Ke Fakaasi Atu a Uiga o Keliso!

“Ke tuku atu ki a koutou ne te Atua o te kufaki mo te fakamalosiga, a te olaga lototasi, e pela eiloa mo te loto o Keliso Iesu.”​—⁠LOMA 15:⁠5.

1. E mafai pefea o ‵fuli te olaga o se tino ona ko ana uiga?

ETĀUA ‵ki a uiga o tino i te olaga nei. A te kaugatā io me ko te kaugofie, te fiafia io me ko te fanoanoa, te fakalogogatā io me ko te fia fakalogo, te loto muimui io me ko te loto fakafetai, e mafai o ‵fuli malosi i ei a faifaiga a se tino penā foki loa mo faifaiga a nisi tino ki te tino tenā. Kafai e maua ne se tino a uiga ‵lei, e mafai o loto malie a ia i tulaga faiga‵ta. Kafai e se ‵lei a uiga o se tino, e se mafai o loto malie a ia ki so se mea​—⁠faitalia me e foliga mai me e ‵lei tena olaga.

2. E fakaakoako pefea se tino ki uiga ‵fou?

² E mafai o ‵fuli ‵tou uiga​—⁠ke ‵lei io me ke ma‵sei. A te ‵tonuga loa, e ‵tau o fakaakoako ki ei. E fai mai penei te tusi ko te Collier’s Encyclopedia e uiga ki te pepe telā ne fatoā fanau mai: “E ‵tau o fakaakoako a ia ki uiga kolā ka maua fakamuli ne ia, e pelā mo tena fakaakoako ki se ‵gana io me ko so se isi atamai aka foki.” E fakaakoako atu pefea tatou ki uiga konā? E tiga eiloa e uke a mea e aofia i ei, e aofia malosi i ei a fakanofonofoga mo tino kolā e ‵kau atu tatou ki ei. E fai mai te tusi tenā penei: “E fakaakoako io me e fakamasani malie tatou ki uiga o ‵tou takaga, e pelā me se mea e faifai malie kae e se matea atu.” E tai ‵pau te manatu tenei ne fakaasi mai ne te Tusi Tapu i te fia afe tausaga ko ‵teka: “Kauga ki tino poto kae ka poto foki koe. Kafai e kauga koe ki tino valea kae ka se aoga koe.”​—⁠Faataoto 13:20; 1 Kolinito 15:⁠33.

Se Fakaakoakoga mō Uiga ‵Lei

3. Ko oi te tino telā ne ‵lei ‵ki ana uiga, kae e mafai pefea o fakaakoako atu tatou ki a ia?

³ Ne fai ne Iesu Keliso te ‵toe fakaakoakoga ‵lei i ana uiga, penā foki loa mo nisi mea katoa. Ana muna: “Ko avatu ne au te fakaakoakoga mo koutou. Tela la, e ‵tau mo koutou o fai pela mo te mea ko oti ne fai ne au ki a koutou.” (Ioane 13:15) A koi tuai o fai tatou pelā mo Iesu, e ‵tau o tauloto muamua tatou e uiga ki a ia.a E suke‵suke tatou ki te olaga o Iesu ona ko te manakoga ke fai pelā mo pati fakamalosi konei a te apositolo ko Petelu: “Tenei te pogai ne kalagagina ei koutou ne te Atua; i te mea i a Keliso ne puapuagatia mo koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga.” (1 Petelu 2:21) Tenei te ‵tou fakamoemoega ke fai tatou pelā mo Iesu i feitu katoa e mafai ei o fai penā. E aofia i ei te fakaakoako atu ki ana uiga.

4, 5. Se a te uiga o Iesu telā e faka‵mafa mai i te Loma 15:​1-3, kae e mafai pefea ne Kelisiano o fakaakoako atu ki a ia?

⁴ Ne a mea e aofia i te mauaga o uiga o Keliso Iesu? E fesoasoani mai te mataupu e 15 o te tusi a Paulo ki te kau Loma ke maua ei ne tatou te tali ki te fesili tenā. I fuaiupu i te kamataga o te mataupu tenā, ne fakauiga eiloa a Paulo ki te uiga ‵kese e tasi o Iesu i ana muna konei: “Ko tatou kola e ma‵losi i te fakatuanaki, e ‵tau mo tatou o fesoasoani ki mea e se mafai ne tino vaivai, kae ke se fakafiafia ifo tatou ki a tatou eiloa. E ‵tau mo tatou takitokotasi o fakafiafia o‵tou tuakoi mō te olotou ‵lei, ko te mea ke fakatupu ake ei a ia i te fakatuanaki. Me i a Keliso e seki fakafiafia ki a ia eiloa, kae muna mai a te Tusi, ‘Ko muna ma‵sei katoa kola ne faipatigina ne latou kola ne muna masei atu ki a koe, ne pa‵ku katoa ki luga i a au.’ ”​—⁠Loma 15:​1-3.

