‘Ke Fakasao Koe mo Latou Kolā e Faka‵logo ki a Koe’

“Ke matapula koe, kae tausi faka‵lei ki au akoakoga, kae fai eiloa ne koe i taimi katoa, me kafai e fai ne koe, ka fakasao ne koe a koe eiloa, pela foki mo latou kola e faka‵logo mai ki a koe.”​—⁠1 TIMOTEO 4:⁠16.

1, 2. Se a te mea e fakamalosi atu ki Kelisiano ‵tonu ke tumau latou i te lotou galuega fakaola tino?

I SE fakai i te vao i te feitu ki mātū o Tailani, ne tofotofo aka se tauavaga Molimau a Ieova ki se ‵gana ‵fou telā ne fatoā tauloto laua ki ei i tino kolā e ‵nofo atu i mauga. Ne fatoā tauloto te tauavaga tenā ki te ‵gana Lahu, ko te mea ke mafai ei ne laua o talai atu te tala ‵lei o te Malo o te Atua ki tino i te fa‵kai tenā.

² “Se mea faigata ke fakamatala atu te fiafia mo te loto malie telā ne lagona ne maua, i te ga‵lue mō tino ‵gali konei,” ko pati a te tagata tenā. “E ma‵natu aka maua me ko aofia maua i te fakataunuga o te Fakaasiga 14:​6, 7, i te folafolaatuga o te tala ‵lei ‘ki tino o te lalolagi, ki fenua katoa mo matakaiga, ki ‵gana katoa mo tino.’ E se uke a koga e ‵toe mai nei kolā e se oko atu ki ei te tala ‵lei, kae tenei eiloa te koga e tasi ne fai penā. E fai pelā me ko se lava a taimi ke fai ei ne maua a akoga faka-te-Tusi Tapu e uke.” E manino i ei, me e ma‵nako eiloa te tauavaga tenā ke se faka‵sao fua laua, kae ke faka‵sao foki a tino kolā e faka‵logo ki a laua. E pelā me ne Kelisiano, e mata, e fakamoe‵moe tatou katoa ke fai penā?

‘Ke Matapulapula Koe i Taimi Katoa’

3. Ne a mea e ‵tau o fai muamua ne tatou, a koi tuai o faka‵sao ne tatou a nisi tino?

³ Ne fakatonutonu atu a te apositolo ko Paulo ki a Timoteo “ke matapulapula koe, kae tausi faka‵lei ki au akoakoga, kae fai eiloa ne koe i taimi katoa,” kae e fakasino atu foki eiloa te mea tenei ki Kelisiano katoa. (1 Timoteo 4:16) A te ‵tonuga loa, e ‵tau o ‵saga atu muamua tatou ki a tatou eiloa, ke fesoasoani atu ei ki nisi tino ke maua ne latou te fakaolataga. E mafai pefea ne tatou o fai penā? E tasi te mea, e ‵tau o matapula‵pula faeloa tatou ki taimi kolā e ‵nofo atu tatou i ei. Ne tuku mai ne Iesu se fakailoga telā e uke a vaega i ei ko te mea ke iloa ei ne ana soko te taimi e oko mai ei “te ‵toe vaitaimi o te fakanofonofoga o mea.” Kae ne fai atu foki a Iesu me ka se iloa tonu ne tatou te taimi e oko mai ei te gataga. (Mataio 24:​3, 36, NW) Ne a ‵tou mea e ‵tau o fai ki ei?

4. (a) Se a te kilokiloga e ‵tau o maua ne tatou e uiga ki taimi kolā e ‵toe mai i te fakanofonofoga tenei? (e) Se a te kilokiloga telā e ‵tau o ‵kalo keatea tatou mai i ei?

