Ke Taofi ‵Mau ki te Kilokiloga a Keliso

“Ke maua foki ne koutou te mafaufau telā ne maua ne Keliso Iesu.” ​—LOMA 15:​5, TUSI PAIA O LE LALOLAGI FOU.

1. Kaia e ‵tau o taumafai tatou ke fakaakoako atu ki te kilokiloga a Keliso?

“O ‵MAI ki a au,” muna Iesu Keliso. “Fakaakoako mai ki a au, me i a au e agamalu kae loto maulalo; e maua foki i ei ne koutou a te tokagamalie otou agaga.” (Mataio 11:​28, 29, Tusi Paia o le Lalolagi Fou) E fakaasi faka‵lei mai i te ‵kamiga alofa tenei a te kilokiloga alofa a Iesu. E seai eiloa se tino e mafai o fai mo fai se fakaakoakoga ‵lei ke tau‵tali ki ei. E tiga eiloa a ia ko te Tama malosi a te Atua, ne fakaasi atu ne Iesu te loto malamalama mo te atafai, maise eiloa ki tino kolā e logo‵mae.

2. Ne a vaegā uiga o Iesu ka suke‵suke tatou ki ei?

² I te mataupu tenei mo mataupu e lua kolā e ‵soko mai, ka suke‵suke eiloa tatou ki te auala e mafai ei o ati aka kae fakatumau ne tatou te kilokiloga a Iesu kae fakaakoako ki “te mafaufau o Keliso” i ‵tou olaga. (1 Kolinito 2:​16) Ka suke‵suke muamua tatou ki vaega e lima: te agamalu mo te loto maulalo o Iesu, tena mataalofa, tena fakalogo ki te Atua, tena loto toa, mo tena alofa tonu.

Ke Tauloto Mai i te Uiga Agamalu o Keliso

3. (a) Se a te akoakoga e tasi e uiga ki te loto maulalo ne akoako atu ne Iesu ki ana soko? (e) Ne saga atu pefea a Iesu i te taimi ne fakaasi atu ei ne ana soko olotou vāivāiga?

³ Ne loto fiafia a Iesu, te Tama ‵lei katoatoa a te Atua o vau ki te lalolagi ke tavini atu i va o tino sē ‵lei katoatoa kae agasala. Ne tamate fakamuli ne nisi tino konā a ia. Kae ne fakatumau faeloa ne Iesu tena fiafia mo te loto pulea. (1 Petelu 2:​21-​23) A te ‘tumau i te ‵kilo atu’ ki te fakaakoakoga a Iesu e mafai o fesoasoani mai ke fai foki tatou penā māfai ko pokotia tatou i mea ‵se mo tulaga sē ‵lei katoatoa o nisi tino. (Epelu 12:2) Ne ‵kami ne Iesu ana soko ke ‘amo tena amoga’ kae fakaakoako atu ki a ia. (Mataio 11:29) Ne a mea e mafai o tauloto ne latou mai i ei? A te mea e tasi e mafai ne soko o tauloto ki ei ko te loto maulalo mo te kufaki o Iesu faitalia olotou mea ‵se. I te po mai mua o tena mate, ne mulumulu ne Iesu olotou vae, telā ne akoako atu ei ne ia ki a latou se akoakoga e uiga ki te “loto maulalo” ko te mea ke se puli i a latou. (Faitau te Ioane 13:​14-​17.) Fakamuli ifo, i te taimi ne fakata‵mala ei a Petelu, Iakopo, mo Ioane o tumau i te “matapula‵pula,” ne fakaasi atu ne Iesu te loto malamalama ki olotou vāivāiga. “Simona a koe e moe?” ne fesili atu a ia. “Ke matapula‵pula koutou kae ‵talo, ke mo a e pa‵ku atu koutou ki te fakaosoosoga. E malosi te agaga, ka ko vāivāi te foitino.”​—Maleko 14:​32-​38.

4, 5. E fesoasoani mai pefea te fakaakoakoga a Iesu māfai ko fakafesagai atu tatou ki vāivāiga o nisi tino?