⁵ I te fakaakoako atu ki a Iesu, e fakamalosi atu ki Kelisiano ke loto ma‵lie latou o tavini atu ki nisi tino i te loto maulalo i lō te fia fakamalie aka fua ne latou olotou manakoga. A te ‵tonuga loa, a te loto malie ke tavini atu mo te loto maulalo ki nisi tino ko te uiga masani o tino “kola e ma‵losi i te fakatuanaki.” Ne sili atu te malosi faka-te-agaga o Iesu i lō so se isi tagata telā ne ola, kae ne fai atu penei a ia e uiga ki a ia eiloa: “E pela mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola mō tino e tokouke.” (Mataio 20:28) E pelā me ne Kelisiano, e fia tavini atu foki tatou ki nisi tino, e aofia i ei ko “tino vaivai.“

6. Se a te auala e mafai ei ne tatou o fakaakoako atu ki a Iesu i ana faifaiga ki ‵tekemaiga mo fakatauemuga?

⁶ A te suā uiga gali telā ne fakaasi atu ne Iesu ko ana manatu mo faifaiga kolā ne fakamalosi atu ki nisi tino. Ne seki talia lele eiloa ne ia a manatu sē ‵lei o nisi tino ke ‵fuli keatea ana manatu ‵lei e uiga ki tena taviniga ki te Atua; kae e se ‵tau foki o talia ne tatou a mea konā. I te taimi ne fakatauemu kae fakasauā atu ki a Iesu me ne tapuaki atu a ia mo te fakamaoni ki te Atua, ne fa‵ki a Iesu i ei kae ne seki loto muimui. Ne iloa ne ia me e se ‵tau o ‵poi a tino kolā e fesoasoani atu ki olotou tuakoi “mō te olotou ‵lei,” māfai e ‵teke mai a tino o te lalolagi kolā e se tali‵tonu kae e se malamalama foki.

7. Ne fakaasi atu pefea ne Iesu tena loto kufaki, kae kaia e e ‵tau ei mo tatou o fai foki penā?

⁷ Ne fakaasi atu ne Iesu a te kilokiloga tonu i nisi auala aka. Ne seki ‵fiu a ia i te faka‵tali ki a Ieova, kae ne nofo fakatalitali a ia mo te kufaki ke fakataunu ei Ana fuafuaga. (Salamo 110:1; Mataio 24:36; Galuega 2:​32-36; Epelu 10:​12, 13) Kae ne seki ‵fiu foki Iesu i ana soko. Ana muna ki a latou: “Fakaakoako mai ki a au”; me ne uiga “filemu” a ia ne fakamalosi atu ana akoakoga ki nisi tino. Kae ona ko tena “loto malalo,” ne seki fakamaualuga kae fakamatamata a ia. (Mataio 11:29) Ne fakamalosi mai a Paulo ke na fakaakoako atu tatou ki vaegā uiga penā o Iesu i ana muna konei: “A te faifaiga e ‵tau o maua ne koutou, ko te faifaiga foki tela ne fai ne Keliso Iesu: I tena nofoga i te lagi, ne iai mo ia a te ‵malu faka-Atua, kae ne pukemau ne ia te ‵malu fakaatua tenei. Mai luga i tona loto malie, ne tiakina katoatoa ne ia tona ‵malu faka-Atua, kae fai mo tavini. Ne liu tino a ia, ne fanau foki a ia i foliga faka te foitino.”​—⁠Filipi 2:​5-7.

8, 9. (a) Kaia e ‵tau ei mo tatou o taumafai malosi ke maua a uiga sē kaiū? (e) Kaia e se ‵tau ei o loto vāivāi tatou māfai e se fakaakoako katoatoa atu tatou ki te fakaakoakoga a Iesu, kae ne fai pefea a Paulo mo fai se fakaakoakoga ‵lei i te feitu tenā?

