

15. E mafai pefea ne taina tali‵tonu i te ‵tou fakapotopotoga o “fesoasoani malosi” mai ki a tatou?

¹⁵ E mafai ne taina tali‵tonu i te fakapotopotoga o “fesoasoani malosi” mai ki a tatou. (Kolose 4:​10, 11) E mafai ne latou o fai mo fai ne ‘takaga tonu’ kae fesoasoani mai ki a tatou i taimi o fakalavelave. (Faataoto 17:17) E pelā mo te taimi ne fakasaoloto ei te toko 220 tavini a te Atua mai i te falepuipui fakasauā tino i Sachsenhausen telā ne leoleo ne te kau Nazi i te 1945, ne ‵tau o sa‵sale latou i se malaga e 120 maila te ‵mao. Ne olo tasi latou, kae ne ‵taki ne tino ma‵losi a tamā kā kolā ne ‵sopo i ei a tino vāi‵vāi. Se a te ikuga? I se malaga telā ne iku atu ki te mate o tino e sili atu i te toko 10,000 kolā ne ‵nofo atu i te falepuipui, ne seki mate eiloa se Molimau a Ieova e tokotasi. E fakamaoni aka a vaegā tala penā kolā e maua i tusi a te Watch Tower kae e aofia i ei te Yearbook of Jehovah’s Witnesses mo te Jehovah’s Witnesses​​—Proclaimers of God’s Kingdom, me e fakamalosi aka ne te Atua ana tino, ko te mea ke se ‵fiu latou i te faiga o mea ‵lei.​—Kalatia 6:9.b

E Fakamalosi Tatou ne te ‵Tou Galuega Talai

16. E fakamalosigina pefea tatou i te feitu faka-te-agaga ne te ‵tou ‵kau sāle atu ki te galuega talai?

¹⁶ Ka maua ne tatou a fakamalosiga i te feitu faka-te-agaga māfai e ‵kau sāle atu tatou ki te galuega ko te talaiatuga o te Malo. E fesoasoani mai a vaegā galuega penā ki a tatou ke ‵saga tonu atu ki te Malo o te Atua kae ke mafau‵fau faeloa ki te ola se-gata-mai mo fakamanuiaga kolā ka maua ne tatou i ei. (Iuta 20, 21) E mafai ne folafolaga mai i te Tusi Tapu kolā e fai‵pati tatou ki ei i te ‵tou talaiga o tuku mai a fakamoemoega ‵lei kae e mafai foki o fai tatou ke mautakitaki e pelā mo te pelofeta ko Mika, telā ne fai mai penei: “Matou e tapuaki kae faka‵logo ki te Aliki te motou Atua ki te se gata mai.”​—Mika 4:5.

17. Ne a manatu fesoasoani e uiga ki te faiga o akoga faka-te-Tusi Tapu e tuku mai ki a tatou?

¹⁷ E fakamalosigina te ‵tou fesokotakiga mo Ieova māfai e fakaaogā sāle ne tatou te Tusi Tapu i te akoako atu ki nisi tino. E pelā mo taimi kolā e fai ei ne tatou a akoga faka-te-Tusi Tapu mo tino kae e fakaaogā i ei te tusi ko Te Iloaga Telā e Takitaki Atu ei ki te Ola Se-Gata-Mai, se mea ‵lei ke faitau kae fakamatala foki a nisi tusi siki i ei. E fesoasoani atu ki te tino akoga kae e fakalauefa foki i ei ‵tou malamalama i te feitu faka-te-agaga. Kafai e faigata ki te tino akoga ke malamalama i nisi fakamatalaga faka-te-Tusi Tapu io me se tala fakatusa, e mafai o ‵vae aka te mataupu e tasi i te tusi ko te Iloaga kae fakamatala atu ki a ia i se isi taimi e fai ei tena akoga i te mataupu foki eiloa tenā. Kae e pefea la ‵tou fiafia māfai e fakatoka faka‵lei tatou kae fai foki a taumafaiga e uke ke fesoasoani atu ki nisi tino ke fakapili‵pili atu ki te Atua!

18. Fakaasi mai te auala e mafai ei o fakaaogā faka‵lei te tusi ko Te Iloaga.

¹⁸ I tausaga takitasi, e fakaaogā te tusi ko Te Iloaga ke fesoasoani atu ki te fia afe o tino ke fai mo fai ne tavini tukugina atu ki a Ieova, kae e aofia foki i ei a tino kolā seki iloa muamua ne latou te Tusi Tapu. E pelā mo te tagata lotu Hinitu mai Sri Lanka, ne lagona ne ia te fakamatalaga a se Molimau e uiga ki te Palataiso i te taimi koi foliki ei a ia. I te fia tausaga mai tua ifo i ei, ne faipati a ia ki te Molimau tenā kae ne kamata o fai tena akoga faka-te-Tusi Tapu fakatasi mo te avaga a te Molimau tenā. Ne fai ne te tamataene tenā tena akoga i aso takitasi, kae ne fakaoti te faiga o te akoga i te tusi ko Te Iloaga i se taimi toetoe. Ne kau atu a ia ki fakatasitasiga katoa, ne seki toe kau atu a ia ki tena lotu mua, kae ne fai mo fai se tino talai o te Malo. I te taimi ne papatiso ei a ia, kae ko oti ne kamata o fai ne ia se akoga faka-te-Tusi Tapu mo tena takaga.