⁴ E pefea a ‵tou faifaiga māfai e isi se taina talitonu e maua ne ia te uiga ko te loto fakatau‵fai, e kaitaua vave, io me e se saga fakavave atu ki pati fakatonutonu mai i toeaina io me ko “te tavini fakamaoni kae poto”? (Mataio 24:​45-​47) E tiga eiloa e mafai o toka tatou ke talia a uiga faka-te-foitino e pelā me ne mea masani i te lalolagi a Satani, e faigata eiloa ke fakafesagai atu tatou ki vaegā tulaga sē ‵lei katoatoa penā i va o ‵tou taina. Kafai e faigofie ke ita tatou ona ko vāivāiga o nisi tino, e ‵tau o fesili ifo tatou penei, ‘E mafai pefea o fakaasi atu ne au a “te mafaufau o Keliso” i se auala tai ‵lei atu?’ Taumafai ke masaua me ne seki ita atu a Iesu ki ana soko, e tiga eiloa ne fakaasi atu ne latou te lotou vāi‵vai i te feitu faka-te-agaga.

⁵ Mafaufau ki te tala o te apositolo ko Petelu. I te taimi ne ‵kami ei ne Iesu a Petelu ke eva ki tua mo te poti kae sasale atu ki a Ia i luga i te vai, ne sasale atu eiloa a Petelu. Kae i te taimi ne kilo atu ei a Petelu ki te matagi, ne kamata ei o apulu tou tagata. E mata, ne kaitaua a Iesu kae fai atu: “Kaitoa! Ke fai eiloa te mea tenā mo akoakoga ki a koe”? Ikai! “Telā, ‵kapa atu ei a te lima o Iesu o puke ki a ia, kae fai atu, ‘A tou fakatuanaki, ko oko eiloa i te foliki. Ai a ne fakalotolotolua ei koe?’ ” (Mataio 14:​28-​31) Kafai ko fetaui tatou mo se taina telā ko vāivāi tena fakatuanaki, e mata, e mafai o ‵kapa atu ‵tou lima i se auala fakatusa kae fesoasoani atu ke momea aka te malosi o tena fakatuanaki? A te mea tenā se akoakoga mautinoa o te loto maulalo o Iesu i ana faifaiga ki a Petelu.

6. Ne a mea ne akoako atu ne Iesu ki ana apositolo e uiga ki te kausaki atu ki tulaga ma‵luga?

⁶ Ne aofia foki a Petelu i te kinauga a te kau apositolo e uiga ki te ‵toe tino sili i a latou. Ne ma‵nako a Iakopo mo Ioane ke saga‵saga lāua i te feitu fakaatamai mo te feitu fakamaui o Iesu i tena Malo. I te taimi ne lagona ei ne Petelu mo nisi apositolo a te mea tenā, ne kaitaua latou. Ne iloa ne Iesu me ne maua ne latou a te uiga tenei mai i te vaegā olaga ne ‵tupu aka ei latou. Ne kalaga atu a ia ki a latou kae fai atu: “E iloa ne koutou i pule e isi se lotou malosi o pule i tino, a takitaki foki e isi se lotou malosi i a latou o fakatonu a tino. Tenei la, e se tenā te auala mō koutou. Kafai se tino i a koutou e manako ke sili a ia, e ‵tau mo ia o fai mo tavini a koutou. A ia foki telā e fia muamua, ke fai a ia mo pologa a koutou.” Ne toe fakasino atu a Iesu ki tena fakaakoakoga, i ana muna: “E pelā mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola mō tino e tokouke.”​—Mataio 20:​20-​28.