⁴ Kāti ka fesili ifo tatou taki tokotasi penei: ‘E mata, e fakaaogā faka‵lei ne au so se taimi e ‵toe mai i te fakanofonofoga tenei ke fakasao au mo latou foki kolā e faka‵logo mai ki a au? Io me ko mafaufau au penei, “Ka se manavase au ki te gataga, me e se iloa tonu ne tatou te taimi telā ka oko mai ei te mea tenā”?’ E fakamataku te manatu tenā. Me e se fetaui te manatu tenā mo te fakamalosiga tenei a Iesu: “E ‵tau koutou o toka me i te Tama a te Tagata e vau i te itula tela ne seki fakatali‵tali koutou ki ei.” (Mataio 24:44) E se tenei te taimi ke ‵tuka ei ‵tou loto finafinau mō te galuega a Ieova io me ke ‵saga atu ki te lalolagi ke maua ei te tokagamalie io me ko te loto malie.​—⁠Luka 21:​34-36.

5. Se a te fakaakoakoga telā ne fai ne molimau a Ieova a koi tuai o oko atu ki te vaitaimi o Kelisiano?

⁵ A te suā auala e mafai ei ne tatou o fakaasi atu me e matapula‵pula tatou ko te kufaki mo te fakamaoni e pelā me ne Kelisiano. Ne kufaki faeloa a tavini a te Atua i aso ko ‵teka, faitalia me e mafau‵fau latou me ka faka‵sao fakavave latou io me ikai. Ko oti ne taku atu ne Paulo a tala o molimau kolā ne ola a koi tuai o oko atu ki te vaitaimi o Kelisiano, e pelā mo Apelu, Enoka, Noa, Apelaamo, mo Sala, kae ne fai atu a ia penei: “Ne ‵mate foki a tino konei i te fakatuanaki. Ne seki maua ne latou a mea ne folafolagina ne te Atua, ka ko leva ne iloa ‵mao ne latou, talia foki ne latou, kae takutonu mai foki ne latou me i a latou ne fakaalofa mo tino se ‵nofo mau i te lalolagi.” Ne seki taka‵vale latou i so se manakoga ke maua se olaga faigofie, kae ne seki talia foki ne latou a fakaosoosoga kolā ne oko mai ke amio ma‵sei latou, kae ne olioli eiloa latou ke na oko mai “te fakataunuga o folafolaga” konā.​—⁠Epelu 11:13; 12:​1, NW.

6. Ne ‵fuli pefea a olaga o Kelisiano i te senitenali muamua ona ko te lotou kilokiloga ki te fakaolataga?

⁶ Ne ma‵natu aka foki a Kelisiano i te senitenali muamua me i a latou ne tino “fakaalofa” i te lalolagi nei. (1 Petelu 2:11) E tiga eiloa ne faka‵sao atu a Kelisiano ‵tonu i te fakamaofaga o Ielusalema i te 70 T.A., ne seki taofi aka ne latou te lotou galuega talai, io me ne seki ‵foki atu latou ki te olaga masani o te lalolagi. Ne iloa ne latou me ne faka‵tali mai se fakaolataga sili mō tino kolā ne tumau i te fakamaoni. A te ‵tonuga loa, ne tusi mai ne te apositolo ko Ioane a pati konei i te 98 T.A.: “A te lalolagi mo mea katoa i ei kola e ma‵nako ki ei a tino e palele atu katoa; ka ko te tino tela e fai ne ia a te mea e loto ki ei a te Atua e ola ki te se gata mai.”​—⁠1 Ioane 2:​17, 28.

7. Ne fakaasi atu pefea ne Molimau a Ieova a te kufaki i tausaga fakamuli nei?

⁷ I aso fakamuli nei, ne tumau foki a Molimau a Ieova i te galuega a Kelisiano, faitalia me ne fe‵paki latou mo fakasauāga faiga‵ta. E mata, ne māumāu fua te lotou kufaki? Ikai, me ne fakatalitonu mai penei a Iesu: “Ka ko te tino e loto mau ke oko ki te ikuga, e ola eiloa a ia,” faitalia me ko te gataga tenā o te fakanofonofoga matagā tenei io me ko te gataga o ‵tou olaga nei. I te toe‵tuga, ka masaua kae toe taui atu ne Ieova ana tavini fakamaoni katoa kolā ko oti ne ‵mate.​—⁠Mataio 24:13; Epelu 6:⁠10.