19. Se a te mea ko iloa tonu ne tatou māfai e ‵sala muamua tatou ki te Malo?

¹⁹ Kafai e ‵sala muamua ne tatou te Malo ka aumai i ei te fiafia telā e fakamalosi loto. (Mataio 6:33) E tiga eiloa e fe‵paki tatou mo tofotofoga kese‵kese, e tumau tatou i te folafolaatuga o te tala ‵lei mo te fiafia mo te loto finafinau. (Tito 2:14) Ko fai nei a nisi tino mo fai ne paenia kolā e talai atu i aso katoa, kae ko nisi o tatou e talai i koga kolā e manakomia i ei a tino talai. Kafai tatou e fai penā, io me fakamuamua ne tatou te Malo i nisi auala aka mo te fiafia, e mautinoa eiloa me e se mafai ne Ieova o puli ‵tou galuega mo te alofa telā e fakaasi atu ne tatou ki tena igoa.​—Epelu 6:​10-12.

Ke Tumau i te Malosi o Ieova

20. E mafai pefea o fakaasi atu me e fakamoemoe tatou ki a Ieova ke maua te malosi?

²⁰ Ke na fakaasi katoatoa atu me e fakamoemoe tatou ki a Ieova ke maua te malosi. E mafai ne tatou o fai penā, mafai e fakaaogā katoatoa ne tatou a mea faka-te-agaga kolā e tuku mai ne ia e alatu i te ‘tavini fakamaoni.’ (Mataio 24:45) E aofia i mea kolā ne tuku mai ne Ieova ko sukesukega totino mo sukesukega kolā e fai ne te fakapotopotoga ki te Muna a te Atua fakatasi mo te fesoasoani o tusi faka-Kelisiano, te faiga o talosaga mo te loto kātoa, te fesoasoani mai te kau toeaina i te feitu faka-te-agaga, ko fakaakoakoga ‵lei a nisi taina tali‵tonu kolā e fakamaoni, e pelā foki mo te kau sāle atu ki te galuega talai. E mafai o fakamalosi mai a mea konā ke tumau te ‵tou fesokotakiga mo Ieova pena foki eiloa mo te faiga o tena taviniga tapu.

21. Ne fakamatala mai pefea ne te avā apositolo ko Petelu mo Paulo me e ‵tau o maua te malosi mai i te Atua?

²¹ E tiga eiloa e vaivai tatou, ka fakamalosigina ne Ieova tatou ke fai tena loto māfai e fakalago‵lago atu tatou ki tena fesoasoani. Ona ko tena iloaga me e ‵tau o maua ne tatou se vaegā fesoasoani penā, ne tusi mai penei te apositolo ko Petelu: “So se tino e tavini atu, e ‵tau mo ia o tavini atu i te malosi ne tuku atu ne te Atua ki a ia.” (1 Petelu 4:11) Kae ne fakaasi atu ne Paulo a tena fakalagolago ki te malosi telā e tuku mai ne te Atua i ana pati konei: “Ona ko Keliso au ko loto malie o fakafeagai mo uiga vaivai o te foitino, muna masei, puapuaga, fakasauaga mo mala; me kafai ko vaivai au i te feitu faka te foitino ona ko mea konei, kae malosi eiloa au i te feitu faka te Agaga i te fesoasoani mai o te Aliki.” (2 Kolinito 12:10) Ke na fakaasi atu ne tatou a te fakatuanaki penā kae ke faka‵malu i ei a Ieova te Aliki Sili, telā e fakamalosi ne ia te tino vaivai.​—Isaia 12:2.

[Fakamatalaga fakaopoopo]

Ka Tali Mai Pefea ne Koe?

• Kaia e ‵tau ei o maua ne tino o Ieova a te malosi telā e sili atu i te malosi masani?

• Ne a tusi siki e fakamaoni mai ei me e fakamalosi ne te Atua ana tavini?

• Ne a nisi fakatokaga faka-te-agaga ne tuku mai ne Ieova ke fakamalosi tatou?

• E mafai pefea ne tatou o fakaasi atu me e fakamoemoe tatou ki te Atua ke maua te malosi?

[Ata i te itulau e 1]

E fakamalosigina te ‵tou fesokotakiga mo Ieova māfai e fakaaogā ne tatou te Tusi Tapu ke akoako atu ki nisi tino