7. E mafai pefea o fesoasoani atu tatou ke maua te fealofani i loto i te fakapotopotoga?

⁷ A te mafaufau ki te loto maulalo o Iesu e mafai o fesoasoani mai ke fai tatou e pelā mo “te tino telā e se taulia” i va o ‵tou taina. (Luka 9:​46-​48) A te faiga penā e fesoasoani atu ki te fealofani o tino katoa. E pelā me ko te tamana o se kāiga lasi, e manako a Ieova ki ana tama‵liki ke ‘‵nofo tasi e pelā me ne taina,’ kae ke fealofani. (Salamo 133:1) Ne ‵talo atu a Iesu ki tena Tamana ke ‵kau fakatasi a Kelisiano ‵tonu katoa mo te fealofani, ko te mea “ke iloa foki ne te lalolagi me ne uga mai ne koe au, kae alofa foki koe ki a latou, e pelā mo tou alofa ki a au.” (Ioane 17:23) Tela la, e fesoasoani mai a te ‵tou ‵kau fakatasi mo te fealofani ke iloa ei tatou e pelā me ne soko o Keliso. Ke maua te vaegā fealofani penā, e ‵tau o ‵kilo atu tatou ki vāivāiga o nisi tino e pelā mo te mea ne fai ne Keliso. Ne loto fakamagalo a Iesu, kae ne akoako mai ne ia me kafai e fakamagalo atu tatou, e mafai foki o fakamagalogina tatou.​—Faitau te Mataio 6:​14, 15.

8. Ne a mea e mafai o tauloto ne tatou mai i te fakaakoakoga a tavini mua a te Atua?

⁸ E mafai foki o uke atu a mea e tauloto ne tatou mai i te tau‵tali atu ki te fakatuanaki o tino kolā ne fakamāumāu ne latou a tausaga e uke i te fakaakoako atu ki a Keliso. E pelā mo Iesu, e fakaasi sāle atu ne latou konei a te malamalama e uiga ki te tulaga sē ‵lei katoatoa o nisi tino. Ne iloa ne latou me i te fakaasi atu o te alofa atafai e pelā mo Keliso e se fesoasoani mai fua ki a tatou ke “fesoasoani ki mea e se mafai ne tino vāivāi” o fai kae fesoasoani atu foki ki te mauaga o te fealofani. E se gata i ei, e fakamalosi atu ki te fakapotopotoga kātoa ke fakaasi atu foki ne latou te kilokiloga a Keliso. E ma‵nako latou ke fai foki penā olotou taina, e pelā mo te mea ne manako ki ei a te apositolo ko Paulo ke fai ne Kelisiano i Loma: “Ke na tuku atu ki a koutou ne te Atua o te kufaki mo fakamafanafanaga ko te mea ke maua foki ne koutou te mafaufau telā ne maua ne Keliso Iesu, ko te mea ke mafai o tavae fakatasi atu koutou ki te Atua mo te Tamana o te ‵tou Aliki ko Iesu Keliso.” (Loma 15:​1, 5, 6, Tusi Paia o le Lalolagi Fou) E tonu, e avatu eiloa a tavaega ki a Ieova ne te ‵tou ‵kau fakatasi i te tapuakiga.

9. Kaia e ‵tau ei o maua ne tatou te agaga tapu ko te mea ke tau‵tali atu tatou ki te fakaakoakoga a Iesu?

⁹ Ne ‵soko tasi ne Iesu a te “loto maulalo” mo te agamalu, telā se vaega o fuataga o te agaga tapu o te Atua. Tela la, fakatasi mo te sukesuke ki te fakaakoakoga a Iesu, e ma‵nako tatou ki te agaga tapu o Ieova, ko te mea ke mafai o tau‵tali faka‵lei tatou ki te fakaakoakoga tenā. E ‵tau o ‵talo atu tatou mō te agaga tapu o te Atua kae taumafai ke ati aka a fuataga konā​—“ko te alofa, te fiafia, te filemu, te fa‵ki, te mataalofa, te ‵lei, te fakatuanaki, te agamalu, mo te loto pulea.” (Kalatia 5:​22, 23, Tusi Paia o le Lalolagi Fou) Mai i te tautali ki te fakaakoakoga o te loto maulalo mo te agamalu telā ne tuku mai ne Iesu, ka fakafiafia ei ne tatou te ‵tou Tamana faka-te-lagi, ko Ieova.