8. E mafai pefea ne tatou o fakaasi atu me e fakatāua ne tatou te kufaki o Kelisiano i aso ko ‵teka?

⁸ Kae e fia‵fia eiloa tatou me ne seki mafau‵fau fua a Kelisiano fakamaoni i aso mua ki te lotou fakaolataga. A te ‵tonuga loa, e loto fakafetai tatou me ne tauloto tatou e uiga ki te Malo o te Atua ona ko olotou taumafaiga, kae ne tumau eiloa latou i te fakataunuga o te tofiga tenei mai i a Iesu: “Olo atu koutou ki fenua katoa ke fai a tino i ei mo oku soko, . . . Akoako atu foki latou ke faka‵logo ki mea katoa kola ne fakatonu atu ne au ki a koutou.” (Mataio 28:​19, 20) A koi ‵tala mai te avanoaga ki a tatou, e mafai eiloa o fakaasi atu ne tatou te ‵tou loto fakafetai mai i te talai atu ki nisi tino kolā e seki lagona ne latou te tala ‵lei. Kae ko te talaiga ko te vaega muamua fua o te faiga o soko.

“Tausi Faka‵lei ki Au Akoakoga”

9. Ka fesoasoani mai pefea ki a tatou se manatu aogā ke kamata ei a a‵koga faka-te-Tusi Tapu?

⁹ E aofia foki te akoako atu i te ‵tou galuega, kae e se ko te talai atu fua. Ne ‵tofi aka ne Iesu a tatou ke akoako atu ki tino ke faka‵logo latou ki mea katoa kolā ne fakatonu mai ne ia. E tonu, i nisi fenua e foliga mai pelā me e se tokouke a tino e fia tauloto e uiga ki a Ieova. Kae kafai e ma‵natu aka tatou me e se ‵lei a tino i te ‵tou koga talai, kāti ka fakalavelave mai i ei ki ‵tou taumafaiga ke kamata a a‵koga faka-te-Tusi Tapu. Ne matea atu ne Iveti, telā e paenia i se koga telā e ma‵natu aka a nisi tino me e seai ne tino fia‵fia i ei, me ne kamata ne tino asiasi ki te koga tenā a a‵koga faka-te-Tusi Tapu me ona ko te seai o se lotou manatu me e se aogā te galuega i konā. Ne ‵fuli ne ia tena kilokiloga ke ‵lei, kae ne maua foki ne Iveti a tino kolā ne ma‵nako ke fai olotou a‵koga i te Tusi Tapu.

10. Se a te mea telā e ‵tau mo tatou o fai e pelā me ne faiakoga o te Tusi Tapu?

¹⁰ Kāti e ‵ma a nisi Kelisiano ke fai atu ki tino ke fai se akoga faka-te-Tusi Tapu ona ko te lotou mafaufau me e se ‵kafi ne latou o fai se akoga penā. E tonu, e kese‵kese ‵tou atamai. Kae e se fai pelā me e ‵tau o atamai ‵ki eiloa tatou ke fai pelā me ne faiakoga ‵lei o te Muna a te Atua. E ‵mana eiloa te tinā fekau tonu i te Tusi Tapu, kae ne fai mai a Iesu me ka iloa ne tino pelā me ne mamoe a te leo o te Tausi Mamoe tonu māfai ko lagona ne latou. E ‵tau fua o fakaoko atu ne tatou te fekau a te Tausi Mamoe ‵Lei, ko Iesu, ke manino e ‵tusa loa mo mea e mafai ne tatou o fai.​—⁠Ioane 10:​4, 14.