⁸ Se mea faigofie fua ke fai atu tatou me e fia tavini atu tatou ki nisi tino kae ke fakamuamua ne tatou olotou manakoga i lō ‵tou manakoga. Kae kafai e iloilo faka‵lei ne tatou ‵tou manatu kāti ka fakaasi mai i ei me e se katoatoa ‵lei ‵tou loto ke fai penā. Kaia? Muamua, ne maua ne tatou a uiga kaiū mai i a Atamu mo Eva; kae ko te lua o manatu, e ‵nofo atu tatou i te lalolagi telā e fakamalosi aka i ei a te kaiū. (Efeso 4:​17, 18) Kafai e fia fakamalosi aka ne tatou a uiga sē kaiū, e ‵tau o ati aka sāle i ei a vaegā manatu kolā e ‵kese ‵ki i uiga vāivāi kolā ne fa‵nau mai fakatasi mo tatou. E manakogina i ei te loto ‵mau fakatasi mo taumafaiga.

⁹ Kāti ka loto vāi‵vāi sāle tatou ona ko ‵tou uiga vāivāi sē ‵lei katoatoa kolā e ‵kese ‵ki mai i te fakaakoakoga ‵lei katoatoa telā ne tuku mai ne Iesu. Kāti ka manatu aka tatou me ailoga e mafai o maua ne tatou a vaegā uiga kolā ne maua ne Iesu. Kae onoono ki pati fakamalosi loto konei a Paulo: “ E iloa ne au i toku feitu faka te foitino, e seai eiloa se ‵lei e nofo i ei. E tiga eiloa te nofo mo au te manako o fai te ‵lei, e se mafai eiloa ne au o fai. Me e se fai ne au te ‵lei e manako au ki ei o fai, kae fai eiloa ne au te masei tela e se manako au ki ei o fai. Ka ko toku tina kanoloto tonu eiloa: e fiafia ki te tulafono a te Atua. Kae e matea foki ne au te sua tulafono e galue i toku foitino, ko te tulafono tela e taua mo te tulafono e tonu ki toku mafaufau.” (Loma 7:​18, 19, 22, 23) E tonu, ne fakalavelave atu faeloa a uiga sē ‵lei katoatoa o Paulo ke se fai ne ia te loto o te Atua e pelā mo mea kolā ne manako a ia ki ei, kae ne ‵lei ‵ki tena kanoloto​—⁠ko ana manatu mo ana lagonaga e uiga ki a Ieova mo Ana tulafono. E mafai foki o ‵lei ‵tou kanoloto.

Ke Fakatonutonu Aka a Uiga Sē ‵Lei

10. Se a te vaegā mafaufauga telā ne fakamalosi atu ne Paulo ke na ati aka ne te kau Filipi?

¹⁰ E mata, e ‵tau o fakatonutonu aka ne nisi tino olotou uiga sē ‵lei? Ao. Tenā loa te mea ne ‵tau o fai ne nisi Kelisiano i te senitenali muamua. Ne faipati a Paulo e uiga ki te vaegā mafaufauga tonu i tena tusi ki te kau Filipi. Ne tusi atu a ia penei: “Au e se fai atu pela me ko oti ne maua ne au a te mea nei, [ko te olaga faka-te-lagi mai te toetu fakavave aka] io me ko au foki ko leva ne ‵lei katoatoa. Au tenei eiloa koi kausaki ki ei ke maua ne au, i a au ko leva ne fai mo tino o Keliso Iesu. Taina, au e taofi pela me seki oko eiloa au ki ei; e tasi fua te mea e fai ne au, ko te fakapuli ne au a mea kola i oku tua, kae taumafai malosi eiloa au ke maua ne au a te mea tela e i oku mua. Tela la, au e tele tonu eiloa ki te tapula ke maua ne au a te fakailoga, tela ko te kalaga a te Atua e alatu i a Keliso Iesu ki te ola i te lagi. A tatou kola ko ma‵tua faka te Agaga, e ‵tau o maua ne tatou a te vaega mafaufauga tenei.”​—⁠Filipi 3:​12-15.

11, 12. I auala fea e fakaasi mai ei ne Ieova a mafaufauga ‵lei ki a tatou?