Ne Fakaasi Atu ne Iesu te Mataalofa ki Nisi Tino

10. Ne fakaasi atu pefea ne Iesu a te mataalofa?

¹⁰ A te mataalofa se vaega foki o fuataga o te agaga tapu. Ne fakaasi atu faeloa ne Iesu te mataalofa ki nisi tino. A latou katoa kolā ne ‵sala atu mo te loto fakamaoni ki a Iesu “ne talia ne ia latou” mo te mataalofa. (Faitau te Luka 9:​11.) Ne a mea e mafai o tauloto ne tatou mai i te mataalofa ne fakaasi atu ne Iesu? A te tino mataalofa e mata katakata, e uiga filemu, e loto malamalama, kae mata fiafia. Ne fai eiloa a Iesu penā. Ne loto alofa a ia ki tino me “ko pelā mo mamoe e seai se lotou tino tausi.”​—Mataio 9:​35, 36.

11, 12. (a) Fakamatala mai te auala ne fakaasi atu ei te atafai o Iesu. (e) Ne a mea e mafai o tauloto ne koe mai i te fakaakoakoga ne mafau‵fau tatou ki ei?

¹¹ Ne gasuesue foki a Iesu e ‵tusa mo tena alofa mo te atafai. Mafaufau la ki se mea e tasi. Ne logo‵mae eiloa se fafine i tausaga e 12 i te masaki ko te ‵tafe o tena sua. Ne iloa ne ia me mai lalo i te Tulafono faka-Mose, ne ‵tau o lailai tou fafine mo so se tino telā ne patele atu ki a ia i te feitu tau tapuakiga. (Levitiko 15:​25-​27) Kae kāti ko uiga mo faifaiga a Iesu ne fakatalitonu atu ki tou fafine me e mafai kae ka faka‵lei aka foki a ia ne Iesu. Ne fai mai faeloa tou fafine: “Ko au fua ke patele atu ki te gatu o Iesu, ko ‵lei ei au.” Ne fakamalosi aka tena loto toa, telā ne fai eiloa ne tou fafine te mea tenā kae ne lagona fakavave ne ia me ko ‵lei a ia.

¹² Ne iloa ne Iesu me ne patele atu se tino ki a ia, kae ne kilokilo atu tou tagata ke onoono aka me ko oi te tino tenā. Kāti ne polepole tou fafine i te mataku ona ko te mea ne soli ne ia a te Tulafono, telā ne fakasiga ifo a ia mo te mataku ki vae o Iesu kae taku ‵tonu atu me ko ia. E mata, ne pati ‵toko atu ne Iesu te fafine fakaalofa kae logo‵mae tenei? Ikai, e se tāitāi eiloa! Ne fai atu tou tagata: “Taku tama, ko tou fakatuanaki ko ola ei koe. Na fano la mo te manuia, i a koe ko ‵lei.” (Maleko 5:​25-​34) Ne ‵tau eiloa o fakamafanafana atu ki tou fafine a vaegā pati atafai penā!

13. (a) Ne ‵kese pefea te kilokiloga a Iesu mai i te kau Falesaio? (e) Ne pefea a faifaiga a Iesu ki tama‵liki?

¹³ E se pelā mo Falesaio loto ma‵keke, ne seki fakaaoga eiloa ne Keliso tena malosi pule ke fakaopoopo atu a amoga ‵mafa ki amoga a nisi tino. (Mataio 23:4) E ‵kese mai i ei, ne akoako atu ne ia a auala o Ieova ki nisi tino i te atafai mo te loto kufaki. Ne fai a Iesu mo fai se taugasoa loto alofa ki ana soko, e tumau tena alofa mo tena atafai, kae se taugasoa tonu foki. (Faataoto 17:17; Ioane 15:​11-​15) Ne seki ma‵taku foki a tama‵liki ke olo atu ki a Iesu, kae fiafia foki a ia ke ‵nofo fakatasi mo latou. Ne seki tō fakalavelave a ia ke fakagata aka a mea kolā ne fai ne ia ko te mea ke fakamāumāu a taimi fakatasi mo tama‵liki. I te taimi e tasi, ne taumafai ana soko kolā koi maua ne latou a manatu fia ma‵luga e pelā mo takitaki lotu i olotou tafa, o taofi a tino mai i te faiga o olotou tama‵liki ke olo atu ki a Iesu. Ne seki fiafia a Iesu ki ana soko. Ne fai atu a ia ki a latou: “Tuku tama‵liki ke o‵mai ki a au! Sa taofigina latou, me e o tino penei a te Malo o te Atua.” I konā foki eiloa, ne fakaaoga ne ia a tama‵liki ke tuku atu ki ana soko se akoakoga tāua, i ana muna: “Ke masaua ne koutou, me ko so se tino e se talia ne ia a te Malo o te Atua e pelā mo se tamaliki, e se mafai lele eiloa o ulu atu ki ei.”​—Maleko 10:​13-​15.