11. E mafai pefea o tai momea aka tou ‵lei e pelā me se faiakoga ke fesoasoani atu ki te tino akoga i te Tusi Tapu?

¹¹ E mafai pefea o momea aka te ‵lei o te fakaoko atu ne koe a te fekau a Iesu? A te mea muamua, ke na fakamasani koe ki muna a te Tusi Tapu e uiga ki te mataupu telā ka faipati koe ki ei. E ‵tau o maina muamua koe i te mataupu a koi tuai o akoako atu ne koe te mea tenā ki nisi tino. Kae e taumafai o tausi ne koe te ‵malu mo te fiafia i te taimi e fai ei te akoga. E ‵lei atu te tauloto o tino, e aofia foki i ei a tamā tama‵liki, māfai e se manava‵se latou kae e fakaasi atu ne te faiakoga te fakaaloalo mo te alofa ki a latou.​—⁠Faataoto 16:⁠21.

12. E iloa pefea ne koe me e maina ‵lei te tino akoga i mea kolā e akoako atu ne koe ki a ia?

¹² E pelā me se faiakoga, e se manako koe ke taku atu fua a fakamatalaga ko te mea ke fai te mea tauloto a te tino akoga. Ke fesoasoani atu ki te tino ke maina ‵lei i mea kolā e tauloto a ia ki ei. Ka kese‵kese a malamalama o tino e uiga ki au pati ona ko te kese‵kese o olotou akogaga, olotou telega, mo te lotou masani ki te Tusi Tapu. Tela la, kāti ke fesili ifo koe penei, ‘E mata, e maina ‵lei a ia i te tāua o tusi siki kolā e maua i te mataupu telā e sukesuke ki ei?’ E mafai o maua ne koe ana manatu mai i te faiga o fesili kolā e se mafai fua o tali mai penei ao io me ikai, kae e ‵tau o fai se fakamatalaga ki ei. (Luka 9:​18-20) Kae ko nisi tino a‵koga e ‵ma sāle ma fai a fesili ki te faiakoga. Tela la, kāti e fakaasi mai i ei me e se maina latou i mea kolā e akoako atu ki a latou. Ke fakamalosi atu ki te tino akoga ke fai ne ia ana fesili kae ke fakailoa mai foki māfai e se maina ‵lei a ia i se mea.​—⁠Maleko 4:10; 9:​32, 33.

13. E mafai pefea ne koe o fesoasoani atu ki te tino akoga ke fai mo fai se faiakoga?

¹³ A te suā pogai e fai ei te akoga faka-te-Tusi Tapu ko te fesoasoani atu ki te tino akoga ke fai mo fai se faiakoga. (Kalatia 6:⁠6) Ona ko te mea tenā, kafai ko toe mafau‵fau koulua ki mea kolā ne suke‵suke koulua ki ei, kāti e mafai ne koe o fakamolemole atu ki a ia ke fakamatala mai se manatu i se auala faigofie e pelā eiloa me e fai ne ia tena fakamatalaga ki se tino telā e fatoā lagona ne ia te mea tenā. Fakamuli ifo, kafai ko toka a ia ke kau atu ki te galuega talai, kāti e mafai ne koe o ‵kami mai a ia ke olo atu koulua tokolua i te galuega talai. Kāti ka se manavase a ia ke ga‵lue fakatasi koulua, kae ka fesoasoani atu i ei ki a ia ke se ma ke oko eiloa ki te taimi ko toka ei a ia o fanatu tokotasi i te galuega talai.

Fesoasoani Atu ki te Tino Akoga ke Fai mo Taugasoa o Ieova

14. Se a te ‵toe fakamoemoega sili o koe e pelā me se faiakoga, kae ne a mea ka fesoasoani mai ki a koe ke fai penā?

¹⁴ A te fakamoemoega sili o faiakoga Kelisiano katoa ko te fia fesoasoani atu ki te tino akoga ke fai mo fai se taugasoa o Ieova. Ka se fai fua ne koe te mea tenā i te faiga o au pati, kae i au amioga foki. E aogā ‵ki eiloa ki loto o tino a‵koga ke akoako atu i au amioga. E se ko pati ako faiga, kae maise eiloa māfai e taumafai o ‵fuli a amioga a te tino, kae fakamalosi atu ki te tino akoga ke loto finafinau. Kafai e matea atu ne ia me i au pati mo au faifaiga e māfua mai i se fesokotakiga ‵lei mo Ieova, ka sili atu te fakamalosi ki a ia ke ati aka te fesokotakiga tenā i tena olaga.