¹¹ E fakaasi mai ne pati a Paulo me e sē ‵lei a manatu o so se tino telā ko oti ne fai mo fai se Kelisiano, māfai e manatu aka a ia me e se ‵tau o gasolo atu a ia ki mua. Ko se talia i ei ne ia te vaegā mafaufauga o Keliso. (Epelu 4:11; 2 Petelu 1:10; 3:14) E mata, e se toe ‵lei aogā te tino tenā? E se fai penā. E mafai ne te Atua o fesoasoani mai ki a tatou ke ‵fuli ‵tou manatu māfai e ma‵nako tonu tatou ki ei. Ne toe fai mai penei a Paulo: “Ia, kae kafai e isi ne mea ko ala ei o tai kese mai otou mafaufauga, ka fakamaina ne te Atua ki a koutou.”​—⁠Filipi 3:⁠15.

¹² Kae kafai e ma‵nako tatou ke fakaasi mai ne Ieova te vaegā mafaufauga tonu ki a tatou, e isi ne mea e ‵tau o fai ne tatou i ei. Kafai e suke‵suke a tino ‘kolā e ‵kese olotou mafaufauga’ ki te Muna a te Atua i te faiga o ‵talo fakatasi mo te fesoasoani o tusi faka-Kelisiano kolā e tuku mai ne “te tavini poto kae fakamaoni,” ka mafai ei ne latou o maua te vaegā mafaufauga tonu. (Mataio 24:45) Ka fia‵fia o fesoasoani atu ki a koe a toeaina Kelisiano kolā e tofi aka ne te agaga tapu ‘ke tausi a te fakapotopotoga a te Atua.’ (Galuega 20:28) E pefea te loto fakafetai o tatou me e masaua ne Ieova ‵tou vāivāiga kae e fia fesoasoani mai a ia mo te alofa ki a tatou! Ke na talia ne tatou te fesoasoani tenā.

Ke Fakaakoako Atu ki Nisi Tino

13. Se a te mea e iloa ne tatou i manatu ‵lei mai i te tala i te Tusi Tapu e uiga ki a Iopu?

¹³ I te Loma mataupu e 15, ne fakaasi atu ne Paulo me kafai e mafaufau ‵mafa tatou ki tala mua, ka fesoasoani mai i ei ki a tatou ke ‵fuli ‵tou uiga. Ne tusi mai a ia penei: “Me i mea katoa kola ne tusi i te Tusi, ne tusi ke akoako ei tatou, ko te mea ke maua ne tatou a te fakamoemoega e alatu i te kufaki, mo te fakamalosiga e alatu i te Tusi.” (Loma 15:⁠4) Ne ‵tau mo nisi tavini fakamaoni a Ieova i aso mua o fakatonutonu aka a nisi manatu o latou. Ne ‵lei sāle a manatu o Iopu. Ne seki ‵ti atu ne ia te masei ki a Ieova, kae e seai eiloa se taimi ne fakalotolotolua ei tena fakatuaga ki te Atua ona ko logo‵maega. (Iopu 1:​8, 21, 22) Kae ne tai fia amiotonu tou tagata. Ne uga atu ne Ieova a Eliu ke fakatonutonu aka te uiga tenā. Ne seki ita i ei a Iopu, kae ne talia ne ia mo te loto maulalo me e ‵tau o ‵fuli ne ia ana manatu kae ne fai eiloa ne ia te ‵fuliga tenā.​—⁠Iopu 42:​1-6.

14. E mafai pefea ne tatou o fai pelā mo Iopu māfai e fakatonutonu mai se tino e uiga ki ‵tou manatu?

¹⁴ E mata, ka ‵pau eiloa ‵tou faifaiga mo faifaiga a Iopu māfai e fai mai se taina Kelisiano mo te alofa me ko fakaasi atu ne tatou se uiga sē ‵lei? E pelā mo Iopu ke mo a ma lou atu tatou me e ‵se te Atua. (Iopu 1:22) Kafai e logo‵mae tatou kae e seai se ‵tou mea ‵se ne fai, ke mo a ma loto muimui tatou io me ‵losi atu ki a Ieova me e māfua mai i a ia ‵tou fakalavelave faiga‵ta. Ke ‵kalo keatea tatou mai i te fia amiotonu, kae ke masaua ne tatou me faitalia me e pefea te uke o galuega taulia a tatou i te taviniga ki a Ieova, e fai fua tatou pelā me “ne tavini se aoga.”​—⁠Luka 17:⁠10.

15. (a) Se a te manatu sē ‵lei telā ne fakaasi atu ne nisi soko o Iesu? (e) Ne fakaasi atu pefea ne Petelu se uiga ‵lei?