14. Ne a mea aoga e maua ne tama‵liki mai i te ‵saga atu mo te fia‵fia ki a latou?

¹⁴ Mafaufau malie aka ki lagonaga o nisi tama‵liki konā i te fia o tausaga mai tua ifo, i te taimi ko ma‵tua ei latou, kāti koi masaua eiloa ne latou me i a Iesu Keliso ‘ne kopi ne ia latou kae fakamanuia atu.’ (Maleko 10:16) I aso nei, ka ‵kilo atu foki a tama‵liki ki toeaina mo nisi tino kolā ne ‵saga malosi atu mo te fia‵fia ki a latou e aunoa mo manakoga kaima‵nako. E sili atu i te tāua me e iloa ne tama‵liki kolā e maua ne latou te alofa atafai tonu penā i te fakapotopotoga i te taimi koi fo‵liki ei latou, me e fakatasi atu a te agaga o Ieova ki ana tino.

Ke Fakaasi Atu te Mataalofa i se Lalolagi sē Mataalofa

15. Kaia e se ‵poi ei tatou ona ko te sē fakaasi atu ne tino e tokouke te mataalofa i aso nei?

¹⁵ E mafau‵fau a tino e tokouke i aso nei me e se lava olotou taimi ke fakaasi atu te mataalofa ki nisi tino. Tela la, i aso katoa, i te akoga, i te galuega, i te taimi e faimalaga atu ei, mo te galuega talai, e ‵tau eiloa o fakafesagai atu a tino o Ieova ki te agaga o te lalolagi. E mafai o fakafanoanoa mai a uiga sē atafai, kae e se ‵tau o ofo tatou i ei. Ne fakaosofia ne Ieova a Paulo ke ‵valo mai ne ia me i te olaga i aso faiga‵ta konei o “aso fakaoti” ka fai ei ke fesokotaki atu faeloa a Kelisiano ‵tonu ki tino kolā e “ma‵natu fakapito, . . . e se loto a‵lofa.”​—2 Timoteo 3:​1-3.

16. E mafai pefea o fakamalosi aka ne tatou a te mataalofa o Keliso i te fakapotopotoga?

¹⁶ I te suā feitu la, e maua eiloa se fakamalosiga gali i loto i te fakapotopotoga Kelisiano telā e ‵kese ‵ki mai i te lalolagi sē atafai. Mai i te fakaakoako atu ki a Iesu, e fesoasoani atu eiloa a tatou taki tokotasi ki te tulaga fakafiafia tenā. E mafai pefea o fai tatou penā? Muamua la, e tokouke a tino i te fakapotopotoga e ma‵nako ki ‵tou fesoasoani mo fakamalosiga me e fe‵paki latou mo fakalavelave e pelā mo masaki io me ko nisi tulaga faiga‵ta. I “aso fakaoti” konei, e mafai o momea aka te uke o vaegā fakalavelave penā, kae e se ne mea ‵fou a mea konā. I aso o te Tusi Tapu, ne logo‵mae foki a Kelisiano mai i vaegā fakalavelave penā. Tela la, e ‵pau eiloa te aoga o faifaiga ke fesoasoani atu ki tino i aso nei mo Kelisiano i aso mua. E pelā mo Paulo, ne fakamalosi atu ki Kelisiano ke “fakaloto malosi atu a tino mata ma‵taku, o fesoasoani ki tino vāivāi, kae ke loto kufaki foki ki tino katoa.” (1 Tesalonia 5:​14) E aofia i te mea tenei a te fakaasi atu o te mataalofa e pelā mo Keliso.