15. (a) Kaia e tāua ei ke ati aka ne te tino akoga a te lagonaga tonu mō tena taviniga ki a Ieova? (e) E mafai pefea ne koe o fesoasoani atu ki te tino akoga ke gasolo atu faeloa ki mua i te feitu faka-te-agaga?

¹⁵ E manako koe ke tavini atu te tino akoga ki a Ieova ona ko te alofa, kae e se ko te manavase fua i a ia ma tamate i Amaketo. Kafai e fesoasoani atu ki a ia ke ati aka te manakoga ‵lei tenā, ka ati aka foki ne koe i ei a uiga e se ‵ka i te afi kolā ka tumau māfai ko tofotofogina tena fakatuanaki. (1 Kolinito 3:​10-15) A te manakoga ‵se, e pelā mo te fia fakaakoako malosi atu ki a koe io me ko so se isi tino, ka se tuku atu ei ki a ia te malosi ke ‵teke atu ki mea kolā e se fetaui mo mea faka-Kelisiano, kae ka se maua foki ne ia te loto malosi ke fai te mea tonu. Masaua la, ka se fai koe mo fai tena faiakoga ke oko eiloa ki te se-gata-mai. A koi maua ne koe te avanoaga, ke na fakamalosi atu koe ki a ia ke fakapilipili atu faeloa ki a Ieova mai i te faitau mo te mafaufau ki te Muna a te Atua i aso katoa. I te auala eiloa tenei ka talia faeloa ne ia a “faifaiga o muna ‵lei” mai te Tusi Tapu mo tusi faka-te-Tusi Tapu i se taimi leva ‵ki mai tua ifo o te taimi ko palele ei tau lua akoga.​—⁠2 Timoteo 1:⁠13.

16. E mafai pefea ne koe o akoako atu ki te tino akoga ke ‵talo atu mai i tena loto?

¹⁶ E mafai foki ne koe o fesoasoani atu ki te tino akoga ke fakapilipili atu ki a Ieova mai i te akoako atu ki a ia ke ‵talo atu mai tena loto. E mafai pefea ne koe o fai penā? Kāti ke fakasino atu koe ki te ‵talo fakaakoako a Iesu, e penā foki loa mo nisi ‵talo kolā ne fai mo te loto katoatoa kae ne tusi ki lalo i te Tusi Tapu, e pelā mo mea kolā e maua i salamo. (Salamo 17, 86, 143; Mataio 6:​9, 10) Kae kafai e lagona foki ne te tino akoga au ‵talo i te kamataga mo te fakaotiga o te akoga, ka iloa ei ne ia ou lagonaga e uiga ki a Ieova. Tela la, e ‵tau o fakaasi atu faeloa i au ‵talo tou loto fakamaoni mo tou fiafia, e penā foki loa mo te paleni ‵lei i te feitu faka-te-agaga mo mea tau lagonaga.