¹⁵ I te senitenali muamua, ne se ‵lei a uiga kolā ne fakaasi atu ne nisi tino kolā ne fakalogo‵logo ki a Iesu. E tasi te taimi, ne taku atu ne Iesu se mea telā e fui maina a tino i ei. Ona ko te mea tenā, “e tokouke ona soko ne lagona ne latou a te mea tenei, kae fai atu, ‘Se muna faigata tena; ko oi te tino e mafai o fakalogo ki ei?’ ” E manino i ei me ne ‵se a manatu o tino kolā ne fai‵pati penā. Kae ona ko olotou manatu ‵se ne seki toe fakalogo‵logo latou ki a Iesu. E fai mai penei te tala: “Ona ko te feitu tenei, e tokouke ona soko ko solomuli ki tua, ko se tau‵tali foki i a ia.” E mata, ne se ‵lei a manatu o tino katoa? Ikai. Ne toe fai mai te tala tenā penei: “Tela muna atu ei a Iesu ki te tinoagafulu mo te tokolua, ‘Kae pefea koutou, e fia olo foki koutou keatea?’ Ne tali mai Simona Petelu ki a ia, ‘Te Aliki, ko oi te tino ka olo matou ki ei?’ ” Ne tali ne Petelu tena fesili penei: “A muna o te ola se gata mai, e nofo mo koe.” (Ioane 6:​60, 66-68) Ko tafaga la te gali o te uiga tenā! Kafai e maua ne tatou a fakamatalaga mo tamā ‵fuliga ki ‵tou malamalama e uiga ki te Tusi Tapu kāti ka faiga‵ta muamua ki a tatou ke talia a mea konā, kae e mata, e ‵lei ke na fakaasi atu ne tatou te uiga telā ne fakaasi atu ne Petelu. E supa ‵ki eiloa te tino telā e se toe tavini atu ki a Ieova io me e ‵teke atu a ia ki “faifaiga o muna ‵lei,” me e se maina ‵lei muamua a ia i nisi mea!​—⁠2 Timoteo 1:⁠13.

16. Se a te uiga matagā telā ne fakaasi atu ne takitaki lotu Iutaia i aso o Iesu?

¹⁶ Ne seki fakaasi atu ne takitaki lotu Iutaia i te senitenali muamua a te vaegā mafaufauga telā ne fakaasi atu ne Iesu. Ne fakaasi atu te lotou loto ‵fika ke se faka‵logo ki a Iesu i te taimi ne toe fakatu aka ne ia a Lasalo mai i te mate. A te vavega tenā se tinā fakamaoniga tonu ki tino kolā ne ‵tonu olotou manatu, me ne uga mai ne te Atua a Iesu. Kae e fai‵tau tatou penei: “Tela, fakapotopoto ei ne Falesaio mo faitaulaga sili a te kau o te Fono, olotou muna, ‘Se a te mea ka fai ne tatou? A fakailoga fakaofoofogina katoa, ko fai ne te tagata tenei! Kafai e tiaki ne tatou ke fai ne ia mea penei, ko tino katoa ka talitonu ki a ia, mo tino pule o te Malo o Loma, ka fakamasei ne latou te Fale Tapu mo te fenua katoa o tatou!’ ” Se a te lotou fakaikuga? “Tela, kamata mai eiloa i te aso tena o fia tamate ne latou a Iesu.” Kae e se gata fua i te lotou fia tamate atu ki a Iesu, ne fai foki te lotou aofaga ke fakagalo atu te fakamaoniga ola me i a ia se tino fai vavega. “Ko mafaufau foki ei faitaulaga sili ki se auala e tamate ei ne latou Lasalo.” (Ioane 11:​47, 48, 53; 12:​9-11) E pefea te masei māfai ko fakaputuputu putiputi aka ne tatou a vaegā uiga penā kae e ita io me e loto masei tatou e uiga ki mea kolā e ‵tau eiloa o fia‵fia tonu tatou ki ei! Ao, e pefea te fakamataku o te mea tenā!

Ke Fakaakoako Atu ki Uiga ‵Lei o Keliso

17.(a) I vaegā taimi fea ne fakaasi atu ei ne Tanielu te uiga ko te sē mataku? (e) Ne fakaasi mai pefea ne Iesu tena loto malosi?