17, 18. Ne a nisi auala e mafai ei o fakaakoako atu tatou ki te mataalofa o Iesu?

¹⁷ E maua ne Kelisiano a te tiute ke ‘fesoasoani atu ki olotou taina,’ ke ‵pau olotou faifaiga ki a latou e pelā mo Iesu, mai i te fakaasi atu o te atafai tonu ki tino kolā ko leva ne iloa ne tatou mo latou foki kolā e seki fetaui aka eiloa mo tatou. (3 Ioane 5-8) E pelā mo Iesu telā ne gasuesue muamua o fakaasi atu te atafai ki nisi tino, e ‵tau foki o fai faeloa tatou e pelā me ne tino fakamalosi ki nisi tino.​—Isaia 32:2; Mataio 11:​28-​30.

¹⁸ E mafai ne tatou taki tokotasi o fakaasi atu te mataalofa mai i te faiga o se mea telā e ‵lei ei a nisi tino. Ke ‵sala atu ki auala mo avanoaga ke fai foki penā. Ke na fai eiloa koe penā! Ne fakamalosi atu a Paulo: “Ke fakatau a‵lofa koutou i te alofa fakataina; kae ke fakatau fia‵fia koutou, i te āva o te suā tino ki te suā tino.” (Loma 12:10) E fakauiga te mea tenā ki te tautali atu ki te fakaakoakoga a Keliso, te fakaasi atu o te alofa mo te mataalofa ki nisi tino, kae fakamasani ke fakaasi atu “te alofa tonu.” (2 Kolinito 6:6) Ne fakamatala mai ne Paulo a te vaegā alofa faka-Keliso i te auala tenei: “A te alofa, e kufaki kae kaimalie; e se kaisano io me fakamatamata.” (1 Kolinito 13:4) I lō te ‵nofo mo ‵tou loto kaitaua ki ‵tou taina mo tuagane, ke na faka‵logo tatou ki te fakamalosiga tenei: “E ‵tau mo koutou o fakatau a‵lofa kae fakatau atafai; ke fakatau fakamagalo foki koutou, e pelā eiloa mo te Atua ko oti ne fakamagalo ne ia koutou i a Keliso.”​—Efeso 4:​32.

19. Ne a ikuga ‵lei e maua mai i te fakaasi atu o te mataalofa faka-Keliso?

¹⁹ A te ‵tou taumafai ke fakamalosi kae fakaasi atu a te mataalofa o Keliso i taimi mo tulaga katoa, e maua ei ne tatou a fakamanuiaga e uke. Ka mafai o galue ‵lei te agaga o Ieova i te fakapotopotoga, mai te fakamalosiakaga o fuataga ‵lei o te agaga. E se gata i ei, kafai e tau‵tali atu tatou ki te fakaakoakoga ne tuku mai ne Iesu kae fesoasoani atu ki nisi tino ke fai foki penā, a te ‵tou ‵kau fakatasi mo te fiafia i te tapuakiga ka fai ei a te Atua ke fiafia. Tela la, ke na tumau eiloa tatou i te taumafai ke fakaasi atu te agamalu mo te mataalofa o Iesu i ‵tou faifaiga ki nisi tino.

E Mafai o Fakamatala Mai ne Koe?

• Ne fakaasi mai pefea ne Iesu me i a ia e “agamalu kae loto maulalo”?

• Ne fakaasi atu pefea ne Iesu te mataalofa?

• Ne a nisi auala e fakaasi atu ei ne tatou a te agamalu mo te mataalofa faka-Keliso i te lalolagi sē ‵lei katoatoa tenei?

[Ata i te itulau e 11]

Kafai ko vāivāi te fakatuanaki o se taina, e pelā mo Petelu, e mata, ka ‵kapa atu ‵tou lima o fesoasoani atu ki ei?

[Ata i te itulau e 13]

E mafai pefea o fesoasoani atu koe i te faiga o te fakapotopotoga mo fai se koga e maua i ei te mataalofa?