Ke Kausaki o Faka‵sao Au Tama‵liki

17. E mafai pefea ne mātua o fesoasoani atu ki olotou tama‵liki ke tumau i te auala ki te fakaolataga?

¹⁷ E aofia i a latou kolā e fia faka‵sao ne tatou, ko tino eiloa o ‵tou kāiga. E tokouke a tama‵liki a mātua Kelisiano e fakamaoni kae e “mautakitaki” foki te lotou fakatuanaki. Kae e se ‵pau te mautakitaki o te munatonu i loto o nisi tama‵liki. (1 Petelu 5:9; Efeso 3:17; Kolose 2:⁠7) E tiakina ne nisi tama‵liki konā a te auala faka-Kelisiano i te taimi ko pili o mā‵tua latou. Kafai koe se mātua, ne a au mea e mafai o fai ke mo a ma tupu te mea tenā? Muamua la, ke kausaki koe ke maua te fealofani tonu i loto i te kāiga. Kafai e ‵lei te olaga faka-te-kāiga, e fakatoka i ei te kilokiloga ‵tau e uiga ki pulega, te fakatāua o amioga ‵lei, mo fesokotakiga fiafia mo nisi tino. (Epelu 12:⁠9) Tela la, te fealofani tonu i te kāiga e fai pelā me se fatoaga telā ka tupu aka ei te va fakataugasoa o te tamaliki mo Ieova. (Salamo 22:10) A kāiga fealofani e fai fakatasi olotou mea​—⁠faitalia me e ‵tau o ‵galo atu i mātua a taimi e mafai ei o fakaaogā ne latou mō te lotou ‵lei eiloa. Tenā loa te auala e mafai ei ne koe o akoako atu ki au tama‵liki ke fai a filifiliga ‵tonu i te olaga nei. A mea kolā e ma‵nako malosi ki ei au tama‵liki, e mātua, ko koutou​—⁠ko otou taimi, otou malosi mo te otou a‵lofa, kae e se ko te fia o kope faka-te-lalolagi. E mata, e avatu sāle ne koe a mea konā ki au tama‵liki?

18. Ne a vaegā fesili e ‵tau o fesoasoani atu a mātua ki olotou tama‵liki ke tali aka?

¹⁸ E se ‵tau lele eiloa o ma‵natu aka a mātua Kelisiano me ka mautinoa eiloa a te faiga olotou tama‵liki mo fai ne Kelisiano. Ne fai mai penei a Tanielu, se toeaina telā e tokolima ana tama‵liki: “E ‵tau o fakamāumāu ne mātua a taimi ke ‵tuli keatea a manatu fakalotolotolua kolā e maua faeloa ne olotou tama‵liki i te faleakoga mo nisi koga aka. E ‵tau o loto kufaki latou kae fesoasoani malie atu ki olotou tama‵liki ke maua ne latou a tali ki vaegā fesili penei: ‘Ko ‵nofo tonu eiloa tatou i te taimi o te gataga? E tonu me e tasi fua te lotu tonu? Kaia e se ‵lei ei te fai taugasoa ki se tamaliki i te akoga telā e foliga mai pelā me e ‵lei? E mata, e masei faeloa te ‵moe fakatasi a koi tuai o avaga?’ ” Mātua, e mafai o fakalagolago atu koutou ki a Ieova ke fakamanuia mai ki otou taumafaiga, me e manako foki a ia ke manuia otou tama‵liki.

19. Kaia e ‵lei atu ei ke na fai ne mātua a akoga a olotou tama‵liki?

¹⁹ Kāti e ma‵natu aka a nisi mātua me e se lava te lotou ata‵mai ke fai ei a akoga a olotou tama‵liki. Kae e se ‵tau o mafaufau koe penā, me e seai aka foki se isi tino e ‵lei atu tena tulaga ke akoako atu ki au tama‵liki e pelā mo koe. (Efeso 6:⁠4) Kafai e fai ne koe te akoga a au tama‵liki, ka iloa tonu ne koe a mea i olotou loto mo olotou mafaufau. E mata, e māfua mai olotou tali i olotou loto, io me e taku mai fua a manatu? E mata, e tali‵tonu latou ki mea kolā e tau‵loto latou ki ei? E tali‵tonu eiloa latou me e ola tonu a Ieova? Ka maua fua ne koe a tali ki fesili konā mo nisi fesili tāua aka, māfai e fai eiloa ne koe te akoga a au tama‵liki.​—⁠2 Timoteo 1:⁠5.