¹⁷ E ‵lei faeloa a kilokiloga a tavini a Ieova. I te taimi ne fai ei te aofaga a fili o Tanielu ke fai se tulafono ke fakatapu te faiga o se ‵talo ki se isi atua io me se tagata kae na ko te tupu i aso e 30, ne iloa ne Tanielu me ka fakalavelave atu te mea tenā ki tena fesokotakiga mo Ieova te Atua. E mata, ka se ‵talo atu a ia ki te Atua i aso e 30? Ikai, ne loto toa tou tagata kae ne ‵talo atu faeloa ki a Ieova e fakatolu taimi i aso katoa, e pelā eiloa mo tena masani. (Tanielu 6:​6-17) Ne seki talia foki ne Iesu ke mataku a ia ki ana fili. E tasi te Sapati ne fetaui laua mo se tagata telā e ‵mate tena lima. Ne iloa ne Iesu me ka se fia‵fia a nisi tino Iutaia i konā māfai e faka‵lei ne ia te masaki o se tino i te Sapati. Ne fesili tonu atu a ia ke na fakaasi mai ne latou olotou faka‵tauga e uiga ki te mea tenā. Ne ita latou ma fai penā, telā ne faka‵lei aka ei ne Iesu te tagata tenā. (Maleko 3:​1-6) Ne seki mataku a Iesu ke fakataunu tena galuega e ‵tusa loa mo te mea telā e iloa ne ia me e ‵tau o fai.

18. Kaia e ‵teke mai ei nisi tino ki a tatou, kae ne a ‵tou mea e ‵tau o fai ki olotou manatu ‵teke?

¹⁸ E iloa foki ne Molimau a Ieova i aso nei me e se ‵tau foki mo tatou o loto mataku i pati sē ‵lei kolā kāti ka fai mai ne nisi tino ‵teke. Moi se fai penā, penei e se fakaasi atu ne tatou te uiga o Iesu. E ‵teke mai a tino e tokouke ki Molimau a Ieova. A nisi tino e fai penā me e se iloa ne latou te tala tonu, kae ko nisi tino e fai penā me e takalia‵lia latou ki te kau Molimau io me ko te lotou fekau. Kae ke mo a ma talia ne tatou olotou uiga sē fiafia ke fakatuka mai ki ‵tou uiga ‵lei. E se ‵tau lele eiloa o talia ne tatou a nisi tino ke pule mai ki te auala telā e fai ei ne tatou te ‵tou tapuakiga.

19. E mafai pefea ne tatou o fakaasi atu a uiga kolā e tai ‵pau mo uiga o Iesu Keliso?

¹⁹ Ne fakaasi atu faeloa ne Iesu a uiga ‵lei ki ana soko penā foki loa mo fakatokaga a te Atua, faitalia me e pefea te faigata ke fai penā. (Mataio 23:​2, 3) Ke na fakaakoako atu tatou ki a ia. E tonu, e se ‵lei katoatoa ‵tou taina, kae e se ‵lei katoatoa foki tatou. Kae tefea te koga telā e maua ei ne tatou a takaga kolā e ‵lei atu mo taugasoa fakamaoni i lō te ‵tou kautaina i te lalolagi kātoa? Koi tuai o tuku mai ne Ieova se mainaga katoatoa e uiga ki tena Muna tusia, kae se a te vaegā lotu telā e sili atu te lotou malamalama i lō tatou? Ke na tumau eiloa tatou i ‵tou uiga ‵lei, ko vaegā uiga kolā ne fakaasi mai ne Iesu Keliso. E aofia i ei, te malamalama ke ‵nofo fakatali‵tali tatou ki a Ieova, e pelā mo te mea telā ka faipati tatou ki ei i te suā mataupu.

[Fakamatalaga fakaopoopo]

E Mafai ne Koe o Fakamatala Mai?

• E ‵fuli pefea ‵tou olaga ona ko ‵tou uiga?

• Ke fakamatala mai a uiga o Iesu Keliso.

• Ne a mea e iloa ne tatou ona ko uiga o Iopu?

• Se a te uiga ‵lei telā e ‵tau o maua māfai e fe‵paki tatou mo ‵tekemaiga?

[Ata i te itulau e 19]

E fia fesoasoani atu ki nisi tino te Kelisiano telā e ‵lei ana uiga

[Ata i te itulau e 20]

Kafai e suke‵suke tatou ki te Muna a te Atua i te faiga o ‵talo ka fesoasoani mai i ei ke talia ne tatou a uiga o Keliso