20. E mafai pefea ne mātua o fai te akoga a te kāiga ke gali kae aogā foki?

²⁰ E mafai pefea o fakatoka ne koe te polokalame mō te akoga a te kāiga, māfai ko oti ne kamata o fai ne koe te akoga tenā? E fai mai penei a Iosefa, telā e isi sena tama tagata mo sena tama fafine: “E pelā mo akoga faka-te-Tusi Tapu katoa, e ‵tau o ‵gali, kae e ‵tau o fai pelā me se mea e fia‵fia a tino ki ei. Ke fai penā i te motou kāiga, e se mafai o fai ne matou se tulafono makeke e uiga ki te taimi. E fai sāle ne matou te motou akoga i se itula e tasi, kae i nisi taimi kāti e avanoa mai fua se sefulu minute, kae e fai eiloa ne matou te akoga faitalia me e pefea te leva. E tasi te mea telā e fai ei te motou akoga mo fai te ‵toe mea gali i te vaiaso, ko te faiga ne tama‵liki o koniseti mai tala i te tusi ko Taku Tusi o Tala Mai te Tusi Tapu.a E sili atu te tāua o mea e iloa kae malamalama i ei i te faiga tenā i lō te uke o palakalafa kolā e suke‵suke matou ki ei.“

21. Ko taimi fea e mafai ei o akoako atu a mātua ki olotou tama‵liki?

²¹ E tonu, e se ‵tau o gata fua te akoako atu ki au tamaliki i te taimi e fai ei se akoga. (Teutelonome 6:​5-7) E fai mai penei te Molimau mai Tailani telā ne fai‵pati tatou ki ei i te kamataga: “E masaua ‵lei ne au me ne ave sāle au ne toku Tamana i te galuega talai, i ma pasika, ki koga ‵mao kolā ne talai i ei te motou fakapotopotoga. E mautinoa eiloa, ne fesoasoani mai te fakaakoakoga ‵lei a mā mātua mo te lotou akoako mai i taimi katoa ke fakaiku aka ne maua ke ga‵lue tumau i te galuega talai. Kāti ne ‵mautakitaki a akoakoga konā. Me koi galue au i koga ‵mao i te galuega talai!”

22. Ne a mea ka iku mai māfai e ‘matapulapula koe kae tausi faka‵lei foki au akoakoga’?

²² Ko pili mai nei te aso ka vau ei a Iesu i te taimi tonu ke fakaoko mai ne ia te fakamasinoga a te Atua ki luga i te fakanofonofoga tenei. Kafai ko palele atu te aso tenā, ka masaua fua fakamuli ne tino te aso tenā, kae ko tavini fakamaoni a Ieova ka tumau eiloa i te tavini atu ki a ia ke oko eiloa ki te se-gata-mai. E mata, e fakamoemoe koe ke aofia i a latou konā fakatasi mo au tama‵liki mo tino kolā e a‵koga fakatasi mo koe i te Tusi Tapu? Kafai e fai penā, ke na masaua: “Ke matapula koe, kae tausi faka‵lei ki au akoakoga, kae fai eiloa ne koe i taimi katoa, me kafai e fai ne koe, ka fakasao ne koe a koe eiloa, pela foki mo latou kola e faka‵logo mai ki a koe.”​—⁠1 Timoteo 4:⁠16.

[Fakamatalaga fakaopoopo]

E Mafai ne Koe o Fakamatala Mai?

• Se a te kilokiloga e ‵tau o maua ne tatou, me e se iloa ne tatou te taimi tonu o te fakamasinoga a te Atua?

• I auala fea e mafai ei ne tatou o ‘matapulapula ki ‵tou akoakoga’?

• E mafai pefea ne koe o fesoasoani atu ki te tino akoga ke fai mo fai te taugasoa o Ieova?

• Kaia e tāua ei ke fakamāumāu ne mātua a taimi ke akoako atu ei ki olotou tama‵liki?

[Ata i te itulau e 25]

Ka faigofie ki se tino ke tauloto ki mea māfai e fakatau fakaaloalo kae fia‵fia a tino i ei

[Ata i te itulau e 26]

Kafai e fai a koniseti ki tala i te Tusi Tapu, e pelā mo te fakamasinoga ne Solomona o fāfine talitāgata e tokolua, ka fai a akoga a te kāiga ke ‵gali ‵ki